(VOVWORLD) - ຕອນບ່າຍວັນທີ 17 ຕຸລາ, ຢູ່ຮ່າໂນ້ຍ, ອົງການຮ່ວມມື ແລະ ພັດທະນາເສດຖະກິດ (OECD) ໄດ້ສົມທົບກັບກະຊວງການຕ່າງປະເທດ ຫວຽດນາມ ແລະ ສະຖານທູດ ອົດສະຕາລີ ປະຈຳ ຫວຽດນາມ ຈັດເວທີປາໄສລັດຖະມົນຕີ OECD - ອາຊີຕາເວັນອອກສ່ຽງໃຕ້ ປີ 2022. ເວທີປາໄສດັ່ງກ່າວ ແມ່ນໜຶ່ງໃນບັນດາກິດຈະກຳສຳຄັນຂອງໂຄງການ ອາຊີຕາເວັນອອກສ່ຽງໃຕ້ (SEARP) ປີ 2022 ຂອງ OECD ເຊິ່ງໄດ້ດຳເນີນໃນລະຫວ່າງວັນທີ 17 – 18 ຕຸລາ ຢູ່ຮ່າໂນ້ຍ ແລະ ມີການນຳຂັ້ນສູງ, ຜູ້ຕາງໜ້າທີ່ມາຈາກ 38 ພື້ນຖານເສດຖະກິດຂຶ້ນກັບ OECD ແລະ ບັນດາປະເທດ ອາຊີຕາເວັນອອກສ່ຽງໃຕ້ ນັບຮ້ອຍຄົນເຂົ້າຮ່ວມ.
ຫຼາຍກິດຈະກຳນອນໃນລາຍການ SEARP 2022 ຖືກຈັດຂຶ້ນຕາມຂໍ້ລິເລີ່ມຂອງ ອົດສະຕາລີ ແລະ ຫວຽດນາມ ໃນຖານະເປັນປະທານຮ່ວມ, ເປັນຂີດໝາຍແກ່ບາດກ້າວພັດທະນາໃໝ່ໃນວິວັດການຮ່ວມມືທີ່ນັບມື້ນັບແໜ້ນແຟ້ນ, ມີປະສິດທິຜົນ ເພື່ອຄວາມວັດທະນາຖາວອນລວມ ແລະ ການພັດທະນາແບບຍືນຍົງລະຫວ່າງ OECD ເຊິ່ງເປັນອົງການທີ່ສະມາຊິກສ່ວນຫຼາຍແມ່ນບັນດາພື້ນຖານເສດຖະກິດພັດທະນາ ກັບ ອາຊີຕາເວັນອອກສ່ຽງໃຕ້ ເຊິ່ງເປັນພາກພື້ນເສດຖະກິດທີ່ຂະຫຍັນຂັນເຄື່ອນ ມີບົດບາດສຳຄັນທີ່ສຸດໃນແຜນທີ່ເສດຖະກິດຂອງພາກພື້ນ ແລະ ໃນໂລກ, ເປັນເຂດໃຈກາງຂອງສັນຍາການຄ້າເສລີສະບັບຕ່າງໆ ທີ່ມີຂອບຂະໜາດໃຫຍ່ສຸດໃນໂລກ ເປັນຕົ້ນແມ່ນ ສັນຍາຄູ່ຮ່ວມມືເສດຖະກິດຮອບດ້ານພາກພື້ນ (RCEP), ສັນຍາເສດຖະກິດຮອບດ້ານ ແລະ ກ້າວໜ້າຂ້າມ ປາຊີຟິກ (CPTPP)…
 ຜູ້ແທນ ຫວຽດນາມ ໂອ້ລົມກັບຜູ້ແທນຕ່າງປະເທດທີ່ເຂົ້າຮ່ວມເວທີປາໄສ (ພາບ: baoquocte.vn) |
ຂະບວນວິວັດແຫ່ງການຮ່ວມມືລະຫວ່າງ OECD - ອາຊີຕາເວັນອອກສ່ຽງໃຕ້ ນັບມື້ນັບແໜ້ນແຟ້ນ
