(vovworld)- “ສິ່ງຍອດຍິ່ງຂອງເສື້ອຍາວຫວຽດນາມ” ແມ່ນຫົວເລື່ອງ ຂອງ Festival ເສື້ອຍາວ ຮ່າໂນ້ຍ ປີ 2016 ຫາກໍດຳເນີນໄປຫວ່າງແລ້ວນີ້ ຢູ່ ຮ່າໂນ້ຍ. ຄວາມງາມດ້ານຈິດຕະກຳຂອງຄຸ້ມເມືອງເກົ່າ ຮ່າໂນ້ຍ, ຮູບພາບເຂົ້າເໝົ້າ ໃນໝູ່ບ້ານ ວ່ອງ, ພາບພື້ນເມືອງ ດົງໂຮ່, ພາບພື້ນເມືອງ ຮ່າງຈົງ, ບັນດາທັດສະນີຍະພາບຂອງນະຄອນຫລວງ ໂດຍນັກອອກແບບຢູ່ພາຍໃນປະເທດ ແລະ ຕ່າງປະເທດ 32 ຄົນ ໄດ້ສະແດງໃຫ້ເຫັນຜ່ານບັນດາຊຸດເສື້ອຍາວ ນຳມາເຊິ່ງຄວາມງາມໃຫມ່ອ່ຽມໃຫ້ແກ່ເສື້ອຍາວຫວຽດນາມ. ສິ່ງດັ່ງກ່າວໄດ້ວາດພາບເຖິງຮູບພາບນະຄອນຫລວງ ຮ່າໂນ້ຍ ທີ່ສວຍງາມ, ສະຫງົບສຸກ ແລະ ເຕັມໄປດ້ວຍຄວາມປະທັບໃຈ. ບົດຂຽນຂອງນັກຂ່າວ ລານແອງ.
 |
ຊຸດເສື້ອຍາວທີ່ເປັນມູນເຊື້ອຂອງແຕ່ລະປະເທດ ລ້ວນແຕ່ຊ້ອນແຝງບັນດາສິ່ງຍອດຍິ່ງດ້ານວັດທະນະທຳທີ່ເປັນເອກະລັກສະເພາະ, ປຸກລຸກຄວາມຮູ້ສຶກ, ຄວາມປາດຖະຫນາຢາກຄົ້ນຫາຂອງນັກທ່ອງທ່ຽວ ເມື່ອໄປຢ້ຽມຢາມປະເທດຫນຶ່ງ. ສເກົາຫລີ ມີ ຊຸດອາພອນ hanbok, ຍີ່ປຸ່ນ ມີຊຸດອາພອນ kimino, Scotland ມີກະໂປ່ງ kilt… ຫວຽດນາມ ມີເສື້ອຍາວທີ່ມີຄວາມສະເຫ່ນ. ເສື້ອຍາວ ແມ່ນສັນຍາລັກໃຫ້ແກ່ແມ່ຍິງ ຫວຽດນາມ ທີ່ອ່ອນໂຍນ ແຕ່ເຕັມໄປດ້ວຍຄວາມສະເຫ່ນ ແລະ ພະລັງຊີວິດ. ນັກອອກແບບຊຸດອາພອນ ມີງແຫ້ງ ໃຫ້ຮູ້ວ່າ: ເພື່ອສ້າງພະລັງຊີວິດໃຫມ່ໂດຍອີງໃສ່ສິ່ງຍອດຍິ່ງຂອງ ຮ່າໂນ້ຍສະແດງໃຫ້ເຫັນຜ່ານບັນດາຊຸດເສື້ອຍາວທີ່ເປັນມູນເຊື້ອ ນັ້ນບໍ່ແມ່ນເລື່ອງງ່າຍດາຍ. ແຕ່ບັນດານັກອອກແບບເຫລົ່ານັ້ນໄດ້ອອກແບບບັນດາຊຸດເສື້ອຍາວມີຄວາມງາມເປັນເອກະລັກສະເພາະ, ດູດດື່ມ ແຕ່ເຂັ້ມຂົ້ນໄປດ້ວຍສີສັນມູນເຊື້ອ ເພື່ອແນະນຳໃນ Festival ເສື້ອຍາວ ຮ່າໂນ້ຍປີ 2016. ດ້ວຍບັນດາຮູບພາບທີ່ສວຍງາມຂອງບັນດານາງສາວ, ເສັ້ນທາງເຄື່ອງປັ້ນດິນເຜົາ, ຮູບ ເຄວວັນກາກ, ທາດເຕົ່າ, ພາບພື້ນເມືອງ ຮ່າງຈົງ, ພາບພື້ນເມືອງ ດົງໂຮ່, ຄຸ້ມຖະຫນົນເກົ່າ ຮ່າໂນ້ຍ, ຊ້ຳບໍ່ໜຳນັບທັງບັນດາພາບໂຄສະນາ…, ບັນດານັກອອກແບບ ໄດ້ຜະລິດຊຸດເສື້ອຍາວດ້ວຍເຕັກນິກທີ່ໃຫມ່ອ່ຽມເຮັດໃຫ້ຊຸດເສື້ອຍາວທັນສະໄຫມ ແຕ່ຍັງຄົງນິ້ມນວນ, ມີສະເຫນ່. ບາງຄົນໄດ້ເລືອກເຟັ້ນພາບແຕ້ມເພື່ອອອກແບບເສື້ອຍາວ, ໃນນັ້ນ ມີພາບແຕ້ມຂອງຈິດຕະກອນ ບູ່ຍຊວນຟາຍ, ເຈີນງວຽນດານ, ຟ້າມບີງເຈືອງ…
“ສຳລັບຂ້າພະເຈົ້າແລ້ວ ຮ່າໂນ້ຍແມ່ນບ່ອນເຕົ້າໂຮມບັນດາປັດໄຈເພື່ອໃຫ້ພວກເຮົາພັດທະນາໃນຂົງເຂດ ແຟຊັນ. ເວົ້າຄືແນວນັ້ນບໍ່ໝາຍຄວາມວ່າ ເສື້ອຍາວແມ່ນ ແຟຊັນເຊິ່ງມັນແມ່ນສັນຍາລັກທີ່ເປັນເອກະລັກສະເພາະທີ່ສຸດຂອງສີສັນວັດທະນະທຳ ແລະ ແຟຊັນ ກໍເຊັ່ນດຽວກັນ. ຕົ້ນກຳເນີດຂອງ ແຟຊັນແມ່ນສີສັນ.”
ຮ່າໂນ້ຍ ແມ່ນແຫ່ງເຕົ້າໂຮມສິ່ງຍອດຍິ່ງ ແລະ ກໍແມ່ນເຂດດິນທີ່ສະຫງວນໃຫ້ແກ່ການມີຫົວຄິດປະດິດສ້າງຂອງບັນດານັກອອກແບບ. Festival ເສື້ອຍາວ ຮ່າໂນ້ຍປີ 2016 ແມ່ນໂອກາດເພື່ອໃຫ້ບັນດານັກອອກແບບອາພອນ, ນັກສິລະປະກອນ, ນັກສິລະປິນ ແລະ ຜູ້ມີຄວາມຮັກຕໍ່ນະຄອນຫລວງ ຮ່າໂນ້ຍ ໄດ້ອຸທິດພູມປັນຍາ, ກຳລັງເຫື່ອແຮງຂອງຕົນເພື່ອແນະນຳໃຫ້ປະຊາຊົນໃນທົ່ວປະເທດ ແລະ ເພື່ອນມິດສາກົນບັນດາຄວາມງາມທີ່ເປັນມູນເຊື້ອ, ຄວາມເກັ່ງກ້າສາມາດຂອງຊາວ ທັງລອງ -ຮ່າໂນ້ຍ. ນັກສິລະປີນປະຊາຊົນ ຕຽນເລີ້ຍ ໄດ້ແບ່ງປັນວ່າ:
“ຮ່າໂນ້ຍ ໄດ້ຈັດຕັ້ງ Festival ເສື້ອຍາວເປັນຄັ້ງທຳອິດ, ບັນຍາກາດແມ່ນຟົດຟື້ນມ່ວນຊື່ນທີ່ສຸດ. ຍ້ອນວ່າ ຊຸດເສື້ອຍາວໄດ້ເຂົ້າຫນ້າປະຫວັດສາດ ແລະ ເປັນມູນເຊື້ອຂອງຫວຽດນາມ. ຊາວຫວຽດນາມ ຍາມໃດກໍຕິດພັນກັບເສື້ອຍາວ ບໍ່ພຽງແຕ່ສຳລັບແມ່ຍິງເທົ່ານັ້ນ ຫາກນັບທັງຜູ້ຊາຍ, ຊາວຫນຸ່ມ, ຜູ້ເຖົ້າຜູ້ແກ່ອີກດ້ວຍ. ບັນດາຜູ້ຄົນເຫລົ່ານັ້ນ ລ້ວນແຕ່ນຸ່ງຊຸດເສື້ອຍາວ ເພາະເສື້ອຍາວແມ່ນຊຸດອາພອນປະຈຳຊາດຂອງຫວຽດນາມ.”
ເສື້ອຍາວ ແມ່ນຊຸດອາພອນປະຈຳຊາດຂອງ ຫວຽດນາມ
|
ເສື້ອຍາວ ບໍ່ພຽງແຕ່ແມ່ນຊຸດອາພອນເທົ່ານັ້ນ ຫາກຍັງແມ່ນເລື່ອງລາວດ້ານວັດທະນະທຳອີກດ້ວຍ. ຄວາມງາມຂອງ ຫວຽດນາມ ຍາມໃດກໍຕິດພັນກັບຊຸດເສື້ອຍາວທີ່ເປັນມູນເຊື້ອ ແລະ ກໍແມ່ນເລື່ອງລາວທີ່ບໍ່ອາດຫລົງລືມໄດ້ ຍ້ອນຄຸນຄ່າປະຫວັດສາດຂອງເສື້ອຍາວໄດ້ສ້າງບັນດາຄຸນຄ່າສືບທອດໃຫ້ແຕ່ລະຍຸກສະໄຫມ ພ້ອມທັງປະກອບສ່ວນສຳຄັນເຂົ້າໃນການກໍ່ສ້າງບັນດາຄຸນຄ່າທີ່ໃຫມ່ອ່ຽມ, ຈິດໃຈໃຫມ່ອ່ຽມໃຫ້ແກ່ບັນດາຊຸດເສື້ອຍາວ ຫວຽດນາມ. ສຳລັບຊາວຕ່າງປະເທດຫລາຍຄົນແລ້ວ, ຮູບພາບເສື້ອຍາວໄດ້ກາຍເປັນຄວາມຊີນເຄີຍ, ເສື້ອຍາວ ແມ່ນຊຸດອາພອນປະຈຳຊາດຂອງ ຫວຽດນາມ ທີ່ສວຍງາມ, ເປັນເອກະລັກສະເພາະ ແລະ ສຸພາບ. ນັກສິລະປິນປະຊາຊົນ ຈາຢາງ ແບ່ງປັນວ່າ:
“ເມື່ອໄປຮ່ວມງານມະໂຫລານຮູບເງົາ, ສັບປະດາວັດທະນະທຳ, ສັບປະດາຮູບເງົາ ຫວຽດນາມ ຢູ່ ຕ່າງປະເທດ ໃນຫລາຍຄັ້ງ, ຂ້າພະເຈົ້າລ້ວນແຕ່ນຸ່ງຊຸດເສື້ອຍາວຂອງຫວຽດນາມ. ແລະ ເມື່ອເຫັນຂ້າພະເຈົ້ານຸ່ງຊຸດເສື້ອຍາວຄືແນວນັ້ນ ບັນດານັກຂ່າວຕ່າງປະເທດລ້ວນແຕ່ມາຖ່າຍຮູບ ເພື່ອລົງພິມໃນຫນັງສືພິມຂອງເຂົາເຈົ້າ. ຜູ້ໃດຍັງບໍ່ທັນຊົມຮູບເງົາກ່ຽວກັບຫວຽດນາມ ເຂົາເຈົ້າຈະບໍ່ເຂົ້າໃຈກ່ຽວກັບ ຫວຽດນາມ ແຕ່ເມື່ອເຫັນຮູບພາບເສື້ອຍາວຂອງແມ່ຍິງຫວຽດນາມ ເຂົາເຈົ້າຈະເຂົ້າໃຈໄດ້ສ່ວນໃດຫນຶ່ງກ່ຽວກັບຫວຽດນາມ.”
