ບັນຍາກາດງານບຸນທີ່ຕາແສງເຊີນວີ ເມືອງເລີມທາວ ແຂວງຟູ້ເຖາະ
(ພາບ: baophutho)
|
ໃນຊຸມມື້ທ້າຍປີ, ຖ້າຫາກມີໂອກາດລົງຢ້ຽມຢາມຕາແສງເຊີນວີ ເມືອງເລີມທາວ ແຂວງຟູ້ເຖາະ, ກໍຈະໄດ້ຟັງສຽງກອງໃນພິທີບູຊາທີ່ສັກສິດ. ສຽງກອງນັ້ນ ໄດ້ດັງກ້ອງກັງວານຈາກສາລາຖືກຕັ້ງຢູ່ກາງບ້ານ. ໃນທ່າມກາງບັນຍາກາດທີ່ເຄັ່ງຂຶມນັ້ນ, ສຽງກອງໃນພິທີບູຊາໄດ້ເຮັດໃຫ້ທຸກຄົນ ບໍ່ວ່າຜູ້ໃດເມື່ອໄດ້ຍິນແລ້ວ, ກໍລ້ວນແຕ່ຢາກຢຸດແວ່ຢ້ຽມຊົມ ແລະ ໄຫວ້ບູຊາ ພາວະນາໃຫ້ທຸກສິ່ງທຸກຢ່າງມາສູ່ກັບຄອບຄົວ ກໍຄືໝູ່ບ້ານ.
ຢູ່ເດີນສາລາ ມີຊາຍປະມານ 5 ຄົນ, ອາຍຸ 60 ປີຂຶ້ນໄປພວມນັ່ງເມົາມົວຕີກອງ. ນີ້ແມ່ນຊົ່ວໂມງຝຶກແອບຕີກອງຮັບໃຊ້ພິທີບູຊາເພື່ອກະກຽມໃຫ້ແກ່ງານບຸນຂອງໝູ່ບ້ານທີ່ຈະຈັດຂຶ້ນໃນວັນທີ 3 ເດືອນຈຽງໄລຕາມຈັນທະປິຕິທິນ ໝາຍເຖິງວັນທີ 3 ຂອງບຸນເຕັດ. ສຽງກອງໃນພິທີບູຊາ ສວມບົດບາດສຳຄັນໃນຊີວິດຈິດວິນຍານຂອງປະຊາຊົນຢູ່ຕາມເຂດບ້ານນາ. ສຽງກອງໃນພິທີບູຊາແມ່ນສຽງດົນຕີແບບຈິດວິນຍານທີ່ມີມາແຕ່ດົນນານ, ມັນເຄີຍດັງກ້ອງກັງວານຂຶ້ນໃນຊຸມມື້ຈັດພິທີງານບຸນທີ່ສຳຄັນຂອງໝູ່ບ້ານຫຼືຂອງວົງຕະກູນຕ່າງໆ, ລຸງ ກຽວຈຸງຮຽ້ວ ຊຶ່ງແມ່ນຜູ້ປະກອບອາຊີບຕີກອງໃນພິທີບູຊາໃຫ້ຮູ້ວ່າ:
“ ພາຍຫຼັງສຽງກອງດັງກ້ອງກັງວານຂຶ້ນ, ຊາວບ້ານຈຶ່ງຮູ້ວ່າ ມື້ນີ້, ໝູ່ບ້ານຈັດພິທີບູຊາຢູ່ສາລາຂອງໝູ່ບ້ານ. ສຽງກອງໃນພິທີບູຊາແມ່ນສະແດງໃຫ້ເຫັນດ້ານຈິວິນຍານ, ດັ່ງນັ້ນການຕີກອງ ແມ່ນຕ້ອງໃຫ້ເກີດສຽງເຂົ້າສູ່ຈິດໃຈຂອງມະນຸດ ”
ຕາແສງເຊີນວີ ແມ່ນໝູ່ບ້ານທີ່ເກົ່າແກ່ ຍັງຖືກເອີ້ນວ່າແມ່ນ ແກໄຫ່ວ. ລະບົບສາລາ, ວິຫານ, ວັດວາອາຮາມຢູ່ ເຊີນວີ ລ້ວນແຕ່ບູຊາບັນດານາຍພົນທະຫານໃນສະໄໝລາດຊະວົງຮຸ່ງ. ບັນດາງານບຸນຂອງໝູ່ບ້ານເຊີນວີ ແມ່ນມີຊື່ສຽງທີ່ສຸດ,ຄື: ບຸນເຟັດໃນວັນທີ 3 ເດືອນຈຽງໄລຕາມຈັນທະປິຕິທິນ ບໍ່ພຽງແຕ່ດຶງດູດປະຊາຊົນຢູ່ອ້ອມເຂດມາຊົມເທົ່ານັ້ນ, ຫາກຍັງດຶງດູດປະຊາຊົນຈາກບັນດາແຂວງໃກ້ຄຽງມາຊົມອີກດ້ວຍ. ລຸງ ບຸຍວັນແທ່ງ ຫົວໜ້າພະແນກສິລະປະວັນນະຄະດີ-ສະມາຄົມຜູ້ອາຍຸສູງໝູ່ບ້ານ ເຊີນວີ ໃຫ້ຮູ້ວ່າ:
