ແຕ່ລະປີ, ໃນຊຸມວັນໃກ້ຈະຮອດບຸນໄຫວ້ພະຈັນຢູ່ຖະໜົນ ຮ່າງມ້າ-ຮ່າໂນ້ຍ ເຕັມໄປດ້ວຍສີສັນຫຼາກຫຼາຍ ຂອງເຄື່ອງຫຼິ້ນພື້ນເມືອງປະເພດຕ່າງໆ. ປີນີ້, ທັງຜູ້ຊື້ ແລະ ຜູ້ຂາຍລ້ວນແຕ່ນິຍົມບັນດາ ເຄື່ອງຫຼິ້ນພື້ນເມືອງປະເພດຕ່າງໆທີ່ສຸດ. ໃນຮ້ານຂາຍເຄື່ອງຢູ່ຖະະໜົນ ຮ່າງມ້າ ກໍ່ໄດ້ວາງຂາຍ ເຄື່ອງຫຼິ້ນປະເພດຕ່າງໆຄື: ໜ້າກາກຮູບເຈົ້າດິນ, ຮູບໂຕໝູ, ໂຕຄວາຍ, ໂຕເສືອ, ໂຕສິງ, ໂຕລີງ ຕະຫຼອດຮອດໂຄມໄຟໃຫຍ່, ນ້ອຍຫຼາຍປະເພດ.
ອ້າຍ ຫງວຽນກີ່, ພວມເລືອກຊື້ເຄື່ອງຫຼິ້ນພື້ນເມືອງບາງຢ່າງໃຫ້ລູກຊາຍອາຍຸ 5 ປີ, ຕາມອ້າຍແລ້ວການເລືອກຊື້ເຄື່ອງຫຼິ້ນບໍ່ພຽງແຕ່ ເພື່ອຕອບສະໜອງຄວາມນິຍົມຂອງເດັກເທົ່ານັ້ນ, ຫາກຍັງເຮັດໃຫ້ເດັກເຂົ້າໃຈຕື່ມອີກ ກ່ຽວກັບວັດທະນະທຳ, ປະຫວັດສາດຂອງຊາດອີກດ້ວຍ.
“ຫຼິ້ນເຄື່ອງຫຼິ້ນພື້ນເມືອງ ຫວຽດນາມ ແລະ ຊື້ສິນຄ້າຫັດຖະກຳໂດຍຊາວ ຫວຽດນາມຜະລິດ ແມ່ນການສົ່ງເສີມນ້ຳໃຈຊົນຊາດ, ນີ້ກໍ່ແມ່ນການສຶກສາໃຫ້ເດັກຮູ້ຈັກບັນດາ ເຄື່ອງຫຼິ້ນພື້ນເມືອງຂອງລຸ້ນພໍ່, ລຸ້ນອ້າຍ. ທີໜຶ່ງແມ່ນເຮັດໃຫ້ເດັກເຂົ້າໃຈໄດ້ຄວາມໝາຍຂອງ ເຄື່ອງຫຼິ້ນແລະ ເຂົ້າໃຈໄດ້ວ່າ ເຄື່ອງຫຼິ້ນນັ້ນ, ໂດຍຊາວ ຫວຽດນາມຜະລິດເອງ. ທີສອງແມ່ນສຶກສາໃຫ້ເດັກສືບທອດມູນເຊື້ອ ແລະ ມີນ້ຳໃຈຮັກຊາດ”.
ນອກຈາກໂຄມໄຟຮູບດວງດາວສີແດງ, ອ້າຍກໍ່ຍັງຊື້ກອງນ້ອຍ ຊື່ງແມ່ນກອງປະເພດ 1 ທີ່ເດັກເຄີຍຫຼິ້ນໃນບຸນໄຫວ້ພະຈັນ. ອ້າຍກໍ່ໃຫ້ຮູ້ວ່າ:
“ບຸນໄຫວ້ພະຈັນ ແມ່ນບຸນວັນເພັງ. ການແຫ່ໂຄມໄຟດວງດາວໃນຄ່ຳຄືນວັນເພງເດືອນ 8 ເພື່ອໃຫ້ພວກຫຼານເຂົ້າໃຈຄວາມໝາຍຂອງບຸນວັນເພັງ ຍ້ອນວ່ານີ້ຖືກຖືວ່າແມ່ນແສງໄຟເຍືອງທາງໃຫ້ພວກຫຼານກ້າວໄປເຖິງອະນາຄົດ. ສ່ວນສຽງກອງທັງສ້າງຄວາມຟົດຟື້ນໃນບຸນໄຫວ້ພະຈັນທັງເຮັດໃຫ້ພວກເຮົາທວນຄືນສຽງກອງ, ໃນການສູ້ຮົບຕີເອົາຊະນະສັດຕູ ເພື່ອກູ້ຊາດໃນເມື່ອກ່ອນ”.
ເອື້ອຍ ທູຮ່ວຽນ ພວມຊື້ໂຄມໄຟຮູບປາໄນໃຫ້ແກ່ລູກສາວຂອງຕົນ, ເອື້ອຍໃຫ້ຮູ້ວ່າ: ເຄື່ອງຫຼິ້ນຂອງເດັກໃນປະຈຸບັນ ແມ່ນອຸດົມສົມບູນ ກ່ຽວກັບປະເພດ ແລະ ມີສີສັນຫຼາກຫຼາຍ ແຕ່ເອື້ອຍຢາກຊື້ເຄື່ອງຫຼິ້ນພື້ນເມືອງທີ່ເຂັ້ມຄົ້ນໄປດ້ວຍສີສັນວັດທະນະທຳ ຫວຽດນາມ ໃຫ້ລູກ .
