(vovworld)- ກາຈູ່ແມ່ນມໍລະດົກວັດທະນະທຳທີ່ເປັນເອກະລັກສະເພາະຂອງຫວຽດນາມ ທີ່ໄດ້ຮັບການຮັບຮອງຈາກ UNESCO ວ່າແມ່ນມໍລະດົກວັດທະ ນະທຳບໍ່ມີຮູບຮ່າງ ຄວນໄດ້ຮັບການຮັກສາໄວ້ຢ່າງຮີບດ່ວນນັບແຕ່ປີ 2009. ຫວນ ຄືນໄລຍະ 4 ປີ, ນັບແຕ່ໄດ້ຮັບການຮັບຮອງນັ້ນ, ເຖິງວ່າຫວຽດນາມ ມີຄວາມພະຍາຍາມຫຼາຍຢ່າງ ແລະ ໄດ້ຮັບການໜູນຊ່ວຍຈາກບັນດາອົງການຈັດຕັ້ງສາກົນກໍ່ຕາມ, ແຕ່ກາຈູ່ ຍັງຄົງຈຳເປັນຕ້ອງໄດ້ຮັບການຮັກສາໄວ້ເພື່ອຍືນຍົງຄົງຕົວ ແລະ ເສີມຂະຫຍາຍໃນຊີວິດວົງຄະນາຍາດກ່ວາອີກ..
(ພາບ: vi.wikipedia.org)
ຕາມການສະຖິຕິແລ້ວ, ຢູ່ 15 ແຂວງ, ນະຄອນຂອງຫວຽດນາມ ມີສະໂມສອນກາຈູ່, ບ້ານຂັບກາຈູ່ພື້ນເມືອງ. ໃນນັ້ນ, ຢູ່ຮ່າໂນ້ຍມີມະໂມສອນກາຈູ່ທີ່ມີຊື່ສຽງ 22 ແຫ່ງ. ນັບແຕ່ກາຈູ່ໄດ້ຮັບການຮັບຮອງຈາກ UNESCO ວ່າເປັນມໍລະດົກວັດທະນະທຳບໍ່ມີຮູບຮ່າງຕ້ອງໄດ້ຮັບການຮັກສາດ່ວນມາຮອດປະຈຸບັນ, ຮ່າໂນ້ຍ ຍັງຄົງແມ່ນທ້ອງຖິ່ນທີ່ນຳໜ້າໃນການອະນຸລັກຮັກສາ, ເສີມຂະຫຍາຍຄຸນຄ່າວັດທະນະທຳມໍລະດົກຂອງກາຈູ່.
ຖ້າຫາກທ່ານມາສາລາບ້ານກີມເງິນ ໃນຄຸມຖະໜົນເກົ່າຮ່າໂນ້ຍ ທ່ານຈະສາມາດຮັບຟັງສຽງຂັບກາຈູ່ຂອງບັນດານັກຮ້ອງຂອງສະໂມສອນກາຈູ່ຮ່າໂນ້ຍ.. ນັບແຕ່ຫຼາຍປີມານີ້, ແຂກທ່ອງທ່ຽວເຄີຍໄດ້ຮັບຟັງກາຈູ່ໃນຕອນຄ່ຳຂອງວັນພະຫັດ, ວັນສຸກ ແລະ ວັນອາທິດເປັນປະຈຳ. ຕາມນັກສິລະປະກອນ ເລທິແບກເວີນ ປະທານສະໂມສອນກາຈູ່ຮ່າໂນ້ຍ ແລ້ວ, ໃນທ່າອ່ຽງພັດທະນາຂອງບັນດາຮູບການສິລະປະບັນເທິງອື່ນໆ, ກາຈູ່ພວມປະເຊີນໜ້າກັບເລື່ອງຂາດຜູ້ຟັງຜູ້ຊົມ. ສະໂມສອນຫຼາຍແຫ່ງຕ້ອງຍ້າຍສະຖານທີ່ສະແດງ, ຫລຸດຜ່ອນລາຍກາຍສະແດງລົງ. ນັກສິລະປະກອນ ເລທິແບກເວີນ ໃຫ້ຮູ້ວ່າ:
“ເມື່ອກອ່ນພວກຂ້າພະເຈົ້າສະແດງປະມານ 24-26 ເທື່ອ/ເດືອນ ແຕ່ດຽວນີ້ຕ້ອງຫລຸດລົງ ນັ້ນແມ່ນເລື່ອງເສຍດາຍທີ່ສຸດ. ນີ້ບໍ່ແມ່ນການດຳເນີນທຸລະກິດ, ຫາກແມ່ນການອະນຸລັກຮັກສາກາຈູ່, ສະນັ້ນຕ້ອງຮັກສາໄວ້“.
