ສ້າງເງື່ອນໄຂເພື່ອໃຫ້ແມ່ຍິງພັດທະນາ ແລະ ອຸທິດສ່ວນ

ວັນຈັນ ທີ 12 ມີນາ ຄ.ສ. 2012 | 19:22:04

(vovworld) - ແມ່ຍິງຫວຽດນາມ ສວມບົດບາດ, ທີ່ຕັ້ງສຳຄັນໃນປະຫວັດສາດແຫ່ງການສ້າງສາ ແລະ ປົກປັກຮັກສາປະເທດຊາດ. ການບຳລຸງ ແລະ ຝຶກຝົນຫລໍ່ຫລອມກຳລັງແມ່ຍິງ, ເສີມຂະຫຍາຍກຳລັງແຮງ, ຍົກສູງສະຕິປັນຍາ ແລະ ເອົາໃຈໃສ່ຕໍ່ການພັດທະນາໃນທຸກດ້ານຂອງແມ່ຍິງ ແມ່ນຫນ້າທີ່ເປັນປະຈຳ ແລະ ສຳຄັນຂອງສະຫະພັນແມ່ຍິງຂັ້ນຕ່າງໆໃນທຸກສະໄໝແຫ່ງການປະຕິວັດ, ພິເສດແມ່ນໃນໄລຍະການປະຕິວັດປະຈຸບັນ. ເນື່ອງໃນໂອກາດດຳເນີນກອງປະຊຸມໃຫຍ່ຜູ້ແທນແມ່ຍິງທົ່ວປະເທດສະຫະພັນແມ່ຍິງຫວຽດນາມ ຊຸດທີ XI ຖືກໄຂຂຶ້ນໃນວັນທີ 12/03 ຢູ່ຮ່າໂນ້ຍ, ນັກຂ່າວວິທະຍຸກະຈາຍສຽງຫວຽດນາມ ມີບົດຂຽນທີ່ມີຫົວຂໍ້ວ່າ: ສ້າງເງື່ອນໄຂເພື່ອໃຫ້ແມ່ຍິງພັດທະນາ ແລະ ອຸທິດສ່ວນ.

ສ້າງເງື່ອນໄຂເພື່ອໃຫ້ແມ່ຍິງພັດທະນາ ແລະ ອຸທິດສ່ວນ - ảnh 1

ສ້າງວຽກເຮັດງານທຳໃຫ້ແກ່ແມ່ຍິງຢູ່ເຂດຊົນນະບົດ
ພາບ:vtv.vn

ອາດຈະເຫັນໄດ້ວ່າ, ໃນ 5 ປີຜ່ານມາ, ແມ່ຍິງໃນທົ່ວປະເທດທຸກຂັ້ນ ຍາມໃດກໍມານະພະຍາຍາມສູ້ຊົນ, ຜ່ານຜ່າຄວາມຫຍຸ້ງຍາກ, ຂະຫຍັນຂັນເຄື່ອນ, ຕັ້ງຫນ້າ ເຂົ້າຮ່ວມບັນດາຂະບວນການແຂ່ງຂັນຮັກຊາດ ປະກອບສ່ວນສຳຄັນເຂົ້າໃນຜົນງານພັດທະນາລວມຂອງປະເທດຊາດ. ດ້ວຍບົດບາດຫລັກແຫລ່ງ, ໃນອາຍຸການຜ່ານມາ, ສະຫະພັນແມ່ຍິງຫວຽດນາມໃນທຸກຂັ້ນໄດ້ມີການປ່ຽນແປງທາງດ້ານເນື້ອໃນ, ວິທີການເຄື່ອນໄຫວຢ່າງບໍ່ຢຸດຢັ້ງ, ປຸກລະດົມຫລາຍຂະບວນການແຂ່ງຂັນ ແລະ ການຂົນຂວາຍຕ່າງໆ, ປະຕິບັດກິດຈະການລົບລ້າງຄວາມອຶດຫິວຫລຸດຜ່ອນຄວາມທຸກຍາກ, ສ້າງເສດຖະກິດຢູ່ບັນດາທ້ອງຖິ່ນຢ່າງມີປະສິດທິຜົນ. ບັນດາການຂົນຂວາຍນີ້ໄດ້ດຶງດູດການເຂົ້າຮ່ວມຂອງພະນັກງານ, ສະມາຊິກສະຫະພັນ, ແມ່ຍິງ ແລະ ວົງຄະນາຍາດເປັນຈຳນວນຫລວງຫລາຍ. ທ່ານນາງ ຮ່ວາງທິອ໋າຍຍຽນ, ຮອງປະທານສະຫະພັນແມ່ຍິງຫວຽດນາມ ໃຫ້ຮູ້ວ່າ:

