(vovworld)- ວັນທີ 25/5, ປະທານາທິບໍດີ ອາເມລິກາ Barack Obama ໄດ້ສິ້ນສຸດການຢ້ຽມຢາມຫວຽດນາມ ຢ່າງເປັນທາງການໃນເວລາ 3 ວັນ, ແຕ່ວັນທີ 23/5. ການຢ້ຽມຢາມບັນລຸໄດ້ບັນດາໝາກຜົນພົ້ນເດັ່ນໃນທຸກຂົງເຂດຄື: ການເມືອງ, ເສດຖະກິດ, ການປ້ອງກັນຊາດປ້ອງກັນຄວາມສະຫງົບ, ການສຶກສາບຳລຸງສ້າງ ແລະ ບັນດາບັນຫາທົ່ວໂລກ, ເປີດໄລຍະຮ່ວມມືໃຫມ່ໃນການພົວພັນລະຫວ່າງ ຫວຽດນາມ ແລະ ອາເມລິກາ, ພ້ອມກັນມຸ່ງໄປສູ່ອະນາຄົດ.
.jpg)
ທ່ານປະທານາທິບໍດີ ອາເມລິກາ B.Obama ແລະ ທ່ານປະທານປະເທດ
ຫວຽດນາມ ເຈີນດ້າຍກວາງ
|
ການຢ້ຽມຢາມຂອງການນຳທຳນຽບຂາວ ກໍແມ່ນການຢ້ຽມຢາມຫວຽດນາມ ຄັ້ງທີ 3 ຂອງປະທານາທິບໍດີ ອາເມລິກາ ພາຍຫລັງສ້າງການພົວພັນທາງການທູດລະຫວ່າງສອງປະເທດເປັນປົກກະຕິ, ແມ່ນການພິສູດໃຫ້ເຫັນການພັດທະນາກະໂດດຂັ້ນຂອງການພົວພັນລະຫວ່າງສອງປະເທດ, ທີ່ເຄີຍເປັນປໍລະປັກກັນໃນອະດີດຕະການ. ການຢ້ຽມຢາມ ແລະ ບັນດາໝາກຜົນພົ້ນເດັ່ນໃນການຢ້ຽມຢາມຫວຽດນາມ ຄັ້ງນີ້ ໄດ້ພິສູດໃຫ້ເຫັນຢ່າງຈະແຈ້ງທີ່ສຸດ ຢັ້ງຢືນການພົວພັນຄູ່ຮ່ວມມືຮອບດ້ານຫວຽດນາມ ແລະ ອາເມລິກາ ພວມຢູ່ໃນໄລຍະອັນດີງາມ ແລະ ໝັ້ນໝາຍແງ່ຫວັງຫລາຍຢ່າງໃນອະນາຄົດ.
ຮັດແຫນ້ນການພົວພັນຄູ່ຮ່ວມມືຮອບດ້ານ
ໃນການຢ້ຽມຢາມຫວຽດນາມ ຄັ້ງນີ້, ຄຳຕັດສິນທີ່ໄດ້ຮັບຄວາມຊົມເຊີຍຈາກຫາງສຽງສອງປະເທດ ນັບທັງປະຊາຄົມສາກົນ ນັ້ນແມ່ນ ເລື່ອງທ່ານປະທານາທິບໍດີ ອາເມລິກາ B. Obama ປະກາດຖະແຫລງຍົກເລີກຄຳສັ່ງຂວ້ຳບາດດ້ານອາວຸດສຳລັບຫວຽດນາມ. ເປັນອັນວ່າ ບັນດາຮົ້ວກີດຂວາງສຸດທ້າຍຂອງໄລຍະສົງຄາມເຢັນ ຖືກຍົກເລີກ. ເລື່ອງທ່ານ ປະທານາທິບໍດີ ອາເມລິກາ B. Obama ຍົກເລີກຄຳສັ່ງຂວ້ຳບາດດັ່ງກ່າວ ແມ່ນບາດກ້າວສຳຄັນໃນການພົວພັນລະຫວ່າງຫວຽດນາມ ແລະ ອາເມລິກາ ຄືດັ່ງຄຳເຫັນຂອງທ່ານ ປະທານາທິບໍດີ ອາເມລິກາ B. Obama ທີ່ການພົບປະກັບການນຳຂັ້ນສູງຂອງຫວຽດນາມ, ແມ່ນການພັດທະນາແບບທຳມະຊາດ. ຄຳຕັດສິນດັ່ງກ່າວສະແດງໃຫ້ເຫັນວ່າ ການພົວພັນລະຫວ່າງຫວຽດນາມ ແລະ ອາເມລິກາ ພວມຫັນເປັນປົກກະຕິ ຖືກກັບຄວາມໝາຍຂອງມັນ, ສ້າງເງື່ອນໄຂຊຸກຍູ້ການຮ່ວມມືຮອບດ້ານລະຫວ່າງສອງຝ່າຍ, ໃນນັ້ນ ມີການຮ່ວມມືດ້ານປ້ອງກັນຊາດ, ປະກອບສ່ວນສ້າງຄວາມໄວ້ເນື້ອເຊື່ອໃຈລະຫວ່າງສອງປະເທດ.
