1.  ພັກປະກາດໃຊ້ບັນດາມະຕິສຳຄັນໃນການປະຕິບັດມະຕິກອງປະຊຸມໃຫຍ່ຄັ້ງທີ 12 ຂອງພັກ

ປີ 2018, ພັກໄດ້ປະກາດໃຊ້ບັນດາມະຕິແນໃສ່ຫັນບັນດາໜ້າທີ່ຈຸດສຸມເປັນລະອຽດ ເຊິ່ງກອງປະຊຸມໃຫຍ່ຄັ້ງທີ 12 ຂອງພັກໄດ້ວາງອອກ, ມີຄວາມໝາຍອັນໃຫຍ່ຫລວງສຳລັບການພັດທະນາແບບຍືນຍົງຂອງປະເທດຊາດ, ສົ່ງຜົນກະທົບຢ່າງແຮງ, ເລິກເຊິ່ງກ້ວາງຂວາງເຖິງພະນັກງານ, ສະມາຊິກພັກ ແລະ ປະຊາຊົນ. ພິເສດແມ່ນ ທີ່ກອງປະຊຸມຄັ້ງທີ 7, ສູນກາງພັກໄດ້ຮັບຮອງເອົາມະຕິ “ກ່ຽວກັບການສຸມໃສ່ກໍ່ສ້າງຖັນແຖວພະນັກງານທຸກຂັ້ນ, ເປັນຕົ້ນແມ່ນຂັ້ນຍຸດທະສາດ, ມີຄຸນນະທາດ, ກຳລັງຄວາມສາມາດ ແລະ ອິດທິພົນຊື່ສຽງ, ເທົາແທນກັບໜ້າທີ່ຢ່າງຄົບຖ້ວນ”; ກອງປະຊຸມສູນກາງພັກຄັ້ງທີ 8 ໄດ້ປະກາດໃຊ້ຂໍ້ກຳນົດ “ຄວາມຮັບຜິດຊອບເປັນແບບຢ່າງຂອງພະນັກງານສະມາຊິກພັກ, ກ່ອນອື່ນໝົດແມ່ນກຳມະການກົມການເມືອງ, ກຳມະການຄະນະເລຂາສູນກາງພັກ, ກຳມະການຄະນະບໍລິຫານງານສູນກາງພັກ”; ກອງປະຊຸມສູນກາງພັກຄັ້ງທີ 9 ໄດ້ວາງແຜນກຳນົດຄະນະບໍລິຫານງານສູນກາງພັກອາຍຸການ 2021 – 2026; ເປັນຄັ້ງທຳອິດສູນກາງພັກໄດ້ດຳເນີນການປ່ອນບັດໄວ້ວາງໃຈສຳລັບບັນດາຕຳແໜ່ງກຳມະການກົມການເມືອງ, ຄະນະເລຂາສູນກາງພັກ.

2.  ສະພາແຫ່ງຊາດ ແລະ ລັດຖະບານປ່ຽນແປງໃໝ່ວິທີການເຄື່ອນໄຫວຢ່າງແຮງ, ຕັດສິນ ແລະ ຊີ້ນຳບັນດາບັນຫາສຳຄັນຂອງປະເທດຊາດຢ່າງມີໄຊ

ດ້ວຍທິດນຳສ້າງລັດຖະບານແຫ່ງການສ້າງສາມີຫົວຄິດປະດິດສ້າງ, ມີຄວາມສັດຊື່ບໍລິສຸດ, ມີການກະທຳ ແລະ ຮັບໃຊ້ປະຊາຊົນ, ໃນປີຜ່ານມາ, ນາຍົກລັດຖະມົນຕີ ແລະ ບັນດາຮອງນາຍົກລັດຖະມົນຕີ, ບັນດາສະມາຊິກລັດຖະບານໄດ້ຍູ້ແຮງການສ້າງສາ ແລະ ປັບປຸງລະບອບລະບຽບການ, ແກ້ໄຂຄວາມຫຍຸ້ງຍາກ, ສິ່ງຕິດຂັດ, ປັບປຸງລະບຽບການບໍລິຫານ, ດຶງດູດການລົງທຶນຢູ່ພາຍໃນ ແລະ ຕ່າງປະເທດ, ທັງຊຸກຍູ້ການພັດທະນາເສດຖະກິດ - ສັງຄົມ, ທັງເບິ່ງແຍງດູແລປັບປຸງຊີວິດການເປັນຢູ່ໃຫ້ແກ່ປະຊາຊົນ.

