ຮູບຫຼໍ່ທອງເຈົ້າແມ່ກວນອີມຂອງອິນເດຍ(ສະຕະວັດ 17-18)
|
ເນື່ອງໃນໂອກາດດຳເນີນກອງປະຊຸມປະຈຳປີ ສະຫະສະມາຄົມບັນດາຫໍພິພິ ທະພັນແຫ່ງຊາດອາຊີຄັ້ງທີ 4 (ANMA 4) ຢູ່ຮ່າໂນ້ຍ, ຫໍພິພິທະພັນປະຫວັດສາດແຫ່ງຊາດຫວຽດນາມ ຫາກໍຈັດງານວາງສະແດງທີ່ມີຫົວເລື່ອງ “ ອາຊີ-ບັນດາສີສັນວັດທະນະທຳ” . ງານວາງສະແດງໄດ້ແນະນຳໃຫ້ຜູ້ມາຊົມກ່ຽວກັບບັນດາວັດຖຸພັນ, ວັດຖຸບູຮານ, ມໍລະດົກວັດທະນະທຳທີ່ເປັນເອກະລັກສະເພາະຂອງບັນດາປະເທດອາຊີ. ພິເສດ, ບັນດາວັດຖຸພັນ, ວັດຖຸບູຮານທີ່ມີຄ່າຫາຍາກຂອງຫວຽດນາມທີ່ນຳມາວາງສະແດງຢູ່ທີ່ນີ້ ໄດ້ປະກອບສ່ວນເຮັດໃຫ້ຮູບພາບດ້ວຍສີສັນຫຼາກຫຼາຍຂອງວັດທະນະທຳອາຊີເພີ່ມຄວາມອຸດົມສົມບູນຂຶ້ນຕື່ມ.
ເມື່ອເຂົ້າມາທັດສະນະສຶກສາໃນງານວາງສະແດງຫົວເລື່ອງ“ອາຊີ - ບັນດາສີສັນວັດທະນະທຳ” ຊຶ່ງຖືກໄຂຂຶ້ນໃນບໍລິເວນ ຫໍພິພິທະພັນປະຫວັດສາດແຫ່ງຊາດຫວຽດນາມທີ່ຮ່າໂນ້ຍ. ບັນດາຜູ້ມາຊົມໄດ້ຮັບຊົມບັນດາວັດຖຸພັນ, ວັດຖຸ ບູຮານທີ່ມີຄ່າຫາຍາກ ແລະ ມີຕົ້ນກຳເນີດມາຈາກ 10 ປະເທດອາຊີຄື ຈີນ, ຍີປຸ່ນ, ສ.ເກົາຫຼີ, ອີນເດຍ, ໄທ, ອິນໂດເນເຊຍ, ມຽນມາ, ກຳປູເຈຍ, ລາວ ແລະ ຫວຽດນາມ. ບັນດາວັດຖຸພັນ, ວັດຖຸບູຮານຄື ເຄື່ອງໃຊ້ໃນຄອບຄົວ, ເຄື່ອງປະດັບ, ເຄື່ອງຮັບໃຊ້ການບູຊາທີ່ນຳມາວາງສະແດງ ຖືກເຮັດດ້ວຍທອງແດງ, ດິນເຜົາ, ຫີນປະເສີດ, ເງິນ....ທ່ານປະລິນຍາໂທ ຫງວຽນກັວກຫິ້ວ ຮອງຫົວໜ້າພະແນກວາງສະແດງ- ຫໍພິພິທະພັນປະຫວັດສາດແຫ່ງຊາດຫວຽດນາມ ໃຫ້ຮູ້ວ່າ :
“ງານວາງສະແດງໄດ້ແນະນຳບັນດາວັດຖຸພັນ, ວັດຖຸບູຮານກ່ຽວກັບສິລະປະແກະຄວັດສະຫຼັກ, ສາສະໜາພຸດ, ສາສະໜາຮິນດູ. ນອກຈາກນັ້ນ ຍັງແນະນຳກ່ຽວກັບສິລະປະສະເພາະຂອງແຕ່ລະປະເທດຄື : ສິລະປະຜະລິດເຄື່ອງປັ້ນດິນເຜົາຂອງຈີນ, ເຄື່ອງຂັດມັນຂອງຍີປຸ່ນ, ເຄື່ອງສິລະປະກຳຝັງໄຂ່ມຸກຂອງໄທ ແລະ ເຄື່ອງເອ້ຢ້ອງ, ເຄື່ອງສິລະປະກຳ, ເຄື່ອງຮັບໃຊ້ການບູຊາເຮັດດ້ວຍທອງແດງຂອງຫວຽດນາມ ”
