ທ່ານລັດຖະມົນຕີກະຊວງກະສິກຳ ແລະ ພັດທະນາຊົນນະບົດຫວຽດນາມ ເລມິນຮວານ (ພາບ:baoqocte.vn)

ຮັບມື ແລະ ມີໄຫວພິບ

ໃນໂລກ, ຫຼາຍປະເທດໄດ້ຫັນປ່ຽນຍຸດທະສາດ, ກຳນົດທັດສະນະດຳລົງຊີວິດຮ່ວມກັບໂລກລະບາດ , ຮັບມືກັບໂລກລະບາດ ແລະ ວັກຊິນປິ່ນປົວ, ຢາປິ່ນປົວໄດ້ຮັບຮູ້ວ່າ ແມ່ນຍຸດທະສາດຍາວນານ ແລະ ແມ່ນເຄື່ອງມືຕັດສິນ. ສະນັ້ນ, ວິທີສຳຜັດຂອງຫວຽດນາມຍັງເດີນຕາມທິດນຳທີ່ວ່າ: ປະຕິບັດຕາມຂໍ້ກຳນົດ 5 ຂໍ້+ວັກຊິນ+ເຕັກໂນໂລຊີ. ພ້ອມທັງຄ່ອຍໆດັດປັບຍຸດທະສາດການປ້ອງກັນ, ຕ້ານໂລກລະບາດໃນໄລຍະໃໝ່ບົນຈິດໃຈ “ພະຍາດເກີດຢູ່ບ່ອນໃດ ແກ້ໄຂຢູ່ບ່ອນນັ້ນ”. ລະອຽດຄື: ບັນດາແຂວງທີ່ສາມາດຄວບຄຸມໂລກລະບາດໄດ້ນັ້ນກໍ່ ຈະສືບຕໍ່ປະຕິບັດຫຼັກການສະກັດກັ້ນ, ຄົ້ນພົບໂດຍໄວ, ຕາມຫາເຊື້ອ, ປິດລ້ອມເຂດ, ແຍກຕົວຢ່າງທັນການ, ປິ່ນປົວຢ່າງມີປະສິດທິຜົນ. ພ້ອມກັນນັ້ນ ແມ່ນຜ່ອນຜັນການເຄື່ອນໄຫວຜະລິດ, ດຳເນີນທຸລະກິດຕາມສະພາບການປົກກະຕິໃໝ່, ມີການດັດປັບທີ່ຕັ້ງໜ້າເພື່ອສ້າງຮູບແບບໃນການດຳລົງຊີວິດຢູ່ຮ່ວມກັບໂລກລະບາດຢ່າງປອດໄພ.

ບຸລິມະສິດເປີດປະຕູບັນດາຂົງເຂດ, ຂະແໜງການຫຼັກແຫຼ່ງ

ມາຮອດຈຸດເວລານີ້, ຕ້ອງໃຫ້ບຸລິມະສິດຟື້ນຟູບັນດາວິສາຫະກິດຫຼັກແຫຼ່ງຂອງພື້ນຖານເສດຖະກິດ, ມີບົດບາດຮັບປະກັນຄວາມສາມາດແກ່ງແຍ້ງແຫ່ງຊາດ.

ໂດຍໄດ້ກຳນົດວ່າ ໂລກລະບາດໂຄວິດ 19 ຍັງມີການຜັນແປໃນໄລຍະຍາວ, ຂະແໜງກະສິກຳພວມຄ່ອຍໆສ້າງຮູບແບບຈຳໜ່າຍຜະລິດຕະພັນກະເສດ “ດຳລົງຊີວິດຢູ່ຮ່ວມກັບໂລກລະບາດ”. ທ່ານລັດຖະມົນຕີກະຊວງກະສິກຳ ແລະ ພັດທະນາຊົນນະບົດຫວຽດນາມ ເລມິນຮວານ ໃຫ້ຮູ້ວ່າ:

ທາງກະຊວງຈະສ້າງສາງຂໍ້ມູນ ແລະອັບເດັດເປັນປະຈຳໃຫ້ແກ່ລະບົບແຈກຢາຍ ເພື່ອຮູ້ວ່າຢູ່ແຂວງໃດຈະກະກຽມເກັບກ່ຽວຜະລິດຕະພັນໃດແດ່, ມີປະລິມານເທົ່າໃດ ເພື່ອໃຫ້ລະບົບແຈກຢາຍໄດ້ເປັນເຈົ້າການ ກ່ຽວກັບການກຳກັບສ້າງ, ການຂົນສົ່ງ… ພວກຂ້າພະເຈົ້າກໍ່ຈະສ້າງວິທີການຂົນສົ່ງຈາກສວນໄປຍັງລະບົບແຈກຢາຍ.

