(vovworld) - ບຸນປີໃໝ່ໃນທັດສະນະຂອງຊາວຫວຽດນາມ ມີຄວາມໝາຍສັກກະລະບູຊາທີ່ສຸດ, ທັງແມ່ນຈຸດເວລາ ເພື່ອໃຫ້ທຸກຄົນໃນຄອບຄົວໄດ້ພັກຜ່ອນ, ເຕົ້າໂຮມນຳກັນ, ພາວະນາໃຫ້ມີຄວາມສົມບູນພູນສຸກຕະຫຼອດປີ. ສ່ວນຜູ້ຢູ່ໄກຈາກຄອບຄົວກໍ່ຢາກກັບເມືອຕ້ອນຮັບບູນປີໃໝ່ພ້ອມກັບຄອບຄົວ. ເພາະວ່າ, ສຳລັບເຂົາເຈົ້າແລ້ວ, ບັນຍາການບຸນປີໃໝ່ຢູ່ບ້ານເກີດເມືອງນອນ ເຖິງວ່າຈະທຳມະດາສາມັນກໍ່ຕາມ, ແຕ່ພັດສັກກະລະບູຊາທີ່ສຸດ. ໃນຄວາມເບີກບານມ່ວນຊື່ນຂອງລະດູບານໃໝ່, ເຊີນທ່ານເຂົ້າຮ່ວມບັນຍາກາດຕ້ອນຮັບບຸນປີໃໝ່ປະຈຳຊາດຂອງແມ່ຕູ້ ບູ່ຍທິກາກ ຢູ່ຕາແສງເຊີນວີ, ເມືອງເລິມທາວ, ແຂວງຟູ໋ທໍ້, ຜ່ານບົດສາລະຄະດີ “ບຸນປີໃໝ່ ບຸນແຫ່ງການເຕົ້າໂຮມທຸກຄົນໃນຄອບຄົວ”.
ພາບປະກອບ
“ແມ່ເອີຍ, ຕະຫຼອດຊີວິດນີ້ຈະບໍ່ມີໃຜສາມາດປຽບທຽບກັບແມ່ໄດ້, ອວຍພອນແມ່ໃຫ້ມີຄວາມມ່ວນຊື່ນ/ ອວຍພອນປີໃໝ່/ ອວຍພອນທັງຄອບຄົວພາກພູມໃຈ/ ອວຍພອນໃຫ້ພວກຫຼານທີ່ໄປເຮັດວຽກຢູ່ໄກມີສຸຂະພາບເຂັ້ມແຂງ/ ອວຍພອນປີໃໝ່”
ໃນ 10 ກວ່າປີມານີ້, ຄ່ຳຄືນສົ່ງທ້າຍປີເກົ່າ ຕ້ອນຮັບປີໃໝ່ ປີໃດຄອບຄົວແມ່ຕູ້ ບູ່ຍທິກາກ ກໍ່ເຕົ້າໂຮມລູກເຕົ້າຢຢ່າງຄົບໜ້າພໍ້ຕາ. ໃບໜ້າຜູ້ໃດກໍ່ສົດໃສ ເຕັມໄປດ້ວຍຄວາມສຸກ ເມື່ອໄດ້ຕ້ອນຮັບບຸນປີໃໝ່ພ້ອມກັບທຸກຄົນໃນຄອບຄົວ. ປີນີ້ແມ່ຕູ້ ບູ່ຍທິກາກ ມີອາຍຸ 84 ປີແລ້ວ, ແມ່ຕູ້ດີໃຈຫຼາຍເມື່ອເຫັນລູກຫຼານເຕົ້າໂຮມກັນໃນຄວາມອົບອູ່ນ ແລະ ເບີກບານມ່ວນຊື່ນ.
“ຜູ້ໃດກໍ່ມັກບຸນປີໃໝ່, ເພື່ອໃຫ້ລູກຫຼານເຖິງວ່າຈະຢູ່ໃກ້ຫຼືໄກກໍ່ມາເຕົ້າໂຮມກັນ, ຢາກໃຫ້ພວກລູກຫຼານກັບມາຢ່າງຄົບໜ້າພໍ້ຕາ. ອີງໃສ່ເງື່ອນໄຂຕົວຈິງເພື່ອຈັດບຸນປີໃໝ່. ນັ້ນແມ່ນສິ່ງດີທີ່ສຸດເມື່ອເຕົ້າໂຮມທຸກຄົນໃນຄອບຄົວນຳກັນ.”
ໂດຍແມ່ນລູກຊາຍກົກຂອງແມ່ຕູ້ ກາກ, ທ່ານຫງວຽນວັນທື ຫວັງວ່າ ພາຍຫຼັງໜຶ່ງປີທີ່ເຮັດວຽກຢ່າງທຸກຍາກ, ອິດເມື່ອຍນັ້ນ, ອ້າຍນ້ອງ, ລູກຫຼານຈະກັບມາເຕົ້າໂຮມກັນຢູ່ບ້ານເກີດເມືອງນອນຂອງຕົນ. ບຸນປີໃໝ່ປະຈຳຊາດຍິ່ງມີຄວາມໝາຍ ແລະ ມ່ວນຊື່ນກວ່າ ເມື່ອອ້າຍນ້ອງເຕົ້າໂຮມກັນ, ພ້ອມກັນກິນເຂົ້າ, ດື່ມເຫຼົ້າ, ອວຍພອນແມ່ໃຫ້ມີອາຍຸໝັ້ນຂວັນຍື່ນ, ແລະ ພ້ອມກັນແບ່ງປັນວຽກເຮັດງານທຳໃນປີຜ່ານມາ.
“ບຸນປີໃໝ່ປະຈຳຊາດ ແມ່ນບຸນແຫ່ງການເຕົ້າໂຮມ, ຜູ້ໃດກໍ່ຮູ້ສຶກເບິກບານມ່ວນຊື່ນ, ແບ່ງປັນຄວາມສຸກ, ຄວາມທຸກກ່ຽວກັບວຽກເຮັດງານທຳໃນປີທີ່ຜ່ານມາ, ອ້າຍນ້ອງໃນຄອບຄົວເອົາໃຈໃສ່ເຖິງວຽກເຮັດງານທຳ ແລະ ເສດຖະກິດຂອງກັນ, ໄດ້ຕ້ອນຮັບບຸນປີໃໝ່ພ້ອມກັບພໍ່ແມ່ ແລະ ອວຍພອນໃຫ້ພໍ່ແມ່ມີສຸຂະພາບເຂັ້ມແຂງ, ເພື່ອເປັນບ່ອນອີງ, ບ່ອນເຕົ້າໂຮມໃຫ້ລູກຫຼານໃນແຕ່ລະປີ. ນີ້ແມ່ນວັດທະນະທຳອັນດີງາມ ຂອງຫວຽດນາມທີ່ມີມາແຕ່ດົນນານ”.
ພາບປະກອບ
ຄອບຄົວແມ່ຕູ້ ກາກ ມີລູກ 5 ຄົນ, ໃນນັ້ນມີ 4 ຄົນເຮັດວຽກຢູ່ຮ່າໂນ້ຍ. ດັ່ງນັ້ນ, ເມື່ອບຸນປີໃໝ່ວຽນມາ ກໍ່ແມ່ນໂອກາດເພື່ອໃຫ້ເຂົາເຈົ້າກັບເມືອບ້ານ. ທ່ານ ຫງວຽນວັນຟອງ, ລູກຊາຍຂອງແມ່ຕູ້ ກາກ ເວົ້າວ່າ, ເມື່ອຕ້ອນຮັບບຸນປີໃໝ່ພ້ອມກັບຍາດຕິພີ່ນ້ອງ, ໄດ້ກິນເຂົ້າພ້ອມກັບຄອບຄົວ ແລະ ໄດ້ໄປຢ້ຽມຢາມພີ່ນ້ອງໃນບ້ານຈຶ່ງເຫັນໄດ້ຄວາມໝາຍຂອງບຸນປີໃໝ່ປະຈຳຊາດຢ່າງແທ້ຈິງ.
