ພາບລະດົມກຳລັງໃຈ ແມ່ນປະເພດປະຈັນບານຂອງຂົງເຂດວິຈິດຕະກຳຫວຽດນາມ ຕໍ່ໜ້າບັນດາເຫດການການເມືອງ, ບັນດາບັນຫາສະຖານະການຂອງປະເທດຊາດຄື ການປະຕິວັດເດືອນສິງຫາ, ພາກໃຕ້ຫວຽດນາມໄດ້ຮັບການປົດປ່ອຍ ເມື່ອວັນທີ 30/4/1975, ວັນຊາດທີ 2 ກັນຍາ, ການເລືອກຕັ້ງສະພາແຫ່ງຊາດ, ກອງປະຊຸມຜູ້ແທນທົ່ວປະເທດຄັ້ງຕ່າງໆຂອງພັກ… ບັນດານັກຈິດຕະກອນແຕ້ມ ພາບລະດົມກຳລັງໃຈຍາມໃດກໍແມ່ນຜູ້ນຳໜ້າເພື່ອສ່ອງແສງຊີວິດສັງຄົມດ້ວຍພາສາຈິດຕະກຳ ຊຶ່ງໄດ້ສົ່ງຜົນກະທົບຢ່າງແຂງແຮງເຖິງຜູ້ຊົມ ແລະ ກາຍເປັນແຫຼ່ງລະດົມກຳລັງໃຈໃນການອອກແຮງງານ ແລະ ຕໍ່ສູ້ຂອງປະຊາຊົນໃນພາລະກິດສ້າງສາ ແລະ ປົກປັກຮັກສາປະເທດຊາດ.
ພາບແຕ້ມກ່ຽວກັບປະທານໂຮ່ຈິມິນກ່າວບົດຖະແຫຼງປະກາດເອກະລາດສະຖາປະນາປະເທດສາທາລະນະລັດປະຊາທິປະໄຕຫວຽດນາມ |
ໃນຄວາມຊົງຈຳຂອງຕົນ, ຈິດຕະກອນ ເຈີນມາຍ ຍາມໃດກໍເຕື້ອງເຖິງຊຸດ ພາບແຕ້ມລະດົມກຳລັງໃຈ “ລະດູບານໃໝ່ 79 ຄັ້ງ” ກ່ຽວກັບປະທານໂຮ່ຈິມິນ, ຊຶ່ງທ່ານໄດ້ແນະນຳຕໍ່ໜ້າມວນຊົນໃນງານວາງສະແດງກ່ອນນີ້ 6 ປີ. ນັ້ນແມ່ນພາບແຕ້ມ 79 ແຜ່ນ ທີ່ໄດ້ແຕ້ມຮູບປະທານໂຮ່ຈິມິນທີ່ພວມຢູ່ໃນສະພາວະທີ່ແຕກຕ່າງກັນ. ຈາກຄາວທີ່ເພິ່ນຍັງເປັນຊາຍໜຸ່ມ, ຕັດສິນໃຈອອກເດີນທາງໄປຕ່າງປະເທດເພື່ອຊອກຫາເສັ້ນທາງກູ້ຊາດ ຕະຫຼອດຮອດໄລຍະເຄື່ອນໄຫວຢູ່ຕ່າງປະເທດ, ແລ້ວກໍຮອດວັນທີ່ເພິ່ນກ່າວບົດຖະແຫຼງປະກາດເອກະລາດຢູ່ສະໜາມຫຼວງບາດິງ ສະຖາປະນາປະເທດສາທາລະນະລັດປະຊາທິປະໄຕຫວຽດນາມເມື່ອວັນທີ 2/9/1945. ຈິດຕະກອນ ເຈີນມາຍ ໄດ້ໃຊ້ສີນ້ຳຕານ ແລະ ສີແດງເພື່ອແຕ້ມຮູບ ປະທານໂຮ່ຈິມິນ ຊຶ່ງແມ່ນຜູ້ນຳທີ່ຍິ່ງໃຫຍ່ຂອງຊາດຫວຽດນາມ ແລະ ເປັນນັກວັດທະນະທຳທີ່ມີຊື່ສຽງໃນໂລກ ແຕ່ພັດລຽບງ່າຍທີ່ສຸດ. ຍ້ອນຄວາມເຄົາລົບຮັກ ແລະ ນິຍົມນັບຖື ປະທານໂຮ່ຈິມິນ, ດັ່ງນັ້ນ ຈິດຕະກອນ ເຈີນມາຍ ໄດ້ມອບຊຸດພາບແຕ້ມ 79 ແຜ່ນນີ້ໃຫ້ເຂດອະນຸສອນສະຖານ ທ່າກຳປັ່ນຍາຮົ່ງ, ນະຄອນໂຮ່ຈິມິນ ເພື່ອວາງສະແດງ. ຈິດຕະກອນ ເຈີນມາຍ ໃຫ້ຮູ້ວ່າ :
