(vovworld)- ວັນທີ 16/8/1945, ກ່ອນທີ່ດຳເນີນການລຸກຮື້ຂຶ້ນຍາດເອົາອຳນາດການປົກຄອງໃນທົ່ວປະເທດ, ກອງປະຊຸມສະພາຜູ້ແທນປະຊາຊົນແຫ່ງຊາດ ຖືກຈັດຂຶ້ນຢູ່ ສາລາບ້ານ ເຕີນຈ່າວ (ຕວຽນກວາງ) ໂດຍມີການເຂົ້າຮ່ວມຂອງຜູ້ແທນທີ່ຕາງຫນ້າໃຫ້ບັນດາຂະແຫນງການ, ວົງການ, ຊົນເຜົ່າ, ພັກຝ່າຍການເມືອງ, ອົງການຈັດຕັ້ງມະຫາຊົນກູ້ຊາດ ແລະ ຊາວຫວຽດນາມ ອາໄສຢູ່ຕ່າງປະເທດຈຳນວນຫນຶ່ງ. ກອງປະຊຸມດັ່ງກ່າວໄດ້ສະແດງໃຫ້ເຫັນຄວາມສາມັກຄີເປັນຈິດຫນຶ່ງໃຈດຽວຂອງຊາດຫວຽດນາມ ຕັດສິນໃຈປະຕິບັດແນວທາງການລຸກຮື້ຂຶ້ນທົ່ວປະເທດ, ລົບລ້າງລະບອບເປັນຂ້າທາດຂອງລ່າເມືອງຂຶ້ນ, ສັກດີນາ, ສ້າງພື້ນຖານດ້ານນິຕິກຳທຳອິດໃຫ້ລະບອບໃຫມ່. ກອງປະຊຸມສະພາຜູ້ແທນປະຊາຊົນແຫ່ງຊາດ ເຕີນຈ່າວ ໄດ້ຢືນຢັນຄວາມຄືບຫນ້າໃຫຍ່ໃນປະຫວັດສາດແຫ່ງການຕໍ່ສູ້ປົດປ່ອຍຊາດ, ສອດຄອ່ງກັບທ່າອ່ຽງພັດທະນາແຫ່ງຄວາມສີວິໄລຂອງມວນມະນຸດ, ສະແດງໃຫ້ເຫັນສິດເສລີ, ປະຊາທິປະໄຕຂອງປະເທດເອກະລາດ, ມີອະທິປະໄຕ. ເຖິງວ່າ ມີຈຳນວນຜູ້ແທນກວ່າ 60 ຄົນ, ແຕ່ໄດ້ຮັບຖືວ່າ ແມ່ນກອງປະຊຸມໃຫຍ່ມີລະດັບປະຫວັດສາດຂອງສະພາແຫ່ງຊາດ, ແມ່ນອົງການສິດອຳນາດຊົ່ວຄາວຂອງປະເທດສາທາລະນະລັດປະຊາທິປະໄຕຫວຽດນາມ.
ສາລາບ້ານ ເຕີນຈ່າວ-ບ່ອນດຳເນີນ
ກອງປະຊຸມສະພາຜູ້ແທນປະຊາຊົນແຫ່ງຊາດ
ພາບເອກະສານ
|
ຕາງຫນ້າໃຫ້ທົ່ວປວງຊົນຕັດສິນຊາຕາກຳຂອງຊາດ
ທີ່ກອງປະຊຸມໃຫຍ່, ທ່ານ ເຈື່ອງຈີງ, ເລຂາທິການໃຫຍ່ ພັກກອມມູນິດ ອິນດູຈີນ ໄດ້ອ່ານບົດລາຍງານ, ໃນນັ້ນ ໄດ້ເນັ້ນຫນັກເຖິງ ສອງບັນຫາໃຫຍ່ ນັ້ນແມ່ນ: ການລຸກຮື້ຂຶ້ນທົ່ວປະເທດ ແລະ ການເລືອກຕັ້ງຄະນະກຳມະການປົດປ່ອຍຊາດ(ໝາຍເຖິງລັດຖະບານປະຕິວັດຊົ່ວຄາວ). ພັກກອມມູນິດ ອິນດູຈີນ ມີແຜນນະໂຍບາຍຊີ້ນຳນຳພາມະຫາຊົນລຸກຮື້ຂຶ້ນ ປົດອາວຸດຂອງຍີ່ປຸ່ນ, ຍາດເອົາອຳນາດການປົກຄອງ. ບົນພື້ນຖານນັ້ນ, ກອງປະຊຸມໃຫຍ່ ໄດ້ເຫັນດີຕໍ່ແຜນນະໂຍບາຍຂອງພັກ ແລະ ແນວໂຮມຫວຽດມີນ, ຕັດສິນປຸກລະດົມການລຸກຮື້ຂຶ້ນໃນທົ່ວປະເທດ, ຊີ້ນຳນຳພາມະຫາຊົນລຸກຮຶ້ຂຶ້ນຍາດເອົາອຳນາດການປົກຄອງຈາກກຳມືຂອງ ຍີ່ປຸ່ນ, ສ້າງຕັ້ງຄະນະກຳມະການປົດປ່ອຍຊາດ, ກຳນົດກ່ຽວກັບທຸງຊາດ, ເພງຊາດ ແລະ ຍຸດທະສາດສຳຄັນອື່ນໆຂອງການປະຕິວັດຫວຽດນາມ.
