ພາບປະກອບ:internet
|
(vovworld) -ປີ ມະເສງ 2013 ໄດ້ຜ່ານໄປ ດ້ວຍຄວາມຫຍຸ້ງຍາກຫລາຍຢ່າງແຕ່ຍັງຄົງບັນລຸໄດ້ໝາກຜົນອັນດີງາມ. ຫວນຄືນຊຸມມື້ດຽວກັນຂອງປີກາຍ, ທັງປະເທດເລີ່ມຕົ້ນບັ້ນດຳເນີນຊີວິດການເມືອງທີ່ສຸດຈິດສຸດໃຈ, ມີພູມປັນຍາ ປະກອບຄຳເຫັນເພື່ອສ້າງ, ປັບປຸງລັດຖະທຳມະນູນ. ດ້ວຍເຈດຈຳນົງຂອງພັກພ້ອມກັບຈິດໃຈຂອງປະຊາຊົນ, ລັດຖະທຳມະນູນ ປະເທດ ສສ ຫວຽດນາມ ໄດ້ຮັບການຮັບຮອງເອົາຈາກສະພາແຫ່ງຊາດ, ແມ່ນບາດກ້າວສ້າງລະບອບກົດໝາຍໃຫ້ສົມບູນແບບ, ສ້າງພື້ນຖານ ແລະ ກຳລັງຫນູນເພື່ອສ້າງສາ ແລະ ພັດທະນາປະເທດຊາດ ຫວຽດນາມ ທີ່ປະຊາຊົນຮັ່ງມີ, ປະເທດຊາດເຂັ້ມແຂງ. ແລະ ກໍໃນປີ ມະເສງ 2013 ຜ່ານມາ, ທັງປະເທດຮ່ວມແຮງຮ່ວມໃຈຢືດໝັ້ນແນວທາງປ່ຽນແປງໃຫມ່, ປະຕິບັດບັນດາລັດຖະນະໂຍບາຍສຳຄັນຢ່າງມີປະສິດທິຜົນ ເພື່ອຟື້ນຕົວພື້ນຖານເສດຖະກິດ. ຊາວຫວຽດນາມ ມີຄວາມປິຕິຊົມຊື່ນ ເພາະວ່າໄດ້ສ້າງການຫັນປ່ຽນຢ່າງຕັ້ງຫນ້າຈາກຄວາມມານະພະຍາຍາມດັ່ງກ່າວ, ຕາມນັ້ນແລ້ວ ເສດຖະກິດມະຫາພາກໄດ້ຖືກຮັກສາເປັນປົກກະຕິ, ໄພເງິນເຟີ້ໄດ້ຮັບການຄວບຄຸມ, ຮັບປະກັນຊີວິດສັງຄົມ. ລະດັບການຈະເລີນເຕີບໂຕພາຍໃນບັນລຸ 5,42%, ວົງເງິນສົ່ງອອກບັນລຸ 132,3 ຕື້ USD, ການດຶງດູດເງິນລົງທຶນຂອງຕ່າງປະເທດບັນລຸ 21,6 ຕື້ USD ນັ້ນແມ່ນບັນດາສັນຍານດີງາມກ່ຽວກັບພື້ນຖານເສດຖະກິດທີ່ພວມຄ່ອຍໆຟື້ນຕົວ, ເຮັດໃຫ້ຈິດໃຈຂອງປະຊາຊົນເພີ່ມຄວາມອົບອຸ່ນຂຶ້ນໃນຊຸມມື້ອາກາດທີ່ຫນາວຈັດນີ້. ບັນດານະໂຍບາຍສຳຄັນຂອງພັກ, ລັດ ຫວຽດນາມ ກ່ຽວກັບການສ້າງໂຄງປະກອບພື້ນຖານເສດຖະກິດຄືນໃຫມ່, ການລົບລ້າງຄວາມອຶດຫິວຫລຸດຜ່ອນຄວາມທຸກຍາກ, ຫນູນຊ່ວຍວິສາຫະກິດແກ້ໄຂຄວາມຫຍຸ້ງຍາກໃນການຜະລິດດຳເນີນທຸລະກິດ, ບັນດາໂຄງການກໍ່ສ້າງຊົນນະບົດໃຫມ່, ຮັບປະກັນຊີວິດສັງຄົມ, ຕ້ານການສໍ້ລາດບັງຫລວງ, ການຟຸມເຟືອຍ… ໄດ້ສະແດງໃຫ້ເຫັນວ່າ ຫວຽດນາມ ພວມມານະພະຍາຍາມເສີມຂະຫຍາຍກຳລັງແຮງພາຍໃນເພື່ອພັດທະນາເທື່ອລະກ້າວ. ເລື່ອງຫວຽດນາມ ເປັນຄັ້ງທຳອິດກາຍເປັນສະມາຊິກສະພາສິດທິມະນຸດ, ສະມາຊິກຄະນະກຳມະການມໍລະດົກ ສປຊ, ສະມາຊິກສະພາຜູ້ວ່າການອົງການພະລັງງານປະລະມານູສາກົນ… ໄດ້ຢັ້ງຢືນອິດທິພົນຊື່ສຽງ ແລະ ທີ່ຕັ້ງບົດບາດຂອງຫວຽດນາມ ນັບມື້ນັບເພີ່ມຂຶ້ນໃນວິວັດທະນາການເຊື່ອມໂຍງເຂົ້າກັບສາກົນ. ບັນດາຜົນງານນັ້ນ ແມ່ນເລີ່ມມາຈາກການປ່ຽນໃຫມ່ທີ່ມີລັກສະນະຕັດສິນຊີ້ຂາດ ນັ້ນແມ່ນເປີດກວ້າງປະຊາທິປະໄຕ, ປະຕິບັດກົນໄກການຕະຫລາດໃນການເຄື່ອນໄຫວເສດຖະກິດ ແລະ ຄຸນທາດຜ່ານຜ່າຄວາມຫຍຸ້ງຍາກຂອງປະເທດຫວຽດນາມ.
ບັນດາໝາກຜົນທີ່ຫວຽດນາມ ບັນລຸໄດ້ໃນປີຜ່ານມາ ບໍ່ພຽງແຕ່ເຮັດໃຫ້ຮູບພາບຂອງລະດູບານໃຫມ່ປີມະເມຍ ສວຍງາມຂຶ້ນກວ່າເກົ່າເທົ່ານັ້ນ ຫາກຍັງແມ່ນພື້ນຖານເພື່ອໃຫ້ປະເທດຫວຽດນາມ ໝັ້ນໃຈກວ່າເມື່ອກ້າວເຂົ້າສູ່ປີໃຫມ່ ດ້ວຍບັນດາກາລະໂອກາດໃຫຍ່ປະສານກັບຄວາມຫຍຸ້ງຍາກ, ສິ່ງທ້າທາຍຫລາຍຢ່າງ. ໃນ ປີ 2014 ນີ້, ຫວຽດນາມ ຜັນຂະຫຍາຍບັນດາຫນ້າທີ່ໄລຍະກາງ ແລະ ຍາວໃນການພັດທະນາເສດຖະກິດສັງຄົມຢ່າງຂ້ຽວຂາດ ແລະ ຄົບຊຸດ ເພື່ອສ້າງພື້ນຖານໃຫ້ແກ່ການພັດທະນາຢ່າງວ່ອງໄວ ແລະ ໝັ້ນຄົງ, ມານະພະຍາຍາມສ້າງລັດແຫ່ງອຳນາດນິຕິບັນຍັດ, ເສີມຂະຫຍາຍສິດເປັນເຈົ້າຂອງປະຊາຊົນຢ່າງແຂງແຮງ, ສ້າງລະບອບເສດຖະກິດການຕະຫລາດຕາມກຳນົດທິດສັງຄົມນິຍົມໃຫ້ສົມບູນແບບ ແລະ ສ້າງໂຄງປະກອບກະສິກຳຕິດພັນກັບການກໍ່ສ້າງຊົນນະບົດໃຫມ່. ບັນດາຄາດໝາຍລະອຽດ ໄດ້ຖືກກຳນົດ, ຕາມນັ້ນແລ້ວ ລະດັບການເຕີບໂຕຍອດຜະລິດຕະພັນພາຍໃນ GDP ບັນລຸປະມານ 5,8%, ລາຍຮັບສະເລ່ຍໃສ່ຫົວຄົນບັນລຸປະມານ 2.100 USD, ວົງເງິນສົ່ງອອກເພີ່ມຂຶ້ນປະມານ 10%. ເປັນອັນວ່າ: ຫວຽດນາມ ຈະຕ້ອງສຸມກຳລັງແຮງໃນລະດັບສູງສຸດເພື່ອສ້າງ, ປັບປຸງບັນດາກົດໝາຍເພື່ອປະຕິບັດລັດຖະທຳມະນູນ, ພ້ອມທັງເພີ່ມເຕີມລະບອບບັນຍັດ, ກົນໄກນະໂນບາຍ, ບູລະນະການຈັດຕັ້ງ, ກົງຈັກ ເພື່ອສືບຕໍ່ຍູ້ແຮງການສ້າງລັດແຫ່ງອຳນາດນິຕິບັນຍັດ, ເສີມຂະຫຍາຍສິດເປັນເຈົ້າຂອງປະຊາຊົນຢ່າງແຂງແຮງ ແລະ ສ້າງສຳເລັດລະບອບເສດຖະກິດການຕະຫລາດຕາມການກຳນົດທິດສັງຄົມນິຍົມ.
ເຖິງວ່າປະສົບກັບຄວາມຫຍຸ້ງຍາກຫລາຍຢ່າງກໍຕາມ ແຕ່ຫວຽດນາມ ມານະພະຍາຍາມບື່ນຕົວຂຶ້ນເຊື່ອມໂຍງເຂົ້າກັບສາກົນ. ໃນຊຸມມື້ນີ້, ຫວຽດນາມ ພວມເລີ່ມຕົ້ນການເຄື່ອນໄຫວທຳອິດໃນອາຍຸການເປັນສະມາຊິກ ສະພາສິດທິມະນຸດ ແລະ ຄະນະກຳມະການ ມໍລະດົກ ສປຊ. ທັງລະບົບການເມືອງ ພວມຜັນຂະຫຍາຍການປະຕິບັດລັດຖະທຳມະນູນ ແລະ ສ້າງພື້ນຖານປະຊາທິປະໄຕ. ບັນດາສັນຍາສົ່ງອອກສິນຄ້າໃນປີ 2014 ພວມປະຕິບັດ ແລະ ປະລິມານການຄ້າໄດ້ສິນຄ້າໄດ້ຂົນລົງກຳປັ່ນ. ໂຮງງານ, ໂຮງຈັກ ເລີ່ມຕົ້ນການເຄື່ອນໄຫວໃນຊຸມມື້ຕົ້ນລະດູບານໃຫມ່. ວັນບຸນລົງໄຮ່ລົງນາຈະຖືກຈັດຂຶ້ນໃນຊຸມມື້ຈະມາເຖິງ.
ລະດູບານໃຫມ່ໄດ້ວຽນມາແລ້ວ. ກຳລັງແຮງພາຍໃນ ແລະ ຄວາມເຊື່ອໝັ້ນ ແມ່ນສິ່ງທີ່ທົ່ວປະເທດຫວຽດນາມພວມສ້າງຂຶ້ນໃນລະດູບານໃຫມ່ນີ້. ດ້ວຍຄວາມເຫັນດີເຫັນພ້ອມ, ການມີຫົວຄິດປະດິດສ້າງ ແລະ ຄວາມຕັດສິນໃຈຢ່າງສູງ ແນ່ນອນ ວ່າ ຫວຽດນາມຈະບັນລຸໄດ້ໝາກຜົນອັນດີງາມຫລາຍຢ່າງ, ປະຊາຊົນມີຄວາມຜາສຸກ, ປະເທດຊາດພັດທະນາ.