(vovworld)-ວິວັດການເຊື່ອມໂຍງເຂົ້າກັບສາກົນຂອງຫວຽດນາມ ພວມກ້າວເຂົ້າສູ່
ໄລຍະໃຫມ່, ເລິກເຊິ່ງ ແລະກວ້າງຂວາງກວ່າ ດ້ວຍບັນດາຄຳໝັ້ນສັນຍາເປີດປະຕູຕະຫລາດເມື່ອເຂົ້າຮ່ວມບັນດາລະບອບເສດຖະກິດສາກົນ. ຍົກສູງກຳລັງຄວາມສາມາດແກ້ງແຍ້ງຂອງພື້ນຖານເສດຖະກິດ, ໃນນັ້ນ ມີກຳລັງຄວາມສາມາດແກ້ງແຍ້ງຂອງບັນດາວິສາຫະກິດຫວຽດນາມ ເພື່ອຍາດແຍ່ງບັນດາກາລະໂອກາດຂອງວິວັດການເຊື່ອມໂຍງນຳມາໃຫ້ ນັ້ນແມ່ນຄວາມຕ້ອງການທີ່ຈຳເປັນ.
ປຸງແຕ່ງກຸ້ງເພື່ອສົ່ງອອກ
ພາບ:vietbao.vn
|
ປີ 2015, ຜູ້ຊ່ຽວຊານຫລາຍທ່ານຄາດຄະເນວ່າ ເສດຖະກິດຫວຽດນາມ ຈະມີບາດກ້າວຫັນປ່ຽນສຳຄັນຕາມທິດໄວກວ່າ ແລະ ກາຍເປັນສະຖານທີ່ດຶງດູດນັກລົງທຶນ. ໃນວິວັດການເຊື່ອມໂຍງເຂົ້າກັບເສດຖະກິດສາກົນ, ຄຽງຄູ່ບັນດາກາລະໂອກາດຂອງວິວັດການເຊື່ອມໂຍງ, ປະຊາຄົມວິສາຫະກິດພາຍໃນປະເທດ, ໃນນັ້ນ ສ່ວນຫລາຍແມ່ນບັນດາວິສາຫະກິດຂະຫນາດກາງ ແລະ ນ້ອຍ ໄດ້ ແລະ ພວມມີບັນດາບາດກ້າວກະກຽມເພື່ອຍົກສູງກຳລັງຄວາມສາມາດແກ້ງແຍ້ງ. ພ້ອມກັນນັ້ນ, ລັດຖະບານກໍໄດ້ວາງອອກບັນດາມາດຕະການຫນູນຊ່ວຍວິສາຫະກິດພາຍໃນປະເທດ ເພື່ອໃຫ້ເສດຖະກິດຫວຽດນາມ ສາມາດກ້າວຂຶ້ນຈາກກຳລັງແຮງພາຍໃນ, ບັນລຸລະດັບເຕີບໂຕໝັ້ນຄົງໃນອະນາຄົດ.
ຍົກສູງກຳລັງຄວາມສາມາດແກ້ງແຍ້ງຂອງວິສາຫະກິດ
ວິສາຫະກິດສວມບົດບາດຫລັກແຫລ່ງສຳລັບການພັດທະນາຂອງແຕ່ລະປະເທດ. ວິສາຫະກິດຕັດສິນຊີ້ຂາດ ຕໍ່ການທີ່ປະເທດນັ້ນເຂັ້ມແຂງຫລືອ່ອນດ້ອຍ, ຮັ່ງມີຫລືບໍ່ຮັ່ງມີ ແລະ ວິສາຫະກິດສາມາດນຳປະເທດນັ້ນຈະເລີນເຕີບໂຕໃນອະນາຄົດ. ແຕ່ວິສາຫະກິດ ເຄື່ອນໄຫວໄດ້ຫລືບໍ່ ພັດແມ່ນອີງໃສ່ກຳລັງຄວາມສາມາດບໍລິຫານຂອງກົງຈັກລັດ. ໃນໄລຍະຜ່ານມາ, ລັດຖະບານ ໄດ້ປະກາດໃຊ້ບັນດາມາດຕະການ ແລະ ຂໍ້ຕົກລົງຢ່າງລຽນຕິດ, ເພື່ອຍູ້ວິວັດການສ້າງໂຄງປະກອບເສດຖະກິດຄືນໃຫມ່ໂດຍໄວ, ສຸມໃສ່ປັບປຸງສະພາບແວດລ້ອມແຫ່ງການດຳເນີນທຸລະກິດ, ຍູ້ແຮງການປະຕິຮູບ, ຫນູນຊ່ວຍວິສາຫະກິດພັດທະນາ, ພິເສດ ແມ່ນວິສາຫະກິດ ຂະຫນາດກາງ ແລະ ນ້ອຍ. ການກະທຳນີ້ ໄດ້ຮັບການສະຫນັບສະຫນູນຢ່າງຕັ້ງຫນ້າຈາກປະຊາຄົມວິສາຫະກິດ. ທ່ານ ຫວູຕຽນລົກ, ປະທານຫ້ອງການການຄ້າ ແລະ ອຸດສາຫະກຳ ຫວຽດນາມ ຖືວ່າ:
“ດ້ວຍບັນດາຂໍ້ຕົກລົງສຳຄັນທີ່ໄດ້ວາງອອກ, ໃນນັ້ນ ມີເລື່ອງຍື່ນສະເຫນີຕໍ່ສະພາແຫ່ງຊາດຮັບຮອງເອົາກົດໝາຍວ່າດ້ວຍວິສາຫະກິດ ແລະ ກົດໝາຍວ່າດ້ວຍການລົງທຶນໃຫມ່ ສະບັບໃຫມ່, ລັດຖະບານໄດ້ກຳນົດຢ່າງຖືກຕ້ອງ ແລະ ຖືກກັບຈີນຕະນາການ ແລະ ວິທີເພື່ອຍົກສູງກຳລັງຄວາມສາມາດແກ້ງແຍ້ງຂອງຫວຽດນາມ ໃນໄລຍະຈະມາເຖິງ ແມ່ນຍູ້ແຮງການຫັນເປັນຫຸ້ນສ່ວນ, ຖອນທຶນຂອງລັດອອກຈາກຫລາຍຂົງເຂດດຳເນີນທຸລະກິດ ແລະ ມີບາດກ້າວບຸກທະລຸໃນການປັບປຸງຄຸນນະພາບການບໍລິຫານ ແລະ ລະບຽບການບໍລິຫານຂອງບັນດາອົງການມີສິດອຳນາດ.”
ພາບປະກອບ:doanhnhansaigon.vn
|
ສິ່ງທີ່ເປັນຫນ້າສົນໃຈ ນັ້ນແມ່ນໃນກົດໝາຍວ່າດ້ວຍວິສາຫະກິດ ແລະ ກົດໝາຍວ່າດ້ວຍການລົງທຶນ ສະບັບປັບປຸງ, ບັນດາລະບຽບການດຳເນີນທຸລະກິດ ໄດ້ເປັນເອກະພາບກວ່າ, ບໍ່ມີການຈຳແນກຫລາຍລະຫວ່າງບັນດານັກລົງທຶນພາຍໃນປະເທດ ແລະ ຕ່າງປະເທດ. ກົດໝາຍ ແລະ ບັນດາຄຳສັ່ງ, ດຳລັດ ໄດ້ຫັນສິດຂອງວິສາຫະກິດເປັນລະອຽດມີຄວາມເສລີໃນການເລືອກເຟັ້ນເນື້ອໃນກໍຄືຮູບການຜະລິດດຳເນີນທຸລະກິດ . ນີ້ແມ່ນການປັບປຸງຢ່າງຕັ້ງຫນ້າ ຊື່ງຕາມການຕີລາຄາຂອງ ດຣ ເລດັງຢວັນ, ຜູ້ຊ່ຽວຊານເສດຖະກິດ ຈະສ້າງທ່າພັດທະນາຢ່າງແຮງກວ່າໃຫ້ແກ່ວິສາຫະກິດ ຫວຽດນາມ.
“ກົດໝາຍວ່າດ້ວຍວິສາຫະກິດປັບປຸງເພີ່ມເຕີມ, ໃນນັ້ນ ຍົກເລີກການຈົດທະບຽນບັນດາຂະແຫນງອາຊີບດຳເນີນທຸລະກິດ. ທີສອງ ສະຫງວນໃຫ້ແກ່ວິສາຫະກິດມີສິດຕັດສິນກາປະທັບຂອງຕົນ. ນີ້ແມ່ນທ່າໄດ້ປຽບສຳຄັນທີ່ສຸດ.”
ຄຽງຄູ່ກັບການປະຕິຮູບລະບຽບການບໍລິຫານ, ບັນດາວິສາຫະກິດຍັງໄດ້ຮັບການຫນູນຊ່ວຍກ່ຽວກັບທຶນກູ້ຢືມ, ຫນູນຊ່ວຍຍົກສູງກຳລັງຄວາມສາມາດບໍລິຫານ ຕອບສະຫນອງຄວາມຕ້ອງການເຊື່ອມໂຍງເຂົ້າກັບສາກົນ. ທ່ານນາງ ບູ່ຍທູຖູຍ, ຮອງຫົວຫນ້າກົມພັດທະນາວິສາຫະກິດ, ສັງກັດກະຊວງແຜນການ ແລະ ການລົງທຶນ ຫວຽດນາມ ຢືນຢັນວ່າ:
“ພວກຂ້າພະເຈົ້າໄດ້ສ້າງບັນດາລາຍການຫນູນຊ່ວຍສົມທົບກັບບັນດາຫົວຫນ່ວຍ, ກະຊວງ, ຂະແຫນງການອື່ນ ເພື່ອຫນູນຊ່ວຍບັນດາກຸ່ມວິສາຫະກິດກ່ຽວກັບການກູ້ຢືມທຶນ ຜ່ານລະບົບທະນາຄານ. ນອກນັ້ນ, ກະຊວງແຜນການ ແລະ ການລົງທຶນ ກໍພວມພິຈາລະນາກັບ World Bank ໂຄງການຫນູນຊ່ວຍຍົກສູງກຳລັງຄວາມສາມາດຂອງວິສາຫະກິດຂະຫນາດກາງ ແລະ ນ້ອຍ. ພວກຂ້າພະເຈົ້າກໍມີບັນດານະໂຍບາຍເພື່ອໃຫ້ວິສາຫະກິດພາຍໃນປະເທດ ຍົກສູງກຳລັງຄວາມສາມາດແກ້ງແຍ້ງ.”
