(vovworld) - ນັບແຕ່ປີ 2013, ກອງປະຊຸມກຸ່ມທີ່ປຶກສາ ແລະ ນັກອຸປະຖຳໃຫ້ແກ່ຫວຽດນາມ (ກອງປະຊຸມ CG) ຈະປ່ຽນຊື່ເອີ້ນເປັນ ”ເວທີປາໄສກ່ຽວກັບການພົວພັນຄູ່ຮ່ວມມືພັດທະນາຫວຽດນາມ” ໂດຍທະນາຄານໂລກ ພ້ອມກັບກະຊວງແຜນການ ແລະ ການລົງທຶນຫວຽດນາມເປັນປະທານຮ່ວມ. ເວທີປາໄສນີ້ຈະສ່ອງແສງຄວາມຕ້ອງການຂອງຫວຽດນາມ ໃນຖານະແມ່ນປະເທດທີ່ມີພື້ນຖານເສດຖະກິດການຕະຫຼາດເປັນປົກກະຕິ, ປະຊາຊົນມີລາຍຮັບໃນລະດັບປານກາງ ແລະ ສ່ອງແສງຄວາມຈິງແຫ່ງການພັດທະນາຂອງການພົວພັນຄູ່ຮ່ວມມືລະຫວ່າງຫວຽດນາມກັບປະຊາຄົມໂລກໄດ້ດີກວ່າ.
ກອງປະຊຸມກຸ່ມທີ່ປຶກສາ ແລະ ນັກອຸປະຖຳໃຫ້ແກ່ຫວຽດນາມ ປີ 2012
(ພາບ: ອິນເຕີແນດ)
ທ່ານນາງ Victoria Kwakwa, ຜູ້ອຳນວຍການທະນາຄານໂລກປະຈຳຫວຽດນາມ, ທັງເປັນປະທານກອງປະຊຸມ CG ປີ 2012, ຢືນຢັນວ່າ ການປ່ຽນໃໝ່ຊື່ເອີ້ນ ແລະ ເນື້ອໃນກອງປະຊຸມ CG ແມ່ນຄວາມຈຳເປັນ. ທ່ານນາງ Victoria Kwakwa ໃຫ້ຮູ້ວ່າ, ກອງປະຊຸມ CG 2012, ລັດຖະບານ ແລະ ບັນດາຄູ່ຮ່ວມມືພັດທະນາໄດ້ໃຊ້ເວລາສ່ວນຫຼາຍ ເພື່ອແລກປ່ຽນຄວາມເຫັນກ່ຽວກັບເລື່ອງກອງປະຊຸມ CG ໃຫ້ແກ່ຫວຽດນາມຈະພັດທະນາຄືແນວໃດໃນໄລຍະໃໝ່ຂອງປະເທດຊາດ ກໍ່ຄືໃນສະພາບທີ່ມີການປ່ຽນແປງຫຼາຍຢ່າງຂອງບັນດາຄູ່ຮ່ວມມືພັດທະນາຢູ່ຫວຽດນາມ.
ທ່ານນາງ Victoria Kwakwa, ຜູ້ອຳນວຍການທະນາຄານໂລກປະຈຳຫວຽດນາມ
(ພາບ: ອິນເຕີແນດ) ”ກອງປະຊຸມບັນດານັກອຸປະຖຳໃຫ້ແກ່ຫວຽດນາມຄັ້ງນີ້ ຈະແມ່ນກອງປະຊຸມສຸດທ້າຍທີ່ຈັດຂຶ້ນຕາມຮູບແບບທີ່ເຄີຍດຳເນີນນັບແຕ່ 20 ປີມານີ້, ເພື່ອແນໃສ່ຮັບໃຊ້ໃຫ້ແກ່ເວທີປາໄສລະດົມແຫຼ່ງກຳລັງ ODA. ສິ່ງສຳຄັນໃນປະຈຸບັນແມ່ນ ຈຳເປັນຕ້ອງມີເວທີປາໄສການເຈລະຈາເປີດກວ້າງ ແລະ ເໝາະສົມລະຫວ່າງລັດຖະບານ ແລະ ບັນດາຄູ່ຮ່ວມມື ກ່ຽວກັບການພັດທະນາຂອງຫວຽດນາມ. ໃນ 20 ປີກ່ອນນີ້, ຄູ່ຮ່ວມມືຕົ້ນຕໍແມ່ນລັດຖະບານ ແລະ ບັນດາຄູ່ຮ່ວມມືພັດທະນາ. ປະຈຸບັນມີຄູ່ຮ່ວມມືຕື່ມອີກໃນວິວັດແຫ່ງການພັດທະນາຂອງຫວຽດນາມ - ສັງຄົມພົນລະເຮືອນນັບທັງພາຍໃນປະເທດ ແລະ ຕ່າງປະເທດ, ກໍ່ຄືພາກສ່ວນເອກະຊົນ. ພວກຂ້າພະເຈົ້າຫວັງວ່າ, ຮູບການເວທີປາໄສໃໝ່ນີ້ ຈະມີການປະກອບສ່ວນຢ່າງກວ້າງຂວາງຂອງບັນດາຝ່າຍກ່ຽວຂ້ອງ. ພວກຂ້າພະເຈົ້າກໍ່ຫວັງວ່າ, ກອງປະຊຸມ CG ຈະປະຕິບັດຕາມທິດທາງທີ່ໄດ້ກຳນົດ ແລະ ກຳນົດໄດ້ບັນດາຂົງເຂດຈຸດສຸມຢ່າງລະອຽດ”.
