(vovworld)- ເລື່ອງຈີນ ຕັ້ງຮ້ານເຈາະນ້ຳມັນຢ່າງຜິດກົດໝາຍຢູ່ເຂດເສດຖະກິດຈຳເພາະ ແລະໄຫລ່ທະວີບຂອງຫວຽດນາມ ຖືກ ຄັດຄ້ານຢ່າງແຮງບໍ່ພຽງແຕ່ ຈາກຫາງສຽງພາຍໃນເທົ່ານັ້ນ ຫາກນັບທັງປະຊາຄົມໂລກອີກດ້ວຍ. ປະຊາຄົມໂລກ ຖືວ່າ: ການກະທຳຂອງຈີນບໍ່ພຽງແຕ່ລະເມີດກົດໝາຍສາກົນຢ່າງເປີດແປນເທົ່ານັ້ນ ຫາກຍັງເຮັດໃຫ້ຄວາມໄວ້ເນື້ອເຊື່ອໃຈຫລຸດລົງ ແລະ ສິ່ງທີ່ອັນຕະລາຍກວ່າ ມັນສ້າງຄວາມຊິນເຄີຍທີ່ອັນຕະລາຍໃນການພົວພັນກັບສາກົນ.
ການກະທຳບໍ່ເຄົາລົບອະທິປະໄຕຂອງປະເທດອື່ນ
ບົດຂຽນທີ່ລົງພິມໃນຫນັງສືພິມ Interpreter ຂອງສະຖາບັນນະໂຍບາຍສາກົນ Lowy ຢູ່ ອົດສະຕາລີ ໄດ້ຕັ້ງຄຳຖາມວ່າ: ຄວາມເຄັ່ງຕຶງຢູ່ທະເລຕາເວັນອອກ ຈະບໍ່ເກີດຂຶ້ນກ່ອນທີ່ຈີນເຕີບໂຕຂຶ້ນ ແລະ ແນວຄິດປະເທດມະຫາອຳນາດຂອງປັກກີ່ງ ນັບມື້ນັບສະແດງອອກຢ່າງຈະແຈ້ງໃນການພົວພັນລະຫວ່າງປະເທດຕ່າງໆ.
ດ້ວຍຄວາມມັກໃຫຍ່ໄຝ່ສູງຂອງຕົນ, ບັນດາຜູ້ກຳອຳນາດຈີນ ໄດ້ມີບາດກ້າວຄິດໄລ່ຕ່າງໆ ເພື່ອຫັນຄວາມມັກໃຫຍ່ໄຝ່ສູງຢູ່ທະເລຕາເວັນອອກດ້ວຍຄຳຮຽກສິດກ່ຽວກັບເສັ້ນລິ້ນງົວ 9 ຕອນ ໃຫ້ປະກົດຜົນເປັນຈິງ. ທຸກການກະທຳຂອງຈີນ ເພື່ອແນໃສ່ຫັນຄວາມມັກໃຫຍ່ໄຝ່ສູງນີ້ໃຫ້ປະກົດຜົນເປັນຈິງ ແມ່ນສິ່ງທີ່ບັນດານັກການທະຫານ, ນັກຄົ້ນຄ້ວາກົດໝາຍ, ນັກຮຽນຮູ້ສາກົນເຫັນໄດ້ງ່າຍ. ນາຍພົນ Daniel Schaeffer, ອະດີດທູດທະຫານ - ສະຖານທູດ ຝລັ່ງ ປະຈຳຈີນ, ຫວຽດນາມ ແລະ ໄທ, ປະຈຸບັນ ເປັນຜູ້ຊ່ຽວຊານກ່ຽວກັບບັນຫາຈີນ ຂື້ນກັບສູນຄົ້ນຄ້ວາ ອາຊີ 21 ຂອງຝລ່ັງ ຖືວ່າ:
“ ຈຸດປະສົງຂອງຈີນ ທີ່ຈະເຫັນໄດ້ງ່າຍ, ນັ້ນແມ່ນດ້ວຍການໃຊ້ ກຳລັງແຮງ, ຫຼືດ້ວຍການກະທຳພຽງລຳພັງຝ່າຍດຽວ ບັງຄັບໃຫ້ບັນດາປະເທດຕ້ອງຍອມຮັບວ່າ 80% ເນື້ອທີ່ເຂດທະເລຕາເວັນອອກແມ່ນນອນໃນ “ເສັ້ນລີ້ນງົວ 9 ຕອນ’’ ແມ່ນເຂດນ່ານທະເລຂອງຈີນ. ນັ້ນແມ່ນຈຸດປະສົງທຳອິດ. ເປັນຫຍັງແນວນັ້ນ ? ນັ້ນແມ່ນຍ້ອນຈີນຢາກຢຶດເອົາແຫຼ່ງຊັບພະຍາກອນທັງໝົດ. ແຕ່ແຫຼ່ງຜົນປະໂຫຍດດ້ານຊັບພະຍາກອນນັ້ນ ພຽງແຕ່ແມ່ນຮູບນອກເພື່ອປົກປິດຄວາມຈິງ, ນັ້ນແມ່ນຈີນຢາກສ້າງທາງເດີນທີ່ປອດໄພໃຫ້ແກ່ບັນດາກຳປັ່ນດຳນ້ຳຂອງຕົນເຂົ້າອອກຖານທີ່ໝັ້ນກອງທັບເຮືອຢູ່ເກາະໄຮໜຳ, ຜ່ານບັນດາເຂດນ້ຳເລິກຢູ່ທະເລຕາເວັນອອກຫຼືແລ່ນຜ່ານຊອງແຄບທະເລລະຫວ່າງ ຟີລິບປິນ ແລະ ໄຕ້ຫວັນ ”
ໃນຂະນະນັ້ນ, ທ່ານ Anton Svetov , ນັກວິຊາການສະພາການຕ່າງປະເທດລັດເຊຍ ຖືວ່າ ບັນດາກໍລະນີເກາະຜິດຄ້າຍຄືກັນຂອງຈີນ ໄດ້ເຄີຍເກີດຂຶ້ນຫຼາຍຄັ້ງກັບບາງປະເທດເພື່ອນບ້ານໃກ້ຄຽງໃນອະດີດຕະການ, ແຕ່ໃນຄັ້ງນີ້ ແມ່ນກ້າວໄປໄກກ່ວາ ແລະ ເປັນອັນຕະລາຍກ່ວາ ດ້ວຍການກະທຳທີ່ຖືກຂຶ້ນແຜນລະອຽດ. ເລື່ອງຈີນຈັດສົ່ງກອງເຮືອຫຼາຍລຳເພື່ອຄຸ້ມກັນແກ່ຮ້ານເຈາະນ້ຳມັນນັ້ນ ແມ່ນໄດ້ສໍ່ສະແດງໃຫ້ເຫັນທຸກສິ່ງທຸກຢ່າງໃນກົນອຸບາຍຂອງຈີນ.
ທຳລາຍທຸກຄວາມມານະພະຍາຍາມສ້າງສາຍພົວພັນຮ່ວມມືມິດຕະພາບ
ເພື່ອປະຕິບັດຄວາມມັກໃຫຍ່ໄຝ່ສູງຂອງຕົນ, ປັກກິງບໍ່ຫົວຊາຕໍ່ກົດໝາຍສາກົນ, ບັນດາສັນຍາທີ່ໄດ້ໝັ້ນໝາຍ, ນຳໃຊ້ທຸກມາດຕະການ, ຈາກການນາບຂູ່ເຖິງການນຳໃຊ້ກຳລັງອາວຸດທີ່ມີຕໍ່ໍ່ບັນດາປະເທດບ້ານໃກ້ເຮືອນຄຽງທີ່ມີຜົນປະໂຫຍດ, ອະທິປະໄຕບົນທະເລຕາເວັນອອກ. ບັນດາການກະທຳທີ່ເປັນອັນຕະລາຍຂອງຈີນພວມເຮັດໃຫ້ຫາງສຽງບໍ່ພໍໃຈ.
ປີ 2011, ຈີນໄດ້ລົງນາມກັບຫວຽດນາມໃນສັນຍາກ່ຽວກັບບັນດາຫຼັກການພື້ນຖານຊີ້ນຳແກ້ໄຂບັນຫາບັນທະເລ, ຕາມນັ້ນແລ້ວ, 2 ຝ່າຍເຫັນດີແກ້ໄຂບັນດາຄວາມຂັດແຍ້ງຢູ່ທະເລຕາເວັນອອກໂດຍສັນຕິວິທີ, ຜ່ານການເຈລະຈາໂດຍມິດຕະພາບ. ບໍ່ພຽງແຕ່ສົ່ງຜົນສະທ້ອນເຖິງການພົວພັນ 2 ຝ່າຍເທົ່ານັ້ນ, ການທີ່ຈີນໄດ້ຈົງໃຈນຳຮ້ານເຈາະນຳ້ມັນເຂົ້າເຄື່ອນໄຫວຢູ່ເຂດນ່ານທະເລຂອງຫວຽດນາມນັ້ນ ຍັງແມ່ນການກະທຳທຳລາຍຄວາມເຊື່ອໝັ້ນຂອງທັງກຸ່ມອາຊຽນ, ໄປຝືນກັບຈິດໃຈຂອງຖະແຫຼງການກ່ຽວກັບວິທີການປະພຶດຂອງຝ່າຍຕ່າງໆຢູ່ທະເລຕາເວັນອອກ (DOC) ຊຶ່ງຈີນໄດ້ລົງນາມກັບບັນດາປະເທດອາຊຽນແຕ່ປີ 2002. ທ່ານ Gregory Poling , ຜູ້ຊ່ຽວຊານສັງກັດສູນຄົ້ນຄ້ວາຍຸດທະສາດ ແລະ ສາກົນຂອງອາເມລິກາ ຢືນຢັນວ່າ :