ສຳລັບຫວຽດນາມ, ຄຳຕັດສິນນີ້ ມີຄວາມໝາຍສຳຄັນ., ຫວຽດນາມ ໄດ້ຢັ້ງຢືນເຖິງນະໂຍບາຍສະເຫມີຕົ້ນສະເຫມີປາຍຂອງຕົນຫລາຍຄັ້ງວ່າ ແມ່ນສັນຕິພາບ, ແລະ ມີແຜນນະໂຍບາຍແກ້ໄຂຄວາມຂັດແຍ້ງໂດຍສັນຕິວິທີ, ການທູດ ແລະ ນິຕິກຳ. ຈຸດປະສົງແມ່ນເພີ່ມທະວີກຳລັງຄວາມສາມາດດ້ານປ້ອງກັນຊາດແມ່ນເພື່ອປົກປັກຮັກສາເອກະລາດ, ອະທິປະໄຕ ແລະ ຜືນແຜ່ນດິນອັນຄົບຖ້ວນ. ເລື່ອງ ອາເມລິກາ ຕັດສິນຍົກເລີກຄຳສັ່ງຂວ້ຳບາດຫ້າມຂາຍອາວຸດໃຫ້ແກ່ຫວຽດນາມ ບໍ່ພຽງແຕ່ຊ່ວຍຫວຽດນາມ ຫັນແຫລ່ງອາວຸດ, ອຸປະກອນການທະຫານເປັນຫລາຍຮູບຫລາຍແບບເທົ່ານັ້ນ ຫາກຍັງຊ່ວຍເພີ່ມທະວີຄວາມສາມາດປ້ອງກັນຕົນເອງ ເຊິ່ງແມ່ນສິດອັນຊອບທຳຂອງບັນດາປະເທດໂດຍກົດໝາຍສາກົນກຳນົດຢ່າງຈະແຈ້ງ. ອາເມລິກາ ກໍເຫັນດີເພີ່ມທະວີການຮ່ວມມືໃນຂົງເຂດຕຳຫລວດປ້ອງກັນທະເລ, ກູ້ໄພກູ້ຊີບ, ບຸລິມະສິດສູງກວ່າໃຫ້ການຮ່ວມມືແກ້ໄຂຜົນຮ້າຍຢ້ອນຫລັງຈາກສົງຄາມ.