ທີ່ງານວາງສະແດງ, ຫວຽດນາມກໍມີບັນດາວັດຖຸພັນ, ວັດຖຸບູຮານທີ່ເປັນເອກະລັກສະເພາະ, ພິເສດແມ່ນຄ້ອງບ້າງ ດົງເຊີນ ທີ່ມີມາກ່ອນນີ້ປະມານ 2-3 ພັນປີ. ໜ້າຄ້ອງບ້າງມີຮູບພາບດວງຕາເວັນພວມສ່ອງແສງສະຫວ່າງ ຊຶ່ງເປັນສັນຍາລັກໃຫ້ແກ່ອາກາດຍາມທຳລະດູການຜະລິດກະສີກຳຂອງຊາວຫວຽດນາມຊຶ່ງຕິດພັນກັບພື້ນຖານອະລິຍະທຳຜະລິດເຂົ້ານາທາມ. ຮູບສັດສາວາສິ່ງຕ່າງໆຄື ງົວຄວາຍ, ຕົ້ນເຂົ້າ, ທົ່ງໄຮ່ທົ່ງນາ, ການຈັບຫາສິນໃນນ້ຳ, ການລ່າສັດ.....ທັງໝົດເຫຼົ່ານັ້ນ ໄດ້ສະແດງໃຫ້ເຫັນວ່າ ຄ້ອງບ້າງ ດົງເຊີນແມ່ນຜະລິດຕະພັນຂອງ ພື້ນຖານອະລິຍະທຳກະສີກຳຜະລິດເຂົ້ານາທາມ ແລະ ຍັງແມ່ນຜະລິດຕະພັນແຫ່ງພູມປັນຍາຂອງຊາວຫວຽດເດີມ. ທີ່ ງານວາງສະແດງ, ຍັງມີຜະລິດຕະພັນສິລະປະກຳອີກອັນໜຶ່ງທີ່ເປັນເອກະລັກສະເພາະຂອງຫວຽດນາມ, ນັ້ນແມ່ນຮູບແກະຄວັດສະຫຼັກເຈົ້າແມ່ກວນອີມ ພັນຕາພັນມື ຊຶ່ງຮັບຖືວ່າແມ່ນຜະລິດຕະພັນທີ່ໂດດເດັ່ນໃນພື້ນຖານສິລະປະແກະຄວັດສະຫຼັກຂອງສາສະໜາພຸດຫວຽດນາມ ຊຶ່ງພວມຖືກຮັກສາຢູ່ວັດ ບຸດທາບ ໃນແຂວງບັກນິງ. ຮູບແກະຄວັດສະຫຼັກເຈົ້າແມ່ກວນອີມ ພັນຕາພັນມື ຖືກເຮັດດ້ວຍໄມ້ຕົ້ນມີ້ ມີລວງສູງ 3,7 ມ, ກ້ວາງ 2,1 ມ. ບັນດາແຂນ ແລະ ໜ່ວຍຕາຂອງເຈົ້າແມ່ ສະແດງໃຫ້ເຫັນຄວາມເຫັນໃຈ, ແບ່ງເບົ່າຂອງເຈົ້າແມ່ທີ່ມີຕໍ່ມະນຸດ. ບັນດາວັດຖຸພັນ, ວັດຖຸບູຮານຂອງຫວຽດນາມທີ່ນຳມາວາງສະແດງພ້ອມກັບບັນດາວັດຖຸພັນ, ວັດຖຸບູຮານທີ່ນຳມາຈາກຫຼາຍປະເທດ ໄດ້ປະກອບສ່ວນເຮັດໃຫ້ສີສັນວັດທະນະທຳອາຊີເພີ່ມຄວາມອຸດັມສົມບູນຂຶ້ນຕື່ມ. ລຸງ ຫງວຽນເຈືອງ ຊາວຮ່າໂນ້ຍ ໃຫ້ຂໍ້ສັງເກດວ່າ :
“ ຜ່ານນີ້, ບັນດາຜູ້ຊົມຍັງຈະສາມາດຈຳແນກລະຫວ່າງວັດທະນະທຳ ຫວຽດນາມກັບວັດທະນະທຳກຳປູເຈຍ ຫຼື ໄທ. ແຕ່ຍັງມີອີກອັນໜຶ່ງທີ່ດີ, ນັ້ນແມ່ນຮູ້ສຶກວ່າວັດທະນະທຳລະຫວ່າງບັນດາປະເທດໃນພາກພື້ນມີການພົວພັນແລກ ປ່ຽນ, ເປັນຕົ້ນແມ່ນຮູບແກະສະຫຼັກຫີນ ຈຳປາ ມັນມີອັນໃດອັນໜຶ່ງຄ້າຍຄືກັນ”
ພື້ນຖານວັດທະນະທຳເກົ່າແກ່ດ້ວຍບັນດາວັດຖຸບູຮານທີ່ເປັນເອກະລັກສະເພາະຂອງບັນດາປະເທດອາຊີທີ່ງານວາງສະແດງ ໄດ້ປະກອບສ່ວນຊ່ວຍຜູ້ຊົມມີການສັງເກດຕີລາຄາຢ່າງຈະແຈ້ງກ່ຽວກັບຈຸດພິເສດ, ຄວາມເປັນເອກະລັກສະເພາະ ກໍຄືການພົວພັນແລກປ່ຽນລະຫວ່າງບັນດາພື້ນຖານວັດທະນະທຳອາຊີ. ຜ່ານບັນດາວັດຖຸບູຮານຂອງຫວຽດນາມທີ່ງານວາງສະແດງ, ບັນດາຜູ້ຊົມອາດຈະເຫັນວ່າ ຫວຽດນາມແມ່ນປະເທດທີ່ມີພື້ນຖານວັດທະນະທຳມາແຕ່ດົນນານ ແລະ ມີຫຼາຍຮູບຫຼາຍສີ, ຂະຫຍາຍຕົວບົນພື້ນຖານວັດທະນະທຳປະຈຳຖິ່ນຢ່າງໝັ້ນຄົງໜັກແໜ້ນ ແລະ ການພົວພັນແລກປ່ຽນກັບວັດທະນະທຳຈີນ, ອີນເດຍ, ຝ່າຍຕາເວັນຕົກ.