ທ່ານເລຂາທິການໃຫ່ຍຫງວຽນຟູຈ້ອງ ຕ້ອນຮັບປະທານສະພາແຫ່ງຊາດລາວ ປານີ ຢາທໍ່ຕູ້ (ພາບ: TTXVN)

   ໂດຍໄດ້ປະຕິບັດຂໍ້ຕົກລົງລະຫວ່າງພັກ, ລັດ, ກອງທັບ ແລະ ປະຊາຊົນສອງປະເທດຫວຽດນາມ-ລາວ ນັ້ນ, ພາກສ່ວນໜຶ່ງໃນກອງທັບປະຊາຊົນຫວຽດນາມ ໄດ້ຮັບການມອບໝາຍໜ້າທີ່ສາກົນ ໄປຊ່ວຍການປະຕິວັດລາວ ໃນພາລະກິດປົດປ່ອຍຊາດ ແລະ ປົກປັກຮັກສາປະເທດລາວ. ໂດຍໄດ້ປະຕິບັດຕາມຄຳສັ່ງສອນຂອງປະທານໂຮ່ຈີມິນ “ຊ່ວຍປະຊາຊົນປະເທດເພື່ອນມິດ ກໍ່ແມ່ນຊ່ວຍຕົນເອງ” ນັ້ນ, ທະຫານອາສາສະໝັກ ແລະ ຜູ້ຊ່ຽວຊານຫວຽດນາມ ຫຼາຍລຸ້ນຄົນ ໄດ້ຮຽງບ່າຮຽງໄຫຼ່ພ້ອມກັບບັນດາກຳລັງຕໍ່ຕ້ານຂອງການປະຕິວັດລາວ.

ປະຕິບັດພັນທະສາກົນອັນສູງສົ່ງ

  ໃນການຕໍ່ຕ້ານພວກລ່າເມືອງຂຶ້ນຝະລັ່ງ, ຈັກກະພັດອາເມລິກາ ແລະ ພວກລູກແລ້ງຕີນມື, ມີພະນັກງານ, ທະຫານຫວຽດນາມ ນັບແສນເທື່ອຄົນ ໄດ້ເຂົ້າຮ່ວມການຕໍ່ສູ້ຢູ່ສະໜາມຮົບລາວ. ທະຫານອາສາສະໝັກ ແລະ ຜູ້ຊ່ຽວຊານຫວຽດນາມ ໄດ້ຊ່ວຍລັດຖະບານລາວ ຍົກສູງກຳລັງແຮງການຕໍ່ສູ້ຂອງກອງທັບ ແລະ ກຳລັງປະກອບອາວຸດຮັກຊາດ, ຈຸດສຸມແມ່ນບຳລຸງສ້າງຄວາມສາມາດການຈັດຕັ້ງບັນຊາການຕໍ່ສູ້ຂອງພະນັກງານ ແລະ ດ້ານເຕັກນິກ, ຍຸດທະວິທີຂອງທະຫານ; ສົມທົບການສ້າງຕັ້ງກອງທັບປົດປ່ອຍປະຊາຊົນ ກັບການພັດທະນາກຳລັງປະກອບອາວຸດທ້ອງຖິ່ນຢ່າງແໜ້ນແຟ້ນ; ສ້າງກຳລັງໃຫ້ແກ່ການປະຕິວັດລາວ ພັດທະນາຢ່າງໝັ້ນຄົງ. ທ່ານພັນເອກ ເຈິ່ນຮູຍຕວັນ ເຂົ້າຮ່ວມທະຫານອາສາສະໝັກຫວຽດນາມ ຢູ່ລາວ ໃຫ້ຮູ້ວ່າ:

   ຂ້າພະເຈົ້າຍັງຈື່ຈຳວ່າ ເມື່ອໄປລາວ, ທ່ານພົນເອກ ຫວໍ້ງວຽນຢາບ ໄດ້ບອກສອນວ່າ: ສຳລັບປະເທດລາວ ແລ້ວ ຕ້ອງຈື່ຈຳປະໂຫຍກທີ່ວ່າ: ຕ້ອງຮັກແພງຊ່ວຍເຫຼືອຊື່ງກັນ ແລະ ກັນຕະຫຼອດຊີວິດ,  ຖ້າເຮັດໄດ້ຄືແນວນັ້ນຈຶ່ງປະຕິບັດໜ້າທີ່ສຳເລັດໄດ້. ແລະ ປະທານໂຮ່ຈິມິນ ກໍ່ເຄີຍເວົ້າວ່າ ຊ່ວຍເພື່ອນກໍ່ແມ່ນຊ່ວຍຕົນເອງ.