“ແຕ່ລະບາດກ້າວຄືແນວນີ້, ຈີນ ໄດ້ທຳລາຍເຈດຕະນາດີ ຊື່ງເຂົາເຈົ້າໄດ້ສ້າງຂຶ້ນຢູ່ ອາຊີຕາເວັນອອກສຽງໃຕ້, ຍູ້ໃຫ້ບັນດາປະເທດ ບ້ານໃກ້ເຮືອນຄຽງນັບມື້ນັບອອກໄກ, ກາຍເປັນຜູ້ລົບກວນໃນລະບົບສາກົນ, ບໍ່ອາດກາຍເປັນປະເທດມະຫາອຳນາດທີ່ພວມພົ້ນເດັ່ນຂຶ້ນ ແລະ ຄວາມຮັບຜິດຊອບໃນປະຊາຄົມໂລກ. ປະຊາຊາດຈະບໍ່ມີຄວາມໄວ້ເນື້ອເຊື່ອໃຈຕໍ່ຄຳໝັ້ນສັນຍາຂອງຈີນ ສຳລັບບັນດາສັນຍາອື່ນ.”
ການກະທຳທີ່ອັນຕະລາຍໃນການພົວພັນກັບສາກົນ
ຫາງສຽງສາກົນຖືວ່າ: ດ້ວຍການກະທຳຄືແນວນີ້, ປັກກີ່ງ ໄດ້ຂ້າມຜ່ານຂອບເຂດທີ່ສຳຄັນ ແລະ ເຮັດໃຫ້ຄວາມໄວ້ເນື້ອເຊື່ອໃຈຂອງປະເທດຫນຶ່ງທີ່ຖືວ່າ ຕົນເອງເປັນປະເທດມະຫາອຳນາດ, ຍາມໃດກໍພະຍາຍາມໃນການສ້າງການພົວພັນກັບບັນດາປະເທດບ້ານໃກ້ເຮືອນຄຽງຖືກຫລຸດລົງ. ແຕ່ ການກະທຳນີ້ຂອງຈີນ ຍັງເປັນການສ້າງເປັນປະຖົມປັດໄຈທີ່ອັນຕະລາຍໃນການພົວພັນສາກົນ, ນັ້ນແມ່ນປະເທດຫນຶ່ງສາມາດສວຍໃຊ້ຂອບຂະຫນາດ ແລະ ກຳລັງແຮງ ເພື່ອນາບຂູ່ປະເທດບ້ານໃກ້ເຮືອນຄຽງ, ເມີນເສີຍຕໍ່ກົດໝາຍສາກົນ. ຫາງສຽງຖືວ່າ:ຖ້າການກະທຳນີ້ບໍ່ຖືກຄັດຄ້ານ ແລະ ສະກັດກັ້ນ, ຈີນ ຈະສືບຕໍ່ຍູ້ແຮງບັນດາການກະທຳເກາະຜິດ, ເຮັດໃຫ້ໂລກກັບຄືນສູ່ໄລຍະວຸນວາຍ ດ້ວຍກຳລັງແຮງການທະຫານ ແລະ ກະຫາຍສົງຄາມອາດຈະສ້າງເປັນການປົກຄອງຂອງແຕ່ລະປະເທດ. ນີ້ບໍ່ແມ່ນສິ່ງທີ່ບັນດາປະເທດຮັກຫອມສັນຕິພາບປາດຖະຫນາ ເພາະວ່າ ມັນໄປຝືນກັບຜົນປະໂຫຍດຂອງປະຊາຄົມພາກພື້ນ ແລະ ສາກົນ.
ເປັນທີ່ຈະແຈ້ງແລ້ວວ່າ: ຫາງສຽງໂລກ ພວມຢາກໄດ້ຮັບຄຳຕອບຈາກຝ່າຍຈີນ. ອາດຈະຢືນຢັນວ່າ ວິທີ, ແນວຄິດ ແລະ ການກະທຳຂອງຈີນ ພວມໄປຝືນກັບທ່າອ່ຽງຕົ້ນຕໍໃນໂລກປະຈຸບັນ ແມ່ນການຮ່ວມມື, ເຄົາລົບ ແລະ ສ້າງຄວາມໄວ້ເນື້ອເຊື່ອໃຈເຊິ່ງກັນ ແລະ ກັນ ເພື່ອແກ້ໄຂ ຜົນປະໂຫຍດຂອງທຸກຝ່າຍ ໂດຍສັນຕິ ແລະ ກົມກຽວ.