ໂດຍຮັບຮູ້ໄດ້ວ່າ ອາຊີຕາເວັນອອກສ່ຽງໃຕ້ ກໍຄື ແຕ່ລະປະເທດສະມາຊິກໃນພາກພື້ນມີບົດບາດ ແລະ ທີ່ຕັ້ງພູມີສາດເສດຖະກິດທີ່ສຳຄັນ, ນັບແຕ່ປີ 2007, OECD ໄດ້ຊຸກຍູ້ການຮ່ວມມື ກັບພາກພື້ນ ອາຊີຕາເວັນອອກສ່ຽງໃຕ້ຢ່າງແຮງ, ຖືພາກພື້ນນີ້ແມ່ນບຸລິມະສິດຍຸດທະສາດ. ຮອດປີ 2014, ຕາມຂໍ້ລິເລີ່ມຂອງ ຍີ່ປຸ່ນ, “ໂຄງການອາຊີຕາເວັນອອກສ່ຽງໃຕ້ຂອງ OECD” (SEARP) ໄດ້ຮັບການສ້າງຕັ້ງຂຶ້ນ ແລະ ກາຍເປັນ 1 ໃນ 6 ໂຄງການລະດັບພາກພື້ນຂອງ OECD. SEARP ແນໃສ່ເປົ້າໝາຍໜູນຊ່ວຍວິວັດທະນາການປະຕິຮູບເສດຖະກິດຂອງບັນດາປະເທດໃນພາກພື້ນ ອາຊີຕາເວັນອອກສ່ຽງໃຕ້ ຜ່ານການແບ່ງປັນບົດຮຽນປະສົບການພັດທະນາ, ຜ່ານນັ້ນ ກໍ່ຊຸກຍູ້ການເຕີບໂຕເສດຖະກິດແບບຍືນຍົງ ແລະ ກວມລວມໃນ 13 ຂົງເຂດຮ່ວມມື. ມາຮອດປັດຈຸບັນ, ມີຫຼາຍໝາກຜົນຮ່ວມມືສຳຄັນທີ່ບັນລຸໄດ້ໃນໂຄງການນີ້ ໄດ້ຮັບການຮັບຮູ້ຈາກທັງສອງຝ່າຍ ແລະ ຕີລາຄາສູງຈາກປະຊາຄົມສາກົນ.
ໃນໂຄງການ SEARP 2022, ສອງຝ່າຍສືບຕໍ່ສະແດງຄວາມຫວັງ ແລະ ຄວາມຕັດສິນໃຈຊຸກຍູ້ວິວັດການຮ່ວມມືທີ່ມີປະສິດທິຜົນໃນປັດຈຸບັນຢ່າງແຮງກວ່າອີກ. ຕາມນັ້ນແລ້ວ, OECD ແລະ ອາຊີຕາເວັນອອກສ່ຽງໃຕ້ ໄດ້ເຫັນດີສ້າງເຄືອຂ່າຍວິສາຫະກິດດ້ວຍເປົ້າໝາຍ ເພີ່ມທະວີການຮ່ວມມືລະຫວ່າງປະຊາຄົມວິສາຫະກິດ ກໍຄືການໂອ້ລົມສົນທະນາລະຫວ່າງວິສາຫະກິດ ກັບລັດຖະບານຂອງບັນດາປະເທດ ໃນຄວາມມານະພະຍາຍາມຊຸກຍູ້ການຟື້ນຟູ, ພັດທະນາເສດຖະກິດຂອງພາກພື້ນ ອາຊີຕາເວັນອອກສ່ຽງໃຕ້. ສອງຝ່າຍກໍເຫັນດີເປັນເອກະພາບຕໍ່ບາງການກຳນົດທິດທາງການຮ່ວມມືສຳຄັນອື່ນໆ ກ່ຽວກັບພາສີອາກອນ, ພະລັງງານສະອາດ, ນະໂຍບາຍລົງທຶນ, ການເງິນການບໍລິໂພກ; ພ້ອມທັງຮັບຮອງເອົາແຜນການດຳເນີນງານການຮ່ວມມືລະຫວ່າງ ASEAN – OECD ແລະ ແຜນການດຳເນີນງານການຮ່ວມມືລະຫວ່າງ ຫວຽດນາມ - OECD ໄລຍະ 2022 – 2026. ເປັນອັນວ່າ, ສະເພາະໃນປີ 2022 ນີ້, OECD ແລະ ອາຊີຕາເວັນອອກສ່ຽງໃຕ້ບັນລຸໄດ້ຂໍ້ຕົກລົງວ່າດ້ວຍການຮ່ວມມືສຳຄັນຫຼາຍສະບັບ.
