ວຽກງານເຂົ້າອອກເມືອງໄດ້ຮັບການປະຕິບັດຢ່າງເຂັ້ມງວດໃນຊ່ວງເວລາເກີດໂລກລະບາດໂຄວິດ 19. ພາບ: VGP News

ກ່ຽວກັບດ້ານກົດໝາຍສາກົນ, ເປັນຄັ້ງທຳອິດ ສິດເສລີໃນການໄປມາໄດ້ລະບຸໄວ້ໃນມາດຕາ 13 ຖະແຫລງການສິດທິມະນຸດສາກົນ (UDHR) ປີ 1948, ຕາມນັ້ນແລ້ວ ສິດເສລີໃນການໄປມາລວມມີ: ສິດເສລີໃນການໄປມາຢູ່ພາຍໃນປະເທດ; ມີສິດອອກເມືອງ/ອົບພະຍົບຍ້າຍຖີ່ນຖານ; ສິດເຂົ້າເມືອງ/ອົບພະຍົບເຂົ້າເມືອງ. ຊາວຕ່າງປະເທດ, ຖ້າຫາກດຳລົງຊີວິດ ຫລື ມີຫນ້າຢູ່ບາງປະເທດຖືກຕ້ອງຕາມກົດໝາຍ, ມີສິດເສລີໃນການໄປມາຢູ່ໃນຂອບເຂດຜືນແຜ່ນດິນຂອງປະເທດນັ້ນ ຫາກບໍ່ຖືກສະກັດກັ້ນຫລືກີດຂວາງແບບຕາມລຳພັງ.

ສິດເສລີໃນການໄປມາມີຄວາມໝາຍສຳຄັນ ເພາະມັນສ້າງປະຖົມປັດໄຈເພື່ອໃຫ້ສ່ວນບຸກຄົນຫນຶ່ງໄດ້ຊົມໃຊ້ບັນດາສິດພົນລະເຮືອນ, ການເມືອງ, ເສດຖະກິດ, ສັງຄົມແລະວັດທະນະທຳອື່ນ. ສິດເສລີໃນການໄປມາຂອງສ່ວນບຸກຄົນແມ່ນເງື່ອນໄຂເພື່ອຊຸກຍູ້ການພັດທະນາເສດຖະກິດ, ສັງຄົມຂອງບັນດາປະເທດ. ສິດເສລີໃນການໄປມາແມ່ນສ່ວນຫນຶ່ງສຳຄັນຂອງການຮ່ວມມືລະຫວ່າງບັນດາປະເທດ, ເພາະວ່າ ການພົວພັນພົບປະແລກປ່ຽນກ່ຽວກັບຂໍ້ມູນຂ່າວສານ, ຄວາມຮູ້ ຈະເພີ່ມທະວີຄວາມເຂົ້າໃຈລະຫວ່າງປະຊາຊົນຂອງບັນດາພື້ນຖານວັດທະນະທຳທີ່ແຕກຕ່າງກັນ, ສ້າງຄວາມສາມັກຄີ, ຊຸກຍູ້ສັນຕິພາບ, ບັນດາຄຸນຄ່າວັດທະນະທຳມະນຸດ ແລະຄວາມວັດທະນາຖາວອນລວມຂອງບັນດາຊາດ.

