(vovworld)- ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກກອມມູນິດຫວຽດນາມ ຖືກລົງພິມຢ່າງຫລວງຫລາຍໃນບັນດາຫນັງສືພິມສະບັບປີໃໝ່ປະຈຳຊາດປີວອກ 2016. ບັນຍາກາດຕ້ອນຮັບລະດູບານໃຫມ່ຢ່າງເບີກບານມ່ວນຊື່ນ, ມີຄວາມຜາສຸກຂອງປະຊາຊົນຢູ່ທຸກແຖບຖິ່ນໃນທົ່ວປະເທດ, ປະເພນີຕ້ອນຮັບບຸນປີໃຫມ່ປະຈຳຊາດຂອງຊາວຫວຽດນາມ, ສະພາບການເສດຖະກິດສັງຄົມຂອງປະເທດຊາດ ກໍແມ່ນຫົວຂໍ້ຕ່າງໆທີ່ລົງພິມໃນບັນດາຫນັງສືພິມສະບັບບຸນປີໃຫມ່ປະຈຳຊາດປີນີ້.
ຫ້ອງວາງສະແດງບັນດາຫນັງສືພິມສະບັບບຸນປີໃໝ່ປະຈຳຊາດ
ພາບ:internet
|
ດ້ວຍຫົວຂໍ້ “ເພີ່ມທະວີການກໍ່ສ້າງພັກໃຫ້ປອດໃສ, ໝັ້ນຄົງເຂັ້ມແຂງ, ເສີມຂະກຳລັງແຮງຂອງທົ່ວປວງຊົນທັງຊາດ ແລະ ປະຊາທິປະໄຕສັງຄົມນິຍົມ; ຍູ້ແຮງກິດຈະການປ່ຽນແປງໃຫມ່ຢ່າງຮອບດ້ານ, ຄົບຊຸດ, ປົກປັກຮັກສາປະເທດຊາດຢ່າງໝັ້ນຄົງ, ຮັກສາສະພາບແວດລ້ອມສັນຕິພາບ, ສະຖຽນລະພາບ, ສູ້ຊົນນຳຫວຽດນາມ ກາຍເປັນປະເທດອຸດສາຫະກຳຕາມທິດທັນສະໄຫມໂດຍພື້ນຖານ”, ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກກອມມູນິດຫວຽດນາມ ດຳເນີນໄປແຕ່ວັນທີ 20-28/1/2016. ຫນັງສືພິມຂ່າວຄາວ ຂອງ ສຳນັກຂ່າວສານ ຫວຽດນາມ ໄດ້ລົງພິມບົດຂຽນ “ສ້າງສາປະເທດຊາດໃຫ້ວັດທະນາຖາວອນ, ສັນຕິສຸກ” ແນະນຳບົດລາຍງານຂອງທ່ານເລຂາທິການໃຫຍ່ ຫງວຽນຟູຈ້ອງ ທີ່ວາລະໄຂກອງປະຊຸມໃຫຍ່ຄັ້ງທີ 12 ຂອງພັກ. ບົດລາຍງານຢືນຢັນວ່າ: ຫວຽດນາມ ສືບຕໍ່ກ້າວຂຶ້ນບົນເສັ້ນທາງປ່ຽນໃຫມ່ຢ່າງໝັ້ນຄົງ, ຫວຽດນາມ ສູ້ຊົນກາຍເປັນປະເທດອຸດສາຫະກຳຕາມທິດທັນສະໄຫມໂດຍໄວ, ປົກປັກຮັກສາປະເທດຊາດຢ່າງໝັ້ນຄົງ, ຮັກສາສະພາບແວດລ້ອມສັນຕິພາບ, ສະຖຽນລະພາບ, ຍົກສູງປະສິດທິຜົນການເຄື່ອນໄຫວຕ່າງປະເທດ, ເປັນເຈົ້າການ, ຕັ້ງຫນ້າເຊື່ອມໂຍງເຂົ້າກັບສາກົນ; ເສີມຂະຫຍາຍກຳລັງແຮງມະຫາສາມັກຄີທົ່ວປວງຊົນທັງຊາດ, ປະຊາທິປະໄຕສັງຄົມນິຍົມ; ກໍ່ສ້າງພັກໃຫ້ປອດໃສ, ໝັ້ນຄົງເຂັ້ມແຂງ.