“ໃນ 5 ປີຜ່ານມາ, ການເອົາໃຈໃສ່ເບີ່ງແຍງໃຫ້ແກ່ແມ່ຍິງ ເປັນຕົ້ນແມ່ນການຫນູນຊ່ວຍແມ່ຍິງໃນການລົບລ້າງຄວາມອຶດຫິວຫລຸດຜ່ອນຄວາມທຸກຍາກ ແລະ ພັດທະນາເສດຖະກິດ ສືບຕໍ່ໄດ້ຮັບການຜັນຂະຫຍາຍ ແລະ ປະຕິບັດຢູ່ສະຫະພັນຂັ້ນຕ່າງໆເປັນຢ່າງດີ. ຈາກການປະຕິບັດຂະບວນການແຂ່ງຂັນຮຳ່ຮຽນ, ມີຫົວຄິດປະດິດສ້າງໃນການອອກແຮງງານ, ສ້າງຄອບຄົວໃຫ້ມີຄວາມຜາສຸກ, ຕິດພັນກັບການຂົນຂວາຍຮຳ່ຮຽນ ແລະ ປະຕິບັດຕາມແບບຢ່າງຄຸນສົມບັດປະທານໂຮ່ຈິມີນ, ຂະບວນການແມ່ຍິງຂັ້ນຕ່າງໆໃນທົ່ວປະເທດປຸກລະດົມຂະບວນການປະຕິບັດການປະຢັດຕາມແບບຢ່າງຄຸນສົມບັດປະທານໂຮ່ຈິມີນ. ຄຽງຂ້າງນັ້ນ ສະຫະພັນແມ່ຍິງ ຍັງຫນູນຊ່ວຍປັນຍາຊົນຍິງສ້າງຕັ້ງອົງການສະຫະພັນຂອງຕົນ, ດຳເນີນຈັດຕັ້ງສະຫະພັນແມ່ຍິງທົດລອງໃນບັນດາວິສາຫະກິດພາກເອກະຊົນ, ສ້າງຕັ້ງຮູບແບບສະໂມສອນກຳມະກອນຍິງຢູ່ເຂດອຸດສາຫະກຳ, ສະໂມສອນນັກທຸລະກິດຍິງ, ຍົດຖາບັນດາສັກຍິງໃນສາສະຫນາ ແລະອື່ນໆ. ມາຮອດທ້າຍອາຍຸການ ອັດຕາສ່ວນແມ່ຍິງເຂົ້າຮ່ວມວຽກງານຂອງສະຫະພັນແມ່ນ 15 ລ້ານຄົນ.”