ຕໍ່ຈາກຜົນສຳເລັດຂອງກອງປະຊຸມສະພາຜູ້ແທນປະຊາຊົນແຫ່ງຊາດ, ພາຍຫລັງຍາດເອົາເອກະລາດ, ປະຊາຊົນຫວຽດນາມ ດຳເນີນການເລືອກຕັ້ງທົ່ວປະເທດເມື່ອວັນທີ 6/1/1946 ຢ່າງມີໄຊ, ເລືອກຕັ້ງ ສະພາແຫ່ງຊາດຊຸດທຳອິດຂອງປະເທດ ສາທາລະນະລັດ ປະຊາທິປະໄຕຫວຽດນາມ ແລະ ສ້າງລັດຖະທຳມະນູນຂອງລັດ ຫວຽດນາມ ເອກະລາດ. ສາດສະດາຈານ ນັກປະຫວັດສາດ ເລວັນລານ ຖືວ່າ:
“ກອງປະຊຸມສະພາຜູ້ແທນປະຊາຊົນແຫ່ງຊາດ ເຕີນຈ່າວ ແມ່ນຕົ້ນກຳເນີດຂອງສະພາແຫ່ງຊາດຫວຽດນາມ. ນີ້ແມ່ນໝາກຜົນຂອງແນວຄິດໂຮ່ຈິມີນ. ຍ້ອນມີລັດຖະນະໂຍບາຍທີ່ໄດ້ຮັບການຮັບຮອງເອົາທີ່ກອງປະຊຸມ ຫລັງຈາກນັ້ນ ການປະຕິວັດເດືອນສິງຫາ ໄດ້ຮັບຜົນເລັດຜົນ. ບົນພື້ນຖານນັ້ນ, ປະທານໂຮ່ຈິມີນ ໄດ້ຖະແຫລງວ່າ ຕ້ອງດຳເນີນການເລືອກຕັ້ງສະພາແຫ່ງຊາດໂດຍໄວ.”
