(vovworld) – ການເລືອກຕັ້ງປະທານາທິບໍດີເວເນຊູເອລາ ໄດ້ຮັບຄວາມສົນໃຈຈາກທົ່ວໂລກ, ແລະ ສຸດທ້າຍໄຊຊະນະໄດ້ຂຶ້ນກັບຜູ້ຮັກສາການປະທານາທິບໍດີ Nicola’s Maduro. ແຕ່ເຖິງຢ່າງໃດກໍ່ຕາມ, ອາຍຸການປະທານາທິບໍດີໃນ 6 ປີ ຕໍ່ໜ້າ ຈະເປັນການທະທາຍບໍ່ແມ່ນໜ້ອຍສຳລັບທ່ານ Nicola’s Maduro, ແຕ່ໝາກຜົນແຫ່ງການເລືອກຕັ້ງຄັ້ງນີ້ໄດ້ສະແດງໃຫ້ເຫັນວ່າ ປະຊາຊົນເວເນຊູເອລາ ໄດ້ມີຄວາມໄວ້ເນື້ອເຊື່ອໃຈ ແລະ ສະໜັບສະໜູນແນວທາງເຊິ່ງທ່ານໄດ້ໃຫ້ຄຳໝັ້ນສັນຍາຈະປະຕິບັດ ເພື່ອນຳປະເທດອາເມລິກາໃຕ້ນີ້ພັດທະນາຢ່າງໝັ້ນຄົງ.
ປະທານາທິບໍດີ Nicolas Maduro (ຂວາ) (ພາບ: chinhphu.vn)
ຕາມໝາກຜົນໂດຍສະພາເລືອກຕັ້ງແຫ່ງຊາດ ເວເນຊູເອລາ CNE ປະກາດເມື່ອຕອນຄຳ່ວັນທີ 14/4 ແລ້ວ, ດ້ວຍ 99,12% ຈຳນວນບັດໄດ້ຮັບການນັບຄະແນນ, ຜູ້ຮັກສາການປະທານາທິບໍດີ Nicola’s Maduro, ຜູ້ອອກສະໝັກຮັບເລືອກຕັ້ງຂອງພັກສັງຄົມນິຍົມເອກະພາບ ເວເນຊູເອລາ (PSUV), ໄດ້ຮັບໄຊຊະນະ ດ້ວຍ 50,66% ຈຳນວນບັດສະໜັບສະໜູນ, ເມື່ອທຽບໃສ່ 49,07% ຈຳນວນບັດສະໜັບສະໜູນຜູ້ອອກສະໝັກຮັບເລືອກຕັ້ງຂອງພັກຮ່ວມສຳພັນຝ່າຍຄ້ານ ທ່ານ Caprils. ເປັນອັນວ່າ, ອີກເທື່ອໜຶ່ງ, ປະຊາຊົນເວເນຊູເອລາ ໄດ້ຢັ້ງຢືນການສະໜັບສະໜູນທີ່ມີຕໍ່ວິວັດທະນາການປະຕິວັດ Bolivar ຜ່ານບັດເລືອກຕັ້ງໃຫ້ຜູ້ອອກສະໝັກຮັບເລືອກຕັ້ງຂອງພັກສັງຄົມນິຍົມເອກະພາບ ເວເນຊູເອລາ (PSUV) Nicola’s Maduro. ໄຊຊະນະຂອງຜູ້ຮັກສາການປະທານາທິບໍດີ Nicola’s Maduro ຍັງໄດ້ຮັບການສະໜັບສະໜູນຢ່າງແຮງຈາກການນຳຫຼາຍປະເທດໃນພາກພື້ນອາເມລິກາໃຕ້ ອີກ ຜ່ານສານຊົມເຊີຍ ແລະ ຄຳໝັ້ນສັນຍາຮ່ວມມືພ້ອມກັນພັດທະນາ. ທ່ານປະທານປະເທດກູບາ Raul Castro ຖືວ່າ, ໄຊຊະນະໃນການເລືອກຕັ້ງຜ່ານມາຂອງທ່ານ Maduro ເປັນການພິສູດໃຫ້ເຫັນກຳລັງແຮງຂອງບັນດາແນວຄິດ ແລະ ຜົນງານ ເຊິ່ງອະດີດປະທານາທິບໍດີ Hugo Chavez ໄດ້ກໍ່ຕັ້ງ. ທ່ານປະທານາທິບໍດີ ໂບລີເວຍ Evo Morales ປະກາດວ່າ, ໄຊຊະນະຂອງທ່ານ Maduro ແມ່ນໄຊຊະນະຂອງທັງອາເມລິກາລາຕີນ ພ້ອມທັງຖືວ່າ ໝາກຜົນນີ້ຈະຊ່ວຍເພີ່ມທະວີກຸ່ມກ້ອນມະຫາສາມັກຄີ ໃນບັນດາອົງການຈັດຕັ້ງຢູ່ພາກພື້ນ ເຊິ່ງການນຳຝ່າຍຊ້າຍ Hugo Chavez ໄດ້ກໍ່ຕັ້ງຄື: ພັນທະມິດບັນດາປະເທດອາເມລິກາໃຕ້, ປະຊາຄົມບັນດາປະເທດອາເມລິກາລາຕີນ ແລະ ກາຮີເບ, ຫຼືການເລືອກເຟັ້ນ Bolivar ໃຫ້ປະຊາຊາດຢູ່ທະວີບອາເມລິກາ.
