ໃນຂອບເຂດງານ Festival ເຫ້ວ 2014, ຊຸມປີທີ່ຜ່ານມາ, ຢູ່ໃຈກາງນະຄອນ ເຫ້ວ ກໍຄືບັນດາເມືອງຊານ ນະຄອນ ໄດ້ດຳເນີນບັນດາການເຄື່ອນໄຫວວັດທະ ນະທຳສິລະປະທີ່ມີລັກສະນະວົງຄະນະຍາດ. ເຂົ້າຮ່ວມ Festival ເຫ້ວ 2014, ປະຊາຊົນບໍ່ພຽງແຕ່ແມ່ນເປົ້າໝາຍໄດ້ຮັບຊົມບັນດາການເຄື່ອນໄຫວ ວັດທະນະທຳເທົ່ານັ້ນ, ຫາກເຂົາເຈົ້າເອງ ໄດ້ກາຍເປັນເຈົ້າພາບງານບຸນ. ຊາວເຫ້ວ ແລະ ແຂກທ່ອງທ່ຽວນັບພັນຄົນໄດ້ເຊື່ອມຕົວເຂົ້າກັບບັນຍາກາດງານບຸນອັນເປັນເອກະລັກສະເພາະ.
ຂົວເຈືອງຕຽນທີ່ສວຍງານໃນງານ Festival ເຫ້ວ
(ພາບ: baodanang)
|
ແຕ່ວັນທີ 13 ຫາວັນທີ 19/4, ຮອດຍາມຕອນຄ່ຳ, ຢູ່ແຫ່ງຕ່າງໆໃນນະຄອນເຫ້ວ ກໍລ້ວນແຕ່ຟົດຟື້ນມ່ວນຊື່ນ ແລະ ສວຍງາມດ້ວຍລະບົບດອກໄຟສີຫຼາກຫຼາຍ, ສຽງຕົບມື, ສຽງໂຮ່ຮ້ອງລະດົມກຳລັງໃຈຂອງຜູ້ຊົມເປັນຈຳນວນຫຼວງຫຼາຍ. ນາງຟານກຸກຮ່ວາ ຢູ່ຫ່າງຈາກສະຖານທີ່ຈັດງານບຸນ 10 ກິໂລແມດ, ຮອດຕອນຄ່ຳແຕ່ລະມື້, ນາງພ້ອມດ້ວຍຄອບຄົວກໍພາກັນໄປຊົມລາຍການສະແດງຢູ່ບໍລິເວນສວນສາທາລະນະ 3/2, ສວນສາທາລະນະ ຕື້ເຕື້ອງ . ນາງໃຫ້ຮູ້ວ່າ :
“ 2-3ປີຈຶ່ງມີເທື່ອໜຶ່ງ, ດັ່ງນັ້ນຂ້າພະເຈົ້າຢາກໄປຊົມ. ຕອນຄ່ຳມື້ນີ້, ຂ້າພະເຈົ້າພາຫຼານໄປຊົມ, ເຫັນພວກເຂົາຟ້ອນງາມຫຼາຍ. ພວກນັກສິລະປີນສະແດງຢູ່ບ່ອນນີ້, ບ່ອນນັ້ນຫຼາຍທີ່ສຸດ. ຢູ່ຖະໜົນສາຍໃດ, ກໍມີການສະແດງສິລະປະ, ຢາກໄປຊົມຢູ່ບ່ອນໃດກໍມີ. ຂ້າພະເຈົ້າຢາກມາຊົມຢູ່ເວທີ່ສະແດງນ້ອຍຊຳນີ້, ເພາະເຫັນແຈ້ງກວ່າ”
ບັນດາເວທີ່ສະແດງຖືກຈັດແຈງຢູຸ່ບັນດາບໍລິເວນສາທາລະນະ, ອັນໄດ້ສ້າງກາລະໂອກາດໃຫ້ແຂກທ່ອງທ່ຽວ ແລະ ປະຊາຊົນໄດ້ຮັບຊົມບັນດາວາດຟ້ອນທີ່ເປັນເອກະລັກ ແລະ ດົນຕີສະເພາະຂອງບັນດາຄະນະສິລະປະກອນທີ່ມາຈາກຫຼາຍປະເທດໃນໂລກ. ໂດຍມາຈາກສີລັງກາ, ຄະນະສິລະປະກອນ Ranragan ໄດ້ສະແດງວາດຟ້ອນ Ves ທີ່ເປັນເອກະລັກສະເພາະ ສະແດງໃຫ້ເຫັນຄວາມເຫຼື້ອມໃສຂອງຊາວສີລັງກາ ກ່ຽວກັບຄວາມຫວັງມີສັນຕິສຸກ. ບັນດາບົດເພງພື້ໜເມືອງທີ່ຄຶກຄື້ນຂອງ ໂກລົມໂບ ໂດຍບັນດານັກສິລະປີນຂອງຄະນະສິລະປະກອນ Rio en Caribe ຄືດັ່ງໄດ້ພາຜູ້ຊົມໄປຍັງເຂດດິນຢູ່ເຄິ່ງໜ່ວຍໂລກເບື້ອງນັ້ນ. ຫຼືບົດລະຄອນຕະຫຼົກຂອງ ຄະນະສິລະປະກອນ Yangpyeong ຂອງສ.ເກົາຫຼີ ໄດ້ດຶງດູດໃຈແຂກທ່ອງທ່ຽວ ແລະ ຊາວທ້ອງຖິ່ນ. ເພື່ອນ ເຈີນທິລີລີ ນັກສຶກສາສັງກັດມະຫາວິທະຍາໄລສ້າງຄູ ເຫ້ວ ໃຫ້ຮູ້ວ່າ :
“ ນ້ອງອາດຈະເຫັນປະຈັກຕາບັນດາລາຍການສະແດງທີ່ມີຊີວິດຊີວາຢູ່ຕາມທ້ອງຖະໜົນ ແທນທີ່ຮັບຊົມຜ່ານໂທລະພາບ. ກ່ອນໜ້ານັ້ນ, ນ້ອງພຽງແຕ່ໄດ້ຮູ້ຜ່ານປຶ້ມອ່ານ, ແຕ່ໃນປະຈຸບັນ, ໄດ້ພົບປະ, ໂອ້ລົມກັບບັນດານັກສິລະປີນຊາວຕ່າງປະເທດ, ເປັນໜ໊າຈັບໃຈອີຫຼີ”
ນັກສິລະປີນ Greta Kelly ສະມາຊິກກອງດົນຕີ Deep Blue ທີ່ມາຈາກອົດສະຕາລີ ໄດ້ແບ່ງປັນຄວາມຮູ້ສຶກເມື່ອໄດ້ເຂົ້າຮ່ວມ Festival ເຫ້ວເປັນຄັ້ງທຳອິດວ່າ:
“ ໃນການມາສະແດງຄັ້ງທຳອິດນີ້, ຂ້າພະເຈົ້າເຫັນວ່າ ຜູ້ຊົມຫວຽດນາມໄດ້ສະແດງໃຫ້ເຫັນແຈ້ງກ່ຽວກັບຄວາມຮູ້ສຶກຂອງຕົນ. ເຂົາເຈົ້າຕົບມືຊົມເຊີຍຢ່າງສຸດໃຈ ແລະ ສະແດງໃຫ້ເຫັນຄວາມເຂົ້າໃຈດ້ານດົນຕີຢ່າງຈະແຈ້ງ. ພວກຂ້າພະເຈົ້າຕົກສະເງີ້ ແລະ ມີຄວາມຊົມຊອບເວທີ່ສະແດງຢູ່ຫວຽດນາມຊຶ່ງຖືກຈັດຕັ້ງຂຶ້ນຢູ່ຫຼາຍແຫ່ງ. ແລະ ເມື່ອມານີ້, ພວກຂ້າພະເຈົ້າຖືກສະແດງໃນເວທີ່ສະແດງຖືກຕັ້ງຂຶ້ນບົນເດີນຫຍ້າ, ອ້ອມແອ້ມແມ່ນຕົ້ນໄມ້ ພ້ອມດ້ວຍບັນດາຕຶກເຮືອນເກົ່າແກ່. ນີ້ແມ່ນສິ່ງທີ່ພິເສດທີ່ສຸດ”
Festival ເຫ້ວ 2014 ແມ່ນງານ Festival ຄັ້ງທີ 2 ທີ່ມີລາຍການງານບຸນຕາມທ້ອງຖະໜົນ. ປີນີ້, ບັນດາຂະບວນແຫ່ຂອງບັນດາປະເທດອາຊີ ຕາເວັນອອກສ່ຽງໃຕ້ ແລະ ອາເມລິກາລາຕິນ, ກໍຄືວົງດົນຕີຂອງແຟງລັງ ແລະ ອື່ນໆ ໄດ້ປະກອບສ່ວນເຮັດໃຫ້ບັນຍາກາດຢູ່ຕາມຖະໜົນໃຫຍ່ ທາງກ້ຳເໜືອ ແລະ ໃຕ້ຂົວ ເຈືອງຕຽນ ເພີ່ມຄວາມຟົດຟື້ນມ່ວນຊື່ນ.
