ສິ່ງທີ່ໜ້າສົນໃຈນັ້ນແມ່ນ, ເຕເຮຣານ ປະຕິເສດແຫຼ່ງຂ່າວທີ່ວ່າ ເຮືອບິນບໍ່ມີຄົນຂັບລຳ 1 ຂອງປະເທດນີ້ຖືກອາເມລິກາ ຍິງຕົກຢູ່ຊ່ອງແຄບທະເລ Hormuz, ພ້ອມທັງຖະແຫຼງວ່າ ປະເທດນີ້ໄດ້ທຳລາຍສາຍສືບລາຊະການລັບສາຍໜຶ່ງຂອງອົງການສືບລາຊະການລັບສູນກາງອາເມລິກາ (CIA) ແລະ ຈັບຕົວຫຼາຍຄົນ, ບາງຄົນຖືກຕັດສິນລົງໂທດປະຫານຊີວິດ. ບັນດາການຜັນແປຢ່າງລຽນຕິດໄດ້ເຮັດໃຫ້ບັນຍາກາດຢູ່ເຂດນີ້ແມ່ນຮ້ອນເຮັ່ງທີ່ສຸດ.

        ເຫດການຫຼ້າສຸດ, ວັນທີ 22 ກໍລະກົດ, ຜູ້ບັນຊາການກຳລັງປ້ອງກັນອາກາດ - ກອງທັບອາກາດຂຶ້ນກັບກຳລັງທະຫານພິທັກຮັກສາປະຕິວັດອິດສະລາມອີຣານ (IRGC), ພົນຈັດຕະວາ Amir Ali Hajizadeh ຖະແຫຼງວ່າ, ທ່ານປະທານາທິບໍດີອາເມລິກາ Donald Trump ໄດ້ເວົ້າຕົວະກ່ຽວກັບເຫດກ່ຳປັ່ນສູ້ຮົບອາເມລິກາ ຍິງເຮືອບິນບໍ່ມີຄົນຂັບຂອງອີຣານ ຕົກ. ໃນວັນດຽວກັນ, ເຕເຮຣານ ໄດ້ທຳລາຍສາຍສືບລາຊະການລັບຂອງ CIA ແລະ ຈັບຕົວ 17 ຄົນ, ໃນນັ້ນບາງຄົນຖືກຕັດສິນລົງໂທດປະຫານຊີວິດ. ກ່ອນໜ້ານັ້ນ, ວັນທີ 19 ກໍລະກົດ, ອີຣານ ໄດ້ກັກກ່ຳປັ່ນຂອງອັງກິດ ລຳ 1 ເມື່ອເດີນທາງໄປຜ່ານຊ່ອງແຄບທະເລ Hormuz ດ້ວຍຄຳກ່າວຫາລະເມີດກົດໝາຍ.