ສະແດງສິລະປະ “ນ້ຳໃຈມິດຕະພາບຫວຽດນາມ-ລາວຍືນຍົງຄົງຕົວຕະຫຼອດໄປ” (ພາບ: ໜັງສືພິມດ້ຽນບຽນຝູ)

    ບົນເນື້ອໃນຈິດໃຈດັ່ງກ່າວ, ທະຫານອາສາສະໝັກຫວຽດນາມ ໄດ້ເສຍສະຫຼະຊີວິດ, ບໍ່ຢ້ານກົວຕໍ່ຄວາມທຸກຍາກລຳບາກ, ໄປບໍ່ວ່າແຫ່ງໃດ, ເຮັດບໍ່ວ່າວຽກໃດທີ່ການປະຕິວັດລາວ ຕ້ອງການ. ເຂົາເຈົ້າເຂົ້າໃຈວ່າ, ພຽງແຕ່ຂົນຂວາຍປະຊາຊົນລາວ ລຸກຮື້ຂຶ້ນທຳການຕໍ່ຕ້ານ ຈຶ່ງສາມາດຕີເອົາຊະນະພວກລ່າເມືອງຂຶ້ນຝະລັ່ງ ຜູ້ຮຸກຮານໄດ້. ເຂົາເຈົ້າໄດ້ສະຫນິດຕິດພັນກັບປະຊາຊົນເພື່ອກໍ່ສ້າງຮາກຖານ, ສ້າງຕັ້ງບັນດາອົງການຈັດຕັ້ງມະຫາຊົນ, ກອງທະຫານລາດ, ກອງຫຼອນ, ກ້າວຂຶ້ນກໍ່ສ້າງອຳນາດການປົກຄອງ. ພັດທະນາຮາກຖານເທື່ອລະກ້າວ. ພ້ອມກັນດຳລົງຊີວິດກັບປະຊາຊົນ, ພ້ອມກັນອອກແຮງງານທຳການຜະລິດ, ພ້ອມກັບປະຊາຊົນລາວ ຕີກັບພວກສັດຕູ, ປົກປ້ອງຮາກຖານ, ບ້ານເມືອງ. ທ່ານຫງວຽນວັນງຽບ ຜູ້ຊ່ຽວຊານຂັ້ນສູງຫວຽດນາມ ຢູ່ລາວ ແບ່ງປັນວ່າ:

  ທະຫານຫວຽດນາມ ປະຕິບັດວຽກງານຂົນຂວາຍປະຊາຊົນຢ່າງຫ້າວຫັນທີ່ສຸດ. ຜ່ານນັ້ນ ໄດ້ສ້າງຄວາມໄວ້ເນື້ອເຊື່ອໃຈສຳລັບການນຳ, ພະນັກງານລາວ, ສຳລັບປະຊາຊົນລາວ, ແມ່ນສ້າງອາລົມຈິດສະໜິດຕິດພັນ, ແບ່ງທຸກແບ່ງສຸກ ລະຫວ່າງ ທະຫານອາສາສະໝັກຫວຽດນາມ ແລະ ປະຊາຊົນລາວ.  

                    ໂດຍໄດ້ຮັບຄວາມເອົາໃຈໃສ່ເບິ່ງແຍງ, ຮັກແພງ, ຊ່ວຍເຫຼືອຈາກປະຊາຊົນລາວ ບັນດາເຜົ່າ, ນ້ຳໃຈສາມັກຄີ ຮ່ວມສຳພັນສູ້ຮົບຂອງບັນດາກຳລັງປະກອບອາວຸດການປະຕິວັດລາວ, ທະຫານອາສາສະໝັກ ແລະ ຜູ້ຊ່ຽວຊານຫວຽດນາມ ໄດ້ປະຕິບັດໜ້າທີ່ສາກົນອັນສູງສົ່ງສຳເລັດ, ປະກອບສ່ວນສຳຄັນທີ່ສຸດເຂົ້າໃນໄຊຊະນະອັນສະຫງ່າລາສີຂອງການປະຕິວັດລາວ ໃນການຕໍ່ສູ້ຕ້ານພວກລ່າເມືອງຂຶ້ນຝະລັ່ງ ແລະ ຈັກກະພັດອາເມລິກາ. ນັ້ນກໍ່ແມ່ນໄຊຊະນະຂອງນ້ຳໃຈສາມັກຄີຕໍ່ສູ້ພິເສດຫວຽດນາມ-ລາວ.

