(vovworld)- ຄວາມຕ້ອງການ, ຄວາມຊີນເຄີຍອ່ານປື້ມພວມແມ່ນຄ່ອຍໆກັບຄືນສູ່ຜູ້ອ່ານຫລາຍຄົນ. ເລື່ອງສ້າງຄວາມຊິນເຄີຍໃນການອ່ານປື້ມ ບໍ່ພຽງແຕ່ເລີ່ມຕົ້ນຈາກສະຕິຂອງບຸກຄົນ, ຈາກຄວາມມານະພະຍາຍາມຂອງຄອບຄົວ ແລະ ໂຮງຮຽນເທົ່ານັ້ນ ຫາກຍັງເລີ່ມມາຈາກບັນດາສິ່ງພິມມີຄຸນຄ່າອີກດ້ວຍ. ສະນັ້ນ, ເພື່ອຕອບສະຫນອງມາດຖານດັ່ງກ່າວ, ປື້ມແຕ່ລະຫົວເມື່ອໄດ້ຮັບການພິມຈຳຫນ່າຍໄດ້ນຳມາເຊິ່ງຄວາມເມົາມົວໃຫ້ຜູ້ອ່ານເມື່ອໄດ້ຄົ້ນຫາສາງພູມປັນຍາ. ບົດຂຽນຂອງນັກຂ່າວ ເຟືອງຖູຍທີ່ມີຫົວຂໍ້ວ່າ: ບັນດາສິ່ງພິມດີໄດ້ນຳມາເຊິ່ງຄວາມເມົາມົວອ່ານປື້ມໃຫ້ຜູ້ອ່ານ.
ວັນບຸນປື້ມແຕ່ລະຄັ້ງ ລ້ວນແຕ່ດຶງດູດຜູ້ມາຢ້ຽມຊົມ ແລະ ຊື້ປື້ມນັບໝື່ນໆຄົນ
ພາບ:news.zing
|
ໃນຊຸມປີມໍ່ໆມານີ້, ທີ່ວັນບຸນປື້ມແຕ່ລະຄັ້ງ ລ້ວນແຕ່ດຶງດູດຜູ້ມາຢ້ຽມຊົມ ແລະ ຊື້ປື້ມນັບໝື່ນໆຄົນ. ພໍ່ແມ່ນັກຮຽນໄດ້ພາລູກໄປຊື້ປື້ມ ນອກຈາກເພື່ອໃຫ້ລູກອ່ານແລ້ວ ຍັງເປັນຂອງຂວັນມອບໃຫ້ຍາດຕິພີ່ນ້ອງ ແລະ ໝູ່ເພື່ອນອີກ. ສ່ວນ ນັກສຶກສາມາເຂົ້າຮ່ວມວັນບຸນປື້ມ ບໍ່ພຽງແຕ່ເພື່ອຊື້ປື້ມເທົ່ານັ້ນ ຫາກຍັງໄດ້ເຂົ້າຮ່ວມການພົບປະແລກປ່ຽນ, ການໂອ້ລົມສົນທະນາ… ອີກດ້ວຍ. ຢູ່ບັນດາທ້ອງຖິ່ນ, ວັນບຸນປື້ມປະຈຸບັນແມ່ນສິ່ງທີ່ໃກ້ຊິດຕິດແທດກັບປະຊາຊົນຢູ່ແລ້ວ ຂະນະທີ່ໄດ້ເລີ່ມຕົ້ນດ້ວຍບັນດາໂຄງການລະອຽດຄື: ສ້າງຕູ້ປື້ມ, ແລກປ່ຽນປື້ມ, ຈັດຕັ້ງຂະບວນການອ່ານປື້ມໃນໂຮງຮຽນ, ໝູ່ບ້ານ...ສິ່ງດັ່ງກ່າວໄດ້ກາຍເປັນສັນຍານທີ່ເປັນຫນ້າຊື່ນຊົມສະແດງໃຫ້ເຫັນຄວາມຕ້ອງການໃນການອ່ານປື້ມຂອງຊາວຫວຽດນາມ ຍັງຄົງໄດ້ຮັບການຮັກສາໄວ້. ຍິ່ງກວ່ານັ້ນ ຄວາມຕ້ອງການອ່ານປື້ມພວມໄດ້ຮັບການເພີ່ມເຕີມກ່ຽວກັບວິທີການ, ບໍ່ພຽງແຕ່ປື້ມອ່ານເທົ່ານັ້ນ ຫາກຍັງແມ່ນປື້ມທາງເອເລັກໂຕນິກອີກດ້ວຍ. ທ່ານ ໂດ໋ກູຍຢວານ, ປະທານສະມາຄົມພິມຈຳຫນ່າຍ ຫວຽດນາມ ຢັ້ງຢືນວ່າ:
“ນັບມື້ນັບມີການເຄື່ອນໄຫວຫລາຍຢ່າງເພື່ອຕອບສະຫນອງຄວາມຕ້ອງການອ່ານປື້ມຂອງຜູ້ອ່ານ ຕົວຢ່າງຄື: ຫວ່າງແລ້ວນີ້ ນະຄອນ ໂຮ່ຈິມີນ ໄດ້ຈັດວັນບຸນປື້ມຂຶ້ນເພື່ອຮັບໃຊ້ຜູ້ອ່ານ. ເຂົ້າຮ່ວມວັນບຸນປື້ມ ບໍ່ພຽງແຕ່ມີພໍ່ແມ່ນັກຮຽນພາລູກໄປຊື້ປື້ມເທົ່ານັ້ນຫາກຍັງມີຜູ້ເຖົ້າຜູ້ແກ່ກໍມາຊົມເປັນຈຳນວນຫລວງຫລາຍ. ນອກນັ້ນ ຍັງຈັດລາຍການພົບປະແລກປ່ຽນລະຫວ່າງນັກປະພັນວັນນະຄະດີ ແລະ ສາທາລະນະຊົນ.”
