ວັນທີ 24/4, ທ່ານລັດຖະມົນຕີການຕ່າງປະເທດຈີນ ຫວາງອີ ໄດ້ສິ້ນສຸດການຢ້ຽມຢາມ 3 ປະເທດອາຊີຕາເວັນອອກສ່ຽງໃຕ້ຄື ລາວ, ກຳປູເຈຍ ແລະ ບຣູໄນດ້ວຍຄຳຖະແຫຼງວ່າ ປັກກິງໄດ້ບັນລຸຂໍ້ຕົກລົງ 4 ຂໍ້ກັບ 3 ປະເທດດັ່ງກ່າວໃນບັນຫາທະເລຕາເວັນອອກ. ການຢ້ຽມຢາມແມ່ນໄດ້ດຳເນີນໃນສະພາວະທີ່ສານກຳມະການຢູ່ລາໄຮປະເທດໂຮນລັງໃກ້ຈະປະກາດຄຳຕັດສິນສຸດທ້າຍກ່ຽວກັບເລື່ອງຟີລິບປິນຮ້ອງຟ້ອງຈີນກ່ຽວກັບບັນຫາທະເລຕາເວັນອອກ. ບັນດາຜູ້ຊ່ຽວຊານໄດ້ຊີ້ອອກວ່າ ຈຸດປະສົງຢູ່ເບື້ອງຫຼັງຂອງການຢ້ຽມຢາມຄັ້ງນີ້ ແມ່ນເພື່ອຊອກຫາວິທີກໍ່ຄວາມແບ່ງແຍກໂດຍເຈດຕະນາລະຫວ່າງບັນດາປະເທດອາຊຽນໃນການຂັດແຍ້ງກັນຢູ່ທະເລຕາເວັນອອກ.
 |
ດ້ວຍການອ້າງເຫດຜົນກ່ຽວກັບການຂັດແຍ້ງກັນຢູ່ທະເລຕາເວັນອອກທີ່ວ່າ : “ ບໍ່ແມ່ນບັນຫາລະຫວ່າງຈີນ ແລະ ອາຊຽນ, ບໍ່ຄວນປະໃຫ້ມັນສົ່ງຜົນສະທ້ອນເຖິງການພົວພັນຈີນ-ອາຊຽນ”, ຂໍ້ຕົກລົງ 4 ຂໍ້ ຊຶ່ງປັກກິງໄດ້ປະກາດນັ້ນ ແມ່ນເພື່ອແນໃສ່ດຶງດູດການສະໜັບສະໜູນທາງການທູດກ່ອນທີ່ສານກຳມະການຢູ່ລາໄຮຍົກອອກຄຳຕັດສິນກ່ຽວກັບກໍລະນີຟີລິບປີນຮ້ອງຟ້ອງເລື່ອງຈີນອ້າງເອົາສິດອະທິປະໄຕ “ ເສັ້ນລີ້ນງົວ 9 ຕອນ” ໂດຍຈີນໄດ້ກຳນົດພຽງລຳພັງຝ່າຍດຽວຢູ່ທະເລຕາເວັນອອກ.
ປັກກິງຊອກຫາພັນທະມິດໃນອາຊຽນ
ພາຍຫຼັງສິ້ນສຸດການຢ້ຽມຢາມ 3 ປະເທດ, ເມື່ອຖະແຫຼງໃນການປະຊຸມຂ່າວ, ທ່ານລັດຖະມົນຕີການຕ່າງປະເທດຈີນ ຫວາງອີ ໄດ້ເນັ້ນໜັກວ່າ ຈີນ ແລະ ທັງ 3 ປະເທດອາຊຽນໄດ້ເປັນເອກະພາບກັນວ່າ ການຂັດແຍ້ງກັນຢູ່ເກາະ, ຫາດດອນຫີນ, ເກາະນ້ຳຖ້ວມຢູ່ທະເລຕາເວັນອອກຈະ “ບໍ່ແມ່ນບັນຫາລະຫວ່າງຈີນ ແລະ ບັນດາປະເທດທັງໝົດໃນອາຊຽນ ”. ຈີນ, ລາວ, ກຳປູເຈຍ ແລະ ບຣູໄນ ກໍຢືນຢັນວ່າ ແຕ່ລະປະເທດລ້ວນແຕ່ມີສິດເລືອກເອົາວິທີແກ້ໄຂການຂັດແຍ້ງກັນຕາມກົດໝາຍສາກົນ ແລະ ບັນດາປະເທດອື່ນກໍຕ້ອງເຄົາລົບສິດນີ້.