ຢູ່ຫວຽດນາມ, ອັດຕາສ່ວນແມ່ຍິງໃນເກັນອາຍຸອອກແຮງງານກວມເກືອບ 50% ຍອດຈຳນວນພົນລະເມືອງຢູ່ເຂດຊົນນະບົດ. ເພື່ອຮັບປະກັນສິດຜົນປະໂຫຍດໃຫ້ແກ່ແມ່ຍິງເວົ້າລວມ, ເປັນຕົ້ນແມ່ນແມ່ຍິງຢູ່ເຂດຊົນນະບົດ, ແມ່ຍິງຊາວຊົນເຜົ່າສ່ວນຫນ້ອຍເວົ້າສະເພາະ ໃນຊຸມປີຜ່ານມາ ສະຫະພັນແມ່ຍິງຫວຽດນາມ ໄດ້ຊ່ວຍເຫລືອແມ່ຍິງທີ່ປະສົບກັບຄວາມທຸກຍາກກວ່າ 2 ລ້ານຄົນ ໄດ້ກູ້ຢືມທຶນເພື່ອພັດທະນາເສດຖະກິດຄອບຄົວ, ປັບປຸງຊີວິດການເປັນຢູ່. ແຕ່ລະປີ, ມີຄອບຄົວແມ່ຍິງທຸກຍາກກວ່າ 3 ລ້ານຄອບຄົວໄດ້ຮັບການຫນູນຊ່ວຍດ້ານທຶນຮອນ, ຄວາມຮູ້, ເຕັກນິກ, ວິທີການສ້າງເສດຖະກິດ, ມີປະມານ 40% ໃນຈຳນວນຄອບຄົວເຫຼົ່ານັ້ນຫລຸດພົ້ນອອກຈາກຄວາມທຸກຍາກ. ສ້າງເງື່ອນໄຂໃຫ້ແມ່ຍິງເຂົ້າຮ່ວມການເຄື່ອນໄຫວສັງຄົມໄດ້ຫລາຍກວ່າ, ຫນູນຊ່ວຍແມ່ຍິງໃຫ້ຫລຸດພົ້ນອອກຈາກຄວາມທຸກຍາກ, ບືນຕົວຂຶ້ນສ້າງຄວາມຮັ່ງມີ ສືບຕໍ່ແມ່ນການບຸລິມະສິດຂອງສະຫະພັນແມ່ຍິງໃນອາຍຸການຈະມາເຖິງ. ທ່ານນາງ ຫງວຽນທິແທນຮ່ວາ ປະທານສະຫະພັນແມ່ຍິງຫວຽດນາມໃຫ້ຮູ້ວ່າ:

“ພວກຂ້າພະເຈົ້າສືບຕໍ່ຈັດຕັ້ງບັນດາການເຄື່ອນໄຫວຄື: ຫນູນຊ່ວຍກ່ຽວກັບດ້ານທຶນຮອນ ດ້ວຍຫລາຍແຫລ່ງເງິນ, ຕາມທິດເປັນເຈົ້າການ, ຂົນຂວາຍເອື້ອຍນ້ອງແມ່ຍິງປະຢັດຢ່າງຫນ້ອຍສຸດ 5 ພັນດົ່ງເພື່ອສ້າງກອງທຶນໃຫ້ແກ່ແມ່ຍິງຢູ່ເຂດຊົນນະບົດກູ້ຢືມ, ລັດຖະບານໄດ້ຕົກລົງ ລົງທຶນຈຳນວນເງິນ 100 ຕຶ້ດົ່ງ ແລະ ຂຸດຄົ້ນຈາກແຫລ່ງທຶນອື່ນຄື: ບັນດາອົງການຈັດຕັ້ງສາກົນ ຫລືອົງການເຄື່ອນໄຫວສັງຄົມ ເພື່ອຍົກສູງຄວາມຮູ້ ຄວາມຊຳນານໃຫ້ແກ່ແມ່ຍິງ, ພິເສດຊ່ວຍແມ່ຍິງຢູ່ເຂດຫ່າງໄກສອກຫລີກ, ເຂດຊົນເຜົ່າສ່ວນຫນ້ອຍພັດທະນາເສດຖະກິດ.”

ໃນການໂອ້ລົມສົນທະນາກັບອົງການສະຫະປະຊາຊາດປະຈຳຫວຽດນາມ ຫວ່າງແລ້ວນີ້ ຢູ່ ຮ່າໂນ້ຍ, ທ່ານນາງ ຟ້າມທິຫາຍຈ່ວຽນ ລັດຖະມົນຕີກະຊວງແຮງງານທະຫານເສຍອົງຄະ ແລະ ສັງຄົມຫວຽດນາມ ກໍຢືນຢັນວ່າ: “ໃນຍຸດທະສາດແຫ່ງຊາດກ່ຽວກັບຄວາມສະເໝີພາບລະຫວ່າງຍິງຊາຍໄລຍະ 2011 - 2015”, ພັກ ແລະ ລັດຫວຽດນາມ ປະຕິບັດການຊຸກຍູ້ຄວາມສະເຫມີພາບລະຫວ່າງຍິງຊາຍ ແລະ ມອບສິດໃຫ້ແກ່ແມ່ຍິງໂດຍຜ່ານການປະຕິບັດບັນດານະໂຍບາຍ, ໂຄງການທີ່ກ່ຽວຂ້ອງເຖິງຄວາມສະເໝີພາບລະຫວ່າງ ຍິງຊາຍ, ສ້າງກອບກົດໝາຍ ແລະ ເພີ່ມທະວີການຕິດພັນລະຫວ່າງເພດໃນວິວັດການສ້າງເອກະສານນິຕິກຳ. ສະນັ້ນ ເລື່ອງຮັບປະກັນບັນດາສິດສຳພັດກັບຄວາມສະເໝີພາບລະຫວ່າງຍິງຊາຍໃນບາງຂົງເຂດໃຫ້ແກ່ແມ່ຍິງແມ່ນຫນຶ່ງໃນບັນດາຍຸດທະສາດສຳຄັນ.