 ທ່ານຮອງນາຍົກລັດຖະມົນຕີ ຜູ້ປະຈຳການລັດຖະບານຫວຽດນາມ ຟ້າມບິ່ງມິງ ກ່າວຄຳເຫັນທີ່ເວທີປາໄສ (ພາບ: baoquocte.vn) |
ທີ່ຕັ້ງບົດບາດ ແລະ ຂີດໝາຍຂອງ ຫວຽດນາມ
ອາດເຫັນໄດ້ວ່າ ວິວັດການຮ່ວມມືດ້ວຍຫຼາຍຜົນງານສຳຄັນລະຫວ່າງ OECD ແລະ ອາຊີຕາເວັນອອກສ່ຽງໃຕ້ ໃນຊຸມປີຜ່ານມາ ແມ່ນມີຂີດໝາຍຢ່າງເດັ່ນຊັດ ພ້ອມດ້ວຍການປະກອບສ່ວນສຳຄັນຂອງ ຫວຽດນາມ.
ນັບແຕ່ເມື່ອໂຄງການ SEARP ໄດ້ຮັບການສ້າງຕັ້ງຂຶ້ນ (ປີ 2014), ຫວຽດນາມ ຍາມໃດກໍແມ່ນສະມາຊິກທີ່ຕັ້ງໜ້າຂອງໂຄງການ. ແຕ່ລະປີ, ຫວຽດນາມ ລ້ວນແຕ່ຈັດສົ່ງຄະນະຜູ້ແທນໄປເຂົ້າຮ່ວມ ແລະ ປະກອບສ່ວນຢູ່ເວທີປາໄສລະດັບພາກພື້ນຂອງ OECD ໃນຂອບເຂດຂອງໂຄງການ SEARP. ໃນໄລຍະແຕ່ປີ 2016 – 2020, ຫວຽດນາມ ໄດ້ສົມທົບກັບ OECD ຈັດຫຼາຍເຫດການ, ກອງປະຊຸມສຳມະນາສຳຄັນ. ກຳລັງຄວາມສາມາດ ແລະ ການປະກອບສ່ວນສຳຄັນຂອງ ຫວຽດນາມ ເຂົ້າໃນໂຄງການ SEARP ໄດ້ຮັບການຮັບຮອງດ້ວຍເລື່ອງ ຫວຽດນາມ ໄດ້ຮັບຄວາມໄວ້ວາງໃຈມອບໃຫ້ດຳລົງຕຳແໜ່ງເປັນປະທານໂຄງການ ອາຍຸການ 2022 – 2025 ຮ່ວມກັບ ອົດສະຕາລີ. ນີ້ໄດ້ຮັບຖືວ່າແມ່ນຂີດໝາຍສຳຄັນ ແລະ ມີຄວາມໝາຍທີ່ສຸດ, ເພາະວ່າ ນີ້ກໍເປັນຄັ້ງທຳອິດທີ່ ຫວຽດນາມ ດຳລົງໜ້າທີ່ເປັນປະທານກົນໄກຂອງອົງການໜຶ່ງທີ່ມີມາດຕະຖານສູງ ເຊິ່ງ ຫວຽດນາມ ບໍ່ແມ່ນສະມາຊິກ (OECD).
