ລາຍການສະແດງລະຄອນຕຸກກະຕານ້ຳ
ທີ່ເປັນເອກະລັກສະເພາະຂອງຫວຽດນາມ (ພາບ: baomoi.com)
|
ໝູ່ບ້ານ ແຣກ ທີ່ຕາແສງ ຮົ່ງກວາງ ເມືອງນາມຈຶກ ແຂວງ ນາມດິ້ງ ແຕ່ດົນນານມາແລ້ວ ໄດ້ເປັນທີ່ຮູ້ຈັກກັນດີຍ້ອນແມ່ນແຫ່ງທີ່ມີກອງສິລະປະສະແດງລະຄອນຕຸກກະຕານ້ຳທີ່ມີຊື່ສຽງຢູ່ຫວຽດນາມ. ໂດຍຜ່ານບັນດາໄລຍະແຫ່ງ ປະຫວັດສາດ, ສິລະປະສະແດງລະຄອນຕຸກກະຕານ້ຳຢູ່ ໝູ່ບ້ານ ແຣກຍັງຄົງ ມີຊີວິດຊີວາໃນການສະແດງລະຄອນຕຸກກະຕານ້ຳຜ່ານເລື່ອງລາວ ຕ່າງໆ, ເພາະ ປະຊາຊົນຢູ່ແຫ່ງນີ້ຍາມໃດກໍມີສະຕິຮັກສາ, ເສີມຂະຫຍາຍປະເພດສິລະປະພື້ນເມືອງທີ່ເປັນເອກະລັກສະເພາະໂດຍປູຍ່າຕາຍາຍໄດ້ຖ່າຍທອດ ແລະ ອະນຸລັກຮັກສາຈາກເສັ່ນຄົນນີ້ຫາເສັ່ນຄົນອື່ນ.
ລະຄອນຕຸກກະຕານ້ຳແມ່ນປະເພດສິລະປະທີ່ໄດ້ຮັບຄວາມນິຍົມຊົມຊອບຢູ່ຫວຽດນາມຍ້ອນລັກສະນະມະຫາຊົນ ແລະ ມີສີສັນສະເພາະ. ໂດຍໄດ້ກຳເນີດ ຂຶ້ນຢູ່ເຂດທົ່ງພຽງແມ່ນນ້ຳແດງກ່ອນນີ້ປະມານ 10 ສະຕະວັດ, ນີ້ແມ່ນ ປະເພດສິລະປະທີ່ເປັນເອກະລັກສະເພາະ, ມີລັກສະນະທ້ອງຖິ່ນຂອງພື້ນຖານອະລິຍະທຳເຂົ້ານາທາມ. ກອງສິລະປະສະແດງລະຄອນຕຸກກະຕານ້ຳໝູ່ບ້ານແຣກ(ກ່ອນນີ້ແມ່ນໝູ່ບ້ານ ບານແຖກ) ໄດ້ຮັບການສ້າງຕັ້ງ ແລະ ຂະຫຍາຍຕົວມາແຕ່ດົນນານ ດ້ວຍຊື່ເອີ້ນວ່າ ກອງສິລະປະສະແດງລະຄອນຕຸກກະຕານ້ຳ ນາມເຈີ້ນ. ນີ້ແມ່ນໜຶ່ງໃນຈຳນວນ 3 ກອງສິລະປະສະແດງລະຄອນຕຸກກະຕານ້ຳພື້ນເມືອງ ທີ່ມີຊື່ສຽງຢູ່ແຂວງນາມດິ້ງແລະທົ່ວທັງປະເທດ. ທ່ານຮ່ວາງກົງເຄືອງຜູ້ອຳນວຍການ ສູນສົ່ງເສີມການທ່ອງທ່ຽວແຂວງ ນາມດິ້ງໃຫ້ຮູ້ວ່າ :