ນັບແຕ່ປີ 1993, ເມື່ອຫວຽດນາມເຊື່ອມຕໍ່ການພົວພັນກັບປະຊາຄົມບັນດານັກອຸປະຖຳສາກົນ, ກອງປະຊຸມ CG ໄດ້ສວມບົດບາດແມ່ນເວທີປາໄສໂອ້ລົມສົນທະນານະໂຍບາຍຕ່າງໆຢ່າງມີປະສິດທິຜົນ, ແບ່ງປັນບົດຮຽນກ່ຽວກັບການພັດທະນາທີ່ມີປະໂຫຍດ ໃຫ້ແກ່ລັດຖະບານຫວຽດນາມ. 20 ປີ ຜ່ານມາ, ຫວຽດນາມບັນລຸໄດ້ບັນດາບາດກ້າວພັດທະນາພໍສົມຄວນ, ຈາກປະເທດທີ່ທຸກຍາກ, ດ້ອຍພັດທະນາ, ດ້ວຍອັດຕາຄອບຄົວທີ່ທຸກຍາກກວມເຖິງ 58% ໃນປີ 1993, ປະຈຸບັນໄດ້ກາຍເປັນປະເທດທີ່ມີລາຍຮັບປານກາງ. ຜົນງານເຫຼົ່ານັ້ນ ແມ່ນມີການປະກອບສ່ວນບໍ່ໜ້ອຍຂອງປະຊາຄົມບັນດານັກອຸປະຖຳ, ບໍ່ພຽງແຕ່ໜູນຊ່ວຍທາງດ້ານການເງິນເທົ່ານັ້ນ, ຫາກຍັງໜູນຊ່ວຍດ້ານບົດຮຽນໃນການພັດທະນາ ຜ່ານການໂອ້ລົມສົນທະນາທາງດ້ານນະໂຍບາຍ. ກ້າວເຂົ້າສູ່ໄລຍະພັດທະນາໃໝ່, ຫວຽດນາມສືບຕໍ່ຮັບມືກັບການທ້າທາຍໃໝ່ຫຼາຍຢ່າງຄື: ຄວາມຂາດສະຖຽນລະພາບຂອງເສດຖະກິດໂລກ, ໜ້າທີ່ປະຕິບັດບັນດາຄາດໝາຍພັດທະນາ, ໃນນັ້ນມີຄາດໝາຍກ່ຽວກັບການຫຼຸດຜ່ອນຄວາມທຸກຍາກ, ການຮັບປະກັນຊີວິດສັງຄົມ ແລະ ການປ່ຽນໃໝ່ຮູບແບບເຕີບໂຕ. ທ່ານ Motoroni Tsuno, ຫົວໜ້າອົງການຮ່ວມມືສາກົນຍີ່ປຸ່ນ (JICA) ປະຈຳຫວຽດນາມ, ໃຫ້ຮູ້ວ່າ, ໃນປີການເງິນ 2013, ນອກຈາກເລື່ອງເປັນທີ່ປຶກສາໃຫ້ຫວຽດນາມພັດທະນາເສດຖະກິດ, ສັງຄົມແລ້ວ, ຍີ່ປຸ່ນຢາກສືບຕໍ່ເປັນນັກອຸປະຖຳໃຫຍ່ກວ່າໝູ່ກ່ຽວກັບທຶນ ODA ໃຫ້ແກ່ຫວຽດນາມ. ທ່ານ Motoroni Tsuno ຢືນຢັນວ່າ:
ທ່ານ Motoroni Tsuno, ຫົວໜ້າອົງການຮ່ວມມືສາກົນຍີ່ປຸ່ນ (JICA)