ການຢ້ຽມຢາມລາວ, ກຳປູເຈຍ ແລະ ບຣູໄນຂອງທ່ານລັດຖະມົນຕີການຕ່າງປະເທດຈີນ ຫວາງອີຖືກດຳເນີນໃນສະພາວະທີ່ຄຳຕັດສິນຂອງສານກຳມະການສາກົນ PCA ໃນກໍລະນີຟີລິບປີນຮ້ອງຟ້ອງຈີນ ຄາດວ່າຈະປະກາດໃນທ້າຍເດືອນ 5 ແລະ ຕົ້ນເດືອນ 6 ແລະ ເບິ່ງຄືວ່າມັນຈະນຳມາເຊິ່ງຜົນປະໂຫຍດໃຫ້ແກ່ຟີລິບປີນ. ກ່ອນໜ້ານັ້ນ, ຈີນໄດ້ຖະແຫຼງປະຕິເສດສິດອຳນາດຂອງສານກຳມະການ ແລະ ເດັດດ່ຽວຍອມຮັບຕໍ່ການແກ້ໄຂການຂັດແຍ້ງແບບ 2 ຝ່າຍ ແລະ ຊອກຫາບັນດາພັນທະມິດເພື່ອພ້ອມກັນຄັດຄ້ານຄຳຕັດສິນຂອງສານ. ເພາະສະນັ້ນ, ການຢ້ຽມຢາມ 3 ປະເທດອາຊີຕາເວັນອອກສ່ຽງໃຕ້ຂອງທ່ານລັດຖະມົນຕີການຕ່າງປະເທດຈີນ ຫວາງອີ ໃນຄັ້ງນີ້ ແມ່ນບໍ່ນອນນອກເໜືອຈາກຈຸດປະສົງແກ່ດຶງເອົາການສະໜັບສະໜູນຂອງ 3 ປະເທດສະມາຊິກດັ່ງກ່າວຂອງອາຊຽນໃນບັນຫາທະເລຕາເວັນອອກ. ມີອີກສິ່ງໜຶ່ງທີ່ເປັນໜ້າສົນໃຈ ນັ້ນແມ່ນໃນບັນດາກອງປະຊຸມລັດຖະມົນຕີການຕ່າງປະເທດອາຊຽນ AMM ຊຶ່ງຄາດວ່າຈະດຳເນີນໃນລະດູຮ້ອນປີນີ້, ທັງລາວ, ກຳປູເຈຍ ແລະ ບຣູໄນ ຕ່າງກໍມີລັດຖະມົນຕີການຕ່າງປະເທດຄົນໃໝ່ເຂົ້າຮ່ວມ. ບໍ່ພຽງແຕ່ເທົ່ານັ້ນ, ປະເທດເຈົ້າພາບຈັດກອງປະຊຸມລັດຖະມົນຕີການຕ່າງປະເທດອາຊຽນ AMM ໃນປີນີ້ຈະແມ່ນປະເທດລາວ, ຊຶ່ງແມ່ນປະເທດບໍ່ກ່ຽວຂ້ອງເຖິງການຂັດແຍ້ງອະທິປະໄຕຢູ່ທະເລຕາເວັນອອກໂດຍກົງ. ດັ່ງນັ້ນ ບໍ່ແມ່ນເລື່ອງທຳມະຊາດຂະນະທີ່ຈີນແຕ່ງຕັ້ງລັດຖະມົນຕີການຕ່າງປະເທດໄປຢ້ຽມຢາມປະເທດເຫຼົ່ານັ້ນ ກ່ອນທີ່ດຳເນີນກອງປະຊຸມ AMM. ຜ່ານຄຳຖະແຫຼງດັ່ງກ່າວ ກໍຄືການຢ້ຽມຢາມ 3 ປະເທດອາຊີຕາເວັນອອກສ່ຽງໃຕ້ຂອງທ່ານລັດຖະມົນຕີການຕ່າງປະເທດຈີນ ຫວາງອີ ນັ້ນ, ບັນດາຜູ້ຊ່ຽວຊານຖືວ່າ ຈີນພວມຍູ້ແຮງບັນດາການກະທຳກໍ່ຄວາມແບ່ງແຍກ, ສະກັດກັ້ນ ແລະ ບໍ່ປະໃຫ້ອາຊຽນມີສຽງເວົ້າລວມໃນບັນຫາທະເລຕາເວັນອອກ.
