ໃນແນວຄິດຈິດໃຈຂອງຊາວຫວຽດນາມ ແຕ່ລະຄົນ, ປະທານໂຮ່ຈິມິນ ແມ່ນຜູ້ໄດ້ອຸທິດສ່ວນຕະຫຼອດຊີວິດໃຫ້ການຕໍ່ສູ້ເພື່ອເອກະລາດ, ອິດສະຫຼະພາບຂອງປະເທດຊາດ. ເຖິງວ່າເພິ່ມໄດ້ຈາກພວກເຮົາດົນແລ້ວກໍຕາມ, ແຕ່ຄວາມຮັກແພງ, ແນວຄິດ, ແບບຢ່າງທີ່ໂປ່ງໃສຂອງເພິ່ນຍາມໃດກໍຖືກຊາວຫວຽດນາມລຸ່ນຕ່າງໆຮ່ຳຮຽນ ແລະ ປະຕິບັດຕາມ. ບັນດານັກສິລະປີນ, ນັກປະພັນ, ນັກຂ່າວ ໄດ້ມີບັນດາບົດປະພັນວັນນະຄະດີ, ບົດເພງ, ບົດໜັງສືພິມທີ່ໄດ້ຍ້ອງຍໍສັນລະເສີນຄຸນທາດອັນສູງສົ່ງຂອງປະທານໂຮ່ຈິມິນ,ຜູ້ນຳທີ່ແສນເຄົາລົບຮັກຂອງຊາດຫວຽດນາມ.
ປະທານໂຮ່ຈິມິນ - ແຫຼ່ງອາລົມເພື່ອປະດິດຄິດແຕ່ງສິລະປະຢ່າງບໍ່ມີວັນສິ້ນສຸດ |
ສຳລັບ ບັນດານັກສິລະປີນ, ນັກປະພັນ, ນັກຂ່າວແລ້ວ, ຊີວິດ, ພາລະກິດ, ຄຸນທາດອັນສູງສົ່ງຂອງປະທານໂຮ່ຈິມິນ ຍາມໃດກໍແມ່ນ ແຫຼ່ງອາລົມເພື່ອປະດິດຄິດແຕ່ງສິລະປະຢ່າງບໍ່ມີວັນສິ້ນສຸດ. ແຕ່ລະບົດປະພັນວັນນະຄະດີ, ບົດເພງ, ບົດໜັງສືພິມ ລ້ວນແຕ່ປະກອບສ່ວນຢືນຢັນຄຸນຄ່າອັນໃຫຍ່ຫຼວງກ່ຽວກັບແນວຄິດ, ແບບຢ່າງຄຸນສົມບັດປະທານໂຮ່ຈິມິນ, ປະກອບສ່ວນຍ້ອງຍໍຊົມເຊີຍ, ລະດົມກຳລັງໃຈແກ່ບັນດາລວມໝູ່, ສ່ວນບຸກຄົນຮ່ຳຮຽນ ແລະ ປະຕິບັດຕາມ ແບບຢ່າງຄຸນສົມບັດປະທານໂຮ່ຈິມິນ. ເພື່ອເຊີດຊູບັນດາການປະກອບສ່ວນຂອງວົງການນັກສິລະປີນ, ນັກປະພັນ, ນັກຂ່າວ, ແຕ່ປີ 2011 ມາຮອດປະຈຸບັນ, ຄະນະໂຄສະນາສຶກສາສູນກາງ ໄດ້ສົມທົບກັບບັນດາກະຊວງ, ຂະແໜງການຕ່າງໆ ຈັດຕັ້ງປຸກລະດົມການເສັງປະດິດຄິດແຕ່ງ ແລະ ມອບລາງວັນໃຫ້ແກ່ບັນດານັກສິລະປີນ, ນັກປະພັນ, ນັກຂ່າວທີ່ມີ ບົດປະພັນວັນນະຄະດີ, ບົດເພງ, ບົດໜັງສືພິມດ້ວຍຫົວເລື່ອງ “ ຮ່ຳຮຽນ ແລະ ປະຕິບັດຕາມ ແບບຢ່າງຄຸນສົມບັດປະທານໂຮ່ຈິມິນ”. ໃນຈຳນວນບັນດານັກສິລະປີນ, ນັກປະພັນ, ນັກຂ່າວ ໄດ້ຮັບລາງວັນ, ກໍມີບັນດາຜູ້ອາຍຸສູງຄື ສາດສະດາຈານ ວູ້ຄຽວ, ສາດສະດາຈານ ຮ່າມິນດຶກ, ສາດສະດາຈານ ຮ່ວາງຈ້ອງ….ພິເສດກໍຍັງມີບັນດານັກສິລະປີນ, ນັກປະພັນ, ນັກຂ່າວແມ່ນຜູ້ທີ່ຍັງໜຸ່ມແໜ້ນ ແລະ ແມ່ນຊາວຕ່າງປະເທດ. ທ່ານ ເວືອງຢີບຽນ ລັດຖະມົນຕີຊ່ວຍວ່າການກະຊວງວັດທະນະທຳ, ກິລາ ແລະ ທ່ອງທ່ຽວຫວຽດນາມ ໃຫ້ຮູ້ວ່າ :