(ພາບ: ອິນເຕີແນດ) ”ຫວຽດນາມໄດ້ກາຍເປັນປະເທດທີ່ມີລາຍຮັບປານກາງ ແລະ ບັນດານັກທີ່ປຶກສາ, ນັກອຸປະຖຳ ຕົກລົງປ່ຽນໃໝ່ຍຸດທະສາດກ່ຽວກັບການອຸປະຖຳ. ກອງປະຊຸມ CG ປີນີ້ ບໍ່ພຽງແຕ່ມີການເຂົ້າຮ່ວມຂອງບັນດານັກອຸປະຖຳເທົ່ານັ້ນ, ຫາກຍັງມີການເຂົ້າຮ່ວມຂອງບັນດາວິສາຫະກິດສາກົນອີກດ້ວຍ, ເພາະວ່າຫວຽດນາມ ພວມກາຍເປັນປະເທດພັດທະນາ. ຕາມຂ້າພະເຈົ້າແລ້ວ, ໃນໄລຍະຈະມາເຖິງຄວນມີການຮ່ວມສຳພັນຢ່າງແໜ້ນແຟ້ນລະຫວ່າງບັນດານັກອຸປະຖຳ ແລະ ບັນດາວິສາຫະກິດ ເພື່ອພ້ອມກັນໜູນຊ່ວຍຫວຽດນາມພັດທະນາເສດຖະກິດສັງຄົມ”
ຕາມທ່ານລັດຖະມົນຕີກະຊວງແຜນການ ແລະ ການລົງທຶນ ບູ່ຍ ກວາງວິງ ແລ້ວ, ໃນສະພາບວິກິດການເສດຖະກິດໃນປະຈຸບັນ, ເລື່ອງຮັກສາ ແລະ ຊຸກຍູ້ການເຄື່ອນໄຫວໂອ້ລົມສົນທະນາລະຫວ່າງລັດຖະບານ ແລະ ບັນດາທີ່ປຶກສາ, ນັກອຸປະຖຳ ຍິ່ງມີຄວາມສຳຄັນກວ່າເວລາໃດໝົດ. ທ່ານເວົ້າວ່າ:
”ການປ່ຽນໃໝ່ເນື້ອໃນ, ຮູບການກອງປະຊຸມ CG ບໍ່ແມ່ນວ່າຍ້ອນຫວຽດນາມໄດ້ກາຍເປັນປະເທດທີ່ມີລາຍຮັບປານກາງ, ຫາກບັນດາທີ່ປຶກສາ, ນັກອຸປະຖຳຈະສະຫງວນແຫຼ່ງທຶນກູ້ຢືມພິເສດອື່ນອີກໃຫ້ແກ່ບັນດາປະເທດທຸກຍາກ, ດ້ອຍພັດທະນາອື່ນໆ, ສ່ວນຫວຽດນາມຈະໄດ້ຮັບແຫຼ່ງທຶນກູ້ຢືມການຄ້າໃນລະດັບສູງກວ່າ… ບັນດາປະເທດອຸປະຖຳມີຫຼັກການເຄື່ອນໄຫວທີ່ວ່າ, ພາຍຫຼັງຊ່ວຍຫວຽດນາມຫຼຸດພົ້ນອອກຈາກລະດັບດ້ອຍພັດທະນາແລ້ວ, ເຂົາເຈົ້າຈະສະຫງວນທຶນອຸປະຖຳໃຫ້ແກ່ປະເທດອື່ນໆ ແຕ່ຍາມໃດກໍ່ໃຫ້ຄຳປຶກສາດ້ານນະໂຍບາຍ, ແລະ ແນວທາງພັດທະນາໃຫ້ແກ່ຫວຽດນາມ”.
ຄາດວ່າ”ເວທີປາໄສກ່ຽວກັບການພົວພັນຄູ່ຮ່ວມມືພັດທະນາຫວຽດນາມປີ 2013” ຈຳດຳເນີນໃນເວລາ 1 ຫຼື 2 ວັນ, ໂດຍອິງໃສ່ເນື້ອໃນຂອງລາຍການ. ການປ່ຽນແປງຂອງກອງປະຊຸມ CG ຈະມຸ້ງໄປເຖິງເລື່ອງບັນດານັກອຸປະຖຳ ແລະ ຫວຽດນາມມີບັນດາການເຄື່ອນໄຫວຢ່າງມີປະສິດທິຜົນ, ແທດຈິງ, ແລະ ເຫັນດີເປັນເອກະພາບ ຕໍ່ ຈຸດໝາຍຂອງກອງປະຊຸມສຳມະນາ ເພື່ອການພັດທະນາຂອງຫວຽດນາມ.