ໂຮງລະຄອນຕຸກກະຕານ້ຳທັງລອງ ສ້າງສະຖີຕິ ອາຊີ

ວັນຈັນ ທີ 4 ພະຈິກ ຄ.ສ. 2013 | 19:12:52

ໂຮງລະຄອນຕຸກກະຕາ ນ້ຳທັງລອງຢູ່ເຮືອນເລກທີ 57 B ຖະໜົນດິງຕຽນຮ່ວາງ - ຮ່າໂນ້ຍ (ພາບ : http://www.bayvut.com.au)

ອົງການສະຖີຕິໂລກທີ່ມີສຳນັກງານຕັ້ງຢູ່ອິນເດຍ ຫາກໍຮັບຮູ້ໂຮງລະຄອນ ຕຸກກະຕາ ທັງລອງ ຂອງ ຫວຽດນາມ ບັນລຸສະຖີຕິແມ່ນ “ໂຮງລະຄອນ ພຽງແຫ່ງດຽວຢູ່ອາຊີ ສະແດງລະຄອນຕຸກກະຕານ້້ຳ ຕະຫຼອດປີ. ສິ່ງນີ້ໄດ້ ສະແດງໃຫ້ເຫັນຄວາມມານະພະຍາຍາມຂອງ ໂຮງລະຄອນໃນການອະນຸລັກ ຮັກສາສິລະປະລະຄອນຕຸກກະຕານ້ຳ ພື້ນເມືອງຂອງຫວຽດນາມ, ພ້ອມທັງ ຢືນຢັນເຄື່ອງໝາຍການຄ້າ, ອິດທິພົນຊື່ສຽງຂອງ ໂຮງລະຄອນ ຕຸກກະຕາ ນ້ຳທັງລອງ ໃນໝູ່ຜູ້ຊົມຫວຽດນາມ ແລະ ເພື່ອນມິດສາກົນ. ສິລະປະລະຄອນຕຸກກະຕານ້ຳແມ່ນ ປະເພດສິລະປະສະແດງບົນເວທີ່ ພື້ນເມືອງທີ່ເປັນເອກະລັກສະເພາະ, ຕິດພັນກັບພື້ນຖານອະລິຍະທຳປູກເຂົ້າ ນາທາມ ແລະ ໄດ້ມີມາກ່ອນນີ້ເກືອບພັນປີຢູ່ຫວຽດນາມ. ແຕ່ປາງກ່ອນ, ຊາວຫວຽດນາມເຄີຍສະແດງສິລະປະລະຄອນ ຕຸກກະຕານ້ຳໃນມື້ບຸນປີໃໝ່ປະຈຳຊາດ ຫຼືໃນໂອກາດງານບຸນປະເພນີ. ແຕ່ໃນປະຈຸບັນ, ທຸກໆມື້ໃນປີ, ຜູ້ນິຍົມ ລະຄອນ ຕຸກກະຕານ້ຳກໍລ້ວນແຕ່ສາມາດຮັບຊົມບັນດາລາຍການສະແດງສິລະປະລະ ຄອນຕຸກກະຕານ້ຳ ທີ່ເປັນເອກະລັກສະເພາະຢູ່ ໂຮງລະຄອນຕຸກກະຕາ ນ້ຳທັງລອງທີ່ເຮືອນເລກທີ 57 B ຖະໜົນດິງຕຽນຮ່ວາງ - ຮ່າໂນ້ຍ.

ເກືອບ 20 ປີມານີ້, ໂຮງລະຄອນຕຸກກະຕາ ນ້ຳທັງລອງ ເປັນກາຍເປັນທີ່ຮູ້ຈັກກັນດີຂອງຜູ້ນິຍົມ ລະຄອນຕຸກກະຕານ້ຳນັບແສນເທື່ອຄົນ, ເປັນຕົ້ນແມ່ນນັກທ່ອງທ່ຽວສາກົນຢາກມາຊອກຮູ້ວັດທະນະທຳຫວຽດນາມ. ໃນຊຸມປີມໍ່ໆມານີ້, ໃນສະພາວະທີ່ເວທີ່ການສະແດງສິລະປະພື້ນເມືອງມີການເຄື່ອນໄຫວຊັກຊ້າລົງນັ້ນ, ແຕ່ໂຮງລະຄອນຕຸກກະຕານ້ຳທັງລອງ ຍັງຄົງສາມາດດຶງດູດຜູ້ມາຊົມຢ່າງຫຼວງຫຼາຍ, ເປັນຕົ້ນແມ່ນນັກທ່ອງທ່ຽວສາກົນ. ນັກສິລະປີນດີເດັ່ນ ຈູເລື້ອງ ຮອງຜູ້ອຳນວຍການ ໂຮງລະຄອນຕຸກກະຕານ້ຳທັງລອງ ໃຫ້ຮູ້ວ່າ :