ສ້າງຄຸນຄ່າກ່ຽວກັບກຳລັງແຮງມະຫາສາມັກຄີທົ່ວປວງຊົນທັງຊາດ
ກອງປະຊຸມໃຫຍ່ສະພາຜູ້ແທນປະຊາຊົນແຫ່ງຊາດ ເຕີນຈ່າວ ມີລະດັບປະຫວັດສາດຄື ກອງປະຊຸມໃຫຍ່ຂອງການປະຕິວັດ. ສະພາຜູ້ແທນປະຊາຊົນແຫ່ງຊາດ ແມ່ນຫົວຄິດປະດິດສ້າງຂອງປະທານໂຮ່ຈິມີນ, ຂອງພັກ ແລະ ແນວໂຮມຫວຽດມີນ ໃນການເສີມຂະຫຍາຍເຈດຈຳນົງ, ກຳລັງແຮງທົ່ວປວງຊົນທັງຊາດໃນພາລະກິດຕໍ່ສູ້ຂອງການປະຕິວັດ, ເປັນຈຸດເລີ່ມຕົ້ນໃຫ້ການປະຕິວັດຫວຽດນາມ ຍາດເອົາໄຊຊະນະໃນພາລະກິດຕໍ່ສູ້ຍາດເອົາເອກະລາດ, ໂຮມປະເທດຊາດເປັນເອກະພາບ, ສ້າງສາ, ປົກປັກຮັກສາ ແລະ ພັດທະນາປະເທດຊາດ. ກອງປະຊຸມໃຫຍ່ສະພາຜູ້ແທນປະຊາຊົນແຫ່ງຊາດ ໄດ້ສ້າງບົດຮຽນອັນລ້ຳຄ່າຫລາຍຢ່າງສຳລັບການເຄື່ອນໄຫວຂອງສະພາແຫ່ງຊາດປະຈຸບັນ, ໃນນັ້ນ ມີບົດຮຽນກ່ຽວກັບການເສີມຂະຫຍາຍເຈດຈຳນົງ, ກຳລັງແຮງຂອງທົ່ວປວງຊົນທັງຊາດ, ຕອບສະຫນອງບັນດາຫນ້າທີ່ຍຸດທະສາດຢ່າງທັນການໃນແຕ່ລະໄລຍະປະຕິວັດ, ສະແດງໃຫ້ເຫັນຈິດໃຈປະຊາທິປະໄຕ, ສ້າງລັດແຫ່ງອຳນາດນິຕິບັນຍັດຂອງປະຊາຊົນ, ເພື່ອປະຊາຊົນ ແລະ ໂດຍປະຊາຊົນ, ຢືນຢັນທີ່ຕັ້ງ, ບົດບາດແມ່ນອົງການສິດອຳນາດສູງສຸດຂອງປະຊາຊົນໃນການສ້າງສາ, ປົກປັກຮັກສາ ແລະ ພັດທະນາປະເທດຊາດ. ທ່ານປະທານສະພາແຫ່ງຊາດ ຫງວຽນຊີງຮຸ່ງ ຢືນຢັນວ່າ:
“ຜ່ານໄລຍະເກືອບ 70 ປີ, ນັບແຕ່ເມື່ອ ກອງປະຊຸມໃຫຍ່ສະພາຜູ້ແທນປະຊາຊົນແຫ່ງຊາດ ຈົນເຖິງການສ້າງຕັ້ງສະພາແຫ່ງຊາດຊຸດທີ 1 ມາຮອດປະຈຸບັນ, ສະພາແຫ່ງຊາດຊຸດທີ 13 ແມ່ນວິວັດການສືບທອດຢ່າງລຽນຕິດ, ມີການປ່ຽນໃຫມ່ຢ່າງບໍ່ຢຸດຢັ້ງນັບທັງການຈັດຕັ້ງ ແລະ ການເຄື່ອນໄຫວ. ສະພາແຫ່ງຊາດໄດ້ເສີມຂະຫຍາຍບົດບາດ, ທີ່ຕັ້ງ ແມ່ນອົງການຕົວແທນສູງສຸດຂອງປະຊາຊົນ, ອົງການລັດມີສິດອຳນາດສູງສຸດ, ປະກອບສ່ວນອັນໃຫຍ່ຫລວງ ແລະ ສຳຄັນ ເຂົ້າໃນພາລະກິດຕໍ່ສູ້ປົດປ່ອຍຊາດ, ໂຮມປະເທດຊາດເປັນເອກະພາບ, ສ້າງສາ ແລະ ປົກປັກຮັກສາປະເທດຊາດ.”
ການສ້າງຕັ້ງ ສະພາຜູ້ແທນປະຊາຊົນແຫ່ງຊາດ ກ່ອນນີ້ 70 ປີແມ່ນບາດລ້ຽວສຳຄັນໃນປະຫວັດການປະຕິວັດຫວຽດນາມ. ບັນດາຄຸນຄ່າຊື່ງ ກອງປະຊຸມໃຫຍ່ສະພາຜູ້ແທນປະຊາຊົນແຫ່ງຊາດປະໃຫ້ນັ້ນ ຈະສືບຕໍ່ໄດ້ຮັບການໝູນໃຊ້ຢ່າງມີຫົວຄິດປະດິດສ້າງໃນການເຄື່ອນໄຫວຂອງສະພາແຫ່ງຊາດ, ປະກອບສ່ວນສ້າງສາ, ປົກປັກຮັກສາ ແລະ ພັດທະນາປະເທດຊາດ.