(vovworld)- ພາບແຕ້ມກີມຮ່ວາງ ແມ່ນຊື່ເອີ້ນຂອງພາບພື້ນເມືອງປະເພດຫນຶ່ງທີ່ມີການພັດທະນາຢ່າງແຮງແຕ່ສັດຕະວັດທີ 18 -19 ຂອງໝູ່ບ້ານ ກີມຮວ່າງ ຕາແສງ ເວີນແກງ ເມືອງ ຮວ່າຍດືກ ແຂວງ ຮ່າໄຕ ເກົ່າ ປະຈຸບັນ ແມ່ນຮ່າໂນ້ຍ. ຫົວເລື່ອງຕ່າງໆໃນພາບພຶ້ື້ນເມືອງ ກີມຮ່ວາງ ແມ່ນເລີ່ມມາຈາກຊີວິດປະຈຳວັນທີ່ລຽບງ່າຍ, ຄວາມຊີນເຄີຍຂອງປະຊາຊົນຢູ່ເຂດທົ່ງພຽງພາກເຫນືອ ສະນັ້ນພາບປະເພດນີ້ໄດ້ສ້າງຄວາມດູດດື່ມທີ່ສຸດ. ຮູບພາບໃນ ພາບພຶ້ື້ນເມືອງ ກີມຮ່ວາງ ແຕ່ລະແຜ່ນນັ້ນແມ່ນ: ໂຕຄວາຍ, ໂຕງົວ, ໝູ, ໄກ່, ຊີວິດການເປັນຢູ່ຂອງປະຊາຊົນເຂດບ້ານນາ, ຮູບພາບຂອງມື້ບຸນເຕັດ ແລະອື່ນໆ. ບົດຂຽນຂອງນັກຂ່າວ ລານແອງ.
ພ້ອມກັບພາບ ດົງໂຮ່ ຢູ່ ບັກນີງ, ພາບ ຮ່າງຈົງ ຢູ່ ຮ່າໂນ້ຍ, ພາບພຶ້ື້ນເມືອງ ກີມຮ່ວາງ ແມ່ນປະເພດພາບພື້ນເມືອງທີ່ເປັນເອກະລັກສະເພາະຂອງເຂດທົ່ງພຽງພາກເຫນືອໃນຫວຽດນາມ ເມື່ອກ່ອນ. ກ່ອນນີ້ ພາບພຶ້ື້ນເມືອງ ກີມຮ່ວາງ ຖືກເອີ້ນວ່າ ພາບແດງ ຍ້ອນວ່າ ເຄີຍພິມໃນເຈ້ຍສາສີແດງ ຕ່າງກັບພາບຮ່າງຈົງ ຫລື ພາບດົງໂຮ່ ແມ່ນພິມໃນເຈ້ຍສາສີຂາວ. ພາບປະເພດນີ້ ນອກຈາກໃຊ້ສີແດງເປັນພື້ນຂອງພາບແລ້ວ ຍັງມີສີດຳເມື່ອພິມຈາກແມ່ພິມເຮັດດ້ວຍໄມ້ ແລະ ສີຂາວ, ສີດຳ, ສີບົວ…..ທີ່ໄດ້ແຕ້ມເພີ່ມເຕີມພາຍຫລັງພິມສຳເລັດ. ອ້າຍ ເລບີກ, ຊື່ງແມ່ນຜູ້ນິຍົມພາບພື້ນເມືອງປະເພດນີ້ໃຫ້ຮູ້ວ່າ: ຍ້ອນເມົາມົບກັບບັນດາປະເພດພາບພື້ນເມືອງ ສະນັ້ນ ອ້າຍໄດ້ຍາດເວລາເພື່ອຊອກຮູ້ ແລະ ມີຄວາມປະທັບໃຈພິເສດຕໍ່ ພາບພຶ້ື້ນເມືອງ ກີມຮ່ວາງ.
“ພາບພຶ້ື້ນເມືອງ ກີມຮ່ວາງ ເຄີຍເອີ້ນວ່າພາບແດງ ແມ່ນພາບພື້ນເມືອງປະເພດຫນຶ່ງທີ່ເປັນເອກະລັກສະເພາະທີ່ສຸດ. ຂ້າພະເຈົ້ານິຍົມພາບແຕ້ມຮູບໂຕໝູ ແລະ ຮູບໂຕໄກ່. ນັ້ນແມ່ນບັນດາຮູບພາບແຕ້ມດ້ວຍລວດລາຍທີ່ລຽບງ່າຍບົນພື້ນສີແດງ ດ້ວຍຮູບໝູທີ່ມີຄວາມໃກ້ຊິດຕິດແທດກັບປະຊາຊົນຫວຽດນາມ. ມາຮອດປະຈຸບັນ ມັນຍັງສວຍງາມຢູ່.”