(ພາບ: .vnam.edu.vn/)
ສ່ວນຢູ່ສະໂມສອນກາຈູ່ທັງລອງ, ຈຳນວນແຂກມາຊົມຢູ່ເຮືອນມໍລະດົກເລກທີ 87 ຖະໜົນມ້າໄມຍັງເປັນປົກກະຕິຢູ່ ແຕ່ສ່ວນຫຼາຍກໍ່ແມ່ນແຂກຕ່າງປະເທດ. ສະໂມສອນນີ້ຢາກເຮັດໃຫ້ກາຈູ່ນັບມື້ນັບໃກ້ຊິດກັບຜູ້ຊົມພາຍໃນປະເທດຫຼາຍກ່ວາ, ເຮັດໄດ້ແນວນັ້ນ, ຕ້ອງມີການສົມທົບກັບບັນດາບໍລິສັດທ່ອງທ່ຽວເພື່ອສະແດງຂັບກາຈູ່ຮັບໃຊ້ໃຫ້ແຂກທ່ອງທ່ຽວ. ທາງສະໂມສອນຍັງເອົາໃຈໃສ່ເຖິງການສອນວິຊາຊີບໃຫ້ແກ່ລຸ້ນໜຸ່ມ, ຍ້ອນວ່າຕາມນັກສິລະປະກອນຟ້າທິເຮ້ວ ປະທານສະໂມສອນກາຈູ່ທັງລອງແລ້ວ, ນັ້ນແມ່ນວິທິອະນຸລັກຮັກສາກາຈູ່ດີທີ່ສຸດ. ນັກສິລະປະກອນຟ້າມທິເຮ້ວ ແບ່ງປັນວ່າ:
“ປະຊາຊົນຍັງຄົງອະນຸລັກຮັກສາກາຈູເອງ. ສະໂມສອນກາຈູ່ທັງລອງ ໂຊກດີກ່ວາ ສະໂມສອນອື່ນຍ້ອນມີນັກຮ້ອງໜຸ່ມຫຼາຍຄົນ. ພວກເພື່ອນໜຸ່ມມີຄວາມນິຍົມ ແລະ ເມົາມົວກັບການຂັບກາຈູ່ທີ່ສຸດ“
ສະໂມສອນກາຈູ່ຮ່າໂນ່ຍ ແລະ ສະໂມສອນກາຈູ່ທັງລອງ ແມ່ນສະໂມສອນທີ່ພົ້ນເດັ່ນຢູ່ນະຄອນຫຼວງດ້ວຍຄວາມມານະພະຍາຍາມສະແດງ, ແນະນຳ ແລະ ສອນຂັບການຈູ່. ສ່ວນບັນດາສະໂມສອນຢູ່ຊານນະຄອນຄື ສະໂມສອນແຈງທົນ (ຟູອຽນ), ໂລ້ເຄ (ດົງແອງ) ຫຼືບັນດາສະໂມສອນຢູ່ແຂວງເງ້ອານ, ຮ່າຕິ້ງ, ກວາງບິງ… ເຖິງວ່າຍັງປະສົບກັບຄວາມຫຍຸ້ງຍາກຫຼາຍຢ່າງກໍ່ຕາມ ແຕ່ການສືບທອດກາຈູ່ຍັງຄົງຮັກສາໄວ້ຢູ່.