“ ໝູ່ບ້ານ ແຣກທີ່ຕາແສງ ຮົ່ງກວາງ ເມືອງນາມຈຶກແມ່ນໜຶ່ງໃນໃນບັນດາອູ່ສິລະປະລະຄອນຕຸກກະຕາພາກເໜືອ ແລະ ຢູ່ແຫ່ງນີ້ ມີນັກສິລະປິນຫຼາຍຄົນໄດ້ປະກອບສ່ວນກໍ່ສ້າງໂຮງລະຄອນຕຸກກະຕາສູນກາງ. ກອງສິລະປະສະແດງລະຄອນຕຸກກະຕານ້ຳນີ້ ໄດ້ຮັບການສ້າງຕັ້ງຂຶ້ນມາແຕ່ດົນນານ ແລະ ມາຮອດປະຈຸບັນ, ຍັງຄົງສາມາດອະນຸລັກຮັກສາຈຸດວັດທະນະທຳພື້ນເມືອງດ້ວຍບັນດາເລື່ອງລາວທີ່ຕິດພັນກັບຊີວິດການເປັນຢູ່, ການອອກແຮງງານທຳການຜະລິດຂອງປະຊາຊົນ. ປະເພດສິລະປະສະແດງລະຄອນຕຸກກະຕານ້ຳນີ້ ເຄີຍຖືກບັນດາ ນັກສິລະປິນສະແດງໃນໂອກາດງານບຸນຕ່າງໆ, ປະກອບສ່ວນເຮັດໃຫ້ສີສັນບັນດາງານບຸນຂອງໝູ່ບ້ານຢູ່ເຂດທົ່ງພຽງແມ່ນ້ຳແດງເພີ່ມຄວາມອຸດົມສົມບູນຂຶ້ນຕື່ມ ”
ງານບຸນສະແດງລະຄອນຕຸກກະຕານ້ຳພື້ນເມືອງໝູ່ບ້ານ ແຣກ, ໃນ 5 ປີໃດກໍຖືກຈັດຂຶ້ນເທື່ອໜຶ່ງ ໃນວັນທີ 16 ເດືອນຈຽງໄລຕາມຈັນທະປະຕິທິນ ເພື່ອແນໃສ່ອາໄລຫາ ພະອໍລະຫັນ ລິງອຶ້ງດ້າຍເວືອງ ຜູ້ກໍ່ຕັ້ງອາຊີບສະແດງລະຄອນຕຸກກະຕານ້ຳ . ປະຊາຊົນໃນໝູ່ບ້ານ ແຣກ ໄດ້ຈັດງານບຸນເພື່ອເຊີດຊູອາຊີບການສະແດງລະຄອນຕຸກກະຕານ້ຳ ແລະ ນີ້ແມ່ນຈຸດຄວາມງາມທີ່ມີຄຸນຄ່າວັດທະນະທຳມະນຸດຢ່າງເລິກເຊິ່ງຂອງງານບຸນສະແດງລະຄອນຕຸກກະຕານ້ຳພື້ນເມືອງໝູ່ບ້ານ ແຣກ. 6 ສະຕະວັດທີ່ຜ່ານມາ, ສິລະປະສະແດງລະຄອນຕຸກກະຕານ້ຳທີ່ເປັນເອກະລັກຢູ່ແຫ່ງນີ້ໄດ້ຮັບການສືບທອດ ແລະ ຖ່າຍທອດຜ່ານນັກສິລະປິນ 20 ລຸ່ນຄົນແລ້ວ. ໃນນັ້ນມີ 3 ວົງຕະກູນໃຫຍ່ຄື : ຟານ, ດັ້ງ, ຝ້າມ ໄດ້ຖະໜຸຖະໜອມ ແລະ ຮັກສາອາຊີບປຽບເໝືອນສິ່ງທີ່ປະເສີດເລີດລ້ຳຂອງວົງຕະກູນຕົນ. ປະຊາຊົນຢູ່ແຫ່ງນີ້ ຍາມໃດກໍມີຄວາມເອກອ້າງທະນົງໃຈເພາະໄດ້ອະນຸລັກຮັກສາມໍລະດົກໂດຍປູຍ່າຕາຍາຍປະໄວ້ໃຫ້. ພໍ່ຕູ້ ຟານວັນໜ້ຽມ ນັກສິລະປິນທີ່ມີອາຍຸສູງໃນໝູ່ບ້ານໄດ້ເວົ້າວ່າ :
“ ຕ້ອງມີລຸ່ນໜຸ່ມເພື່ອສືບທອດ, ບໍ່ປະໃຫ້ປະເພດສິລະປະນີ້ຖືກສູນຫາຍໄປ. ສ່ວນບັນດາຜູ້ເຖົ້າຜູ້ແກ່ຈະຖ່າຍທອດຈົນສຸດໃຫ້ແກ່ລຸ່ນໜຸ່ມເພືອ່ອະນາຄົດ ”