ຕອບຄືນຄວາມໄວ້ເນື້ອເຊື່ອໃຈຂອງບັນດາຜູ້ສະໜັບສະໜູນ, ໃນບົດກ່າວປາໄສເມື່ອໄດ້ຮັບໄຊຊະນະ, ທ່ານ Maduro ໄດ້ຢັ້ງຢືນຈະຈົ່ງຮັກພັກດີຕໍ່ອຸດົມຄະຕິຂອງປະທານາທິບໍດີອາຍຸການກອນ, ສືບຕໍ່ເສີມຂະຫຍາຍ ແລະ ເຮັດໃຫ້ໂຄງການສັງຄົມນິຍົມໃນສະຕະວັດທີ 21 ເຊິ່ງອະດີດປະທານາທິບໍດີ Hugo Chavez ເປັນຜູ້ລິເລີ່ມມີຄວາມເລິກເຊິ່ງຍິ່ງຂຶ້ນ. ທ່ານກໍ່ໄດ້ເນັ້ນໜັກວ່າຈະຊຸກຍູ້ການປະຕິຮູບດ້ານການເມືອງ ແລະ ເສດຖະກິດກວ່າອີກ, ເຮັດວຽກຢ່າງມີປະສິດທິຜົນກວ່າ ເພື່ອຕອບສະໜອງຄວາມຮຽກຮ້ອງຕ້ອງການຂອງປະຊາຊົນໃຫ້ດີທີ່ສຸດ, ພ້ອມທັງຈະຂະຫຍາຍບັນດາໂຄງການສັງຄົມເພື່ອຄົນທຸກຍາກ ເຊິ່ງລັດຖະບານໄດ້ຜັນຂະຫຍາຍໃນໜຶ່ງທົດສະວັດກວ່າທີ່ຜ່ານມາ.
ອາດເວົ້າໄດ້ວ່າ, ໜ້າທີ່ນຳພາປະເທດຂອງທ່ານ Maduro ກໍ່ມີຄວາມສະດວກຫຼາຍຢ່າງ, ຍ້ອນປະທານາທິບໍດີອາຍຸການກ່ອນນັ້ນ ໄດ້ສ້າງຜົນງານຫຼາຍຢ່າງກ່ຽວກັບສັງຄົມ ເຊິ່ງໄດ້ຮັບການຮັບຮູ້ຈາກທົ່ວໂລກ. ອັນຕາຄອບຄົວທີ່ທຸກຍາກຢູ່ເວເນຊູເອລາ ໄດ້ຫຼຸດລົງເຄິ່ງໜຶ່ງ, ເຫຼືອພຽງ 24%. ອັດຕາສ່ວນຜູ້ຫວ່າງງານຫຼຸດລົງ 5,9% ໃນເດືອນ 12/2012, ເຊິ່ງແມ່ນລະດັບຕຳ່ສຸດນັບແຕ່ກ່ອນມາຮອດປະຈຸບັນ. ນີ້ແມ່ນໝາກຜົນຂອງເລື່ອງສ້າງວຽກເຮັດງານທຳໃໝ່ໃຫ້ຄົນງານເກືອບ 4 ລ້ານຄົນ ແລະ ນະໂຍບາຍເກືອດຫ້າມຄັດເຂ່ຍຜູ້ອອກແຮງງານ. ນອກນັ້ນ, ສະຫະປະຊາຊາດຍັງຮັບຮູ້ເວເນຊູເອລາ ແມ່ນປະເທດນຳໜ້າໃນຄວາມມານະພະຍາຍາມແກ້ໄຂບັນຫາບໍ່ພໍກິນ. ນັບແຕ່ປີ 2003, ໄດ້ມີ 30 ກວ່າໂຄງການທີ່ມີຊື່ວ່າບັນດາພາລະໜ້າທີ່ Bolivar ໄດ້ຮັບການຜັນຂະຫຍາຍໃນບັນດາຂົງເຂດການສຶກສາ, ສາທາລະນະສຸກ, ທັນຍາຫານ, ເຮືອນຢູ່, ສ້າງວຽກເຮັດງານທຳ, ວັດທະນະທຳ, ວິທະຍາສາດ, ກິລາ.
