ໃນໄລຍະຂໍ້ມູນຂ່າວສານເບັ່ງບານພ້ອມກັບການພັດທະນາຢ່າງແຂງແຮງຂອງສື່ມວນຊົນປະເພດຕ່າງໆ, ເປັນຕົ້ນແມ່ນໂທລະພາບ, ສື່ເອເລັກໂຕນິກ, ວິທະຍຸກະຈາຍສຽງ ຍັງຄົງໄດ້ຮັບຄວາມສົນໃຈຈາກຜູ້ຟັງ, ຜູ້ອ່ານ. ໃນແຕ່ລະວັນ, ກໍຍັງຄົງມີຫຼານຄົນມັກຟັງ ວິທະຍຸກະຈາຍສຽງຫວຽດນາມ. ສຳລັບເຂົາເຈົ້າແລ້ວ, ວິທະຍຸກະຈາຍສຽງຫວຽດນາມໄດ້ກາຍເປັນເພື່ອນຜູ້ສະໜິດສະໜົມ, ບັນດາລາຍຫານຂອງວິທະຍຸກະຈາຍສຽງຫວຽດນາມ ຍັງຝັງເລິກໃນແນວຄິດຈິດໃຈຂອງຜູ້ຟັງຢ່າງຫຼວງຫຼາຍ.
(ພາບປະກອບ) |
ໂດຍໄດ້ເປັນຄວາມຊີ້ນເຄີຍນັບແຕ່ສິບປີມານີ້, ຕອນເຊົ້າແຕ່ລະວັນ, ທ່ານ ຫງວຽນວັນຕອງ ອະດີດຫົວໜ້າພະແນກວັດທະນະທຳຖະແຫຼງຂ່າວນະຄອນໂຮ່ຈິມິນ ກໍເປີດ ວິທະຍຸກະຈາຍສຽງຫວຽດນາມເພື່ອຟັງຂ່າວ. ທ່ານ ຫງວຽນວັນຕອງ ເລົ່າສູ່ຟັງວ່າ ນັບແຕ່ຄາວເຂົ້າຮ່ວມການຕໍ່ຕ້ານມາຮອດປະຈຸບັນ, ເວລາໃດທ່ານກໍຖືເຄື່ອງວິທະຍຸຕາມຕົວເພື່ອຕິດຕາມຟັງຂ່າວ. ພິເສດ ເມື່ອໄດ້ຮັບຂ່າວໄຊຊະນະຢູ່ສະໜາມຮົບຜ່ານຄື້ນຂອງ ວິທະຍຸກະຈາຍສຽງຫວຽດນາມ, ທ່ານພັດເພີ່ມຄວາມເຊື່ອໝັ້ນຕໍ່ວັນປະເທດຊາດໄດ້ໂຮມເຂົ້າກັນເປັນເອກະພາບ. ທ່ານ ຫງວຽນວັນຕອງ ເປີດເຜີຍວ່າ :
“ວິທະຍຸກະຈາຍສຽງມີການປະກອບສ່ວນຢ່າງໃຫຍ່ຫຼວງເຂົ້າໃນພາລະກິດປະຕິວັດ. ໃນຊຸມຄຳຄືນທີ່ຂ້າພະເຈົ້າເຄື່ອນທັບຜ່ານບັນດາໝູ່ບ້ານ, ຢູ່ໃສກໍເຫັນປະຊາຊົນຟັງ ວິທະຍຸກະຈາຍສຽງ. ຄຸນປະໂຫຍດຂອງ ວິທະຍຸກະຈາຍສຽງແມ່ນໃຫຍ່ຫຼວງທີ່ສຸດ. ປະຈຸບັນ, ຜູ້ຄົນທັງຫຼາຍມັກຊົມໂທລະພາບ, ແຕ່ກໍຍັງມັກຟັງ ວິທະຍຸກະຈາຍສຽງ. ຄວາມຊີ້ນເຄີຍຟັງ ວິທະຍຸຂອງຂ້າພະເຈົ້າ ແມ່ນບໍ່ອາດປະລະໄດ້ ”