ເປັນຄັ້ງທຳອິດສະພາແຫ່ງຊາດສະເໜີລັດຖະບານລາຍງານໝາກຜົນ 3 ປີແຫ່ງການຜັນຂະຫຍາຍປະຕິບັດບັນດາມະຕິຂອງສະພາແຫ່ງຊາດກ່ຽວກັບການພັດທະນາເສດຖະກິດ-ສັງຄົມ, ສ້າງໂຄງປະກອບພື້ນຖານເສດຖະກິດຄືນໃໝ່, ກ່ຽວກັບການເງິນແຫ່ງຊາດ, ການລົງທຶນສາທາລະນະໄລຍະກາງ. ການເຄື່ອນໄຫວຕິດຕາມກວດກາໂດຍຜ່ານການຊັກຖາມ ແລະ ຕອບຕຳຊັກຖາມສືບຕໍ່ໄດ້ດຳເນີນຕາມວິທີການ “ຖາມໄວ, ຕອບສັ້ນ”; ບັນດາກອງປະຊຸມຂອງສະພາແຫ່ງຊາດ, ຄະນະປະຈຳສະພາແຫ່ງຊາດໄດ້ປະຕິບັດຢ່າງມີປະຊາທິປະໄຕ, ມີຄວາມສັດຊື່ບໍລິສຸດ, ມີປະສິດທິຜົນຢ່າງແທ້ຈິງ; ປະຕິບັດການປ່ອນບັດໄວ້ວາງໃຈສຳລັບບັນດາຕຳແໜ່ງໂດຍສະພາແຫ່ງຊາດເລືອກຕັ້ງ ຫຼື ໃຫ້ສັດຕະຍາບັນ.

3. ປະຕິບັດສຳເລັດເປົ້າໝາຍ “ຄູ່”: ທັງຮັກສາເສດຖະກິດມະຫາພາກເປັນປົກກະຕິຢ່າງໝັ້ນຄົງ, ທັງຊຸກຍູ້ການເຕີບໂຕເສດຖະກິດ, GDP ທັງປີຄາດວ່າບັນລຸໄດ້ 7%

ພາຍໃຕ້ການຊີ້ນຳນຳພາພັກ, ການບໍລິຫານຢ່າງຂ້ຽວຂາດຂອງລັດຖະບານ, ປີ 2018, ປະເທດເຮົາປະຕິບັດໄດ້ ແລະ ລື່ນກາຍ 12 ຄາດໝາຍການພັດທະນາເສດຖະກິດ - ສັງຄົມ. GDP ບັນລຸໄດ້ 7,08%, ແມ່ນລະດັບສູງສຸດໃນເກືອບ 10 ປີຜ່ານມາ. ສິ່ງທີ່ເປັນໜ້າສົນໃຈ, ເຖິງວ່າການເຕີບໂຕສູງກໍ່ຕາມ, ແຕ່ ຫວຽດນາມ ຍັງຄົງສາມາດຮັກສາເສດຖະກິດມະຫາພາກເປັນປົກກະຕິ ດ້ວຍເລື່ອງຮັກສາໄດ້ຄາດໝາຍກ່ຽວກັບດັດຊະນີລາຄາໃຊ້ສອຍ (CPI), ການຂາດດຸນງົບປະມານຫລຸດລົງ, ຕະຫລາດຫຼັກຊັບເປັນປົກກະຕິ.

4.  ທ່ານເລຂາທິການໃຫຍ່ ຫງວຽນຝູຈ້ອງ ໄດ້ຮັບການເລືອກຕັ້ງຈາກສະພາແຫ່ງຊາດໃຫ້ດຳລົງຕຳແໜ່ງເປັນປະທານປະເທດ

ດ້ວຍບັດເຫັນດີສູງ, ທີ່ກອງປະຊຸມສະໄໝສາມັນເທື່ອທີ 6, ບັນດາສະມາຊິກສະພາແຫ່ງຊາດຊຸດທີ 14 ໄດ້ເລືອກຕັ້ງທ່ານເລຂາທິການໃຫຍ່ ຫງວຽນຝູຈ້ອງ ຮັກສາດຳລົງຕຳແໜ່ງປະທານປະເທດແຫ່ງສາທາລະນະລັດສັງຄົມນິຍົມ ຫວຽດນາມ. ນີ້ແມ່ນເຫດການການເມືອງສຳຄັນ, ຕອບສະໜອງຄວາມມຸ່ງມາດປາດຖະໜາຂອງຜູ້ມີສິດເລືອກຕັ້ງ ແລະ ປະຊາຊົນໃນທົ່ວປະເທດ. ເລື່ອງທ່ານເລຂາທິການໃຫຍ່ຮັກສາດຳລົງຕຳແໜ່ງປະທານປະເທດ ຈະສ້າງຄວາມສະດວກໃຫ້ແກ່ວຽກງານຊີ້ນຳພາຍໃນ ແລະ ຕ່າງປະເທດ, ສ້າງຜົນປະໂຫຍດໃຫ້ແກ່ປະເທດຊາດ, ປະກອບສ່ວນປັບປຸງ, ຍົກສູງທີ່ຕັ້ງບົດບາດຂອງ ຫວຽດນາມ ໃນເວທີສາກົນ.

5.  ສະພາແຫ່ງຊາດໃຫ້ສັດຕະຍາບັນສັນຍາຄູ່ຮ່ວມມືຮອບດ້ານ ແລະ ກ້າວໜ້າຂ້າມປາຊີຟິກ (CPTPP), ຫວຽດນາມ ສືບຕໍ່ເຊື່ອມໂຍງເຂົ້າກັບສາກົນຢ່າງຮອບດ້ານ, ເລິກເຊິ່ງກ້ວາງຂວາງ

ວັນທີ 12 ພຶດສະພາ 2018, ສະພາແຫ່ງຊາດໄດ້ຮັບຮອງເອົາມະຕິໃຫ້ສັດຕະຍາບັນສັນຍາ CPTPP ພ້ອມດ້ວຍບັນດາເອກະສານທີ່ກ່ຽວຂ້ອງ. ຕາມກະຊວງແຜນການ ແລະ ລົງທຶນ ຫວຽດນາມ ແລ້ວ, CPTPP ສາມາດຊຸກຍູ້ GDP ແລະ ການສົ່ງອອກຂອງ ຫວຽດນາມ ຮອດປີ 2035 ເພີ່ມຂຶ້ນປະມານ 1,32%  ແລະ ກ່ວາ 4%. ເລື່ອງໃຫ້ສັດຕະຍາບັນ CPTPP ໄດ້ສະແດງໃຫ້ເຫັນຄຳໝັ້ນສັນຍາຢ່າງແຮງຂອງ ຫວຽດນາມ ເປັນເຈົ້າການ ແລະ ຕັ້ງໜ້າເຊື່ອມໂຍງເຂົ້າກັບສາກົນ, ໃນນັ້ນເຊື່ອມໂຍງເຂົ້າກັບເສດຖະກິດສາກົນແມ່ນຈຸດສຸມ, ເຂົ້າຮ່ວມບັນດາພາກພື້ນການຄ້າເສລີ ແລະ ບັນດາສັນຍາການຄ້າເສລີໃໝ່, ສືບຕໍໍຊຸກຍູ້ການພັດທະນາເສດຖະກິດ - ສັງຄົມຂອງປະເທດຊາດຕາມບັນດາມາດຕະຖານສາກົນ.