ກ່ອນນີ້ ເພື່ອຜະລິດພາບແຕ້ມດ້ວຍພື້ນສີແດງທີ່ງາມຕານັ້ນ, ຜູ້ຜະລິດ ພາບພຶ້ື້ນເມືອງ ກີມຮ່ວາງເຄີຍນຳໃຊ້ແມ່ພິມເຮັດດ້ວຍໄມ້ຕົ້ນຈັນຫລືຕົ້ນມີ້ ແລະຖືກຄວັດແກະສະຫລັກຢ່າງລະອຽດລະອໍ ແລະ ມີເຕັກນິກສູງໃນການພິມ. ປະຊາຊົນໃນບ້ານເລົ່າຄືນສູ່ຟັງວ່າ ຊຸມປີຕົ້ນສັດຕະວັດທີ 20, ພາຍຫລັງລະດູການເກັບກ່ຽວໃນເດືອນ 10 ສຳເລັດຜົນ, ອາກາດຫນາວເຢັນ ກໍແມ່ນຈຸດເວລາທີ່ປະຊາຊົນບ້ານກີມຮ່ວາງ ພ້ອມກັນທຳການຜະລິດ ພາບພຶ້ື້ນເມືອງ ກີມຮ່ວາງ. ເຈ້ຍສາແດງເພື່ອແຕ້ມພາບແມ່ນຊື້ມາຈາກຖະຫນົນ ຮ່າງໝ໋າ. ພາຍຫລັງນຳໃຊ້ແມ່ພິມເຮັດດ້ວຍໄມ້ທີ່ມີຢູ່ແລ້ວ, ນັກສິລະປະການໄດ້ທານ້ຳສີໃສ່, ວາງເຈ້ຍ ແລະ ດັດໃຫ້ຮາບພຽງ ແລ້ວໃຊ້ໄຍໝາກບວບທາຄ່ອຍໆເພື່ອໃຫ້ລວດລາຍແຈ້ງລະອຽດ, ແລ້ວນຳເອົາໄປຕາກແດດ. ເມື່ອພາບແຫ້ງແລ້ວ ຜູ້ແຕ້ມພາບຈະຈ້ຳສີ ແລະ ແຕ້ມລວດລາຍໃສ່ຕື່ມເພື່ອໃຫ້ພາບແຕ້ມມີຊີວິດຊີວ່າກວ່າ. ຟອຍທາສີທີ່ໄດ້ນຳໃຊ້ເພື່ອແຕ້ມພາບປະເພດນີ້ແມ່ນເຮັດດ້ວຍເຟືອງເຂົ້າຫນຽວ, ເພື່ອສ້າງຄວາມນຸ່ມ ແລະ ເວລາແຕ້ມແມ່ນງ່າຍກວ່າ. ສະນັ້ນ ລວດລາຍທີ່ໄດ້ແຕ້ມໃນພາບພຶ້ື້ນເມືອງ ກີມຮ່ວາງ ເຫັນວ່າແມ່ນລຽບງ່າຍ ແລະ ມີຊີວິດຊີວາທີ່ສຸດ. ທ່ານນາງ ຫງວຽນທິທູຮ່ວາ, ຜູ້ເກັບຮັກສາພາບພື້ນເມືອງໃຫ້ຮູ້ວ່າ:
“ພາບພຶ້ື້ນເມືອງ ກີມຮ່ວາງ ຢູ່ໝູ່ບ້ານຊົນນະບົດ ຊານນະຄອນຮ່າໂນ້ຍ ພຽງແຕ່ຮັບໃຊ້ໃຫ້ປະຊາຊົນຊາວຜູ້ອອກແຮງງານ ສະນັ້ນ ມີຄວາມຜົນສະທ້ອນກ່ຽວກັບສີສັນໃນພາບ, ລວດລາຍກໍລຽບງ່າຍ. ສຳລັບຊາວຜູ້ອອກແຮງງານ ເມື່ອບຸນເຕັດວຽນມາ ເຂົາເຈົ້າເຄີຍຊື້ຄຳພະຫຍາ, ພາບພື້ນເມືອງແດງມາປະດັບປະດາໃນເຮືອນ ເພື່ອປາດຖະຫນາວ່າ ທຸກຄົນໃນຄອບຄົວຈະໄດ້ຮັບຄວາມໂຊກດີ. ພາບພຶ້ື້ນເມືອງ ກີມຮ່ວາງ ມີສີສັນແບບທຳມະຊາດ.”