“ ສຽງກອງໃນພິທີບູຊາທີ່ສາລາໝູ່ບ້ານ ເຊີນວີ ເຄີຍຖືກນຳໃຊ້ໃນຊຸມມື້ພາວະນາ, ຄື ໃນວັນທີ 3 ເດືອນຈຽງ, ວັນທີ 6 ເດືອນ 3, ໄລ່ຕາມຈັນທະປິຕິທິນ. ວັນທີ 10 ເດືອນ 10, ວັນທີ 8 ເດືອນ 4 ແມ່ນວັນໄຫວ້ບູຊາເຂົ້າໃໝ່, ວັນທີ 18 ເດືອນ 12 ແມ່ນວັນປັດກວາດສຸສານພະອໍລະຫັນ-ຜູ້ກໍ່ຕັ້ງໝູ່ບ້ານ. ແຕ່ລະເທື່ອ, ເມື່ອສຽງກອງດັງກ້ອງກັງວານຂຶ້ນ, ຊາວບ້ານທຸກໆຄົນຕ່າງກໍຮູ້ວ່າ ໃນຈຸດເວລານີ້ພວກຜູ້ເຖົ້າຜູ້ແກ່ໃນໝູ່ບ້ານ ເຊີນວີ ພວມເລີ່ມທຳພິທີໄຫວ້ບູຊາພະອໍລະຫັນ-ຜູ້ກໍ່ຕັ້ງໝູ່ບ້ານ. ຈຸດປະສົງຂອງສຽງກອງແມ່ນຄືເຊັ່ນນັ້ນ. ເຂົາເຈົ້າຟັງສຽງກອງເພື່ອ ສັງເກດວ່າ ປີນີ້ສຽງກອງຄືແນວໃດ, ກະຕຸກຊຸກຍູ້ຄືແນວໃດ, ສະແດງໃຫ້ເຫັນດ້ານຈິດວິນຍານຄືແນວໃດ, ສະແດງໃຫ້ເຫັນທັງຊີວິດໃນພາຍພາກໜ້າແມ່ນ ຄືແນວໃດ ”
ເປັນອັນວ່າ ໃນປີໜຶ່ງ, ສຽງກອງໃນພິທີບູຊາທີ່ສາລາໝູ່ບ້ານ ເຊີນວີ ຖືກດັງຂຶ້ນ 5 ເທື່ອ, ແຕ່ມ່ວນກ່ວາໝູ່ແມ່ນໃນໂອກາດໃນວັນທີ 3 ເດືອນຈຽງ. ນັ້ນແມ່ນ ວັນບຸນຂອງໝູ່ບ້ານເຊີນວີ. ກ່ອນທີ່ງານບຸນຖືກຈັດຂຶ້ນ, ທຸກໆພິທີຖະຫວາຍ ທູບທຽນບູຊາແມ່ນຕ້ອງດຳເນີນໃນສາລາ. ຕາມຈັ່ງຫວະຂອງສຽງກອງ, ບັນດາ ຜູ້ເຖົ້າຜູ້ແກ່ໃນບ້ານໄດ້ຂຶ້ນເວທີທຳພິມີບູຊາເປັນລ້ຳດັບ. ການທຳພິທີບູຊາແມ່ນຖືກແກ່ຍາວປະມານ 1 ຊົ່ວໂມງເຄິ່ງ, ດັ່ງນັ້ນ ຜູ້ຕີກອງ ບໍ່ພຽງແຕ່ຕ້ອງຕີມ່ວນເທົ່ານັ້ນ, ຫາກຍັງຕ້ອງກຳແໜ້ນບັນດາຂັ້ນຕອນໃນພິທີອີກດ້ວຍ. ລຸງ ບຸຍວັນກີ້ ຊາວບ້ານ ເຊີນວີ ໃຫ້ຮູ້ວ່າ :
“ ສຽງກອງໃນພິທີບູຊາທີ່ສາລາໝູ່ບ້ານ ເຊີນວີ ຖືກດັງຂຶ້ນຕາມຈິດວິນຍານ ແລະ ທຸກໆຄົນຕ່າງກໍຮູ້ສຶກຄວາມສັກສິດທີ່ສຸດ. ການທຳພິທີແມ່ນເພື່ອພາວະນາໃຫ້ປະຊາຊົນມີຄວາມອີ່ມໜຳສຳລານ ຜາສຸກ ມີໂຊກມີລາບຕະຫຼອດປີ. ດັ່ງນັ້ນ ທຸກໆຄົນເມືອ່ໄດ້ຍິນສຽງກອງ ກໍລ້ວນແຕ່ຢືນໂດຍບໍ່ເໜັງຕີງຈັກໜ້ອຍ. ສຽງກອງໃນພິທີບູຊາທີ່ສາລາໝູ່ບ້ານ ເຊີນວີ ແມ່ນມີຄວາມເຄັ່ງຂຶ້ມເຊັ່ນນັ້ນ”.