6.  ຫວຽດນາມ ຈັດຕັ້ງເວທີປາໄສເສດຖະກິດໂລກກ່ຽວກັບອາຊຽນ ປີ 2018 ປະສົບຜົນສຳເລັດ

ເວທີປາໄສເສດຖະກິດໂລກກ່ຽວກັບ ອາຊຽນ ປີ 2018 (WEF ASEAN 2018) ດ້ວຍຫົວຂໍ້ວ່າ “ການປະຕິວັດອຸດສາຫະກຳ 4.0 ແມ່ນອະນາຄົດຂອງ ອາຊຽນ” ໄດ້ດຶງດູດຄວາມສົນໃຈພິເສດຈາກປະຊາຄົມສາກົນ. ຫວຽດນາມ ໄດ້ມີຂໍ້ລິເລີ່ມສ້າງການເຊື່ອມຕໍ່ກ່ຽວກັບແນວຄວາມຄິດ, ກ່ຽວກັບການປ່ຽນແປງໃໝ່ ແລະ ປະດິດຄິດສ້າງລະຫວ່າງ ອາຊຽນ ແລະ ເວທີປາໄສເສດຖະກິດໂລກ. ບັນດາຜູ້ແທນເຂົ້າຮ່ວມເວທີປາໄສໄດ້ຕີລາຄາສູງບັນດາຂໍ້ສະເໜີຂອງ ຫວຽດນາມ, ໃນນັ້ນ ມີຂໍ້ສະເໜີຖື ອາຊຽນ ເປັນໃຈກາງ, ສ້າງບັນດາຫຼັກການຂອງ ອາຊຽນ ໃນການຮ່ວມມືແບ່ງປັນຂໍ້ມູນ, ສ້າງຂອບເຂດການເຊື່ອມຕໍ່ບັນດາສູນປະດິດຄິດສ້າງລະດັບຊາດກັບຕາໜ່າງສູນປະດິດຄິດສ້າງຂອງທົ່ວພາກພື້ນ…

7.  ວຽກງານປ້ອງກັນ, ຕ້ານສໍ້ລາດບັງຫລວງ, ສູ້ຊົນຕ້ານໄພຫຍໍ້ທໍ້ໄດ້ຮັບການຜັນຂະຫຍາຍຢ່າງແຮງ. ພະນັກງານຂັ້ນສູງຫລາຍຄົນຖືກປະຕິບັດວິໄນ

“ບໍ່ມີເຂດຫ້າມ”, “ບໍ່ຍົກເວັ້ນ” ແລະ “ບໍ່ໃຫ້ພົ້ນຈາກການຮັບຜິດຊອບຄວາມຜິດ” - ຄວາມຕັດສິນໃຈດ້ານການເມືອງຢ່າງແຮງ, ເດັດຂາດ, ຈະແຈ້ງຂອງພັກ, ລັດ, ນຳໜ້າແມ່ນທ່ານເລຂາທິການໃຫຍ່, ປະທານປະເທດ ຫງວຽນຝູຈ້ອງ ໄດ້ຮັບການສະໜັບສະໜູນ, ຕອງສະໜອງຈາກທົ່ວພັກ, ທົ່ວປະຊາຊົນ, ທົ່ວກອງທັບ. ພະນັກງານຂັ້ນສູງຫລາຍຄົນຢູ່ບັນດາກະຊວງ, ຂະແໜງການ, ທ້ອງຖິ່ນນັບທັງໄດ້ອອກບຳນານ ຫຼື ກຳລັງດຳລົງຕຳແໜ່ງລ້ວນແຕ່ຖືກປະຕິບັດວິໄນຢ່າງເຄັ່ງຄັດກ່ຽວກັບພັກ, ອຳນາດການປົກຄອງ ແລະ ນັບທັງການລົງໂທດທາງອາຍາ. ປີ 2018, ພັກ ແລະ ລັດໄດ້ປະຕິບັດວິໄນພະນັກງານຂັ້ນສູງຫລາຍຄົນ, ບາງຄົນມີຊັ້ນນາຍພົນໃນຕຳຫລວດ ແລະ ກອງທັບ.