ທ່ານຮອງລັດຖະມົນຕີ ກະຊວງອຸດສາຫະກຳ ແລະ ການຄ້າ ຫວຽດນາມ ໂດ້ທັງຫາຍ (ພາບ:danviet.vn )

ໂດຍກຳນົດເອົາກະສິກຳແມ່ນທ່າແຮງ, ກະຊວງອຸດສາຫະກຳ ແລະການຄ້າ ກໍພວມເປັນເຈົ້າການຜັນຂະຫຍາຍ ບັນດາມາດຕະການໜູນຊ່ວຍບັນດາທ້ອງຖິ່ນຍູ້ແຮງການຈຳໜ່າຍຜະລິດຕະພັນກະເສດຢູ່ຕະຫຼາດພາຍໃນປະເທດ. ຄຽງຄູ່ກັນນັ້ນ, ເປີດກ້ວາງການສົ່ງອອກໄປຍັງຕະຫຼາດທີ່ມີຄວາມສາມາດບົ່ມຊ້ອນຫຼາຍ. ຕາມທ່ານຮອງລັດຖະມົນຕີ ກະຊວງອຸດສາຫະກຳ ແລະການຄ້າ ຫວຽດນາມ ໂດ້ທັງຫາຍ ແລ້ວ, ປະຈຸບັນ, ທາງກະຊວງໄດ້ກວດກາຄືນ, ວິເຄາະ, ຕີລາຄາຄວາມສາມາດບົ່ມຊ້ອນໃນຕະຫຼາດ ສຳລັບ 9 ປະເພດ/ໝວດສິນຄ້າຜະລິດຕະພັນກະເສດ, ເຄື່ອງປ່າຂອງດົງ, ສິນໃນນ້ຳທີ່ສົ່ງອອກຕົ້ນຕໍຂອງຫວຽດນາມ ຢູ່ 14 ເຂດ/ຕະຫຼາດສົ່ງອອກຈຸດສຸມ, ໃນນັ້ນ ເອົາໃຈໃສ່ເປັນພິເສດເຖິງບັນດາເຂດຕະຫຼາດທີ່ເປັນຄູ່ຮ່ວມມືຂອງຫວຽດນາມ ໃນສັນຍາການຄ້າ FTA ສະບັບຕ່າງໆ. ທ່ານໂດ້ທັງຫາຍ ກ່າວວ່າ:

ບົນພື້ນຖານການກວດກາຄືນນັ້ນ, ກະຊວງອຸດສາຫະກຳການຄ້າ ມີບົດລາຍງານ, ຂະເໜີຕໍ່ທ່ານນາຍົກລັດຖະມົນຕີ ຊີ້ນຳຄະນະກຳມະການ ປຊຊ ບັນດາແຂວງ ນະຄອນຂຶ້ນກັບສູນກາງ ອີງໃສ່ການວິເຄາະໄຈ້ແຍກ, ຕີລາຄາກ່ຽວກັບຄວາມສາມາດບົ່ມຊ້ອນ, ແງ່ຫວັງຕະຫຼາດສົ່ງອອກ, ແລ້ວມອບໜ້າທີ່ໃຫ້ບັນດາພະແນກ, ຄະນະ, ຂະແໜງການ ແນະນຳ, ໜູນຊ່ວຍວິສາຫະກິດໃນບໍລິເວນ ຈັດຕັ້ງການຜະລິດຄືນໃໝ່ໂດຍດ່ວນ, ຟື້ນຟູລະບົບສະໜອງການສົ່ງອອກໃນບໍລິເວນເພື່ອຂຸດຄົ້ນກາລະໂອກາດຂອງຕະຫຼາດສົ່ງອອກໃນໄລຍະຈະມາເຖິງ.