ຍຸດທະສາດກໍ່ຄວາມກົດດັນສູງສຸດຂີດຂອງວໍຊິງຕັນ

        ຕາມຄຳກ່າວຫາຂອງເຕເຮຣານ ແລ້ວ, ກ່ຳປັ່ນຂອງອັງກິດ ຕັ້ງໃຈ “ມອດເຄື່ອງຈັບຈຸດທີ່ຕັ້ງ” ແລະ ປະລະສັນຍານກ່າວເຕືອນຈາກຝ່າຍອີຣານ ເປັນຫຼາຍຄັ້ງກ່ອນທີ່ຖືກກັກ. ໃນຂະນະນັ້ນ, ບໍລິສັດ Stena Bulk (ຊູແອັດ) ຄຸ້ມຄອງກ່ຳປັ່ນຂົນສົ່ງນ້ຳມັນພັດຢັ້ງຢືນວ່າ ຍາມໃດກ່ຳປັ່ນກໍ່ປະຕິບັດຕາມບັນດາຂໍ້ກຳນົດໃນການເດີນທະເລສາກົນ. ອັງກິດ ມີປະຕິກິລິຍາທີ່ແຂງກະດ້າງເມື່ອກ່າວເຕືອນອີຣານ ຈະຖືກຮັບຜົນຮ້າຍຢ່າງຮ້າຍແຮງ ຖ້າຫາກບໍ່ປ່ອຍກ່ຳປັ່ນຂົນສົ່ງນ້ຳມັນດັ່ງກ່າວ. ເຖິງວ່າໄດ້ຕຳໜິຕິຕຽນຕໍ່ການກະທຳຂອງອີຣານ ແລະ ໃຫ້ຄຳໝັ້ນສັນຍາຈະມີບັນດາມາດຕະການໂຕ້ຕອບຢ່າງແຂງແຮງ, ແຕ່ອັງກິດ ພັດຢັ້ງຢືນວ່າ ປະເທດນີ້ຈະບໍ່ພິຈາລະນາມາດຕະການດ້ານການທະຫານ ຫາກຢາກແກ້ເລື່ອງນັ້ນການຜ່ານທາງການທູດ.

        ເຖິງແນວນັ້ນກໍ່ຕາມ, ໃນຄັ້ງນີ້ ອາເມລິກາ ພັດບໍ່ມີການກະທຳໃດໆເພື່ອໂຕ້ຕອບ ເມື່ອອີຣານ “ມີການກະທຳ” ຕໍ່ພັນທະມິດຂອງອາເມລິກາ. ແທນທີ່ນັ້ນ, ທ່ານປະທານາທິບໍດີອາເມລິກາ D.Trump ໄດ້ອອກສຽງຕຳໜິຕິຕຽນອີຣານ ແລະ ຢືນຢັນວ່າຈະແລກປ່ຽນກັບບັນຫາດັ່ງກ່າວກັບອັງກິດ. ເປັນທີ່ຈະແຈ້ງແລ້ວວ່າ, ອາເມລິກາ ຢາກຫຼີກລ້ຽງການປະທະກັນດ້ານການທະຫານກັບເຕເຮຣານ, ພິເສດເມື່ອການເລືອກຕັ້ງປະທານາທິບໍດີອາເມລິກາ ປີ 2020 ທີ່ໃກ້ຈະມາຮອດນີ້ແລ້ວ. ແທນທີ່ນາບຂູ່ ມີການກະທຳດ້ານການທະຫານ, ອາເມລິກາ ຢາກເພີ່ມຄວາມກົດດັນກັບອີຣານ ໃຫ້ຫຼາຍຂຶ້ນ, ນຳໃຊ້ຍຸດທະສາດກໍ່ຄວາມກົດດັນຢ່າງສຸດຂີດ “ເພື່ອຈຳກັດການເຄື່ອນໄຫວສົ່ງອອກນ້ຳມັນ ເຊິ່ງເຄີຍແມ່ນກະດູກສັນຫຼັງໃນພື້ນຖານເສດຖະກິດຂອງປະເທດນີ້”. ໃນຕົວຈິງ, ອີຣານ ປະສົບກັບຄວາມຫຍຸ້ງຍາກຕໍ່ບັນດາຄຳສັ່ງລົງໂທດຂອງອາເມລິກາ. ການສົ່ງອອກນ້ຳມັນຂອງອີຣານ ຖືກຫຼຸດລົງຫຼາຍພໍສົມຄວນ. ບັນດາຄຳສັ່ງລົງໂທດຂອງອາເມລິກາ ກໍເຮັດໃຫ້ເອີລົບ ລັງເລໃຈໃນການລົງທຶນເຂົ້າອີຣານ, ເຖິງວ່າບາງປະເທດເອີລົບ ແມ່ນບັນດາຝ່າຍເຂົ້າຮ່ວມຂໍ້ຕົກລົງນິວເຄຼຍກໍ່ຕາມ. ທີ່ຈິງແລ້ວ, ອາເມລິກາ ສືບຕໍ່ຮຽກຮ້ອງໃຫ້ເອີລົບ ເພີ່ມບັນດາຄຳສັ່ງລົງໂທດແນໃສ່ອີຣານ ດ້ວຍຈຸດປະສົງບັງຄັບໃຫ້ ເຕເຮຣານ ມີພຽງທາງເລືອກດຽວຄືເຂົ້າຮ່ວມການເຈລະຈາເທົ່ານັ້ນ.