ໂດຍປະກົດຕົວນັບແຕ່ສັດຕະວັດທີ 17, ເສື້ອຍາວ ແມ່ນຄວາມເອກອ້າງທະນົງໃຈຂອງຊາດຫວຽດນາມ, ແມ່ນຊ້ອນແຝງສິ່ງຍອດຍິ່ງ, ຈິດວິນຍານ, ນິດໄສໃຈຄໍຂອງ ຊາວຫວຽດນາມ. ເຖິງວ່າມີການຜັນແປຫລາຍຢ່າງກໍຕາມ ແຕ່ມາຮອດປະຈຸບັນ, ເສື້ອຍາວ ຍັງຄົງຮັກສາຄຸນຄ່າດັ້ງເດີມໃນຊີວິດດ້ານວັດທະນະທຳ ແລະ ຈິດໃຈໃນສັງຄົມຫວຽດນາມໄວ້ໄດ້. ທ່ານນາງ ຫງວຽນທິຮ່າ, ຊາວນະຄອນຫລວງ ຮ່າໂນ້ຍ ໄດ້ແບ່ງປັນວ່າ:
“ແມ່ຍິງ ຫວຽດນາມ ນຸ່ງເສື້ອຍາວ ງາມທີ່ສຸດ. ເມື່ອເຂົ້າຮ່ວມເຫດການໃດ ຂ້າພະເຈົ້າກໍລ້ວນແຕ່ນຸ່ງເສື້ອຍາວ. ກ່ອນນີ້ ເມື່ອລົງຖະຫນົນທຸກຄົນຕ້ອງນຸ່ງເສື້ອຍາວ ແຕ່ປະຈຸບັນເມື່ອໄປຮ່ວມງານດອງ, ງານບຸນຕ່າງໆ ຈຶ່ງນຸ່ງເສື້ອຍາວ.”
ນັກສິລະປິນ ຈາຢາງ ໃນຊຸດເສື້ອຍາວ
ພາບ:baomoi
|
ເສື້ອຍາວ ບໍ່ພຽງແຕ່ແມ່ນຊຸດອາພອນເທົ່ານັ້ນ ຫາກສຳລັບແມ່ຍິງ ຫວຽດນາມແລ້ວ, ເສື້ອຍາວຍັງຊ້ອນແຝງຄວາມໝາຍຫລາຍຢ່າງໃນແຕ່ລະລວດລາຍ. ເສື້ອຍາວ ຫວຽດນາມ ເປັນການສະແດງໃຫ້ເຫັນສີສັນ ແລະ ດ້ານຈິດໃຈຂອງຫວຽດນາມ. ເສື້ອຍາວ ມີຄວາມງາມແບບສຸພາບນິ້ມນວນຮຽບຮ້ອຍ ແຕ່ພັດມີຄວາມເຂັ້ມແຂງຄືຄວາມເອກອ້າງທະນົງໃຈຂອງແມ່ຍິງ ຫວຽດນາມ. /.