ຕາມນັກຊ່ຽນຊານດ້ານເສດຖະກິດແລ້ວ, ບັນດາລະບົບມູນຄ່າ, ເສົາຄ້ຳການເຕີບໂຕຂອງພື້ນຖານເສດຖະກິດ ຕ້ອງໄດ້ຮັບການບຸລິມະສິດ. ນອກຈາກນັ້ນແລ້ວ ຕ້ອງມີບັນດານະໂຍບາຍໜູນຊ່ວຍລວມຄື: ໂຈະ, ຫລຸດຜ່ອນພາສີ, ຄ່າທຳນຽມຕ່າງໆ… ແຕ່ລະວິສາຫະກິດກໍ່ຕ້ອງມີແຜນການໃນສະເພາະໜ້າ, ຍາວນານ ເພື່ອເລີ່ມເຄື່ອນໄຫວຄືນໃໝ່ໃຫ້ເໝາະສົມ. ທ່ານຮອງລັດຖະມົນຕີກະຊວງກະສິກຳ ແລະ ພັດທະນາຊົນນະບົດຫວຽດນາມ ເລກວັກແຢວງ ຖືວ່າ: ບັນດາວິສາຫະກິດ ຕ້ອງເສີມຂະຫຍາຍຄວາມເປັນເຈົ້າການ ໃນການສ້າງແຜນການພັດທະນາ ຮັບມືກັບການຜັນແປຂອງໂລກລະບາດ:

ໂລກລະບາດຕ້ອງຄວບຄຸມໃຫ້ໄດ້ໂດຍໄວ, ພວກເຮົາຕ້ອງກັບຄືນສູ່ຊີວິດການເປັນຢູ່ທີ່ເປັນປົກກະຕິ, ຕ້ອງກຽມຈິດກຽມໃຈໃຫ້ດີ, ເມື່ອຕົກຢູ່ໃນສະພາບຄວາມຫຍຸ້ງຍາກນັ້ນ ກໍ່ຕ້ອງເຫັນໄດ້ກາລະໂອກາດດ້ານການຕະຫຼາດຫຼາຍຢ່າງ. ປະຈຸບັນ, ບັນດາຕະຫຼາດຍັງມີຄວາມຕ້ອງການສຳລັບສິນຄ້າຂອງຫວຽດນາມ ຫຼາຍທີ່ສຸດຄື: ອາເມລິກາ, ອີຢູ. ຕ້ອງເຫັນໄດ້ກາລະໂອກາດໃນໄລຍະຈະມາເຖິງ ແລະ ພິເສດແມ່ນຕ້ອງກະກຽມເພື່ອຟື້ນຟູໂດຍພື້ນຖານ ແລະ ມີຄວາມສາມາດເປັນໄປໄດ້.

ຕາມບົດລາຍງານຂອງທະນາຄານພັດທະນາອາຊີ (ADB) ປະກາດເມື່ອວັນທີ 22 ກັນຍາ, ອົງການນີ້ ຍັງຍົກອອກການຕີລາຄາຢ່າງປະເອີບໃຈ ກ່ຽວກັບແງ່ຫວັງການເຕີບໂຕຂອງຫວຽດນາມ ໃນໄລຍະກາງ ແລະ ຍາວ. ການເຕີບໂຕອາດຈະໄດ້ຮັບການໜູນຊ່ວຍ ຍ້ອນການຟື້ນຟູຂອງຄວາມຕ້ອງການພາຍໃນ, ຍູ້ແຮງການປ່ອຍເງິນລົງທຶນພາກລັດ, ເປີດກ້ວາງການເຄື່ອນໄຫວໄປຍັງຕະຫຼາດສົ່ງອອກໃໝ່ ໂດຍສັນຍາການຄ້ານຳມາໃຫ້, ຊຸກຍູ້ການຫັນເປັນດີຈີຕອນ ເພື່ອຍົກສູງປະສິດທິຜົນຂອງມາດຕະການຄວບຄຸມໂລກລະບາດ ແລະ ໜູນຊ່ວຍການຟື້ນຟູແບບຍືນຍົງຂອງພື້ນຖານເສດຖະກິດໃນປີ 2021 ນີ້ ແລະ ປີຕໍ່ໄປ./.