8. ການສໍ້ໂກງໃນການສອບເສັງຈົບຊັ້ນມັດທະຍົມຕອບປາຍທົ່ວເທດປີ 2018; ຢູ່ບາງໂຮງຮຽນຂາດຄວາມປອດໄພ

ເລື່ອງບັນດາພະນັກງານໃນຂະແໜງສຶກສາຢູ່ ຮ່າຢາງ, ເຊິນລາ ແລະ ຮວ່າບິ່ງ… ແຊກແຊງ, ດັດແປງຄະແນນສອບເສັງໃນການເສັງຈົບຊັ້ນມັດທະຍົມຕອນປາຍທົ່ວເທດໄດ້ເຮັດໃຫ້ຫາງສຽງສັງຄົມບໍ່ພໍໃຈ. ພ້ອມກັບການສໍ້ໂກງໃນການສອບເສັງນັ້ນ ການໃຊ້ຄວາມຮຸນແຮງໃນການຮ່ຳຮຽນສືບຕໍ່ເປັນບັນຫາທີ່ເຄັ່ງຮ້ອນຂອງຂະແໜງການສຶກສາ. ໃນນັ້ນຕ້ອງເວົ້າເຖິງການທີ່ເອື້ອຍຄູຄົນໜຶ່ງ ຢູ່ກວ໋າງບິ່ງ ບັງຄັບໃຫ້ບັນດານັກຮຽນໃນຫ້ອງດຽວກັນຕົບໜ້າໝູ່ຮ່ວມຫ້ອງ 200 ບາດ ເຮັດໃຫ້ນັກຮຽນດັ່ງກ່າວຕ້ອງໄດ້ເຂົ້າໂຮງໝໍ ຫຼື ເຫດການຜູ້ອຳນວຍການໂຮງຮຽນກິນນອນຊົນເຜົ່າ ແທງເຊີນ, ຝູເທາະ ຖືກຈັບຕົວຍ້ອນຖືກຮ້ອງຟ້ອງດ້ວຍຂໍ້ຫາທຳຮ້າຍທາງເພດ. ບັນດາເຫດການໂສກເສົ້ານີ້ ໄດ້ການເປັນສຽງກ່າວເຕືອນກ່ຽວກັບບັນດາຈຸດອ່ອນໃນຂະແໜງການສຶກສາ ຄືພະຍາດຜົນງານ, ຄວາມເສີຍເມີຍ, ໄຮ້ຄວາມຮູ້ສຶກຂອງພະນັກງານ, ຄູອາຈານຈຳນວນໜຶ່ງ.

9.  ອາກາດຮ້າຍແຮງ, ໄພທຳມະຊາດບໍ່ເປັນປົກກະຕິ ໄດ້ກໍ່ຜົນຮ້າຍຢ່າງໜັກໜ່ວງຕໍ່ບັນດາທ້ອງຖິ່ນ, ຂະແໜງການຕ່າງໆ