“ຫວຽດນາມໄດ້ຮັບການຮັບຮູ້ຈາກສະຫະປະຊາຊາດແມ່ນປະເທດໃນພາກພື້ນອາຊີຕາເວັນອອກສ່ຽງໃຕ້ທີ່ ລົບລ້າງຊ່ອງຫວ່າງ ລະຫວ່າງເພດຊາຍ ແລະ ຍິງໄດ້ຢ່າງວ່ອງໄວໃນຮອບ 20 ປີ ອັດຕາສ່ວນແມ່ຍິງພາຍໃນສະພາແຫ່ງຊາດບັນລຸ 24,4% ຢືນອັນດັບທີ 2 ໃນ 8 ປະເທດພາຍໃນກຸ່ມອາຊຽນທ່ີມີສະພາແຫ່ງຊາດ. ສະນັ້ນ ພວກເຮົາຈະພ້ອມກັນຍົກສູງບົດບາດຂອງແມ່ຍິງຢູ່ເຂດຊົນນະບົດໃນການລົບລ້າງຄວາມ ອຶດຫິວຫລຸດຜ່ອນຄວາມທຸກຍາກ ແລະ ໃນການພັດທະນາ. ວາງອອກບັນດານະໂຍບາຍເພື່ອຮັບປະກັນການປ່ຽນແປງກ່ຽວກັບຄວາມສະເໝີພາບລະຫວ່າງຍິງຊາຍໃນວິວັດການຈັດຕັ້ງຜັນຂະຫຍາຍການປະຕິບັດນະໂຍບາຍແຫ່ງຊາດກ່ຽວກັບຄວາມສະເໝີພາບລະຫວ່າງຍິງຊາຍໃນໄລຍະຈະມາເຖິງ.”

ກອງປະຊຸມໃຫຍ່ຜູ້ແທນແມ່ຍິງທົ່ວປະເທດຄັ້ງທີ XI ໄດ້ສ້າງວິວັດການ ແຕ່ນີ້ຮອດທ້າຍປີ 2017 ຍູ້ແຮງວຽກງານໂຄສະນາຂົນຂວາຍແມ່ຍິງເຂົ້າຮ່ວມການສ້າງກໍຄືສ່ອງແສງຕີລາຄາກ່ຽວກັບກົດໝາຍ, ນະໂຍບາຍເພື່ອໃຫ້ແມ່ຍິງປົກປ້ອງສິດຜົນສະໂຫຍດອັນຊອບທຳຂອງຕົນ. ໃນປີ 2012, ເຊິ່ງແມ່ນປີທຳອິດແຫ່ງການຜັນຂະຫຍາຍມະຕິກອງປະຊຸມໃຫຍ່ຜູ້ແທນແມ່ຍິງອາຍຸການຄັ້ງທີ 11, ສະຫະພັນແມ່ຍິງຫວຽດນາມ ຍູ້ແຮງວຽກງານສ້າງຄອບຄົວໃຫ້ມີຄວາມຜາສຸກ, ພ້ອມທັງກະກຽມຍຸດທະສາດແຫ່ງຊາດກ່ຽວກັບຄອບຄົວ ແລະ ກະກຽມໃຫ້ແກ່ໂຄງການສອນວິຊາຊີບ, ແກ້ໄຂວຽກເຮັດງານທຳໃຫ້ແກ່ແມ່ຍິງໃນໄລຍະ 2012 - 2017.

ນັກຂ່າວ: ທູຮັ່ງ