“ ພາບແຕ້ມເຫຼົ່ານັ້ນ ແມ່ນບັນດາຮູບພາບທີ່ມີຄວາມໝາຍເລິກເຊິ່ງທີ່ສຸດໃນຊີວິດການເຄື່ອນໄຫວຂອງຂ້າພະເຈົ້າ. ຈິດຕະກອນບໍ່ວ່າຜູ້ໃດ ຖ້າບໍ່ມີຄວາມຮັກແພງ ແມ່ນບໍ່ສາມາດແຕ້ມໄດ້. ເພາະວ່າ ບໍ່ມີເອກະສານເພື່ອຊ່ວຍການແຕ້ມ. ຂ້າພະເຈົ້າໄດ້ໄປຊອກຫາຢູ່ຫໍພິພິທະພັນປະຕິວັດ, ຫໍພິພິທະພັນໂຮ່ຈິມິນ, ແລ້ວກໍໄດ້ຮັບການຊ່ວຍເຫຼືອຈາກໝູ່ເພື່ອນຢູ່ສະມາຄົມວິຈິດຕະກຳຫວຽດນາມທີ່ແຫ່ງຕ່າງໆ, ຖ້າວ່າ ມີຮູບກ່ຽວກັບປະທານໂຮ່ຈິມິນເຖິງວ່າເລກນ້ອຍຢູ່ຕາມໜັງສືພິມຕ່າງໆຂອງຝະລັ່ງນັ້ນ, ຂ້າພະເຈົ້າກໍໄດ້ບັນທຶກໄວ້ໝົດ. ເຮັດເຊັ່ນນັ້ນ, ຈຶ່ງໄດ້ມີຮູບ 79 ແຜ່ນ ”
ພາບລະດົມກຳລັງໃຈກ່ຽວກັບຫົວເລື່ອງ ປະທານໂຮ່ຈິມິນ ແມ່ນໜຶ່ງໃນບັນດາຫົວເລື່ອງທີ່ລຶ້ງເຄີຍຂອງບັນດາຈິດຕະກອນ. ຈິດຕະກອນ ເຈີນແຄ້ງເຈືອງ ປະທານສະມາຄົມວິຈິດສິນຫວຽດນາມ ໄດ້ຫວນຄືນຊຸມວັນເດືອນປີແຫ່ງຄວາມລຳບາກກາກກຳຂອງປະເທດຊາດ, ຄາວນັ້ນ, ຈິດຕະກອນທຸກໆຄົນຕ່າງກໍແຕ້ມ ພາບລະດົມກຳລັງໃຈຢ່າງໜ້ອຍແຕ່ໜຶ່ງຫາສອງແຜ່ນ. ສ່ວນບັນດາຈິດຕະກອນອາຊີບກໍແຕ້ມນັບຮ້ອຍແຜ່ນ. ພາບລະດົມກຳລັງໃຈຫຼາຍແຜ່ນຖືກແຕ້ມໃສ່ຝາເຮືອນຫຼືຖືກພິມໃນໜັງສືພິມເພື່ອສົ່ງເຖິງເຂດພາກໃຕ້. ພາບລະດົມກຳລັງໃຈແຕ່ລະແຜ່ນ ກໍລ້ວນແຕ່ຊ້ອນແຝງສານຕ່າງໆເພື່ອລະດົມໃຈມະນຸດ. ຈິດຕະກອນ ເຈີນແຄ້ງເຈືອງ ປະທານສະມາຄົມວິຈິດສິນຫວຽດນາມ ເວົ້າວ່າ :
“ ຄາວນັ້ນ, ໄດ້ຈັດງານວາງສະແດງພາບລະດົມກຳລັງໃຈ ແລະ ພາບໂຄສະນາຫຼາຍຄັ້ງ. ທີ 2 ແມ່ນຈັດງານວາງສະແດງຕ່າງໆເພື່ອຕ້ານໄພກຶກໜັງສື, ແລ້ວກໍຮອດວັນທີ 19/8 ແມ່ນທຳການລຸກຮື້ຂຶ້ນ, ຮອດວັນທີ 2/9 ຢູ່ສະໜາມຫຼວງບາງດິງ, ປະທານໂຮ່ຈິມິນກ່າວບົດຖະແຫຼງປະກາດເອກະລາດສະຖາປະນາປະເທດສາທາລະນະລັດປະຊາທິປະໄຕຫວຽດນາມ, ຫຼັງຈາກນັ້ນໃນທັນທີ່, ໄດ້ມີງານວາງສະແດງວັດທະນະທຳ ຊຶ່ງມີເອກະສານ, ຮູບພາບ, ວັດຖຸພັນກວ່າ 200 ຢ່າງ, ໃນນັ້ນ, ມີພາບແຕ້ມແຕ່ 40 ຫາ 50 ແຜ່ນແລ້ວ. ປີ 1946, ໃນສະພາບການກະກຽມທຳການຕໍ່ຕ້ານເຊັ່ນນັ້ນ, ໃນໂອກາດສະເຫຼີມສະຫຼອງວັນຊາດ, ບັນດາ ຈິດຕະກອນໄດ້ຈັດງານວາງສະແດງກ່ຽວກັບຫົວເລື່ອງການປະຕິວັດເດືອນສິງຫາ”
ຈິດຕະກອນ ລິວຫງອກຟານ, ຜູ້ເຂົ້າຮ່ວມບັ້ນຂົນຂວາຍປະດິດຄິດແຕ່ງຫຼາຍຄັ້ງກ່ຽວກັບຫົວເລື່ອງປະຕິວັດ ໃຫ້ຮູ້ວ່າ ພວກຈິດຕະກອນໜຸ່ມລຸ່ນປະຈຸບັນມີ ຄວາມຮູ້ສຶກກ່ຽວກັບອະດີດຕະການ ບໍ່ພຽງແຕ່ດ້ວຍເອກະສານປະຫວັດສາດເທົ່ານັ້ນ, ຫາກຍັງຜ່ານບັນດາບົດກາບກອນ, ດົນຕີອີກດ້ວຍ. ນັ້ນແມ່ນແຫຼ່ງອາລົມເພື່ອຊຸກຍູ້ໃຫ້ຈິດຕະກອນແຕ້ມພາບ. ຈິດຕະກອນ ລິວຫງອກຟານ ເວົ້າວ່າ:
“ຈິດຕະກອນຫຼາຍຄົນ, ເມື່ອໄດ້ຟັງຄຳປະໂຫຍກໜຶ່ງໃນບົດເພງແລ້ວ, ກໍສາມາດແຕ້ມພາບໄດ້. ຖ້າຫາກມີຄວາມຕ້ອງການຊອກຮູ້ ກໍຕ້ອງຊອກ ຫາຜ່ານຮູບເງົາເອກະສານ, ບັນດາບົດເພງ ເປັນຕົ້ນແມ່ນບົດເພງ, ກາບກອນຫຼືບັນດາຄຳເວົ້າຂອງ ປະທານໂຮ່ຈິມິນ . ເວົ້າລວມແລ້ວ ແມ່ນຕ້ອງກຳແໜ້ນໂດຍສັງເຂບ, ຕ້ອງມີຄວາມຮູ້ຄວາມເຂົ້າໃຈກ່ຽວກັບປະຫວັດສາດ, ຈາກນັ້ນຈຶ່ງມີຜະລິດຕະພັນຈິດຕະກຳໄດ້ ”
ປະຈຸບັນ, ພາບລະດົມກຳລັງໃຈພວມຢືນຢູ່ຕໍ່ໜ້າການເລືອກເຟັ້ນຫຼາຍຢ່າງໃນແບບວິທີປະດິດຄິດແຕ່ງ. ຍ້ອນມີເຕັກໂນໂລຢີທັນສະໄໝ, ຈິດຕະກອນສາມາດແຕ້ມພາບຜ່ານເຄື່ອງຄອມພິວເຕີຢ່າງສະດວກສະບາຍ. ສິ່ງນີ້ກໍເປັນການທ້າທາຍສຳລັບນັກແຕ້ມ. ໃນວັນນີ້ ພາບລະດົມກຳລັງໃຈຖືກນຳໃຊ້ຢ່າງກ້ວາງຂວາງ ແລະ ເຜີຍແຜ່ໃນຫຼາຍຂົງເຂດກວ່າເກົ່າ. ພາບລະດົມກຳລັງໃຈກ່ຽວກັບຫົວເລື່ອງປະຕິວັດ ຍາມໃດກໍເປັນທຶນຮອນອັນປະເສີດເລີດລ້ຳຂອງພື້ນຖານວິຈິດຕະກຳຫວຽດນາມ ຊຶ່ງໄດ້ຕິດພັນກັບໄລຍະຕໍ່ສູ້ຢ່າງພິລະອາດຫານເພື່ອຍາດເອົາເອກະລາດ, ອິດສະຫຼະພາບມາໃຫ້ປະເທດຊາດ.