ເລື່ອງຈຳກັດ ສິດເສລີໃນການໄປມາຢ່າງຜິດກົດໝາຍບໍ່ພຽງແຕ່ກໍ່ຜົນຮ້າຍເຖິງສິດທິມະນຸດຂອງບັນດາສ່ວນບຸກຄົນເທົ່ານັ້ນຫາກຍັງກີດຂວາງການພັດທະນາໃນທຸກດ້ານຂອງສັງຄົມອີກດ້ວຍ. ຍ້ອນສາຍເຫດນັ້ນ ສິດເສລີໃນການໄປມາໄດ້ຮັບການຮັບຮູ້ ແລະ ປົກປ້ອງໃນລັດຖະທຳມະນູນ ແລະ ກົດໝາຍຂອງຫລາຍປະເທດໂດຍໄວ. ຢູ່ ຫວຽດນາມ ສິດເສລີການໄປມາ ໄດ້ຮັບຮູ້ດ້ວຍຖານະແມ່ນສິດພື້ນຖານຂອງມະນຸດ, ພົນລະເມືອງ ຢູ່ໃນມາດຕາ 23 ລັດຖະທຳມະນູນປີ 2013: “ພົນລະເມືອງມີສິດເສລີໃນການໄປມາ ແລະ  ພັກອາໄສຢູ່ພາຍໃນປະເທດ, ມີສິດອອກໄປຕ່າງປະເທດ ແລະ ຈາກຕ່າງປະເທດກັບມາປະເທດຊາດ”. ເນື້ອໃນນີ້ກໍ່ເໝາະສົມກັບເອກະສານກ່ຽວກັບສິດທິມະນຸດຂອງກົດໝາຍສາກົນ. ການກຳນົດກ່ຽວກັບການໄປມາ, ພັກອາໄສຂອງພົນລະເມືອງຫວຽດນາມແລະຊາວຕ່າງປະເທດ ຢູ່ຫວຽດນາມ ໄດ້ລະບຸໄວ້ໃນປະມວນກົດໝາຍວ່າດ້ວຍພົນລະເຮືອນ, ກົດໝາຍວ່າດ້ວຍສັນຊາ, ກົດໝາຍວ່າດ້ວຍການລົງທຶນ, ກົດໝາຍວ່າດ້ວຍການພັກອາໄສ ແລະ ບັນດາເອກະສານນິຕິກຳອື່ນທີ່ກ່ຽວຂອ້ງ. ລັດຖະບານຫວຽດນາມ ກໍ່ໄດ້ລົງນາມໃນສັນຍາ ແລະຂໍ້ຕົກລົງສອງຝ່າຍ 78 ສະບັບ ກ່ຽວກັບການຍົກເວັ້ນວີຊາໃຫ້ແກ່ພົນລະເມືອງບັນດາປະເທດ ແລະເຂດແຄ້ວນ, ສັນຍາວ່າດ້ວຍບັນຫາຊາຍແດນກັບບັນດາປະເທດບ້ານເຮືອນຄຽງ, ສ້າງເງື່ອນໄຂສະດວກໃຫ້ພົນລະເມືອງໄປມາ.

 ສິ່ງທີ່ໜ້າສົນໃຈນັ້ນແມ່ນໃນສະພາບການເກີດໂລກລະບາດໂຄວິດ-19, ເຖິງວ່າປະສົບກັບຄວາມຫຍຸ້ງຍາກຫຼາຍຢ່າງກໍ່ຕາມ, ແຕ່ ພັກ, ລັດ ໄດ້, ພວມ ແລະ ຈະມະນາພະຍາຍາມສຸດຈົນສຸດຄວາມສາມາດຂອງຕົນເພື່ອຮັບປະກັນບັນດາຄຳໝັ້ນສັນຍາ, ພັນທະສາກົນກ່ຽວກັບສິດເສລີໃນການໄປມາຂອງປະຊາຊົນ. ເມື່ອໂລກລະບາດໂຄວິດ-19ຍັງບໍ່ທັນໄດ້ຮັບການຄວບຄຸມ, ຂໍ້ຕົກລົງແຍກຫ່າງໃນສັງຄົມຂອງນາຍົກລັດຖະມົນຕີ ຫວຽດນາມ ໃນຊ່ວງເວລາເກີດໂລກລະບາດແມ່ນມີຄວາມຈຳເປັນທີ່ສຸດ, ສອດຄ່ອງກັບກົດໝາຍສາກົນ, ກົດໝາຍ ຫວຽດນາມ ແລະ ຮັບປະກັນສິດເສລີໃນການໄປມາຂອງປະຊາຊົນ, ຖືກກັບມາດຕາທີ 12 ຂອງສົນທິສັນຍາສາກົນກ່ຽວກັບບັນດາສິດພົນລະເຮືອນ ແລະ ການເມືອງ (ICCPR) ປີ 1966 ໂດຍຢັ້ງຢືນວ່າ ສິດເສລີໃນການໄປມາອາດຈະຖືກບັງຄັບດ້ວຍ”…ບັນດາຂໍ້ຈຳກັດຂອງກົດໝາຍໄດ້ກຳນົດ ແລະ ແມ່ນມີຄວາມຈຳປັນທີ່ສຸດເພື່ອປົກປັກຮັກສາຄວາມໝັ້ນຄົງຂອງປະເທດຊາດ, ຄວາມເປັນລະບຽບຮຽບຮ້ອຍທາງສັງຄົມ, ສຸຂະພາບ ຫຼື ຄຸນສົມບັດຈັນຍາບັນສັງຄົມ ຫຼື ບັນດາສິດເສລີຂອງຄົນອື່ນ”. ອີງຕາມກົດໝາຍ ຫວຽດນາມ, ຂໍ້ທີ  2, ມາດຕາທີ 14 ລັດຖະທຳມະນູນ ປີ 2013 ໄດ້ລະບຸຢ່າງຈະແຈ້ງວ່າ “ສິດທິມະນຸດ, ສິດພົນລະເມືອງພຽງແຕ່ຖືກຈຳກັດຕາມການກຳນົດຂອງກົດໝາຍໃນກໍລະນີທີ່ຈຳເປັນຍ້ອນເຫດຜົນດ້ານ ປ້ອງກັນຊາດ, ຄວາມໝັ້ນຄົງປະເທດຊາດ, ຄວາມເປັນລະບຽບຮຽບຮ້ອຍ, ຄວາມປອດໄພທາງສັງຄົມ, ຄຸນສົມບັດຈັນຍາບັນສັງຄົມ, ສຸຂະພາບຂອງປະຊາຊົນ”.