“ບັນດານັກສິລະປີນ, ນັກປະພັນ, ນັກຂ່າວດ້ວຍບົດປະພັນວັນນະຄະດີ, ບົດເພງ, ບົດໜັງສືພິມຂອງຕົນ ບໍ່ພຽງແຕ່ສະແດງໃຫ້ເຫັນຮູບພາບຂອງປະທານໂຮ່ຈິມິນເທົ່ານັ້ນ, ຫາກຍັງສະແດງໃຫ້ເຫັນບັນດາວຽກດີ ທີ່ເຮັດຕາມເພິ່ນ. ປະສິດທິຜົນຂອງບັນດາບົດປະພັນວັນນະຄະດີ, ບົດເພງ, ບົດໜັງສືພິມ ແມ່ນມີຄຸນປະໂຫຍດທີ່ສຸດຕໍ່ພວກເຮົາ ແລະ ລຸ່ນໜຸ່ມໃນອະນາຄົດ ”
ບັນດາບົດປະພັນວັນນະຄະດີ, ບົດເພງ, ບົດໜັງສືພິມ, ກິດຈະກຳຕ່າງໆໄດ້ຕິດແທດຫົວເລື່ອງ ຮ່ຳຮຽນ ແລະ ປະຕິບັດຕາມ ແບບຢ່າງຄຸນສົມບັດປະທານໂຮ່ຈິມິນ, ປະກອບສ່ວນລະດົມກຳລັງໃຈ, ສົ່ງເສີມ, ທະວີຄູນບັນດາວຽກດີໃນບັນດາຂົງເຂດຊີວິດສັງຄົມ, ວຽກງານຕ່າງໆ. ພັນເອກ ດວານຮ່ວາຍຈຸງ ຫົວໜ້າສະໂມສອນ ຖ່າຍຮູບນັກຮົບ ຜູ້ໄດ້ຮັບລາງວັນ B ໃນພິທີມອບລາງວັນປະດິດຄິດແຕ່ງ, ໂຄສະນາບັນດາບົດປະພັນວັນນະຄະດີ, ບົດເພງ, ບົດໜັງສືພິມກ່ຽວກັບຫົວເລື່ອງ “ຮ່ຳຮຽນ ແລະ ປະຕິບັດຕາມ ແບບຢ່າງຄຸນສົມບັດປະທານໂຮ່ຈິມິນ” ໃຫ້ຮູ້ວ່າ :
“ປະທານໂຮ່ຈິມິນແມ່ນຮູບພາບທີ່ງາມທີ່ສຸດໃນບັນດາຮູບຖ່າຍ ຂອງພວກຂ້າພະເຈົ້າ. ເພິ່ນແມ່ນຄວາມເຊື່ອໝັ້ນເພື່ອໃຫ້ພວກຂ້າພະເຈົ້າຮ່ຳຮຽນຕາມ. ຊຸດຮູບຖ່າຍຂອງບັນດານັກຖ່າຍຮູບ ໄດ້ສະແດງໃຫ້ເຫັນຮູບພາບຂອງບັນດານັກຮົບໃນວັນນີ້ໃນການຝຶກຊ້ອມ, ທຳການຕໍ່ສູ້, ຮູບພາບໃນຊີວິດປະຈຳວັນ. ຮູບຖ່າຍເຫຼົ່ານັ້ນໄດ້ສົ່ງສານທີ່ດີງາມກ່ຽວກັບບັນດານັກຮົບໃນປະຈຸບັນສືບທອດມູນເຊື້ອຂອງລຸ່ນພໍ່ລຸ່ນປູ່ ແລະ ເຂົາເຈົ້າແມ່ນບັນດາຜູ້ທີ່ມີພູມປັນຍາປະຕິວັດ, ຮູ້ຈັກວິທີຮັບເອົາສິ່ງທີ່ຍອດຍິ່ງຂອງຊາດ ແລະ ຂອງມວນມະນຸດເພື່ອກຽມພ້ອມປົກປັກຮັກສາປະເທດຊາດ ແລະ ສຸດຈິດສຸດໃຈເພື່ອປະຊາຊົນ”
ໃນຈຳນວນບັນດາໝູ່ຄະນະ, ສ່ວນບຸກຄົນທີ່ໄດ້ຮັບລາງວັນຄັ້ງນີ້, ຍັງມີບັນດານັກສິລະປີນ, ນັກປະພັນ, ນັກຂ່າວຊຶ່ງແມ່ນຊາວເຜົ່າໄຕ, ນຸ່ງ, ເອເດ, ເຈົາຣໍ… ທ່ານ ເຈີນຮີ້ວເຊີນ ຜູ້ຕາງໜ້າສະມາຄົມສິລະປະວັນນະຄະດີພື້ນເມືອງ 3 ແຂວງ ອຽນບ້າຍ, ລາວກາຍ, ຮ່າຢາງ ໄດ້ຮັບລາງວັນ A ດ້ວຍຊຸດກາບກອນພື້ນເມືອງ “ປະຊາຊົນເຂດພູສູງຮູ້ບຸນຄຸນທ່ານ ປະທານໂຮ່ຈິມິນ” ໃຫ້ຮູ້ວ່າ :