“ຂ້າພະເຈົ້າຊື້ໂຄມໄຟຮູບປາໃນ ແລະ ໂຄມໄຟ. ໂຄມໄຟແມ່ນສັນຍາລັກຂອງບຸນໄຫວ້ພະຈັນ ຍ້ອນວ່າເດັກເຄີຍແຫ່ໂຄມໄຟໃນໂອກາດນີ້, ສ່ວນໂຄມໄຟຮູບປາໃນກໍ່ແມ່ນຮູບພາບທີ່ເປັນມູນເຊື້ອ, ຜ່ານ ເຄື່ອງຫຼິ້ນພື້ນເມືອງນີ້, ຂ້າພະເຈົ້າຢາກໃຫ້ລູກເຂົ້າໃຈ ກ່ຽວກັບວັດທະນະທຳຂອງຊາວ ຫວຽດນາມ”.
ບັນດານາຍຊ່າງຫັດຖະກຳຢູ່ໝູ່ບ້ານອາຊີບ ຮ່າໂນ້ຍ ແມ່ນຜູ້ຜະລິດບັນດາ ເຄື່ອງ ຫຼິ້ນພື້ນເມືອງນີ້, ເຂົາເຈົ້າພວມພະຍາຍາມ ເພື່ອຜະລິດສຳເລັດ ເຄື່ອງຫຼິ້ນພື້ນເມືອງຕາມໃບສັ່ງຊື້, ກ່ອນບຸນໄຫວ້ພະຈັນຄອບຄົວເອືຶ້ອຍ ຫງວຽນທິຕ໋ຽນ ມີຊື່ສຽງໃນໝູ່ບ້ານ ເວີນແກງ ກ່ຽວກັບການຜະລິດເຄື່ອງຫຼິ້ນຮູບ ດຣ ດ້ວຍເຈ້ຍ, ໂຄມໄຟຮູບດວງດາວ. ປີນີ້, ແຂກໄດ້ສັ່ງຊື້ເຄື່ອງຫຼິ້ນທົບສອງເທົ່າ ເມື່ອທຽບກັບປີກາຍ.
“ ຂ້າພະເຈົ້າຕ້ອງກະກຽມແຕ່ເດືອນ 6 ໄລ່ຕາມຈັນທະປະຕິທິນ ຈົນເຖິງມີວັນເພັງເດືອນ 8. ເຄື່ອງຫຼິ້ນພື້ນເມືອງໃນເມື່ອກ່ອນ ແມ່ນຕ້ອງມີ ດຣ ເຮັດດ້ວຍເຈ້ຍ ເພາະວ່າພໍ່ແມ່ຢາກໃຫ້ລູກຫຼານປະສົບຜົນສຳເລັດໃນການຮ່ຳຮຽນ, ສະນັ້ນຈຶ່ງຢາກຊື້ ດຣ ເຮັດດ້ວຍເຈ້ຍດ້ວຍຄວາມຫວັງລູກຫຼານຂອງຕົນຈະເປັນນັກຮຽນເກັ່ງ, ຄວາມຮູ້ ແລະ ກາຍເປັນນັກວິສາວະກອນ, ເປັນທ່ານໝໍໃນອະນາຄົດ.”
ເຖິງວ່າຄວາມນິຍົມຂອງເດັກ ມີການປ່ຽນແປງກໍ່ຕາມ, ແຕ່ຜະລິດຕະພັນພື້ນເມືອງຍັງຄົງ ແມ່ນກົກເຄົ້າແຫ່ງວັດທະນະທຳຂອງຊາດ ແລະ ຕິດພັນກັບຊີວິດຂອງເດັກຫວຽດນາມໃນໂອກາດບຸນໄຫວ້ພະຈັນຕະຫຼອດໄປ.
“ເຄື່ອງຫຼິ້ນພື້ນເມືອງໄດ້ຕິດພັນກັບຊີວິດເຍົາໄວຂອງຂ້າພະເຈົ້ານັບແຕ່ຄາວຍັງນ້ອຍ, ເຫັນພໍ່ແມ່ຜະລິດ ເຄື່ອງຫຼິ້ນພື້ນເມືອງ ຂ້າພະເຈົ້າກໍ່ເຂົ້າໃຈໄດ້ຄວາມໝາຍຂອງມັນແລ້ວ. ແຕ່ລະປີ, ເມື່ອບຸນໄຫວ້ພະຈັນວຽນມາ, ຊາວບ້ານເຄີຍຖາມຂ້າພະເຈົ້າວ່າຄອບຄົວຈະຜະລິດ ເຄື່ອງຫຼິ້ນພື້ນເມືອງຫຼືບໍ. ນັ້ນກໍ່ແມ່ນກຳລັງໜູນ ເພື່ອໃຫ້ຂ້າພະເຈົ້າຮັກສາອາຊີບຜະລິດ ເຄື່ອງຫຼິ້ນພື້ນເມືອງໄວ້.”
ບັນດາເຄື່ອງຫຼິ້ນພື້ນເມືອງຂອງເດັກນ້ອຍນັບມື້ນັບມີທ່າແຮງໃນທ້ອງຕະຫຼາດ, ໃນໂອກາດບຸນໄຫວ້ພະຈັນ. ສິ່ງດັ່ງກ່າວປະກອບສ່ວນຢືນຢັນວ່າ: ວັດທະນະທຳພື້ນເມືອງຍັງຄົງ ແມ່ນພະລັງຊີວິດຂອງປະເທດຊາດ.