ລຸງ ກ່ຽວວັນຮ່ຽນ ຜູ້ຮັບຜິດຊອບວຽກງານຢູ່ສາລາຂອງໝູ່ບ້ານ ເຊີນວີ ໃຫ້ຮູ້ວ່າ :
“ ເມື່ອຂ້າພະເຈົ້າທຳພິທີບູຊາ, ໄດ້ຍິນສຽງກອງດັ່ງກ້ອງກັງວານຂຶ້ນ, ເຮັດໃຫ້ສາລາເພີ່ມຄວາມສັກສິດ, ຂ້າພະເຈົ້າຮູ້ສຶກມີຄວາມສະໜິດຕິດພັນ. ຂ້າພະເຈົ້າຫວັງຢາກຮັບໃຊ້ວຽກງານໃນສາລາ ເພື່ອໃຫ້ລູກຫຼານ ແລະ ຄອບຄົວໄດ້ຮັບໂຊກ, ຮັບລາບ ”
ໃນທ່າມກາງເຂດບ້ານນາທີ່ກ້ວາງໃຫຍ່ໄພສານ, ສຽງກອງໃນພິທີບູຊາປຽບເໝືອນສຽງປຸກຕື່ນທຳມະຊາດ ໃຫ້ລະດູການໄດ້ຮັບຜົນດີ, ທຸກໆຄົນໃນຄອບຄົວມີສຸຂະພາບເຂັ້ມແຂງ, ປະສັບຜົນສຳເລັດໃນໜ້າທີ່ວຽກງານຂອງຕົນ. ຍ້ອນເຫດນີ້ເອງ, ກອງສິລະປະຕີກອງຂອງໝູ່ບ້ານ ເຊີນວີ ໄດ້ສະຫງວນເວລາຫຼາຍເພື່ອຝຶກແອບກ່ອນເດື່ອນໜຶ່ງໃຫ້ແກ່ງານບຸນຍາມລະດູບານໃໝ່ຂອງໝູ່ບ້ານ. ລຸງ ບຸຍວັນແທ່ງ ຫົວໜ້າພະແນກສິລະປະວັນນະຄະດີ-ສະມາຄົມຜູ້ອາຍຸສູງໝູ່ບ້ານ ເຊີນວີ ໃຫ້ຮູ້ວ່າ:
“ ສຽງກອງຕ້ອງດັງແຮງ ແລະ ຕໍ່ເນື່ອງ ຈຶ່ງຈະເປັນສັນຍານທີ່ດີ ບົ່ງບອກວ່າ ໃນປີໃໝ່, ຊາວບ້ານຈະມີຄວາມສະຫງົບສຸກ, ຖ້າຫາກວ່າມີສຽງກະຕຸກກະຕັກ ຈະບອກເຕືອນເຖິງອະນາຄົດທີ່ບໍ່ດີ ”
ໂດຍຜ່ານໄລຍະປະຫວັດສາດນັບພັນປີ, ສຽງກອງໃນພິທີບູຊາທີ່ສາລາໝູ່ບ້ານ ເຊີນວີ ໄດ້ຝັງເລິກໃນຊີວິດຈິດວິນຍານ ແລະ ຈິດໃຈຂອງຊາວບ້ານ ເຊີນວີ. ເຖິງວ່າ ຊາວບ້ານ ເຊີນວີ ຈະຢູ່ໃກ້ຫຼືໄກ ຫຼືວ່າຈະຢູ່ແຫ່ງຫົນໃດກໍຕາມ, ກໍຈະຄິດຮອດຄິດເຖິງ ສຽງກອງໃນພິທີບູຊາທີ່ດັງກ້ອງກັງວານຢ່າງເຄັ່ງຂຶມໃນຊຸມມື້ຈັດງານບຸນໃຫຍ່ຂອງໝູ່ບ້ານ.