“ໂຮງລະຄອນຂອງພວກຂ້າພະເຈົ້າເຄຶ່ອນໄຫວຕະຫຼອດປີເພື່ອຮັບໃຊ້ແຂກຄົນທັງຫຼາຍ ເພື່ອແນະນຳ ແລະ ໂຄສະນາຈຸດວັດທະນະທຳທີ່ເປັນເອກະລັກສະເພາະຂອງຫວຽດນາມ, ນັ້ນແມ່ນ ສິລະປະລະຄອນຕຸກກະຕານ້ຳ. ນີ້ແມ່ນປະເພດສິລະປະ ບໍ່ພຽງແຕ່ໄດ້ຮັບຄວາມສົນໃຈຈາກຊາວຫວຽດນາມເທົ່ານັ້ນ, ຫາກຍັງໄດ້ຮັບຄວາມສົນໃຈຈາກບັນດານັກຄົ້ນຄ້ວາວັດທະນະທຳ, ແຂກທ່ອງທ່ຽວທີ່ມາຈາກຫຼາຍປະເທດໃນໂລກອີກດ້ວຍ. ນີ້ແມ່ນຈຸດທີ່ສະຫວ່າງສະໄຫວກ່ຽວກັບດ້ານວັດທະນະທຳຂອງນະຄອນຫຼວງຮ່າໂນ້ຍ. ຍ້ອນຄວາມມານະພະຍາຍາມເຫຼົ່ານັ້ນ, ອົງການສະຖີຕິໂລກຈຶ່ງມອບນາມມະຍົດນີ້ໃຫ້ແກ່ໂຮງລະຄອນຂອງພວກຂ້າພະເຈົ້າ”

ເມື່ອມີໂອກາດມາຮັບຊົມລາຍການສະແດງສິລະປະລະຄອນຕຸກກະຕານ້ຳຢູ່ ໂຮງລະຄອນ ຕຸກກະຕາ ນ້ຳທັງລອງ, ສິ່ງທີ່ປະທັບໃຈທຳອິດ ແມ່ນການວາງສະແດງສິລະປະຈັດວາງບັນດາຕົວລະຄອນ ຕຸກກະຕານ້ຳທີ່ເຮັດດ້ວຍໄມ້ຊະນິດຕ່າງໆ, ມີສີສັນຫຼາກຫຼາຍເພື່ອຮັບໃຊ້ລາຍການສະແດງລະຄອນ ຕຸກກະຕານ້ຳ. ນີ້ແມ່ນຈຸດທີ່ເປັນເອກະລັກສະເພາະ ຊຶ່ງບັນດາໂຮງລະຄອນອື່ນໆບໍ່ມີ. ບັນດາ ລາຍການສະແດງລະຄອນຕຸກກະຕານ້ຳ ສ່ວນຫຼາຍແມ່ນບັນດາເລື່ອງລາວ, ເທບນິຍາຍ, ເລື່ອງລາວປະຫວັດສາດ, ຊີວິດອອກແຮງງານຂອງຊາວກະສີກອນຫວຽດນາມ... ໃນນັ້ນມີຮູບພາບຊາວນາໄປໄຖນາ, ການຈັບຫາປາ, ເດັກຂີ່ຄວາຍເປົ່າຂຸ່ຍ...ຊຶ່ງໄດ້ຮັບຄວາມຊົມຊອບຈາກນັກທ່ອງທ່ຽວສາກົນ. ໃນການເຄື່ອນໄຫວສະແດງ, ໂຮງລະຄອນຕຸກກະຕານ້ຳທັງລອງ ຍາມໃດກໍສົ່ງເສີມລຸ່ນໜຸ່ມ ນຳຈຸດໃໝ່ອຽມເຂົ້າລາຍການສະແດງ, ອັນໄດ້ເປັນການປະກອບສ່ວນບໍ່ໜ້ອຍເຂົ້່າໃນຜົນສຳເລັດຂອງ ໂຮງລະຄອນ ຕຸກກະຕານ້ຳທັງລອງ. ທ້າວ ແບກກ໋ວກແຄງ ນັກສະແດງໜຸ່ມຂອງໂຮງລະຄອນຕຸກກະຕານ້ຳທັງລອງເວົ້າວ່າ:

“ ຂ້າພະເຈົ້າຄິດວ່າ ໃນສະພາບການທີ່ການເຄື່ອນໄຫວສະແດງບົນເວທີ່ຢູ່ຫວຽດນາມເວົ້າລວມ ແລະ ພິເສດແມ່ນການສະແດງສີລະປະບົນເວທີພື້ນເມືອງ ກໍພວມປະສົບກັບຄວາມຫຍຸ້ງຍາກຫຼາຍຢ່າງນັ້ນ, ການທີ່ໂຮງລະຄອນ ຕຸກກະຕານ້ຳທັງລອງ ສາມາດສ້າງສະຖີຕິເຄື່ອນໄຫວຕະຫຼອດທຸກໆວັນໃນປີ ແມ່ນຄວາມພາກພູມໃຈ ແລະ ການລະດົມກຳລັງໃຈສຳລັບພວກນັກສິລະປີນ, ນັກສະແດງຂອງ ໂຮງລະຄອນຕຸກກະຕານ້ຳທັງລອງ, ຮ່າໂນ້ຍ. ນີ້ບໍ່ພຽງແຕ່ແມ່ນຄວາມເອກອ້າງທະນົງໃຈທີ່ມີຕໍ່ພວກນັກສິລະປີນ, ນັກສະແດງຂອງໂຮງລະຄອນ ຕຸກກະຕານ້ຳທັງລອງ, ຮ່າໂນ້ຍເທົ່ານັ້ນ, ຫາກຍັງແມ່ນສັນຍານທີ່ໜ້າພູມໃຈສຳລັບບັນດານັກສິລະປີນ, ນັກສະແດງຂອງຂະແໜງສະແດງບົນເວທີ່ພື້ນເມືອງຢູ່ຫວຽດນາມອີກດ້ວຍ”