ວິຕົກກັງວົນຕໍ່ເລື່ອງອາຊຽນສາມັກຄີກັນເປັນປຶກແຜ່ນ
ນັກການທູດທ່ານໜຶ່ງໃນອາຊຽນແບ່ງປັນວ່າ : ຈີນມີຄວາມວິຕົກກັງວົນທີ່ສຸດເມື່ອອາຊຽນຈະອອກແຈ້ງການຮ່ວມພາຍຫຼັງທີ່ສານກຳມະການອອກຄຳຕັດສິນສຸດທ້າຍ. ເພາະສະນັ້ນ, ການຢ້ຽມຢາມຂອງທ່ານລັດຖະມົນຕີການຕ່າງປະເທດຈີນ ຫວາງອີຄັ້ງນີ້ ແມ່ນເພື່ອແນໃສ່ຊອກຫາວິທີແກ່ດຶງບັນດາປະເທດສະມາຊິກ. ຕາມບັນດາຜູ້ຊ່ຽວຊານແລ້ວ, ນີ້ແມ່ນການກະທຳເປີດເຜີຍທີ່ສຸດຂອງປັກກິງສຳລັບອາຊຽນນັບແຕ່ກ່ອນເປັນຕົ້ນມາ ໃນການກະກຽມໃຫ້ແກ່ຄຳຕັດສິນຂອງສານສາກົນໃນເວລາໃກ້ຈະມາເຖິງນີ້ກ່ຽວກັບກໍລະນີຮ້ອງຟ້ອງຂອງຟີລິບປີນ . ຈີນພວມດຳເນີນບັນດາຄວາມມານະພະຍາຍາມທາງການທູດແບບບໍ່ເປີດເຜີຍກັບບາງລັດຖະບານຢູ່ອາຊີຕາເວັນອອກສ່ຽງໃຕ້ເພື່ອເກ້ັຍກ່ອມເຂົາເຈົ້າຈົ່ງມີປະຕິກິລີຍາທີ່ບໍ່ນຳຜົນປະໂຫຍດມາສູ່ປະເທດສະມາຊິກອື່ນໃນອາຊຽນ.