ການແກ່ດຶງຢູ່ປາກເຫວສົງຄາມ

        ນັບແຕ່ພາຍຫຼັງການປະຕິວັດອິດສະລາມຢູ່ອີຣານ ເມື່ອປີ 1979, ເຕເຮຣານ ໄດ້ກ້າວເຂົ້າສູ່ໄລຍະເປັນປໍລະປັກທີ່ແກ່ຍາວກັບວໍຊິງຕັນ. ເຖິງຢ່າງໃດກໍ່ຕາມ, ພາຍໃຕ້ສະໄໝຂອງທ່ານປະທານາທິບໍດີອາເມລິກາ Brack Obama, ການພົວພັນລະຫວ່າງ 2 ປະເທດໄດ້ຮັບການປັບປຸງ ດ້ວຍເລື່ອງ 2 ປະເທດ ແລະ ບັນດາປະເທດມະຫາອຳນາດໃນໂລກ ລົງນາມໃນຂໍ້ຕົກລົງນິວເຄຼຍເມື່ອປີ 2015 (JCPOA), ຕາມນັ້ນແລ້ວ, ອີຣານ ຈຳກັດໂຄງການນິວເຄຼຍເພື່ອແລກເອົາການຫຼຸດຜ່ອນຄຳສັ່ງລົງໂທດ. ແຕ່ລົມປ່ຽນທິດນັບແຕ່ເມື່ອທ່ານ D.Trump ຂຶ້ນກຳອຳນາດເປັນປະທານາທິບໍດີອາເມລິກາ. ບໍ່ພຽງແຕ່ຖອນຕົວອອກຈາກ JCPOA ເທົ່ານັ້ນ, ທ່ານ D.Trump ໄດ້ດຳເນີນບັ້ນກໍ່ຄວາມກົດດັນສູງສຸດ, ຈັດວາງບັນດາຄຳສັ່ງລົງໂທດຕໍ່ອີຣານ ຄືນໃໝ່.

        ການພົວພັນລະຫວ່າງອາເມລິກາ - ອີຣານ ນັບມື້ນັບຮ້າຍແຮງລົງ ນັບແຕ່ 2 ເດືອນມໍ່ໆມານີ້. ເຖິງຢ່າງໃດກໍ່ຕາມ, ມີຄວາມຈິງທີ່ວ່າ ເຖິງວ່າ 2 ຝ່າຍມີການໂຕ້ຕອບກັນທີ່ແຂງກະດ້າງ, ຄຳກ່າວເຕືອນທີ່ຮ້າຍແຮງ, ວາງ “ເສັ້ນແດງ” ກໍ່ຕາມ, ແຕ່ທັງ 2 ຝ່າຍລ້ວນແຕ່ຫຼີກລ້ຽງການປະທະກັນດ້ານການທະຫານ. ພາຍຫຼັງເຫດອີຣານ ຍິງເຮືອບິນສອດແນມບໍ່ມີຄົນຂັບຂອງອາເມລິກາ ຕົກຢູ່ຊ່ອງແຄບທະເລ Hormuz ເມື່ອເດືອນ ມິຖຸນາ, ອາເມລິກາ ໄດ້ຖອນຂໍ້ຕົກລົງບຸກໂຈມຕີທາງອາກາດໂຕ້ຕອບ ເຊິ່ງແທນທີ່ນັ້ນແມ່ນຈັດວາງບັນດາຄຳສັ່ງລົງໂທດແນໃສ່ບັນດາເຈົ້າໜ້າທີ່ແຖວໜ້າຂອງອີຣານ. ກໍ່ເຊັ່ນດຽວກັນນັ້ນ, ເຕເຮຣານ ກໍ່ໂຕ້ຕອບອາເມລິກາ ດ້ວຍເລື່ອງຖອນຄຳໝັ້ນສັນຍານິວເຄຼຍສຳຄັນທີ່ສຸດຈຳນວນໜຶ່ງ ແລະ ເສີມທາດຢູລານຽມ ລື່ນກາຍການກຳນົດທີ່ໄດ້ຮັບອະນຸຍາດ.