ເພາະສະນັ້ນ, ສິດເສລີໃນການໄປມາແມ່ນປະຖົມປັດໃຈສຳຄັນໃນສິດທິມະນຸດ ແມ່ນ ໃນສະພາບການ “ສຸຂະພາບຂອງປະຊາຊົນ” ຖືກນາບຂູ່ຈາກໂລກລະບາດໂຄວິດ-19, ຂໍ້ຕົກລົງຂອງນາຍົກລັດຖະມົນຕີ ຫວຽດນາມ ແມ່ນທັນການ ແລະ ມີຄວາມຈຳເປັນທີ່ສຸດ, ສະກັດກັ້ນການແຜ່ລະບາດຂອງໂລະລະບາດ. ສຳຄັນກວ່າ, ຂໍ້ຕົກລົງນີ້ ໄດ້ຮັບການສະໜັບສະຫນູນຈາກປະຊາຊົນ, ຍ້ອນປະຊາຊົນຮັບຮູ້ໄດ້ຜົນກະທົບຂອງໂລກລະບາດໂຄວິດ-19 ແລະ ລະດັບຄວາມສຳຄັນຂອງການຄວບຄຸມການແຜ່ລະບາດໃນຊຸມຊົນ. ບັນດາການແຍກຫ່າງໃນສັງຄົມຢ່າງສຳເລັດຜົນໄດ້ປະກອບສ່ວນສຳຄັນເພື່ອໃຫ້ ຫວຽດນາມ ຍູ້ໂລກລະບາດໂຄວິດ-19 ໃຫ້ຖອຍໄປເປັນການພິສູດໃຫ້ເຫັນຢ່າງຈະແຈ້ງສິ່ງນັ້ນ.

ນອກນັ້ນ ພັກ ແລະລັດ ກໍ່ມີຄວາມເອົາໃຈໃສ່ເປັນພິເສດ ແລະ ໄດ້ມີມາດຕະການຄຸ້ມຄອງວຽກງານເຂົ້າອອກເມືອງຢ່າງເຂັ້ມງວດໃນໄລຍະເກີດໂລກລະບາດໂຄວິດ 19. ຕາມນັ້ນແລ້ວ ນັບແຕ່ວັນທີ 17 ມີນາ ຫວຽດນາມ ຢຸດຕິການອອອວີຊາແບບຊົ່ວຄາວສຳລັບຊາວຕ່າງປະເທດເຂົ້າເມືອງຫວຽດນາມ ໃນເວລາ 30 ວັນ ນັບແຕ່ 0 ໂມງວັນທີ 18 ມີນາ. ສິ່ງນີ້ແມ່ນສອດຄ່ອງກັບກົດໝາຍສາກົນ.