ໂຮງລະຄອນຕຸກກະຕານ້ຳທັງລອງ ສ້າງສະຖີຕິ ອາຊີ - ảnh 2

ລາຍການສະແດງ ລະຄອນຕຸກກະຕານ້ຳຂອງໂຮງລະຄອນ ຕຸກກະຕານ້ຳທັງລອງ (ພາບ : http://www.bayvut.com.au)

ແຂກທ່ອງທ່ຽວສາກົນເມື່ອມາຢ້ຽມຢາມຫວຽດນາມເປັນຄັ້ງທຳອິດ, ໄດ້ຮັບຊົມ ລາຍການສະແດງ ລະຄອນຕຸກກະຕານ້ຳແລ້ວ, ແນ່ນອນວ່າໃນສ່ວນໃດສ່ວນໜຶ່ງກໍສາມາດເຂົ້າໃຈກ່ຽວກັບວັດທະນະທຳ, ປະຫວັດສາດຂອງຫວຽດນາມ. ຂ່າວດີ, ຂ່າວມ່ວນກໍໄດ້ຖືກສົ່ງໄປທົ່ວ, ແຂກທ່ອງທ່ຽວມາຊົມລາຍການສະແດງລະຄອນ ຕຸກກະຕານ້ຳ ແມ່ນນັບມື້ນັບຫຼາຍຂຶ້ນ ແລະ ລາຍການສະແດງລະຄອນ ຕຸກກະຕານ້ຳກໍຖືກເພີ່ມຂຶ້ນເພື່ອຮັບໃຊ້ຄວາມຕ້ອງການຂອງຜູ້ນິຍົມ ລະຄອນ ຕຸກກະຕານ້ຳ. ນັກສິລະປີນດີເດັ່ນ ຈູເລື້ອງ ຮອງຜູ້ອຳນວຍການ ໂຮງລະຄອນ ຕຸກກະຕານ້ຳທັງລອງ ໃຫ້ຮູ້ວ່າ :

“ ແຕ່ລະມື້, ໂຮງລະຄອນຕຸກກະຕານ້ຳທັງລອງ ມີລາຍການສະແດງລະຄອນເຖິງ 5-7 ເທື່ອລາຍການ. ຜູ້ມາຊົມ ສ່ວນຫຼາຍແມ່ນແຂກທ່ອງທ່ຽວສາກົນ, ພວກຫຼານນ້ອຍ, ພໍ່ແມ່ພີນ້ອງຢູ່ພາຍໃນປະເທດ. ນອກຈາກນັ້ນ, ພວກຂ້າພະເຈົ້າ ກໍຍັງໄປສະແດງຢູ່ຫຼາຍທ້ອງຖິ່ນ, ເຂດຫ່າງໄກສອກຫຼີກອີກດ້ວຍ”

ບໍ່ພຽງແຕ່ໄດ້ສະແດງຢູ່ພາຍໃນປະເທດເທົ່ານັ້ນ, ນັບແຕ່ປີ 1992 ມາຮອດປະຈຸບັນ, ໂຮງລະຄອນ ຕຸກກະຕານ້ຳທັງລອງໄດ້ແຕ່ງຕັ້ງຫຼາຍຄະນະໄປສະແດງຢູ່ເກືອບ 50 ປະເທດໃນໂລກ. ໂຮງລະຄອນ ຕຸກກະຕານ້ຳທັງລອງ ກໍໄດ້ເຂົ້າຮ່ວມງານ Festival ສະແດງລະຄອນຕຸກກະຕາລະດັບໂລກຢູ່ ຍີປຸ່ນ, ຝະລັ່ງ, ແອັສປາຍ, ອາເມລິກາ, ອົດສະຕາລີ.....ໄປຮອດໄສ, ບັນດາລາຍການສະແດງລະຄອນ ຕຸກກະຕານ້ຳຂອງໂຮງລະຄອນຕຸກກະຕານ້ຳທັງລອງ ກໍລ້ວນແຕ່ໄດ້ຮັບການຕີລາສູງກ່ຽວກັບເຕັກນິກ, ຄວາມສາມາດສະແດງກໍຄືສີສັນວັດທະນະທຳທີ່ເປັນເອກະລັກສະເພາະຂອງຫວຽດນາມ.