        ເຫດການໃນຄັ້ງນີ້ກໍ່ຄ້າຍຄືກັນ, ເຖິງວ່າໄດ້ນາບຂູ່ ແລະ ກ່າວເຕືອນອີຣານ, ແຕ່ທ່ານປະທານາທິບໍດີ D.Trump ກໍ່ສົ່ງທ່ານສະມາຊິກສະພາສູງພັກສາທາລະນະ Rand Paul ມາພົບປະກັບທ່ານລັດຖະມົນຕີການຕ່າງປະເທດອີຣານ Mohammad Javad Zarif ທີ່ນິວຢອກ, ເພື່ອແນໃສ່ຊອກຫາທາງອອກໃຫ້ແກ່ວິກິດການຢູ່ເຂດອ່າວ. ອີຣານ ກໍ່ໄດ້ປະຕິບັດຍຸດທະສາດທີ່ຄ້າຍຄືກັນ. ດ້ານໜຶ່ງ, ເຕເຮຣານ “ອອກສຽງ” ກ່ຽວກັບການໄປມາຢ່າງເສລີຢູ່ເຂດອ່າວເປີເຊຍ ແລະ ກ່າວເຕືອນວ່າ ບໍ່ວ່າການບຸກໂຈມຕີດ້ານການທະຫານໃດໆທີ່ຕ້ານຄືນປະເທດນີ້ລ້ວນແຕ່ຖືກໂຕ້ຕອບຢ່າງເໝາະສົມ. ແຕ່ດ້ານອື່ນ, ອີຣານ ກໍ່ເປີດໂອກາດເພື່ອເພີ່ມເຕີ່ມບັນດາຂໍ້ມາດຕາໃນຂໍ້ຕົກລົງນິວເຄຼຍ ຖ້າຫາກບັນດາຄຳສັ່ງລົງໂທດຖືກຍົກເລີກ, ຊ້ຳບໍ່ໜຳຝ່າຍ ເຕເຮຣານ ຍັງສະເໜີການພົບປະໂດຍກົງ. ສົງຄາມລະຫວ່າງອາເມລິກາ - ອີຣານ ຈະບໍ່ເກີດຂຶ້ນຈຸດເວລານີ້. ເຖິງຢ່າງໃດກໍ່ຕາມ, ທຸກຄວາມຂັດແຍ້ງລ້ວນແຕ່ມີກຳນົດ. ຕາມບັນດານັກໄຈ້ແຍກແລ້ວ, ການລະຫຼີ້ນຢູ່ປາກເຫວສົງຄາມເຊິ່ງທັງ 2 ຝ່າຍພວມນຳໃຊ້ເພື່ອທົດສອບຄວາມອົດທົນກັນອາດຈະສ້າງຜົນກະທົບດ້ານກົງກັນຂ້າມ, ພຽງແຕ່ມີບັນຫາອັນນ້ອຍໆ ກໍ່ອາດເຮັດໃຫ້ເກີດສົງຄາມຢູ່ເຂດຕາເວັນອອກກາງ ແລະ ຮອດເວລານັ້ນຜົນຮ້າຍຂອງມັນຍາກທີ່ຈະຄາດຄະເນລ່ວງໜ້າໄດ້.