ຄວາມຈິງ ແຕ່ລະປີ ມີປື້ມນັບໝື່ນຫົວໄດ້ຮັບການພິມຈຳຫນ່າຍ ແລະ ແນະນຳເຖິງສາທາລະນະຊົນ. ສະເພາະ ປີ 2015, ມີ ປື້ມກວ່າ 29.000 ຫົວ ສົ່ງເຖິງສຳນັກພິມຈຳຫນ່າຍເພື່ອຮັກສາສຳເນົາ ພອ້ມກັບ 2.700 ຊື່ປື້ມພິມທາງເອເລັກໂຕນິກ. ສິ່ງດັ່ງກ່າວໄດ້ ຕອບສະຫນອງ ຄວາມຕ້ອງການຫລາຍຮູບຫລາຍແບບຂອງຜູ້ອ່ານ ສ່ວນຫນຶ່ງ. ທ່ານ ຫງວຽນແອງຫວູ, ຜູ້ອຳນວຍການ ສຳນັກພິມຈຳຫນ່າຍວັນນະຄະດີ ໃຫ້ຮູ້ວ່າ:
“ໂດຍແມ່ນຫົວຫນ່ວຍດຳເນີນທຸລະກິດ ສະນັ້ນ ສຳນັກພິມຈຳຫນ່າຍວັນນະຄະດີຕ້ອງຮັບໃຊ້ຫລາຍເປົ້າໝາຍ ແລະ ຫລາຍຂົງເຂດ. ພວກຂ້າພະເຈົ້າໄດ້ພິມຈຳຫນ່າຍປື້ມຫລາຍຫົວທີ່ມີຄຸນນະພາບດີກ່ຽວກັບການບັນເທິງ, ກ່ຽວກັບວິຊາສະເພາະເພື່ອຮັບໃຊ້ໃຫ້ນັກຮຽນ, ນັກສຶກສາ ແລະ ບັນດານັກຄົ້ນຄ້ວາ.”
ສ້າງຄວາມຊີນເຄີຍໃນການອ່ານປື້ມ ແລະ ຍິ່ງກວ່ານັ້ນ ແມ່ນວັດທະນະທຳອ່ານປື້ມ, ບໍ່ພຽງແຕ່ອີງໃສ່ສະຕິຂອງບຸກຄົນເທົ່ານັ້ນຫາກຍັງເລີ່ມຕົ້ນຈາກບັນດາສິ່ງພິມທີ່ມີຄຸນນະພາບອີກດ້ວຍ.
ຖ້າຫາກໄລຍະກ່ອນນີ້, ແຕ່ລະປີ ສຳນັກພິມຈຳຫນ່າຍແຕ່ລະແຫ່ງ ພຽງພິມ ຈຳຫນ່າຍປື້ມສະເລ່ຍ 20 – 30 ຫົວ , ແຕ່ມາຮອດປະຈຸບັນ ແຕ່ລະຫົວຫນ່ວຍສາມາດພິມຈຳຫນ່າຍໄດ້ແຕ່ 100 – 200 ຫົວ/ປີ. ເພີ່ມຈຳນວນປະລິມານ ແຕ່ຄຸນນະພາບຍາມໃດກໍແມ່ນສິ່ງທີ່ຜູ້ອ່ານປາດຖະຫນາ. ຄວາມຮັບຜິດຊອບຂອງບັນດາຜູ້ເຮັດວຽກງານພິມຈຳຫນ່າຍປື້ມ ນັ້ນແມ່ນ ເຮັດແນວໃດເພື່ອສະຫນອງບັນດາສິ່ງພິມທີ່ມີຄຸນນະພາບສູງເຖິງສາທາລະນະຊົນຫລາຍກວ່າ ເພື່ອໃຫ້ປື້ມແມ່ນອາຫານທາງດ້ານຈິດໃຈທີ່ມີປະໂຫຍດ, ປະກອບສ່ວນຍົກສູງລະດັບຄວາມຮູ້ ຂອງມະນຸດ.