ປີ 2016 ແມ່ນ ຄົບຮອດ 70 ປີແຫ່ງການເລືອກຕັ້ງທົ່ວປະເທດຄັ້ງທຳອິດ (6/1/1946-6/1/2016). 70 ປີແຫ່ງການສ້າງຕັ້ງ ແລະ ພັດທະນາຂອງສະພາແຫ່ງຊາດຫວຽດນາມ ແມ່ນໄລຍະທາງທີ່ເຕັມໄປດ້ວຍຄວາມເອກອ້າງທະນົງໃຈ. ສະພາແຫ່ງຊາດຫວຽດນາມ ຍາມໃດກໍເປັນຕົວແທນແຫ່ງກຸ່ມກ້ອນມະຫາສາມັກຄີຂອງຊາດ, ປ່ຽນໃຫມ່ ແລະ ບູລະນະຢ່າງບໍ່ຢຸດຢັ້ງ, ປະກອບສ່ວນຢ່າງຕັ້ງຫນ້າເຂົ້າໃນພາລະກິດພັດທະນາລວມຂອງປະເທດຊາດ, ຂອງຊາດ. ໃນບົດຕອບສຳພາດຕໍ່ຫນັງສືພິມຂ່າວຄາວ ຂອງສຳນັກຂ່າວສານຫວຽດນາມ ເນື່ອງໃນໂອກາດປີໃຫມ່, ທ່ານປະທານສະພາແຫ່ງຊາດ ຫງວຽນຊີງຮຸ່ງ ຢືນຢັນວ່າ: ອາຍຸການສະພາແຫ່ງຊາດຊຸດທີ 13 ມີການປ່ຽນໃຫມ່ຫລາຍຢ່າງ. ສະພາແຫ່ງຊາດໄດ້ຍົກອອກຄຳຕັດສິນຫລາຍຢ່າງ ກ່ຽວກັບບັນດາບັນຫາສຳຄັນຂອງປະເທດຊາດ, ເພີ່ມທະວີວຽກງານຕິດຕາມກວດກາ, ເຮັດໃຫ້ສະພາແຫ່ງຊາດໃກ້ຊິດຕິດແທດກັບປະຊາຊົນກວ່າ. ປະຊາຊົນເຫັນດີເຫັນພ້ອມ ແລະ ເຊື່ອໝັ້ນຕໍ່ການຊີ້ນຳນຳພາຂອງພັກ ແລະ ການເຄື່ອນໄຫວຂອງສະພາແຫ່ງຊາດ. ອາຍຸການຂອງສະພາແຫ່ງຊາດຊຸດທີ 14 ຈະມາເຖິງ ຕ້ອງສືບຕໍ່ປ່ຽນໃຫມ່, ຍົກສູງຄຸນນະພາບການເຄື່ອນໄຫວຫລາຍກວ່າອີກ.