Unitel ຮັບຫຼຽນໄຊອິດສະຫຼະຊັ້ນ 1 ຈາກລັດຖະບານລາວ (ພາບ: ໜັງສືພິມກົດໝາຍຫວຽດນາມ)

 ເພີ່ມພູນຄູນສ້າງ ແລະ ພັດທະນາສາຍພົວພັນບໍລິສຸດຜຸດຜ່ອງ ແລະ ໃສແຈ້ງ

   ປະຈຸບັນ, ຫວຽດນາມ-ລາວ ພວມຍູ້ແຮງພາລະກິດການປ່ຽນແປງໃໝ່, ເປັນເຈົ້າການ ແລະ ຕັ້ງໜ້າເຊື່ອມໂຍງເຂົ້າກັບສາກົນ; ສູ້ຊົນສ້າງສາ, ພັດທະນາປະເທດຊາດໃຫ້ຮັ່ງມີເຂັ້ມແຂງ…. ໃນສະພາບການທີ່ບັນດາປະເທດພວມຍົກສູງຜົນປະໂຫຍດແຫ່ງຊາດນັ້ນ, ບັນດາການກະທຳອັນສູງສົ່ງຂອງທະຫານອາສາສະໝັກ ແລະ ຜູ້ຊ່ຽວຊານຫວຽດນາມ ຊ່ວຍການປະຕິວັດລາວ ແຕ່ 70 ປີກ່ອນນີ້ ຍັງແມ່ນໜ້າປະຫວັດສາດທີ່ດີງາມ, ປະກອບສ່ວນຊ່ວຍເພີ່ມທະວີການພົວພັນຖານບ້ານໃກ້ເຮືອນຄຽງມິດຕະພາບ, ນ້ຳໃຈສາມັກຄີແບບພິເສດ, ການຮ່ວມມືຮອບດ້ານລະຫວ່າງຫວຽດນາມ-ລາວ ແລະ ນຳສາຍພົວພັນພິເສດນີ້ ນັບມື້ນັບໄດ້ຮັບການພັດທະນາຢ່າງແຮງ. ທ່ານພັນເອກບາງສີ ໄຊສົມໂຄດ ທູດທະຫານລາວ ປະຈຳຫວຽດນາມ ຖືວ່າ:

   ພວກເຮົາຈົ່ງປົກປັກຮັກສາ, ເສີມຂະຫຍາຍອາລົມຈິດຄວາມຮັກແພງຖານອ້າຍນ້ອງ, ເພື່ອນມິດສະຫາຍ, ບ້ານໃກ້ເຮືອນຄຽງທີ່ສະໜິດສະໜົມ ແລະ ສັກສິດນີ້ກ່ວາອີກ ເພື່ອໃຫ້ຄວາມສະໜິດຕິດພັນນີ້ ນັບມື້ນັບໄດ້ຮັບການພັດທະນາຢ່າງແຮງ, ເຂົ້າສູ່ລວງເລິກ, ຖືວ່າ ນັ້ນແມ່ນສັບສົມບັດອັນລ້ຳຄ່າ, ຕ້ອງສືບທອດໃຫ້ລຄົນລຸ້ນຫຼັງຕະຫຼອດໄປ.

       ປະຫວັດສາດໄດ້ຕິດພັນສອງຊາດຫວຽດນາມ-ລາວ. ນ້ຳໃຈສາມັກຄີ, ຊ່ວຍເຫຼືອຊື່ງກັນ ແລະ ກັນ, ແມ່ນກົດເກນພາວະວິໄສໃນປະຫວັດສາດການປະຕິວັດຂອງສອງຊາດ, ສອງປະເທດ. ການຊ່ວຍເຫຼືອອັນໃສແຈ້ງບໍລິສຸດຂອງທະຫານອາສາສະໝັກ ແລະ ຜູ້ຊ່ຽວຊານຫວຽດນາມ ສຳລັບການປະຕິວັດລາວ ຈະແມ່ນຂີດໝາຍໃນປະຫວັດສາດຂອງສອງຊາດຕະຫຼອດໄປ, ແມ່ນສັນຍາລັກທີ່ມີຊີວິດຊີວາຂອງນ້ຳໃຈສາມັກຄີມິດຕະພາບແບບພິເສດຫວຽດນາມ-ລາວ.