“ປະທານໂຮ່ຈິມິນໄດ້ເຂົ້າສູ່ດວງໃຈຂອງປະຊາຊົນບັນດາເຜົ່າສ່ວນໜ້ອຍຢ່າງແທ້ຈິງ, ດັ່ງນັ້ນ ໃນບໍ່ວ່າເຜົ່າໃດກໍຕາມກໍລ້ວນແຕ່ຮູ້ບຸນຄຸນທ່ານປະທານໂຮ່ຈິມິນ. ເມື່ອລົງຮອດໝູ່ບ້ານເຂດບ້ານນາ, ເຂດປະຊາຊົນບັນດາເຜົ່າສ່ວນໜ້ອຍແຕ່ລະແຫ່ງ, ພວກເຮົາກໍສາມາດເກັບກຳໄດ້ບົດປະພັນວັນນະຄະດີ, ບົດເພງ, ບົດໜັງສືພິມປຽບເໝືອນແກ້ວມະນີປະເສີດ. ພາຍຫຼັງຄົ້ນຄ້ວາ, ເກັບກຳມາເປັນເວລາຫຼາຍປີ, ປະຈຸບັນ, ພວກເຮົາໄດ້ມີຊຸດກາບກອນພື້ນເມືອງປະກອບດ້ວຍ 40 ບົດທີ່ເວົ້າເຖິງປະທານໂຮ່ຈິມິນຜູ້ຍິ່ງໃຫຍ່. ປະຈຸບັນ, ກຳລັງແຜ່ຂະຫຍາຍຂອງບັນດາບົດປະພັນວັນນະຄະດີ, ບົດເພງ, ບົດໜັງສືພິມແມ່ນແຂງແຮງທີ່ສຸດ ເພາະຢູ່ບໍ່ວ່າເຂດໃດ ກໍມີບັນດາບົດເພງຍ້ອງຍໍສັນລະເສີນປະທານໂຮ່ຈິມິນ, ບັນດາບົດເພງຊົມເຊີຍບັນດາວຽກດີທີ່ເຮັດຕາມແບບຢ່າງຄຸນສົມບັດປະທານໂຮ່ຈິມິນ”
ດ້ວຍການເຂົ້າຮ່ວມຂອງຖັນແຖວບັນດານັກສິລະປີນ, ນັກປະພັນ, ນັກຂ່າວ, ບັນດາຜູ້ທີ່ສຸມຈິດສຸມໃຈກັບຫົວເລື່ອງ “ຮ່ຳຮຽນ ແລະ ປະຕິບັດຕາມ ແບບຢ່າງຄຸນສົມບັດປະທານໂຮ່ຈິມິນ”, ບັນດາອົງການສື່ສານ, ວັດທະນະທຳ, ສິລະປະ, ສື່ມວນຊົນ ໄດ້ສ້າງພະລັງຊີວິດໃໝ່ທີ່ມີຕໍ່ການເຄື່ອນໄຫວປະດິດຄິດແຕ່ງ, ໂຄສະນາ ແລະ ເສີມຂະຫຍາຍລັກສະນະຕັ້ງໜ້າ, ມີຫົວຄິດປະດິດສ້າງ, ຍົກສູງຄວາມຮັບຜິດຊອບໃນສັງຄົມ, ສະແດງໃຫ້ເຫັນຄວາມເຄົາລົບນັບຖື, ຄວາມຮັບແພງຂອງບັນດານັກສິລະປີນ, ນັກປະພັນ, ນັກຂ່າວທີ່ມີຕໍ່ທ່ານປະທານໂຮ່ຈິມິນ. ຜ່ານນີ້ ກໍປະກອບສ່ວນເຮັດໃຫ້ຊີວິດທາງດ້ານຈິດໃຈຂອງປະຊາຊົນເພີ່ມຄວາມອຸດົມສົມບູນ, ທັງເປັນການລະດົມກຳລັງໃຈໃຫ້ປະຊາຊົນຮ່ຳຮຽນ ແລະ ປະຕິບັດຕາມ ແບບຢ່າງຄຸນສົມບັດປະທານໂຮ່ຈິມິນ, ພ້ອມກັນນັ້ນ ກໍຢືນຢັນຄວາມຍືນຍົງຄົງຕົວ ແລະ ຄຸນຄ່າອັນໃຫຍ່ຫຼວງຂອງແນວຄິດ, ແບບຢ່າງຄຸນສົມບັດ ບຸກຄະລິກກະພາບປະທານໂຮ່ຈິມິນ .