ສຳລັບຜູ້ຟັງທັງຫຼາຍ, ວິທະຍຸກະຈາຍສຽງຫວຽດນາມແມ່ນແຫຼ່ງຂໍ້ມູນຂ່າວສານຢ່າງເປັນທາງການ, ເປັນໜ້າໄວ້ເນື້ອເຊື່ອໃຈ, ມີຂ່າວສົດໆຮ້ອນໆໃນຕະຫຼອດເວລາ. ດ້ວຍການປົກຄຸມຂອງຄື້ນຈາກດິນຕໍ່ແຜ່ນຮອດເຂດທະເລໝູ່ເກາະ, ປະຊາຊົນຢູ່ແຫ່ງຕ່າງໆໃນທົ່ວປະເທດສາມາດຕິດຕາມຮັບຟັງບັນດາລາຍການຂອງວິທະຍຸກະຈາຍສຽງຫວຽດນາມ. ອ້າຍຝ້າມວັນດົງ ຊາວປະມົງປະກອບອາຊີບຈັບຫາປາຢູ່ບໍລິເວນໝູ່ເກາະເຈືອງຊາຂອງຫວຽດນາມໃຫ້ຮູ້ວ່າ:
“ ເມື່ອມີເວລາວ່າງ, ຂ້າພະເຈົ້າກໍເປີດວິທະຍຸເພື່ອຮັບຟັງລາຍການກ່ຽວກັບ ທະເລໝູ່ເກາະຂອງປະເທດຕົນ, ລາຍການເພງກ່ຽວກັບໝູ່ເກາະຮ່ວາງຊາ ແລະ ເຈືອງຊາພ້ອມກັບຂ່າວຄາວຕ່າງໆ. ສຳລັບຊາວປະມົງພວກຂ້າພະເຈົ້າແລ້ວ, ບັນດາລາຍການຂອງວິທະຍຸກະຈາຍສຽງຫວຽດນາມແມ່ນສຳຄັນທີ່ສຸດ ”
ບັນດາຜູ້ຟັງໃນທຸດເພດ, ທຸກໄວ, ທຸກອາຊີບ ທັງແມ່ນຊາວຫວຽດນາມກໍຄືຊາວຕ່າງປະເທດ ກໍລ້ວນແຕ່ນິຍົມຮັບຟັງບັນດາລາຍການຂອງວິທະຍຸກະຈາຍສຽງຫວຽດນາມຊຶ່ງອອກອາກາດຜ່ານລະບົບຄື້ນສັ້ນ. ທ່ານ Dmitri Kotenev ຊາວລັດເຊຍ, ຜູ້ມັກຟັງວິທະຍຸກະຈາຍສຽງຫວຽດນາມເປັນປະຈຳເລົ່າສູ່ຟັງວ່າ : (ເທບ) “ ຂ້າພະເຈົ້າຮູ້ຈັກເຖິງວິທະຍຸກະຈາຍສຽງຫວຽດນາມໂດຍບັງເອີນ, ນັ້ນແມ່ນໃນປີ 2004, ເມື່ອຂ້າພະເຈົ້າພວມຊອກຫາຂະໜາດຄື້ນທາງວິທະຍຸ, ບັງເອີນຈັບໄດ້ຄື້ນຂອງລາຍການກະຈາຍສຽງພາກພາສາລັດເຊຍ. ຄາວນັ້ນ ແມ່ນກົງກັບໂອກາດສະເຫຼີມສະຫຼອງວັນໄຊຊະນະດ້ຽນບຽນຝູຂອງຫວຽດນາມ ແລະ ຂ້າພະເຈົ້າສົນໃຈທີ່ສຸດ. ນັບແຕ່ນັ້ນເປັນຕົ້ນມາ ຂ້າພະເຈົ້າໄດ້ຟັງເປັນປະຈຳ. ຜ່ານບັນດາລາຍການຂ່າວ, ບົດຄວາມ ແລະ ລາຍການຕ່າງໆ ຂ້າພະເຈົ້າສາມາດເຂົ້າໃຈກ່ຽວກັບປະເທດ ແລະ ຊາວຫວຽດນາມຕື່ມອີກ ”