ດ້ວຍຫົວຂໍ້: “ຂີດໝາຍແຫ່ງການເຊື່ອມໂຍງ, ຫນັງສືພິມໄຊງ່ອນປົດປ່ອຍ ໄດ້ຢືນຢັນວ່າ: ປີ 2015 ແມ່ນປີທີ່ຫວຽດນາມບັນລຸໄດ້ຜົນສຳເລັດຫລາຍຢ່າງກ່ຽວກັບການເຄື່ອນໄຫວການຕ່າງປະເທດ, ທີ່ຕັ້ງບົດບາດຂອງຫວຽດນາມ ໃນເວທີສາກົນ ນັບມື້ນັບໄດ້ຮັບການຍົກສູງຂຶ້ນ. ພົ້ນເດັ່ນ ແມ່ນການຢ້ຽມຢາມສະຫະລັດອາເມລິກາ ຂອງທ່ານເລຂາທິການໃຫຍ່ ຫງວຽນຟູຈ້ອງ ເມື່ອເດືອນ 7/2015, ການຢ້ຽມຢາມປະເທດເອີລົບ ຈຳນວນຫນຶ່ງ ແລະ ເຂົ້າຮ່ວມ ພິທີສວນສະຫນາມສະເຫລີມສະຫລອງ 70 ປີແຫ່ງໄຊຊະນະໃນສົງຄາມປົກປັກຮັກສາປະເທດຊາດອັນຍິ່ງໃຫຍ່ຢູ່ລັດເຊຍ ຂອງທ່ານປະທານປະເທດ ເຈືອງເຕີນຊາງ, ທ່ານນາຍົກລັດຖະມົນຕີ ຫງວຽນເຕີນຢູງ ເຂົ້າຮ່ວມກອງປະຊຸມສຸດຍອດ ສປຊ ກ່ຽວກັບການປ່ຽນແປງຂອງດິນຟ້າອາກາດຄັ້ງທີ 21 (COP 21) ຢູ່ ປາຣີ ປະເທດຝລັ່ງ. ບົດຂຽນໄດ້ຖືວ່າ: ດ້ວຍການສ້າງຕັ້ງການພົວພັນທາງການທູດກັບ 185 ປະເທດໃນໂລກ, ການພົວພັນຄູ່ຮ່ວມມືຍຸດທະສາດ, ຄູ່ຮ່ວມມືຮອບດ້ານກັບ 26 ປະເທດ, ໃນນັ້ນມີ 5 ປະເທດກຳມະການປະຈຳ ສະພາຄວາມໝັ້ນຄົງ ສປຊ, ຫວຽດນາມ ໄດ້ຮັບເອົາຜົນງານຫລາຍຢ່າງທີ່ມີລັກສະນະບຸກທະລຸໃນການເຊື່ອມໂຍງເຂົ້າກັບສາກົນຮອບດ້ານ, ເລິກເຊິ່ງກວ້າງຂວາງໃນຂົງເຂດຕ່າງໆ. ກ່ຽວກັບເສດຖະກິດ, ຫວຽດນາມ ໄດ້ສິ້ນສຸດການເຈລະຈາ 4 ສັນຍາການຄ້າເສລີ (FTA) ກັບ ພັນທະມິດເສດຖະກິດ ອາຊີ -ເອີລົບ, ສະຫະພາບ ເອີລົບ, ສເກົາຫລີ ແລະບັນດາຄູ່ຮ່ວມມືຂ້າມປາຊີຟີກ (TPP), ຍົກຍອດຈຳນວນສັນຍາ FTA ຊື່ງຫວຽດນາມໄດ້ເຂົ້າຮ່ວມຂຶ້ນເຖິງ ຕົວເລກ 14.
ພິທີໄຂວັນບຸນຫນັງສືພິມສະບັບບຸນປີໃໝ່ປະຈຳຊາດປີ 2016ຢູ່ຮ່າໂນ້ຍ
ພາບ:hanoi.gov.vn
|