“ບັນຍາກາຕ້ອນຮັບບຸນປີໃໝ່ຢູ່ເຂດບ້ານນາແມ່ນມີຄວາມອົບອູ່ນທີ່ສຸດ. ເຖິງວ່າຈະຢູ່ຮ່າໂນ້ຍ ມາເປັນເວລາ 20 ກວ່າປີແລ້ວກໍ່ຕາມ, ແຕ່ບຸນເຕັດປີໃດຂ້າພະເຈົ້າກໍ່ກັບເມືອບ້ານ. ອ້າຍນ້ອງໄປເຮັດວຽກໄກຈາກບ້ານ, ຮອດບຸນປີໃໝ່ຈຶ່ງໄດ້ພົບກັນ ເພື່ອແບ່ງປັນ, ໂອ້ລົມນຳກັນ, ມ່ວນຫຼາຍ. ປີໃດຂ້າພະເຈົ້າກໍ່ໃຫ້ລູກກັບເມືອບ້ານ, ພວກຫຼານມ່ວນທີ່ສຸດ ເພາະວ່າຢູ່ທີ່ນີ້ກວ້າງຂວາງ, ອາກາດປອດໂປ່ງ ແລະ ໄດ້ພົບປະກັບຍາດຕິພີ່ນ້ອງ”.
ນັບແຕ່ກາຍເປັນໃພ້ຂອງຕາແສງເຊີນວີ, ປີໃດປ້າ ເລທິຮວາ, ເມຍຂອງທ່ານ ທື ກໍ່ຊື້ເຄື່ອງຂອງຈາກຮ່າໂນ້ຍມາມອບໃຫ້ແມ່ຍ່າ ເພື່ອບູຊາບັນພະບຸລຸດ. ປ້າ ຮວາ ເວົ້າວ່າ, ເຖິງວ່າຢູ່ບ້ານນາ ແຕ່ອັນໃດແມ່ຍ່າກໍ່ມີ, ສ່ວນເຄື່ອງຂອງທີ່ພວກຂ້າພະເຈົ້າຊື້ມານັ້ນແມ່ນນ້ຳໃຈຂອງລູກເຕົ້າທີ່ມີຕໍ່ບັນພະບຸລຸດ, ຕໍ່ພໍ່ແມ່ຂອງຕົນ.
“ພວກລູກຫຼານ, ບ່າວໃພ້, ຍິງຊາຍ, ເຕົ້າໂຮມ, ໂອ້ລົມກັນ ເພື່ອລໍຖ້າຈຸດເວລາສົ່ງທ້າຍປີເກົ່າ, ຕ້ອນຮັບປີໃໝ່. ນີ້ແມ່ນຈຸດເວລາສັກກະລະບູຊາທີ່ສຸດ. ຂ້າພະເຈົ້າຫວັງວ່າຍາມໃດແມ່ລູກ, ເອື້ອຍນ້ອງ, ລູກເຕົ້າກໍ່ມີຄວາມສາມັກຄີນຳກັນ, ແລະ ລຸ້ນລູກລຸ້ນຫຼານໃນພາຍພາກໜ້າກໍ່ຈະຮັກສາໄດ້ມູນເຊື້ອດັ່ງກ່າວ”.