ນັກສິລະປິນ ຟານວັນແມ້ ຜູ້ໄດ້ກຳເນີດຂຶ້ນໃນຄອບຄົວທີ່ມີ 7 ລຸ່ນຄົນເດີນຕາມອາຊີບສະແດງລະຄອນຕຸກກະຕານ້ຳ. ບິດາຂອງພໍ່ຕູ້ ແມ້ແມ່ນ ຟານວັນງ້າຍ ຊຶ່ງແມ່ນບຸກຄົນທຳອິດໄດ້ກໍ່ຕັ້ງໂຮງລະຄອນຕຸກກະຕານ້ຳສູນກາງປະຈຸບັນ. ນັກສິລະປິນ ຟານວັນແມ້ ເລົ່າສູ່ຟັງວ່າ :
“ ເມື່ອໄດ້ກຳເນີດ ແລະ ໃຫຍ່ຂຶ້ນ, ສິລະປະສະແດງລະຄອນຕຸກກະຕານ້ຳໄດ້ຊຶມເລິກເຂົ້າໃນຈິດໃຈຂອງພວກຂ້າພະເຈົ້າ. ນັບແຕ່ຄາວຍັງນ້ອຍ, ເມືອ່ເງື່ອນໄຂການດຳລົງຊີວິດທີ່ຫຍຸ້ງຍາກ, ແຕ່ພວກອ້າຍນ້ອງຂ້າພະເຈົ້າໄດ້ຕິດຕາມປູຍ່າ ໄປທຳການສະແດງ. ຈາກນັ້ນໄດ້ເກີດມີຄວາມເມົາມົວ ແລະ ໄດ້ຂໍເຂົ້າຮ່ວມກອງ ສິລະປະສະແດງລະຄອນຕຸກກະຕານ້ຳ. ຂ້າພະເຈົ້າເອງ, ເຖິງວ່າຍັງບໍ່ທັນໄດ້ຜ່ານໂຮງຮຽນສອນວິທີແກະຄວັດສະຫຼັກ, ແຕ່ຍ້ອນໄດ້ຕິດພັນກັບຕຸກກະຕາແຕ່ຄາວຍັງນ້ອຍ, ດັ່ງນັ້ນຂ້າພະເຈົ້າສາມາດຜະລິດໄດ້ຕຸກກະຕາ, ແລ້ວກໍທ່າສີປະດັບປະດາ ແລະ ທຳການສະແດງເອງ ”
ປະຈຸບັນ, ຢູ່ເຂດທົ່ງພຽງແມ່ນນ້ຳແດງມີເຖິງ 15 ກອງສິລະປະສະແດງ ລະຄອນຕຸກກະຕານ້ຳ, ຊຶ່ງສ່ວນຫຼາຍບັນດາລາຍການສະແດງແມ່ນມີລັກສະນະຄ້າຍຄືກັນ, ແຕ່ສຳລັບໝູ່ບ້ານ ແຣກ ແມ່ນມີບາງລາຍການສະແດງ ຊຶ່ງຢູ່ແຫ່ງອື່ນໆບໍ່ມີ.
ຖ້າມີໂອກາດລົງຢ້ຽມຢາມໝູ່ບ້ານ ແຣກ, ແຂກທ່ອງທ່ຽວຈະໄດ້ຮັບຊົມການສະແດງລະຄອນຕຸກກະຕານ້ຳຢູ່ສະຕ່າງໆໃຕ້ຮົ່ມເຢັນຂອງຕົ້ນໄຮໃນໝູ່ບ້ານ. ຢູ່ຫັ້ນຍັງມີສຽງໄກ່ຂັນ, ມີຮູບພາບເດັກຂີ່ຂວາຍເປົາປີ່, ຊາວກະສີກອນຫາປາ, ຈັບເປັດ... ທີ່ມີຊີວິດຊີວາໃນບັນຍາກາດໝູ່ບ້ານເຂດບ້ານນາທີ່ອົບອຸ່ນ ແລະ ລຽບງ່າຍ, ເພາະສະນັ້ນ ບັນດາລາຍການສະແດງມີຄວາມດູດດື່ມ ແລະ ຈັບອົກຈັບໃຈຫຼາຍ. ພິເສດ ບັນດານັກສິລະປິນ ກໍແມ່ນຊາວນານີ້ເອງ, ເຂົາເຈົ້າ ໄດ້ກັບມາສະແດງຈາກທົ່ງໄຮ່ທົ່ງນາ ແລະ ຍາມໃດກໍກຽມພ້ອມຮັບໃຊ້ແຂກ ທ່ອງທ່ຽວທັງຫຼາຍ.