ບັນດານັກສີລະປີນຂອງແບນຊິກສະແດງການຍ່າງດ້ວຍໄມ້ຄ້ຳຢູ່ຕາມທ້ອງຖະໜົນ
|
ທ່ານ Manfled ແຂກທ່ອງທ່ຽວເຢັຍລະມັນໃຫ້ຮູ້ວ່າ :
“ ຂ້າພະເຈົ້າຫາກໍມາຮອດເຫ້ວເປັນ 1 ຊົ່ວໂມງ. ລາຍການສະແດງທີ່ຫາກໍດຳເນີນນັ້ນ ແມ່ນເປັນໜ້າຈັບໃຈຫຼາຍ. ພິເສດແມ່ນໄດ້ຊົມບັນດານັກສີລະປີນຂອງແບນຊິກສະແດງການຍ່າງດ້ວຍໄມ້ຄ້ຳຢູ່ຕາມທ້ອງຖະໜົນ. ”
ບັນຍາກາດງານບຸນແມ່ນຟົດຟື້ນມ່ວນຊື່ນບໍ່ພຽງແຕ່ຢູ່ບໍລິເວນວັງດ້າຍໂນ້ຍເຫ້ວ, ບັນດາສວນສາທາລະນະເທົ່ານັ້ນ, ຫາກຍັງຟົດຟື້ນມ່ວນຊື່ນຢູ່ຕາມໂຮງຮຽນ, ໂຮງໝໍໃນບໍລິເວນນະຄອນເຫ້ວອີກດ້ວຍ. ນັກສິລະປີນ Cristian Andress ສັງກັດຄະນະສິລະປະກອນ Los Andes ຂອງຈີເລ ແບ່ງປັນວ່າ :
“ ຂ້າພະເຈົ້າມີຄວາມສຸກທີ່ສຸດເມື່ອໄດ້ສະແດງຢູ່ທີ່ນີ້, ຜູ້ຊົມຫວຽດນາມໄດ້ສະຫງວນຄວາມຮັກແພງໃຫ້ພວກຂ້າພະເຈົ້າຢ່າງຫຼວງຫຼາຍ. ຂ້າພະເຈົ້າດີໃຈຫຼາຍເພາະທຸກໆຄົນລ້ວນແຕ່ໄດ້ຊົມບັນດາລາຍການສະແດງ ”
ປີນີ້ຄະນະຈັດຕັ້ງງານ Festival ເຫ້ວ ຍັງໄດ້ຈັດສົ່ງບັນດາ ຄະນະສິລະປະກອນທັງຢູ່ພາຍໃນ ແລະ ສາກົນລົງໄປເຂດບ້ານນາທຳການສະແດງຮັບໃຊ້ປະຊາຊົນຢູ່ຟູ້ວາງ, ຟູ້ໂລກ ຫຼືໄປຮອດເຂດພູດອຍ ນາມດົງ, ອາເລື້ອຍອີດ້ວຍ.
ພ້ອມກັບພິທີອັດງານ Festival ເຫ້ວ 2014, ບັນດາການເຄື່ອນໄຫວສະແດງສິລະປະວົງຄະນະຍາດໄດ້ອັດລົງດ້ວຍກ່ວາ 100 ລາຍການຮັບໃຊ້ມ່ວນຊົນ ແລະ ແຂກທ່ອງທ່ຽວຢູ່ບັນດາສະຖານທີ່ນອກບໍລິເວນໃຈກາງຈັດງານບຸນໃນວັງ ດ້າຍໂນ້ຍເຫ້ວ. ບັນດາລາຍການທີ່ປະທັບໃຈພ້ອມກັບຄວາມສະໜິດສະໜົມຂອງບັນດາຜູ້ເຂົ້າຮ່ວມງານບຸນ ໄດ້ສ້າງເປັນອະນຸສອນທີ່ດີງາມໃນຄວາມຊົງຈຳຂອງຊາວເຫ້ວ, ແຂກທ່ອງທ່ຽວກໍຄືບັນດານັກສິລະປີນທີ່ເຂົ້າຮ່ວມ Festival ເຫ້ວ 2014. ທຸກໆຄົນຕ່າງກໍຄ່ອຍຖ້າງານ Festival ເຫ້ວ ຄັ້ງໃໝ່ດ້ວຍສິ່ງທີ່ຈັບໃຈ ແລະ ເປັນເອກະລັກຫຼາຍຢ່າງ.