ໄພທຳມະຊາດໄດ້ກໍ່ຄວາມເສຍຫາຍທາງດ້ານເສດຖະກິດປະມານ 20.000 ຕື້ດົງ, ເຮັດໃຫ້ມີຜູ້ເສຍຊີວິດ ແລະ ຫາຍສາບສູນ 218 ຄົນ. ຝົນຕົກໜັກບໍ່ພຽງແຕ່ເຮັດໃຫ້ນ້ຳຖ້ວມທົ່ງນາ ແຕ່ຍັງເຮັດໃຫ້ຖະໜົນຫຼາຍສາຍຢູ່ບັນດາຕົວເມືອງໃຫຍ່ໃນທົ່ວປະເທດຄື: ຮ່າໂນ້ຍ, ດາໜັງ, ນະຄອນ ໂຮ່ຈີມິນ, ຂັນຮ່ວາ… ຖືກຖ້ວມເລິກ, ຈົນຢູ່ໃນນ້ຳ. ເມື່ອຕົ້ນເດືອນກັນຍາ 2018, ຝົນຕົກນ້ຳຖ້ວມໄດ້ເຮັດໃຫ້ການສັນຈອນໄປມາຢູ່ຫລາຍແຂວງທາງພາກຕາເວັນຕົກສ່ຽງເໜືອຖືກຕັດຂາດ, ເກີດດິນເຊາະເຈື່ອນ, ການຈາລະຈອນຕິດຂັດຢ່າງຮ້າຍແຮງ. ຜ່ານບັນດາເຫດການດັ່ງກ່າວນີ້ໄດ້ຍົກໃຫ້ເຫັນວ່າ ນອກຈາກສາຍເຫດຍ້ອນໄພທຳມະຊາດແລ້ວ “ໄພພິບັດໂດຍມະນຸດກໍ່ຂຶ້ນ” ກໍ່ກອບເອົາສ່ວນ 1 ທີ່ສຳຄັນ.

10.      ກິລາບານເຕະຫວຽດນາມ ສ້າງຜົນສຳເລັດອັນມະຫັດສະຈັນ ດ້ວຍສັນຍາຂີດໝາຍ ປັກຮາງແຊວ ແລະ ໝາກຜົນຂອງການເປັນທີມບານເຕະອາຊີບ, ມີແບບແຜນ

ປີ 2018 ເປັນປີແຫ່ງຄວາມສຳເລັດຢ່າແທ້ຈິງຂອງ ທີມບານເຕະ ຫວຽດນາມ ດ້ວຍ 3 ນັດຊະນະຢ່າງມະຫັດສະຈັນຢູ່ຂັ້ນທະວີບ ແລະ ພາກພື້ນ: ໂດຍທີມບານເຕະຫວຽດນາມ ໄດ້ຄ້ວາລາງວັນຊະນະເລີດໃນການແຂ່ງຂັນບານເຕະ ອາຊີຕາເວັນອອກສ່ຽງໃຕ້ (AFF Suzuki Cup) ພາຍຫຼັງ 10 ປີແຫ່ງການລໍຄອຍ; ທີມບານເຕະ ໂອແລມປິກ ຫວຽດນາມ ໄດ້ຢືນຢູ່ອັບດັບທີ 4 ຂອງ ASIAD 2018; ທີມບານເຕະ U23  ຫວຽດນາມໄດ້ສ້າງ “ຊື່ສຽງ” ດ້ວຍຕຳແໜ່ງຮອງຊະນະເລີດ ລາຍການເຕະບານ U23 ທະວີບອາຊີ ຢູ່ ກວາງໂຈ (ສປ ຈີນ). ຜົນສຳເລັດຂອງທີມບານເຕະແຫ່ງຊາດ ມີຂີດໝາຍອັນເຂັ້ມຂົ້ນຂອງຄູຝຶກຊ້ອມຊາວ ສ.ເກົາຫຼີ - ປັກຮາງແຊວ, ໄດ້ສົ່ງແຫຼ່ງບັນດານໃຈ, ຄວາມໄຝ່ຝັນອັນແຮງກ້າ, ນ້ຳໃຈສາມັກຄີ ແລະ ແຜ່ກະຈາຍເອກອ້າງທະນົງໃຈຂອງຊາດໄປສູ່ຊາວ ຫວຽດນາມ ນັບສິບລ້ານຄົນ.