ໃນສະພາບການໂລກລະບາດໂຄວິດ-19ພວມແຜ່ລະບາດອອກສູ່ວົງກ້ວາງໃນທົ່ວໂລກ ແລະ ການບິນໂລກເກືອບວ່າ ບໍ່ໄດ້ເຄື່ອນໄຫວຍ້ອນໂລກລະບາດ, ພັກ ແລະ ລັດ ຫວຽດນາມ ມານະພະຍາຍາມຈັດຕັ້ງການສົ່ງພົນລະເມືອງ ຫວຽດນາມ ເກືອບ 50.000 ຄົນ ຢູ່ 48 ປະເທດ ແລະ ເຂດແຄ້ວນກັບມາປະເທດຢ່າງປອດໄພ. ການກະທຳນີ້ບໍ່ພຽງແຕ່ແມ່ນການເຄົາລົບຄຳໝັ້ນສັນຍາຮັບປະກັນສິດເຂົ້າເມືອງຂອງ ພົນລະເມືອງ ແຕ່ລະຄົນເທົ່ານັ້ນ, ຫາກຍັງສະແດງນ້ຳໃຈວັດທະນະທຳມະນຸດຂອງພັກ, ລັດ ແລະ ປະຊາຊົນ ຫວຽດນາມ ທີ່ມີຕໍ່ບັນດາພໍ່ແມ່ປະຊາຊົນ ຫວຽດນາມ ທີ່ຢູ່ຫາ່ງໄກຈາກບ້ານເກີດເມືອງນອນ.

        ເມື່ອໂລກລະບາດໂຄວິດ 19 ໄດ້ຮັບການຄວບຄຸມໂດຍພື້ນຖານ, ນັບແຕ່ວັນທີ 15 ກັນຍາ, ບັນດາສາຍການບິນການຄ້າສາກົນ ຈາກຫວຽດນາມໄປຍັງບາງປະເທດ ແລະເຂດແຄ້ວນໃນພາກພື້ນ ໄດ້ອະນຸຍາດໃຫ້ເຄື່ອນໄຫວຄືນໃຫມ່ ແລະຜູ້ໂດຍສາຍບາງຄົນຈຳເປັນຕ້ອງເຂົ້າເມືອງຫວຽດນາມ. ບັນດາບໍລິສັດການບິນ ຄື: Vietnam Airlines, Vietjet Air ກໍ່ໄດ້ເລີ່ມເປີດສາຍການບິນສາກົນໄປຍັງບັນດາສະຖານທີ່ປອດໄພຢູ່ ຍີ່ປຸ່ນ, ສ.ເກົາຫລີ, ໄຕ້ຫວັນ ຄືນໃຫມ່ ເພື່ອຕອບສະຫນອງຄວາມຕ້ອງການການຮຽນ,ເຮັດວຽກຂອງປະຊາຊົນພາຍໃນປະເທດ ແລະສາກົນ.

ບົນພື້ນຖານບັນດາໝາກຜົນບັນລຸໄດ້ໃນໄລຍະຜ່ານມາ, ພິເສດໃນປີ 2020, ພັກ ແລະລັດຫວຽດນາມຈະສືບຕໍ່ຮັບປະກັນບັນດາສິດພື້ນຖານຂອງພົນລະເຮືອນ, ໃນນັ້ນ ມີ ສິດເສລີໃນການໄປມາບົນພື້ນຖານກົດໝາຍຫວຽດນາມແລະ ກົດໝາຍສາກົນ, ປະກອບສ່ວນເຂົ້າໃນສັນຕິພາບ,ສະຖຽນລະພາບ, ວັດທະນາຖາວອນ ແລະ ການພັດທະນາຂອງປະຊາຄົມສາກົນ.