ສວ່ນເພື່ອນ Bill Ball ຜູ້ຟັງຢູ່ລັດ Maryland ແຫ່ງສະຫະລັດອາເມລິກາ ເປີດເຜີຍວ່າ :
“ ຂ້າພະເຈົ້າໄດ້ເລີ່ມຟັງວິທະຍຸກະຈາຍສຽງຫວຽດນາມນັບແຕ່ຊຸມປີ 1970 ແລະ ຂ້າພະເຈົ້າມີຄວາມປະທັບໃຈຫຼາຍຕໍ່ບັນດາລາຍການກະຈາຍສຽງ, ພິເສດແມ່ນລາຍການຂ່າວ, ບົດວິຈານ ແລະ ລາຍການວັດທະນະທຳ. ຜ່ານບັນດາລາຍການກະຈາຍສຽງ, ຂ້າພະເຈົ້າເຫັນວ່າ ປະເທດຫວຽດນາມໄດ້ຂະຫຍາຍຕົວຫຼາຍເມື່ອທຽບໃສ່ກ່ອນນີ້ ແຕ່ກໍຍັງຄົງສາມາດຮັກສາສີສັນຂອງຕົນໄວ້ໄດ້ ”
ສ່ວນທ່ານ Richard Nowak ຢູ່ພາກໃຕ້ອາເມລິກາ ກໍໄດ້ເລີ່ມຟັງບັນດາລາຍການຂອງວິທະຍຸກະຈາຍສຽງຫວຽດນາມແຕ່ຊຸມປີ 1980 ຂະນະທີ່ລາວຍັງເປັນນັກສຶກສາມະຫາວິທະຍາໄລຢູ່ Florida. ທ່ານ Richard Nowak ເວົ້າວ່າ : (ເທບ) “ໃນຄັ້ງໜຶ່ງ ເມື່ອຂ້າພະເຈົ້າພວມຊອກຫາຂະໜາດຄື້ນທາງວິທະຍຸ, ບັງເອີນຈັບໄດ້ຄື້ນຂອງລາຍການກະຈາຍສຽງພາກພາສາອັງກິດ. ຂ້າພະເຈົ້າໄດ້ຕົກສະເງີ້ທີ່ສຸດ ເພາະໄດ້ຮັບຟັງລາຍການທີ່ກະຈາຍສຽງຈາກປະເທດຫວຽດນາມ. ໃນຊຸມປີ 1980, ເມື່ອນອນພັກຜ່ອນຢູ່ຫໍພັກນັກສືກສາ, ໄດ້ຟັງຂ່າວຂອງວິທະຍຸກະຈາຍສຽງແຫ່ງໜຶ່ງທີ່ກະຈາຍສຽງຈາກແດນໄກ, ກໍແມ່ນຄວາມປະທັບໃຈທີ່ສຸດ ”
ສ່ວນຢູ່ Perche ຫ່າງຈາກນະຄອນຫຼວງປາຣີປະມານ 200 ກິໂລແມັດ , ກໍມີສະໂມສອນບັນດາເພື່ອນຂອງ Radio Perche. ບັນດາລາຍການຂອງວິທະຍຸກະຈາຍສຽງຫວຽດນາມຍາມໃດກໍດືງດູດບັນດາສະມາຊິກໃນສະໂມສອນ. ເພື່ອນ Philippe Marsan ເລົ່າສູຟັງວ່າ :