ຜູ້ຢູ່ໄກຢາກກັບເມືອບ້ານ, ສ່ວນຜູ້ຍັງຢູ່ບ້ານພັດລໍຖ້າຜູ້ຢູ່ໄກ, ນັ້ນແມ່ນຈິດໃຈຂອງທຸກຄົນໃນຄອບຄົວເມື່ອບຸນປີໃໝ່ວຽນມາ. ປ້າ ຫງວຽນທິກົງ ລູກສາວຂອງແມ່ຕູ້ ກາກ ພັດຢາກໃຫ້ບຸນປີໃໝ່ວຽນມາເພື່ອມີໂອກາດໄດ້ພົບປະກັບພວກນ້ອງຂອງຕົນ ແລະ ສິ່ງສຳຄັນກວ່າແມ່ນ ເພື່ອໃຫ້ອ້າຍ, ເອື້ອຍ, ນ້ອງ 5 ຄົນ ນຳເອົາຄວາມເບີກບານມ່ວນຊື່ນມາໃຫ້ແມ່.
“ຂ້າພະເຈົ້າກໍ່ເຊັ່ນດຽວກັບທຸກໆຄົນ, ລ້ວນແຕ່ຢາກເຕົ້າໂຮມກັນໃນເຮືອນຂອງແມ່, ເຊິ່ງແມ່ນແຫ່ງກຳເນີດຂອງຕົນ. ນີ້ແມ່ນສິງທີ່ສັກກະລະບູຊາທີ່ສຸດ. ຢູ່ບ້ານເກີດເມືອງນອນຍັງມີແມ່ຢູ່, ດັ່ງນັ້ນ, ອ້າຍ, ເອື້ອຍ, ນ້ອງເມືອບ້ານກັບແມ່ ແມ່ນສິ່ງທີ່ບໍ່ມີຫຍັງມ່ວນກວ່ານັ້ນອີກ”.
ພາບປະກອບ
ນັ່ງພ້ອມກັບພວກລູກທີ່ຮັກແພງຂອງຕົນ, ເຫັນພວກລູກຫຼານໂອ້ລົມ, ເລົ່າເລື່ອງກ່ຽວກັບວຽກເຮັດງານທຳ, ການຮ່ຳຮຽນນຳກັນ. ແມ່ຕູ້ ກາກ ດີໃຈຫຼາຍ. ຕະຫຼອດປີຕ້ອງເຮັດວຽກຢ່າງອິດເມື່ອຍ, ຮອດບຸນປີໃໝ່, ພວກລູກຈຶ່ງກັບມາເຕົ້າໂຮມກັນໃນຊາຍຄາແຫ່ງກຳເນີດຂອງຕົນ, ເພື່ອກິນອາຫານເຍື່ອງຕ່າງໆ ໂດຍແມ່ເປັນຜູ້ແຕ່ງເອງ. ໃນພາເຂົ້າ, ແມ່ຕູ້ ກາກ ໄດ້ຕັກເຕືອນພວກລູກຂອງຕົນຄືດັ່ງເວລາເຂົາເຈົ້າຍັງແມ່ນເດັກນ້ອຍ.
“ປະຈຸບັນ, ພວກລູກໄດ້ເຕີບໃຫຍ່ແລ້ວ, ສາມາດກຸ້ມຕົນເອງໄດ້ແລ້ວ, ແມ່ພຽງແຕ່ຫວັງວ່າ ພວກລູກມີສຸຂະພາບເຂັ້ມແຂງ, ເຮັດວຽກດ້ວຍຄວາມເປັນທຳ, ບໍ່ໄດ້ສໍ້ລາດບັງຫຼວງຊັບສົມບັດຂອງລັດ, ຂອງເອກະຊົນ”.
ໃນຈຸດເວລາສັກກະລະບູຊາສົ່ງທ້າຍປີເກົ່າ ຕ້ອນຮັບປີໃໝ່, ທັງຄອບຄົວເຕົ້າໂຮມນຳກັນດ້ວຍຄວາມອົບອູ່ນໃນຍາມລະດູບານໃໝ່, ຕ່າງກໍ່ຮູ້ສຶກວ່າມີຄວາມສົມບຸນພູນສຸກ ແລະ ຈິດໃຈສະຫວາດສະເຫວີຍກວ່າ.