ແຕ່ບໍ່ໝາຍຄວາມວ່າ ປະທານາທິບໍດີຄົນໃໝ່ Nicola’s Maduro ບໍ່ປະສົບກັບຄວາມຫຍຸ້ງຍາກໃນອາຍຸການຈະມາເຖິງ. ກ່ອນອື່ນໝົດແມ່ນເລື່ອງຮັກສາ ແລະ ເສີມຂະຫຍາຍບັນດາຜົນງານດັ່ງກ່າວຂອງລັດຖະບານອາຍຸການກ່ອນນີ້ໃນຂົງເຂດພົວພັນພາຍໃນ ແລະ ຮັບປະກັນໃຫ້ທຸກໂຄງການສັງຄົມບັນລຸໄດ້ບັນດາຄາດໝາຍທີ່ໄດ້ວາງອອກ. ນອກນັ້ນ, ເວເນຊູເອລາ ກໍ່ຕ້ອງເພີ່ມທະວີການລົງທຶນຂຸດຄົ້ນນຳ້ມັນອາຍແກສ, ພ້ອມທັງສ້າງພື້ນຖານເສດຖະກິດເປັນຫຼາຍຮູບຫຼາຍແບບ, ພັດທະນາກະສີກຳ ເພື່ອສາມາດກຸ້ມຕົນເອງ ແລະ ກ້າວໄປເຖິງ ກາຍເປັນປະເທດສົ່ງອອກທັນຍາຫານ, ຫຼຸດຜ່ານໄພເງິນເຟີ້. ພ້ອມກັນນັ້ນ, ປະທານາທິບໍດີຄົນໃໝ່ Maduro ກໍ່ຕ້ອງຕໍ່ສູ້ກັບໄພສໍ້ລາດບັງຫຼວງ, ຫຼຸດຜ່ອນອັນຕາສ່ວນອາດສະຍາກອນ. ກ່ຽວກັບການພົວພັນກັບຕ່າງປະເທດ, ປະທານາທິບໍດີ Maduro ຕ້ອງສືບຕໍ່ປັບປຸງທີ່ຕັ້ງຂອງເວເນຊູເອລາ ໃນພາກພື້ນອາເມລິກາລາຕີນເວົ້າສະເພາະ ແລະ ໃນເວທີສາກົນເວົ້າລວມ.
ອາຍຸການປະທານາທິບໍດີ Nicola’s Maduro ຈະແກ່ຍາວໃນເວລາ 6 ປີ. ເຖິງວ່າຢູ່ຕໍ່ໜ້າຍັງປະສົບກັບຄວາມຫຍຸ້ງຍາກ, ການທ້າທາຍຫຼາຍຢ່າງກໍ່ຕາມ, ແຕ່ປະຊາຊົນເວເນຊູເອລາ ຍັງຫວັງວ່າ, ພາຍໃຕ້ການຊີ້ນຳນຳພາຂອງປະທານາທິບໍດີຄົນໃໝ່ Nicola’s Maduro, ປະເທດທີ່ມີນ້ຳມັນ, ບໍ່ແຮ່ຫຼາຍທີ່ສຸດຢູ່ໂລກນີ້ ຈະພັດທະນາຢ່າງໝັ້ນຄົງຕາມເສັ້ນທາງປະຕິວັດ Bolivar.