ກ້າວຂຶ້ນຈາກກຳລັງພາຍໃນ
ປີ 2015 ແມ່ນປີທີ່ມີຫລາຍຄຳໝັ້ນສັນຍາເຊື່ອມໂຍງເຂົ້າກັບສາກົນຂອງຫວຽດນາມ ໄດ້ຮັບການຜັນຂະຫຍາຍຢ່າງແຮງຄື: ເຂົ້າຮ່ວມບັນດາສັນຍາການຄ້າເສລີສອງຝ່າຍກັບຫລາຍປະເທດ. ນີ້ທັງແມ່ນກາລະໂອກາດ ທັງແມ່ນສິ່ງທ້າທາຍສຳລັບວິສາຫະກິດ. ເພື່ອຍາດແຍ່ງກາລະໂອກາດໂດຍບັນດາກົນໄກຮ່ວມມືນີ້ນຳມາໃຫ້, ບັນດາວິສາຫະກິດ ໄດ້ມີບາດກ້າວກະກຽມຫລາຍຢ່າງ ເພື່ອຮັບມືກັບບັນດາຂໍ້ມາດຕາໝັ້ນໝາຍໃນການເຊື່ອມໂຍງເຂົ້າກັບສາກົນ. ທ່ານ ເລຕຽນເຈື່ອງ, ຮອງຜູ້ອຳນວຍການໃຫຍ່ ກຸ່ມບໍລິສັດຕ່ຳແຜ່ນຕັດຫຍິບ ຫວຽດນາມ ໃຫ້ຮູ້ວ່າ:
“ໃນຫລາຍປີຜ່ານມາ, ດ້ວຍການເຊື່ອມໂຍງເຂົ້າກັບສາກົນຂອງທັງປະເທດ, ວິວັດການກະກຽມຂອງຂະແຫນງຕ່ຳແຜ່ນຕັດຫຍິບພວມໄປຖືກທິດ. ນັ້ນແມ່ນ ສຸມໃສ່ປັບປຸງມູນຄ່າເພີ່ມພາຍໃນປະເທດ, ເພີ່ມລະດັບເປັນເຈົ້າການໃນທຸກຂອດ, ພິເສດແມ່ນການອອກແບບ ແລະ ກະກຽມວັດຖຸດິບ. ວິວັດການນີ້ດຳເນີນໄປໃນໄລຍະສີບປີ, ນັບແຕ່ເມື່ອລັດຖະບານ ກະກຽມເຈລະຈາສັນຍາການຄ້າສອງຝ່າຍກັບ ອາເມລິກາ, ອົງການການຄ້າໂລກ ແລະ ປະຈຸບັນ ແມ່ນສັນຍາຄູ່ຮ່ວມມືເສດຖະກິດຂ້າມປາຊີຟີກ. ຍ້ອນມີການກະກຽມດັ່ງກ່າວໃນຫລາຍປີ ໄດ້ເຮັດໃຫ້ມູນຄ່າເພີ່ມຂອງຂະແຫນງຕ່ຳແຜ່ນຕັດຫຍິບມີການປັບປຸງເທື່ອລະກ້າວ.”
ຄວາມຈິງໃນໄລຍະວິກິດການເສດຖະກິດຜ່ານມາ, ມີພາກສ່ວນວິສາຫະກິດຫນຶ່ງຍັງສືບຕໍ່ຄົງຕົວໄດ້ ຍ້ອນລະບົບບໍລິຫານດີ, ສຸມໃສ່ຂະແຫນງດຳເນີນທຸລະກິດຕົ້ນຕໍ, ເອົາໃຈໃສ່ຫັນຕະຫລາດເປັນຫລາຍຮູບຫລາຍແບບ, ກວດກາຄວາມສ່ຽງເປັນຢ່າງດີ. ນີ້ແມ່ນບັນດາບົດຮຽນດີຂອງພື້ນຖານເສດຖະກິດຫວຽດນາມ. ບັນດາການປະຕິຮູບລະບອບນະໂຍບາຍຢ່າງແຮງຂອງລັດຖະບານ ພ້ອມກັບຄວາມມານະພະຍາຍາມຂອງວິສາຫະກິດເອງ ພວມໝັ້ນໝາຍນຳພື້ນຖານເສດຖະກິດຫວຽດນາມ ຈະມີບາດກ້າວຫັນປ່ຽນໃຫມ່ໃນປີ 2015.