ເວທີປາໄສວິສາຫະກິດ ຫວຽດນາມ ປະຈຳປີ ດ້ວຍຫົວຂໍ້ “ຟື້ນຟູ ແລະ ພັດທະນາລະບົບສະໜອງໃນສະພາບປົກກະຕິໃໝ່”  (ພາບ: TTXVN)

ກ່າວຄຳເຫັນທີ່ເວທີປາໄສວິສາຫະກິດ ຫວຽດນາມ ປະຈຳປີ ດ້ວຍຫົວຂໍ້ “ຟື້ນຟູ ແລະ ພັດທະນາລະບົບສະໜອງໃນສະພາບປົກກະຕິໃໝ່” ເຊິ່ງໄດ້ຈັດຂຶ້ນຢູ່ຮ່າໂນ້ຍ ໃນວັນທີ 21 ກຸມພາປີ 2022, ທ່ານນາຍົກລັດຖະມົນຕີ ຟ້າມມິງຈິງ ໃຫ້ຮູ້ວ່າ, ຫວຽດນາມ ໄດ້ ແລະ ພວມປະຕິບັດວິວັດການປ່ຽນແປງໃໝ່, ໃນນັ້ນໄດ້ສຸມໃສ່ສ້າງພື້ນຖານປະຊາທິປະໄຕສັງຄົມນິຍົມ, ສ້າງລັດແຫ່ງກົດໝາຍຂອງປະຊາຊົນ, ໂດຍປະຊາຊົນ, ເພື່ອປະຊາຊົນ; ສ້າງພື້ນຖານເສດຖະກິດການຕະຫຼາດກຳນົດທິດສັງຄົມນິຍົມ, ດ້ວຍ 3 ເນື້ອໃນຫຼັກແມ່ນການລົບລ້າງພະຍາດອາດຍາສິດ, ເກື້ອກູນ, ສ້າງພື້ນຖານເສດຖະກິດຫຼາຍພາກສ່ວນ, ເຊື່ອມໂຍງເຂົ້າກັບເສດຖະກິດສາກົນ. ພາຍຫຼັງການປະຕິບັດກິດຈະການປ່ຽນແປງໃໝ່ມາເປັນເວລາ 35 ປີ, ຫວຽດນາມ ບັນລຸໄດ້ຜົນງານຫຼາຍຢ່າງ ທີ່ມີລັກສະນະປະຫວັດສາດ, ບໍ່ມີເວລາໃດ ທີ່ຫວຽດນາມ ມີພາລະກິດທີ່ໃຫຍ່ຫຼວງ, ກຳລັງບົ່ມຊ້ອນ, ຖານະບົດບາດ, ທີ່ຕັ້ງ ແລະ ອິດທິພົນຊື່ສຽງສາກົນ ຄືໃນປັດຈຸບັນ. ທ່ານນາຍົກລັດຖະມົນຕີ ຟ້າມມິງຈິງ ເນັ້ນໜັກວ່າ, ດ້ວຍທິດນຳຖືປະຊາຊົນ, ວິສາຫະກິດ ເປັນໃຈກາງ ແລະ ເປັຮເຈົ້າກຳ, ແຫຼ່ງກຳລັງພາຍໃນແມ່ນພື້ນຖານ ແລະ ຍາວນານ, ແຫຼ່ງກຳລັງພາຍນອກແມ່ນສຳຄັນ, ບຸກທະລຸ ລັດຖະບານຫວຽດນາມ ສືບຕໍ່ປະຕິບັດ 3 ຂອດບຸກທະລຸຍຸດທະສາດລວມມີສ້າງລະບອບລະບຽບການໃຫ້ສົມບູນແບບ ແລະ ຄົບຊຸດ, ພັດທະນາແຫຼ່ງຊັບພະຍາກອນມະນຸດ, ສ້າງລະບົບພື້ນຖານໂຄງລ່າງຢ່າງຄົບຊຸດ ແລະ ທັນສະໄໝ. ທ່ານກ່າວວ່າ:

ຕ້ອງປະຕິບັດໂຄງການຟື້ນຟູພັດທະນາເສດຖະກິດສັງຄົມຢ່າງວ່ອງໄວ ແລະ ມີການພັດທະນາແບບຍືນຍົງ. ພວກຂ້າພະເຈົ້າຄາດຄະເນວ່າ ຈະໃຊ້ເງິນປະມານກ່ວາ 4% GDP. ຖ້າປະຕິບັດ ຈະສຸມໃສ່ບາງວຽກງານຄື: ທີໜຶ່ງແມ່ນເພີ່ມທະວີກຳລັງດ້ານການແພດ. ທີ ສອງແມ່ນກ່ຽວກັບການໜູນຊ່ວຍສັງຄົມ, ພວກຂ້າພະເຈົ້າບໍ່ເອົາການໜູນຊ່ວຍສັງຄົມ, ຄວາມຍຸຕິທຳສັງຄົມ ໄປແລກກັບການເຕີບໂຕ. ທີ ສາມແມ່ນຊ່ວຍເຫຼືອປະຊາຊົນປະສົບກັບຄວາມຫຍຸ້ງຍາກ, ໃນນັ້ນມີພາກສ່ວນທີ່ມີຄວາມສ່ຽງສູງກ່ວາໝູ່... ທີສີແມ່ນຊ່ວຍເຫຼືອວິສາຫະກິດ, ໄລຍະຜ່ານມາ ວຽກງານນີ້ໄດ້ຮັບການປະຕິບັດຢ່າງຕັ້ງໜ້າແລ້ວ, ເປັນຕົ້ນແມ່ນໄດ້ຫຼຸດຜ່ອນພາສີອາກອນ, ຄ່າທຳນຽມ, ຫຼຸດຜ່ອນຄ່າໄຟຟ້າ, ຄ່ານ້ຳປະປາ, ຄ່າໂທລະຄົມມະນາຄົມ ແລະ ປັດຈຸບັນພວກເຮົາພວມສືບຕໍ່ປະຕິບັດການຟື້ນຟູຕະຫຼາດແຮງງານຢ່າງວ່ອງໄວພໍສົມຄວນ, ກ່ຽວກັບໂຄງການນີ້ແມ່ນສຸມໃສ່ການພັດທະນາພື້ນຖານໂຄງລ່າງລວມມີໂຄງລ່າງດີຈີຕອນ, ໂຄງລ່າງຕ້ານການປ່ຽນແປງຂອງດິນຟ້າອາກາດ, ພິເສດແມ່ນໂຄງລ່າງຄົມມະນາຄົມປັດຈຸບັນ ພວກຂ້າພະເຈົ້າພວມປະຕິບັດການຟື້ນຟູຢ່າງຕັ້ງໜ້າທີ່ສຸດ.

ທ່ານນາຍົກລັດຖະມົນຕີ ຟ້າມມິງຈິງ ກ່າວຄຳເຫັນທີ່ເວທີປາໄສ (ພາບ: TTXVN)

ທ່ານນາຍົກລັດຖະມົນຕີ ຟ້າມມິງຈິງ ໄດ້ຢັ້ງຢືນວ່າ ລັດຖະບານ ຫວຽດນາມ ໄດ້ສ້າງສະພາບແວດລ້ອມສະເໝີພາບ ລະຫວ່າງບັນດາພາກສ່ວນເສດຖະກິດ, ສົ່ງເສີມການລົງທຶນພາກເອກະຊົນ, ລົງທຶນຈາກຕ່າງປະເທດ, ລົງທຶນໃສ່ຂົງເຂດເຕັກໂນໂລຢີສູງ, ອຸດສາຫະກຳສະໜັບສະໜູນ, ກະສິກຳອັດສະລິຍະ, ປົກປັກຮັກສາສິ່ງແວດລ້ອມ, ພະລັງງານຜະລິດຄືນໃໝ່າ, ສ້າງໂຄງປະກອບພື້ນຖານໂຄງລ່າງ ແລະ ບັນດາໂຄງການຮັບໃຊ້ການການໜູນຊ່ວຍສັງຄົມ, ການຫັນປ່ຽນສູ່ສີຂຽວ. ຫວຽດນາມ ໄດ້ສຸມໃສ່ບັນດາມາດຕະການເພື່ອແນໃສ່ຟື້ນຟູລະບົບສະໜອງ, ຮັບປະກັນການຈະລາຈອນສິນຄ້າ, ຮັບປະກັນແຫຼ່ງເຊື້ອເພີງເປັນປົກກະຕິ; ຮັບປະກັນການເຄື່ອນໄຫວຜະລິດ, ດຳເນີນທຸລະກິດ ຢ່າງລຸລ່ວງ ແລະ ປອດໄພ ຂອງວິສາຫະກິດໃນເງື່ອນໄຂປົກກະຕິໃໝ່; ຈຸດສຸມແມ່ນໃຫ້ບຸລິມະສິດແກ່ບັນດາມາດຕະການຮັບປະກັນຄວາມປອດໄພຕໍ່ໂລກລະບາດ, ຫັນການປະຕິບັດລະບຽບການບໍລິຫານເປັນງ່າຍດາຍ, ແກ້ໄຂບັນດາຂໍ້ຕິດຂັດກ່ຽວກັບກົນໄກ, ນະໂຍບາຍດ້ານພາສີອາກອນ, ສິນເຊື່ອ, ຊັບພະຍາກອນມະນຸດ, ພື້ນຖານໂຄງລ່າງ, Logistic... ພິເສດແມ່ນພັດທະນາຕະຫຼາດທຶນ, ຕະຫຼາດທີ່ດິນ, ຕະຫຼາດຊັບພະຍາກອນທຳມະຊາດ, ຕະຫຼາດວິທະຍາສາດອຸດສາຫະກຳ, ພູມປັນຍາ ຕາມທິດແກ້ງແຍ່ງ, ມີປະສິດທິຜົນ ແລະ ຍືນຍົງກ່ວາ. ທ່ານນາຍົກລັດຖະມົນຕີ ຟ້າມມິງຈິງໃຫ້ຮູ້ຕື່ມອີກວ່າ:

ວຽກງານທີ່ຕ້ອງໄດ້ເຮັດໃນປັດຈຸບັນນັ້ນແມ່ນ ການຫັນປ່ຽນສູ່ສີຂຽວ. ເມື່ອນີ້ການຫັນປ່ຽນສູ່ສີຂຽວເປັນທ່າອ່ຽງແລ້ວ, ການຫັນເປັນພື້ນຖານເສດຖະກິດຂຽວ ແລະ ພະລັງງານຂຽວ ຕ້ອງກຳນົດວ່າ ບໍ່ເອົາສິ່ງແວດລ້ອມໄປແລກເອົາການເຕີບໂຕເສດຖະກິດ, ມີ 2 ການຫັນປ່ຽນທີ່ພວກເຮົາໄດ້ປຶກສາຫາລືຫຼາຍຄັ້ງແລ້ວ ນັ້ນແມ່ນການຫັນເປັນດີຈີຕອນ, ເພື່ອສຸມໃສ່ 3 ເສົາຄ້ຳນັ້ນແມ່ນ ພື້ນຖານໂຄງລ່າງດີຈີຕອນ, ອຳນາດການປົກຄອງດີຈີຕອນ ແລະ ພົນລະເມືອງດີຈີຕອນ, ຕະຫຼອດຮອດການປ່ຽນແປງຂອງດິນຟ້າອາກາດ, ໝາຍຄວາມວ່າ ຕ້ອງຫັນປ່ຽນພະລັງງານຫຼຸດຜ່ອນການປ່ອຍອາຍກາກບອນລົງລະດັບ 0 ໃນປີ 2050, ຫຼຸດທາດເມຕານລົງ 30%.

ທ່ານນາຍົກລັດຖະມົນຕີ ຟ້າມມິງຈິງ ຢັ້ງຢືນວ່າ ດ້ວຍຫົວຂໍ້ບໍລິຫານຂອງປີ 2022 ແມ່ນ “ສາມັກຄີປະຕິບັດກົດລະບຽບວິໄນ, ເປັນເຈົ້າການ ຮັບມືຢ່າງປອດໄພ ແລະ ມີປະສິດທິຜົນ, ຟື້ນຟູການພັດທະນາ”, ລັດຖະບານ ຫວຽດນາມ ຈະອີງຕາມສະພາບການຕົວຈິງເພື່ອຊີ້ນຳ, ບໍລິຫານຢ່າງເປັນເຈົ້າການ, ຂ້ຽວຂາດ, ມີຫົວຄິດປະດິດສ້າງ, ມີຄວາມຮັບຜິດຊອບ, ມີລະບຽບວິໄນ, ມີຄວາມຊື່ສັດບໍລິສຸດ, ທ່ານກໍ່ປາດຖະໜາກວ່າ ປະຊາຄົມວິສາຫະກິດຈະຮ່ວມເດີນທາງກັບ ລັດຖະບານ ແລະ ປະຊາຊົນ ຫວຽດນາມ ພ້ອມກັນຜ່ານຜ່າຄວາມຫຍຸ້ງຍາກ ນຳປະເທດຊາດນັບມື້ນັບພັດທະນາແບບຍືນຍົງ.