ຫນັງສືພິມສະບັບບຸນປີໃໝ່ປະຈຳຊາດປີ 2016 ໄດ້ສະຫງວນຂ່າວ, ບົດສ່ວນຫລາຍ ເພື່ອສ່ອງແສງສະພາບການເສດຖະກິດສັງຄົມປີ 2015, ການຄາດຄະເນແງ່ຫວັງດ້ານເສດຖະກິດສັງຄົມປີ 2016. ໃນບົດຕອບສຳພາດຕໍ່ນັກຂ່າວ ຫນັງສືພິມເສດຖະກິດຫວຽດນາມ, ທ່ານ ເວືອງດີງເຫ້ວ, ຫົວຫນ້າຄະນະເສດຖະກິດສູນກາງ ໃຫ້ຮູ້ວ່າ: ຈຸດພົ້ນເດັ່ນຂອງພື້ນຖານເສດຖະກິດ ຫວຽດນາມ ປີ 2015 ແມ່ນລະດັບຈະເລີນເຕີບໂຕເສດຖະກິດ (GDP) ບັນລຸເກືອບ 6,7%, ສູງກວ່າເມື່ອທຽບໃສ່ຄາດໝາຍວາງອອກ ແມ່ນ 6,2%. ໃນບົດຂຽນກ່ຽວກັບການດຶງດູດເງິນລົງທຶນຂອງຕ່າງປະເທດ FDI, ຫນັງສືພິມເສດຖະກິດຫວຽດນາມໃຫ້ຮູ້ວ່າ: FDI ປີ 2015 ບັນລຸລະດັບຫນ້າປະທັບໃຈ ດ້ວຍມູນຄ່າແມ່ນ 14,5 ຕື້ USD, ເພີ່ມຂຶ້ນ 17% ເມື່ອທຽບໃສ່ປີ 2014 ແລະ ແມ່ນລະດັບສູງສຸດໃນໄລຍະ 5 ປີ ຄືແຕ່ປີ 2011-2015. ຫນັງສືພີມຂ່າວຄາວຂອງສຳນັກຂ່າວສານຫວຽດນາມ ໃຫ້ຮູ້ວ່າ: ບັນດາຄາດໝາຍເສດຖະກິດ ສັງຄົມໃນປີ 2016 ນັ້ນແມ່ນ GDP ເພີ່ມຂຶ້ນ 6,7%, ຍອດວົງເງິນສົ່ງອອກເພີ່ມຂຶ້ນປະມານ 10%, ດັດຊະນີລາຄາໃຊ້ສອຍຕ່ຳກວ່າ 5%, ອັດຕາຄອບຄົວທຸກຍາກຕາມມາດຖານໃຫມ່ແມ່ນຫລຸດລົງ 1,3% - 1,5%, ສະເພາະບັນດາເມືອງທຸກຍາກຫລຸດລົງ 4%.
ຮີດຄອງປະເພນີຕ້ອນຮັບບຸນປີໃຫມ່ປະຈຳຊາດ, ບັນດາງານບຸນໃນລະດູບານໃຫມ່, ບັນຍາກາດຕ້ອນຮັບບຸນເຕັດຂອງຊາວຫວຽດນາມ ຢູ່ ພາຍໃນ ແລະ ຕ່າງປະເທດ ກໍແມ່ນບັນດາຫົວຂໍ້ພົ້ນເດັ່ນທີ່ໄດ້ລົງພິມໃນບັນດາຫນັງສືພິມສະບັບບຸນປີໃໝ່ປະຈຳຊາດ. ຫວຽດນາມ ມີ 54 ຊົນເຜົ່າ, ແຕ່ລະຊົນເຜົ່າລ້ວນແຕ່ມີວິທີຕ້ອນຮັບບຸນເຕັດທີ່ແຕກຕ່າງກັນ, ແຕ່ພ້ອມກັນຕ້ອນຮັບບຸນປີໃຫມ່ຕາມຈັນທະປະຕິທິນ ຫລື ເອີ້ນວ່າບຸນປີໃຫມ່ປະຈຳຊາດ. ຈຸດເວລາສົ່ງທ້າຍປີເກົ່າຕ້ອນຮັບປີໃຫມ່ ແມ່ນຈຸດເວລາທີ່ສັກກະລະບູຊາ. ຄອບຄົວໃດກໍມີຄາບເຂົ້າບູຊາປູຍ່າຕ່າຍາຍໃນຈຸດເວລາສົ່ງທ້າຍປີເກົ່າຕ້ອນຮັບປີໃຫມ່, ທຸກຄົນໃນຄອບຄົວໄດ້ພົບກັນ ພ້ອມກັນອວຍພອນປີໃຫມ່. ພາຍຫລັງຈຸດເວລາສົ່ງທ້າຍປີເກົ່າຕ້ອນຮັບປີໃຫມ່, ທຸກຄົນເຄີຍພ້ອມກັນໄປວັດວາອາຮາມເພື່ອພາວະນາຂໍໃຫ້ປີໃຫມ່ມີໂຊກມີໄຊ, ມີສຸຂະພາບເຂັ້ມແຂງ, ມີຄວາມຜາສຸກ ແລະ ວັດທະນາຖາວອນ.