ແຕ່ມາຮອດປະຈຸບັນ, ນອກຈາກຈີນ, 3 ປະເທດອາຊີຕາເວັນອອກສ່ຽງໃຕ້ຄື ລາວ, ກຳປູເຈຍ ແລະ ບຣູໄນ ແມ່ນຍັງບໍ່ທັນຍົກອອກຖະແຫຼງການໃດໆຢ່າງເປັນທາງການທີ່ກ່ຽວຂ້ອງເຖິງຂໍ້ຕົກລົງ 4 ຂໍ້ດັ່ງກ່າວ. ໃນຂະນະນັ້ນ, ກ່າວຄຳເຫັນເມື່ອວັນທີ 25/4 ຢູ່ອີນໂດເນເຊຍ, ທ່ານເລຂາທິການໃຫຍ່ອາຊຽນ ເລເລືອງມິນ ຢືນຢັນຫຼັກໝັ້ນຂອງອາຊຽນກ່ຽວກັບບັນຫາທະເລຕາເວັນອອກແມ່ນຈະແຈ້ງທີ່ສຸດ. ຫຼັກໝັ້ນ 6 ຂໍ້ຂອງອາຊຽນແມ່ນເຄົາລົບກົດໝາຍສາກົນ, ເຄົາລົບ ແລະ ປະຕິບັດສົນທິສັນຍາສະຫະປະຊາຊາດກ່ຽວກັບກົດໝາຍວ່າດ້ວຍທະເລປີ 1982, ຫຼັກການແກ້ໄຂການຂັດແຍ້ງກັນດ້ວຍມາດຕະການໂດຍສັນຕິວິທີ, ຫຼັກການລະງັບໃຈ, ບໍ່ຄວນມີບັນດາການກະທຳເຮັດໃຫ້ປ່ຽນແປງສະພາບຕົວຈິງຢູ່ທະເລຕາເວັນອອກ ແລະ ຮຽກຮ້ອງໃຫ້ປະຕິບັດ DOC ຢ່າງຄົບຖ້ວນ ແລະ ມີປະສິດທິຜົນ ພ້ອມກັນນັ້ນກໍຍູ້ແຮງການເຈລະຈາເພື່ອລົງນາມໃນ COC ໂດຍໄວ. ເມື່ອບໍ່ດົນມານີ້, ສື່ມວນຊົນຂອງໄທກໍໄດ້ລົງພິມບົດຂຽນທີ່ພາດຫົວຂໍ້ວ່າ : “ ອາຊຽນຄວນສະກັດກັ້ນຈີນ ” ຊຶ່ງໄດ້ເນັ້ນໜັກວ່າ ບັນດາການກະທຳຂອງຈີນຢູ່ທະເລຕາເວັນອອກເປັນໄພນາບຂູ່ຕໍ່ທຸກໆປະເທດໃນພາກພື້ນ. ເພາະສະນັ້ນ, ບັນດາປະເທດອາຊຽນຄວນສາມັກຄີກັນເພື່ອຮັບມືຢ່າງແຂງແຮງ ແລະ ມີພິກໄຫວຕໍ່ໜ້າການກະທຳເຫຼົ່ານີ້.
ອາຊຽນທີ່ສັນຕິພາບ, ສະຖຽນລະພາບ ແລະ ພັດທະນາ ແມ່ນບໍ່ອາດຂາດສະຖຽນລະພາບຢູ່ທະເລຕາເວັນອອກໄດ້. ການສ້າງສຽງເວົ້າລວມ ແລະ ເພີ່ມທະວີຄວາມສາມັກຄີຂອງອາຊຽນຕໍ່ໜ້າບັນຫາທີ່ສັບສົນນີ້, ແນ່ນອນວ່າ ບໍ່ນອນນອກເໜືອຈາກເນື້ອໃນຂອງໂຄງການດຳເນີນງານຂອງອາຊຽນ, ໃນສະເພາະໜ້າແມ່ນກອງປະຊຸມລັດຖະມົນຕີການຕ່າງປະເທດອາຊຽນຄັ້ງທີ 49 ຊຶ່ງຈະໄຂຂຶ້ນໃນເດືອນ 7 ທີ່ຈະມາເຖິງຢູ່ລາວ. ນີ້ຈະແມ່ນການທົດສອບກຽ່ວກັບຄວາມສາມັກຄີຂອງອາຊຽນໃນສະພາວະທີ່ປະຊາຄົມລວມຫາກໍໄດ້ຮັບການສ້າງຕັ້ງຂຶ້ນ.