ທ່ານນາງ ຫງວຽນທິທູຮ່ວາ ພ້ອມກັບນັກສິລະປະການຜູ້ອາຍຸສູງໃນ
ບ້ານຜະລິດພາບພື້ນເມືອງກີມຮ່ວາງ
ພາບ:internet
|
ຢູ່ໃນ ພາບພຶ້ື້ນເມືອງ ກີມຮ່ວາງ ແຕ່ລະແຜ່ນນັ້ນ ບໍ່ພຽງແຕ່ມີຮູບພາບເທົ່ານັ້ນ ຫາກຍັງມີຄຳພະຫຍາດ້ວຍການຂຽນຕົວຫນັງສືຈີນຢູ່ເບື້ອງຊ້າຍຂອງພາບອີກດ້ວຍ. ເພື່ອເຮັດໄດ້ສິ່ງດັ່ງກ່າວ ນັກສິລະປະການຜະລິດພາບແຕ້ມປະເພດນີ້ ບໍ່ພຽງແຕ່ຮູ້ພາສາຈີນເປັນຢ່າງດີເທົ່ານັ້ນ ຫາກຍັງມີຄວາມຮູ້ໃດຫນຶ່ງເພື່ອສະແດງຄວາມເກັ່ງກ້າຂອງຕົນຜ່ານພາບແຕ້ມ ແລະ ນີ້ແມ່ນຈຸດແຕກຕ່າງຂອງປະເພດ ພາບພຶ້ື້ນເມືອງ ກີມຮ່ວາງ.
ພາບພຶ້ື້ນເມືອງ ກີມຮ່ວາງ ງາມຄືແນວນັ້ນ ແຕ່ມາຮອດໄລຍະປະຈຸບັນ, ມີບໍ່ເທົ່າໃດຄອບຄົວ ຮັກສາແມ່ພິມເຮັດດ້ວຍໄມ້ໄວ້ ແລະ ຜູ້ຜະລິດພາບພື້ນເມືອງປະເພດນີ້ມີຈຳນວນຫນອ້ຍ. ທ່ານນາງ ຫງວຽນທິທູຮ່ວາ, ຜູ້ເກັບຮັກສາພາບພື້ນເມືອງໃຫ້ຮູ້ວ່າ: ປີ 1915, ໄພນ້ຳຖ້ວມເກີດຂຶ້ນຢ່າງຮ້າຍແຮງ, ຄັນຄູ ລຽນມາກ ຖືກແຕກ ໄດ້ເຮັດໃຫ້ແມ່ພິມເຮັດດ້ວຍໄມ້ຫລາຍແຜ່ນຂອງໝູ່ບ້ານ ກີມຮ່ວາງ ຖືກພັງທະລາຍ. ຫລັງຈາກນັ້ນ ລະດູເກັບກ່ຽວບໍ່ໄດ້ຮັບຜົນ, ໄພອຶດຫິວເກີດຂຶ້ນ ພ້ອມກັບຖືກສົງຄາມ, ສະນັ້ນ ພາບພຶ້ື້ນເມືອງ ກີມຮ່ວາງຖືກສູນຫາຍໄປ. ປະຈຸບັນ ທ່ານນາງ ຫງວຽນທິທູຮ່ວາ ເກັບຮັກສາພາບພຶ້ື້ນເມືອງ ກີມຮ່ວາງ ກວ່າ 60 ແຜ່ນ ແລະ ຟື້ນຟູຄືນໄດ້ 20 ແຜ່ນ.
ເພື່ອຟື້ນຟູອາຊີບຜະລິດ ພາບພຶ້ື້ນເມືອງ ກີມຮ່ວາງ ຊື່ງແມ່ນອາຊີບທີ່ມີຊື່ສຽງຮຽງນາມໃນໄລຍະຫນຶ່ງຢູ່ເຂດບ້ານນາ ນັ້ນແມ່ນຄວາມປາດຖະຫນາດຂອງຜູ້ນິຍົມພາບພື້ນເມືອງກີມຮວ່າງ ຫລາຍຄົນ. ເພາະມີໄລຍະຫນຶ່ງ, ພາບພຶ້ື້ນເມືອງ ກີມຮ່ວາງ ແມ່ນອາຫານດ້ານຈິດໃຈຂອງປະຊາຊົນເຂດດ່ວາຍ ແລະ ເຂດທົ່ງພຽງພາກເຫນືອ. ພິເສດ ໃນໂອກາດບຸນປີໃຫມ່ປະຈຳຊາດແຕ່ລະປີ, ປະຊາຊົນເຄີຍຊື້ພາບມາປະດັບປະດາໃນເຮືອນ. ກ່ອນນີ້ ຄອບຄົວໃດມີ ພາບພຶ້ື້ນເມືອງ ກີມຮ່ວາງ ລ້ວນແຕ່ມີຄວາມເອກອ້າງທະນົງໃຈ ແລະ ເຂົາເຈົ້າເຄີຍອວຍພອນປີໃຫມ່ດ້ວຍພາບພື້ນເມືອງ.