ຫນັງສືພິມຂອງວິທະຍຸກະຈາຍສຽງຫວຽດນາມ ໄດ້ລົງພິມບົດຂຽນເວົ້າເຖິງຊີວິດມີຄວາມສັນຕິສຸກຂອງຄອບຄົວຊາວຫວຽດນາມ ອາໄສຢູ່ ຊານນະຄອນ ປາຣີ ປະເທດ ຝລັ່ງ. ຄອບຄົວເອື້ອຍ ທູ້ຍເຟືອງ ແລະ ອ້າຍ Gilles ເຈີນ ຍາມໃດກໍຮັກສາສີສັນຫວຽດນາມ, ອ່ວາຍເມືອຫາປະເທດຊາດ ແລະ ຫວັງວ່າ ລູກເຕົ້າຂອງຕົນຍາມໃດກໍຮັກສາກົກເຄົ້າເຫງົ້າກໍຂອງຕົນໄວ້. ຫນັງສືພິມໄວຫນຸ່ມ ໄດ້ລົງພິມບົດຂຽນເວົ້າເຖິງຄວາມຮູ້ສຶກ, ອາລົມຈິດຂອງ ນັກອອກແບບອາພອນສະໄຫມ ມາຈາກ ອີຕາລີ Ricardo Bianco Lervin ແລະ Diego Cortizas del Valle ມາຈາກ ແອດສະປາຍ ເມື່ອເຂົາເຈົ້າເລືອກເຟັ້ນຫວຽດນາມ ແມ່ນບ່ອນດຳລົງຊີວິດ, ສ້າງອາຊີບ ແລະ ຖືຫວຽດນາມ ຄືດັ່ງບ້ານເກີດເມືອງນອນແຫ່ງທີ່ສອງຂອງເຂົາເຈົ້າ.
ນອກນັ້ນ ບັນດາຫນັງສືພິມສະບັບບຸນປີໃໝ່ປະຈຳຊາດ ກໍໄດ້ລົງພິມຂ່າວ, ບົດຕ່າງໆທີ່ສອ່ງແສງເຖິງຄວາມເອົາໃຈໃສ່ຂອງພັກ, ລັດ ໃນການເບິ່ງແຍງບຸນເຕັດໃຫ້ຜູ້ທຸກຍາກ, ຄອບຄົວໃນເປົ້າໝາຍນະໂຍບາຍ, ອາລົມຈິດຂອງປະຊາຊົນຢູ່ເຂດດິນຕໍ່ແຜ່ນທີ່ມີຕໍ່ພະນັກງານ, ນັກຮົບພວມປະຕິບັດງານຢູ່ເຂດທະເລໝູ່ເກາະທີ່ຫ່າງໄກ. ບັນດາຫນັງສືພິມວັດທະນະທຳໄດ້ລົງພິມບົດ, ເລື່ອງນິທານພື້ນເມືອງຕ່າງໆເວົ້າເຖິງໂຕລິງ ກໍຄືຄຳກາບກອນ, ຄວາມມຸ່ງມາດປາດຖະຫນາຂອງປະຊາຊົນໃນຕົ້ນປີໃຫມ່….
ໃນໂອກາດບຸນປີໃຫມ່ປະຈຳຊາດແຕ່ລະປີ, ຢູ່ທ້ອງຖິ່ນແຕ່ລະແຫ່ງຂອງຫວຽດນາມ ລ້ວນແຕ່ຈັດຕັ້ງວັນບຸນຫນັງສືພິມສະບັບບຸນປີໃໝ່ປະຈຳຊາດ, ອັນໄດ້ດຶງດູດການເຂົ້າຮ່ວມຂອງປະຊາຊົນເປັນຈຳນວນຫລວງຫລາຍ. ຫນັງສືພິມສະບັບບຸນປີໃໝ່ປະຈຳຊາດຍາມໃດກໍແມ່ນອາຫານທາງດ້ານວັດທະນະທຳ, ຈິດໃຈຂອງຊາວຫວຽດນາມ ເມື່ອລະດູບານໃຫມ່ ບຸນເຕັດວຽນມາ, ແມ່ນອາຫານພິເສດສະເພາະຂອງຫນັງສືພິມຫວຽດນາມ, ປະກອບສ່ວນເຂົ້າໃນພື້ນຖານວັດທະນະທຳຫວຽດນາມ ທີ່ອຸດົມສົມບູນ ເຂັ້ມຂົ້ນໄປດ້ວຍສີສັນຊາດ.