ຕົວຈິງໃຫ້ເຫັນວ່າ, ໃນຂະນະທີ່ຫຼາຍສະໂມສອນຕ້ອງພະຍາຍາມຮັກສາການເຄື່ອນໄຫວນັ້ນ, ມີບາງສະໂມສອນຍັງສາມາດເຄື່ອນໄຫວເປັນຢ່າງດີຍ້ອນໄດ້ຮັບຄວາມເອົາໃຈໃສ່ຈາກອຳນາດການປົກຄອງ ແລະ ປະຊາຊົນ. ນັບແຕ່ປີ 2005 ມາຮອດປະຈຸບັນ, ສະໂມສອນກາຈູ່ໂລ້ເຄ, ຕາແສງລຽນຮ່າ, ເມືອງດົງແອງ, ຮ່າໂນ້ຍ ໄດ້ຮັບເງິນປະມານ 40-50 ລ້ານດົ່ງຈາກງົບປະມານຂອງເມືອງ ເພື່ອໜູນຊ່ວຍໃຫ້ແກ່ການເຄື່ອນໄຫວ, ເປີດບັນດາຊຸດຮຽນໃຫ້ລຸ້ນຫນຸ່ມ. ນອກຈາກນັ້ນແລ້ວ, ທາງເມືອງຍັງຖືກາຈູ່ໂລ້ເຄ ແມ່ນ “ເຍື່ອງອາຫານພິເສດ“ ແລະ ສ້າງໂລ້ເຄ ໃຫ້ກາຍເປັນສະຖານທີ່ທ່ອງທ່ຽວໃນບໍລິເວນ. ສ່ວນແຂວງບັກນິງ ຊື່ງແມ່ນແຂວງຕິດກັບນະຄອນຫຼວງຮ່າໂນ້ຍ ກໍ່ພວມຜັນຂະຫຍາຍແຜນຮ່າງ “ອະນຸລັກຮັກສາ ແລະ ເສີມຂະຫຍາຍມໍລະດົກຂັບກວາຫໍ້ພື້ນເມືອງບັກນິງ ແລະ ກາຈູ່ໄລຍະ 2013-2020“ ດ້ວຍຄ່າໃຊ້ຈາຍທັງໝົດເກືອບ 65 ຕື້ດົ່ງ.
ກະຊວງວັດທະນະທຳ, ກິລາ ແລະ ທ່ອງທ່ຽວຫວຽດນາມ ພວມປະຕິບັດໂຄງການດຳເນີນງານແຫ່ງຊາດ, ໃນນັ້ນ, ວາງອອກບັນດາມາດຕະການເພື່ອອະນຸລັກຮັກສາ, ເສີມຂະຫຍາຍຄຸນຄ່າມໍລະດົກກາຈູ່. ໜຶ່ງໃນບັນດາການເຄື່ອນໄຫວທີ່ມີຂອບຂະໜາດໃຫ່ຍແມ່ນການຈັດຕັ້ງງານມະໂຫລານກາຈູ່ທົ່ວປະເທດຢູ່ຮ່າໂນ້ນໃນເດືອນ 8/2014 ຈະມາເຖິງ ໂດຍມີການເຂົ້າຮ່ວມຂອງສະໂມສອນກາຈູ່ທີ່ມາຈາກ 15 ແຂວງ, ນະຄອນ. ຈຸດປະສົງຂອງງານມະໂຫລານແມ່ນສືບຕໍ່ໂຄສະນາ, ແນະນຳບັນດາຄຸນຄ່າທີ່ເປັນເອກະລັກສະເພາະຂອງມໍລະດົກກາຈູ່ ຊື່ງໄດ້ຮັບການເຊີດຊູຈາກອົງການອູແນສໂກ, ພ້ອມທັງກວດກາ, ຕີລາຄາວຽກງານອະນຸລັກຮັກສາສິລະປະຂັບກາຈູ່ໃນໄລຍະ 2010-2014 ຕາມຄຳໝັ້ນສັນຍາກັບອູແນສໂກ. ງານມະໂຫລານຂັບກາຈູ່ກໍ່ແມ່ນໂອກາດເພື່ອໃຫ້ທັງປະຊາຄົມເອົາໃຈໃສ່ລົງທຶນອະນຸລັກຮັກສາກາຈູ-ເຊິ່ງແມ່ນມໍລະດົກວັດທະນະທຳທີ່ດີເດັ່ນຂອງຊາດ ແລະ ມວນມະນຸດ. ນີ້ຍັງແມ່ນໂອກາດເພື່ອເຊີດຊູບັນດາສະໂມສອນກາຈູ່, ພ້ອມທັງລະດົມກຳລັງໃຈບັນດານັກສິລະປິນຂັບກາຈູ່ໜຸ່ມຕິດພັນກັບສິລະປະພື້ນເມືອງຂອງຊາດ, ເຊື່ອມຕໍ່ບັນດາຄຸນຄ່າມໍລະດົກຂອງສິລະປະກາຈູ່ກັບມະຫາຊົນໃນຍຸກປະຈຸບັນ./.