“ ຂ້າພະເຈົ້າຍັງຈືດີໃນມື້ໜຶ່ງ ພວມຊອກຫາຂະໜາດຄື້ນທາງວິທະຍຸ, ບັງເອີນຈັບໄດ້ຄື້ນຂອງລາຍການກະຈາຍສຽງຂອງ ວິທະຍຸກະຈາຍສຽງຫວຽດນາມ. ຂ້າພະເຈົ້າດີໃຈແທ້ ແລະ ໄດ້ຮ້ອງໂຮວ່າ : ແມ່ນແລ້ວ, ຄື້ນຂອງວິທະຍຸກະຈາຍສຽງຫວຽດນາມຫັ້ນແຫຼະ. ຂ້າພະເຈົ້າໄດ້ຈົດໄວ້ໃນທັນທີ່ ແລະ ສົ່ງຈົດໝາຍໄປຍັງ ວິທະຍຸກະຈາຍສຽງຫວຽດນາມ ”
ສ່ວນເພື່ອນ Gilles Gautier ເລົ່າຄືນສູ່ຟັງວ່າ :
“ ມີຄັ້ງໜຶ່ງ ເນື່ອງໃນໂອກາດສະເຫຼີມສະຫຼອງວັນສ້າງຕັ້ງວິທະຍຸກະຈາຍສຽງຫວຽດນາມ, ຂ້າພະເຈົ້າໄດ້ເຂົ້າຮ່ວມການເສັງຊອກຮູ້ກ່ຽວກັບຫວຽດນາມໂດຍ ວິທະຍຸກະຈາຍສຽງຫວຽດນາມຈັດຕັ້ງຂຶ້ນ. ການເສັງເປັນໜ້າຈັບໃຈອີຫຼີ. ແລະ ຂ້າພະເຈົ້າຮູ້ສຶກມີຄວາມສຸກທີ່ສຸດເມື່ອໄດ້ຮັບລາງວັນຂອງ ວິທະຍຸກະຈາຍສຽງຫວຽດນາມທີ່ສະຫງວນໃຫ້ບັນດາຜູ້ຟັງຊາວຕ່າງປະເທດ ເປັນມິດລາຍການ. ນັ້ນແມ່ນໃບຢັ້ງຢືນການຟັງວິທະຍຸ ພ້ອມດ້ວຍຄ້ອງບ້າງໜ່ວຍໜຶ່ງທີ່ເປັນເອກະລັກສະເພາະຂອງຫວຽດນາມ ແລະ ຂ້າພະເຈົ້າຍາມໃດກໍຮັກສາມັນດີໆ ”.
70 ປີແຫ່ງການສ້າງຕັ້ງ ແລະ ເຕີບໃຫຍ່ຂະຫຍາຍຕົວ, ຄື້ນຂອງວິທະຍຸກະຈາຍສຽງຫວຽດນາມໄດ້ປົກຄຸມໄປເຖິງທຸກແຖບຖິ່ນຂອງປະເທດຊາດກໍຄືແຫ່ງຕ່າງໆໃນໂລກ. ຄວາມຮັກຂອງຜູ້ຟັງໃນທົ່ວໂລກທີ່ມີຕໍ່ ວິທະຍຸກະຈາຍສຽງຫວຽດນາມໃນຫຼາຍປີທີ່ຜ່ານມາ ກໍເປັນແຫຼ່ງລະດົມກຳລັງໃຈແກ່ຖັນແຖວຜູ້ເຮັດວຽກງານກະຈາຍສຽງຂອງ ວິທະຍຸກະຈາຍສຽງຫວຽດນາມສືບຕໍ່ອຸທິດສະຕິປັນຍາ, ສຸມຈິດສຸມໃຈກັບວຽກງານເພື່ອຕອບສະໜອງຄວາມຮຽກຮ້ອງຕ້ອງການທີ່ນັບມື້ນັບສູງຂອງມວນຊົນ.