ການຢ້ຽມຢາມ ບັນລຸໄດ້ບັນດາໝາກຜົນພົ້ນເດັ່ນກ່ຽວກັບດ້ານເສດຖະກິດ, ການສຶກສາ. ຕາມຖະແຫລງການຮ່ວມທີ່ບັນລຸໄດ້ລະຫວ່າງ ປະທານາທິບໍດີ ອາເມລິກາ B. Obama ແລະ ປະທານປະເທດ ເຈີນດ້າຍກວາງ, ສອງຝ່າຍຈະສຸມໃສ່ຮ່ວມມືຫລາຍກວ່າອີກໃນຂົງເຂດການຄ້າ, ການລົງທຶນ, ວິທະຍາສາດເຕັກໂນໂລຊີ, ກໍ່ສ້າງຊັບພະຍາກອນມະນຸດ, ຕ້ານການປ່ຽນແປງຂອງດິນຟ້າອາກາດ. ແຜນນະໂຍບາຍນີ້ໄດ້ພິສູດໃຫ້ເຫັນດ້ວຍບັນດາຂໍ້ຕົກລົງເສດຖະກິດໃຫຍ່ ລວມມູນຄ່າເຖິງ 16,3 ຕື້ USD ຊື່ງໄດ້ລົງນາມໃນການຢ້ຽມຢາມຫວຽດນາມຄັ້ງນີ້. ທ່ານປະທານາທິບໍດີ ອາເມລິກາ B. Obama ໄດ້ຢືນຢັນຄວາມຕັດສິນໃຈຊຸກຍູ້ສະພາແຫ່ງຊາດຮັບຮອງເອົາສັນຍາຄູ່ຮ່ວມມືຂ້າມປາຊີຟີກໃນປີ 2016 ພ້ອມທັງໃຫ້ຄຳໝັ້ນສັນຍາຈະຫນູນຊ່ວຍຫວຽດນາມກ່ຽວກັບດ້ານເຕັກນິກເພື່ອຜັນຂະຫຍາຍສັນຍາສະບັບນີ້ຢ່າງມີປະສິດທິຜົນ. ເນື່ອງໃນໂອກາດມາຢ້ຽມຢາມຫວຽດນາມຄັ້ງນີ້, ມະຫາວິທະຍາໄລ Fulbright ຫວຽດນາມ ໄດ້ຮັບຫນັງສືອະນຸຍາດໃຫ້ເຄື່ອນໄຫວຢ່າງເປັນທາງການ, ດ້ວຍຈຸດໝາຍສ້າງສະພາບແວດລ້ອມການສຶກສາໃຫ້ມີຄຸນນະພາບສູງ ແລະ ບັນລຸມາດຖານສາກົນ ຢູ່ຫວຽດນາມ. ສອງຝ່າຍກໍເຫັນດີເພີ່ມທະວີການປະສານສົມທົບກັນແກ້ໄຂບັນດາສິ່ງທ້າທາຍລວມຢູ່ພາກພື້ນ ແລະ ທົ່ວໂລກ. ເປັນຫນ້າສົນໃຈ, ທ່ານປະທານາທິບໍດີ ອາເມລິກາ B. Obama ຢືນຢັນວ່າ: ເຖິງວ່າອຳນາດການປົກຄອງໃຫມ່ແມ່ນຂຶ້ນກັບພັກໃດກໍຕາມ, ນະໂຍບາຍສຳລັບຫວຽດນາມຈະສືບຕໍ່ໄດ້ຮັບການຮັກສາໄວ້.
ມຸ່ງໄປສູ່ອະນາຄົດ
ໃນໄລຍະກ່ອນນີ້ກວ່າ 20 ປີ ນັບແຕ່ເມື່ອ ສ້າງການພົວພັນລະຫວ່າງສອງປະເທດຫວຽດນາມ ແລະ ອາເມລິກາ ເປັນປົກກະຕິ, ມີ ຊາວ ອາເມລິກາ ພຽງ ປະມານກວ່າ 60.000 ຄົນມາທ່ອງທ່ຽວ ຫວຽດນາມປະຈຳປີເທົ່ານັ້ນ. ແຕ່ມາຮອດປະຈຸບັນ, ຕົວເລກນີ້ບັນລຸເກືອບ 500.000 ຄົນ. ໄລຍະກວ່າ 20 ປີຜ່ານມາ, ການພົວພັນດ້ານການຄ້າສອງຝ່າຍໃນຂົງເຂດນຳເຂົ້າສົ່ງອອກສິນຄ້າກັບຫວຽດນາມ ບັນລຸພຽງ 450 ລ້ານ USD, ປະຈຸບັນ ຕົວເລກນີ້ໄດ້ເພີ່ມຂຶ້ນທົບ 100 ເທົ່າ. ກ່ອນນີ້ 20 ປີ, ມີນັກສຶກສາຫວຽດນາມພຽງ 1.000 ຄົນໄປຮຽນຢູ່ ອາເມລິກາ ແລະ ປະຈຸບັນ, ອາເມລິກາ ໄດ້ຕ້ອນຮັບນັກສຶກສາຫວຽດນາມ ເກືອບ 19.000 ຄົນ.