ເມື່ອແບ່ງປັນຢູ່ເວທີປາໄສລັດຖະມົນຕີ OECD - ອາຊີຕາເວັນອອກສ່ຽງໃຕ້ ປີ 2022 ໃນວັນທີ 17 ຕຸລາ, ທ່ານເລຂາທິການໃຫຍ່ OECD Mathias Cormann ໄດ້ຕີລາຄາສູງຕໍ່ເລື່ອງ ເປັນຄັ້ງທຳອິດ ທີ່ ຫວຽດນາມ ຮັບດຳລົງຕຳແໜ່ງເປັນປະທານຮ່ວມ SEARP ອາຍຸການ 2022 – 2025. ສິ່ງດັ່ງກ່າວຢັ້ງຢືນໃຫ້ເຫັນຄວາມເຊື່ອໝັ້ນຂອງບັນດາປະເທດສະມາຊິກ OECD ແລະ ບັນດາປະເທດໃນພາກພື້ນຕໍ່ກຳລັງຄວາມສາມາດຂອງ ຫວຽດນາມ ໃນການຕິດພັນ OECD ກັບ ພາກພື້ນໄດ້ຢ່າງມີປະສິດທິຜົນ. ທ່ານເລຂາທິການໃຫຍ່ OECD ກໍຕີລາຄາສູງຕໍ່ການປະກອບສ່ວນຢ່າງຕັ້ງໜ້າຂອງ ຫວຽດນາມ ໃນໂຄງການ SEARP ໃນຖານະເປັນປະທານຮ່ວມ, ພິເສດແມ່ນໃນການເປັນປະທານຈັດຫຼາຍເຫດການຂອງ OECD ຢູ່ ຫວຽດນາມ; ພ້ອມທັງຢັ້ງຢືນວ່າ ຈະສືບຕໍ່ສົມທົບກັບ ຫວຽດນາມ ເພື່ອຊຸກຍູ້ການຮ່ວມມືລະຫວ່າງ OECD ກັບ ບັນດາປະເທດອາຊີຕາເວັນອອກສ່ຽງໃຕ້ ແລະ ຜັນຂະຫຍາຍການປະຕິບັດແຜນການດຳເນີນງານ OECD - ອາຊຽນ.
ສ່ວນທ່ານຮອງນາຍົກລັດຖະມົນຕີ ຜູ້ປະຈຳການລັດຖະບານຫວຽດນາມ ຟ້າມບິ່ງມິງ ໄດ້ເນັ້ນໜັກວ່າ ໃນຖານະເປັນປະທານຮ່ວມ ໂຄງການ SEARP ໄລຍະ 2022 – 2025, ຫວຽດນາມ ພ້ອມແລ້ວທີ່ຈະປະກອບສ່ວນເພື່ອຊຸກຍູ້ການພົວພັນຮ່ວມມືລະຫວ່າງ OECD ກັບ ອາຊີຕາເວັນອອກສ່ຽງໃຕ້ ໃຫ້ນັບມື້ນັບຮອບດ້ານ, ມີປະສິດທິຜົນ, ແທດຈິງ ແລະ ຍືນຍົງກວ່າ. SEARP 2022 ແມ່ນພະຍານຫຼັກຖານໃໝ່ ແລະ ຈະແຈ້ງທີ່ສຸດ ແກ່ວິວັດການຮ່ວມມືທີ່ນັບມື້ນັບແໜ້ນແຟ້ນ, ມີປະສິດທິຜົນລະຫວ່າງສອງອົງການຈັດຕັ້ງ/ກົນໄກຮ່ວມມືດ້ານເສດຖະກິດໃຫຍ່ຂອງໂລກ; ພ້ອມທັງຢັ້ງຢືນບົດບາດ, ການປະກອບສ່ວນທີ່ນັບມື້ນັບສຳຄັນຂອງ ຫວຽດນາມ ໃນຂະບວນວິວັດແຫ່ງການຮ່ວມມືເພື່ອສັນຕິພາບ ແລະ ການພັດທະນາແບບຍືນຍົງນີ້./.