ບັນດາບາດກ້າວພັດທະນາຢ່າງຕັ້ງຫນ້າໃນການພົວພັນຄູ່ຮ່ວມມືຮອບດ້ານ ລະຫວ່າງ ຫວຽດນາມ ແລະ ອາເມລິກາແມ່ນໝາກຜົນແຫ່ງຄວາມມານະພະຍາຍາມອັນໃຫຍ່ຫລວງຂອງສອງຝ່າຍ ແລະ ແຜນນະໂຍບາຍຂອງຫວຽດນາມ ກ່ຽວກັບເລື່ອງ “ປະອະດີດຕະການໄວ້, ຜ່ານຜ່າຄວາມແຕກຕ່າງກັນ, ເສີມຂະຫຍາຍຈຸດຄ້າຍຄືກັນ, ມຸ່ງໄປສູ່ອະນາຄົດ” ຄືຄຳເຫັນຂອງ ທ່ານ ເລຂາທິການໃຫຍ່ ຫງວຽນຟູຈ້ອງ ທີ່ການເຈລະຈາກັບທ່ານປະທານາທິບໍດີ ອາເມລິກາ B. Obama ຢູ່ທຳນຽບຂາວເມື່ອເດືອນ 7/2015. ການຢ້ຽມຢາມຫວຽດນາມຂອງ ທ່ານປະທານາທິບໍດີ ອາເມລິກາ B. Obama ອີກຄັ້ງຫນຶ່ງເປັນການຮັບຮູ້ບັນດາຄວາມມານະພະຍາຍາມຂອງທັງສອງຝ່າຍ ຕາມເນື້ອໃນຈິດໃຈດັ່ງກ່າວ. ການຢ້ຽມຢາມເປັນຂີດໝາຍໃຫມ່ບົນເສັ້ນທາງທີ່ສອງປະເທດປະຕິບັດຖະແຫລງການວິໄສທັດຮ່ວມເມື່ອເດືອນ 7/2015 ໃນການຢ້ຽມຢາມ ອາເມລິກາ ຂອງທ່ານເລຂາທິການໃຫຍ່ ຫງວຽນຟູຈ້ອງ, ສະແດງໃຫ້ເຫັນບາດກ້າວເດີນອັນຍາວໄກໃນຈີນຕະນາການຂອງບັນດາການນຳ ອາເມລິກາ ຕໍ່ຫວຽດນາມ ນັບແຕ່ເມື່ອການຢ້ຽມຢາມຫວຽດນາມໃນປີ 2006 ຂອງປະທານາທິບໍດີ ອາເມລິກາ G. Bush. ນັ້ນແມ່ນ ເຄົາລົບລະບອບການເມືອງຂອງຫວຽດນາມ. ຮູບພາບ ທ່ານປະທານາທິບໍດີ ອາເມລິກາ B. Obama ເອົາມືວາງໃສ່ຫນ້າເອີກ ແລະ ເວົ້າວ່າ “ຂ້າພະເຈົ້າຮູ້ສຶກຕື້ນຕັ້ນໃຈທີ່ສຸດ. ອາລົມຈິດຂອງປະຊາຊົນຫວຽດນາມ ໄດ້ເຮັດໃຫ້ຫົວໃຈຂ້າພະເຈົ້າສັ່ນສະເທື່ອນ”, ນັ້ນແມ່ນການພິສູດໃຫ້ເຫັນຢ່າງຈະແຈ້ງວ່າ ການພົວພັນລະຫວ່າງຫວຽດນາມ ແລະ ອາເມລິກາ ແມ່ນຫັນຈາກເປັນປໍລະປັກກັນໃນອະດີດຕະການ ກາຍເປັນຄູ່ຮ່ວມມືຮອບດ້ານ.