(vovworld) - ວັນທີ 5/9 ຂອງທຸກປີ ແມ່ນວັນທົ່ວປວງຊົນພາເດັກນ້ອຍໄປໂຮງຮຽນ ທັງແມ່ນວັນໄຂສົກຮຽນໃໝ່. ໃນຊຸມມື້ນີ້, ຕະຫຼາດອຸປະກອນ, ເຄື່ອງໃຊ້ໃນການຮຳ່ຮຽນ ມີຄວາມຟົດຟື້ນຍິ່ງຂຶ້ນ. ຍືຈາງ, ນັກຂ່າວວິທະຍຸກະຈາຍສຽງຫວຽດນາມ ຂໍແນະນຳບົດສາລະຄະດີ “ຕະຫຼາດປື້ມ ແລະ ອຸປະກອນການຮຽນກ່ອນວັນໄຂສົກຮຽນໃໝ່“. ເຊີນທ່ານຮັບຟັງ.
ພາບປະກອບອິນເຕີແນດ
ເຖິງວ່າຍັງມີເວລາ 1 ສັບປະດາອີກກໍ່ຈະຮອດວັນໄຂສົກຮຽນໃໝ່, ແຕ່ຢູ່ບັນດາຮ້ານຂາຍປື້ມຢູ່ຮ່າໂນ້ຍ ໄດ້ມີພໍ່ແມ່ນັກຮຽນ, ນັກຮຽນມາຊື້ເປັນຈຳນວນຫຼວງຫຼາຍ. ເພື່ອກະກຽມໃຫ້ລູກຂອງຕົນກ້າວເຂົ້າສູ່ສົກຮຽນໃໝ່. ນັບແຕ່ຕົ້ນປີ, ບໍລິສັດປື້ມ, ອຸປະກອນການຮຽນ ແລະ ກໍ່ສ້າງໂຮງຮຽນຮ່າໂນ້ຍ ແລະ ບໍລິສັດຮ່າໄຕ ໄດ້ພິມຈຳໜ່າຍປື້ມຮຽນ ແລະ ປື້ມທາບທາມເກືອບ 10 ລ້ານຊຸດ, ດ້ວຍຫຼາຍຮູບຫຼາຍແບບ ແລະ ຫຼາຍປະເພດ. ທ່ານ ບູ່ຍຊີຮຸ່ງ, ຮອງຫົວໜ້າບໍລິສັດໃຫຍ່ປື້ມ, ອຸປະກອນການຮຽນ ແລະ ກໍ່ສ້າງໂຮງຮຽນຮ່າໂນ້ຍ, ໃຫ້ຮູ້ວ່າ:
“ພວກຂ້າພະເຈົ້າໄດ້ກະກຽມປື້ມຮັບໃຊ້ໃຫ້ສົກຮຽນໃໝ່ນີ້ຢ່າງຄົບຖ້ວນ, ແລະ ຮັກສາລາຄາໄວ້ຄືເກົ່າ. ພໍ່ແມ່ນັກຮຽນມາຊື້ປື້ມ ແລະ ອຸປະກອນການຮຽນຢູ່ບັນດາຮ້ານຂາຍປື້ມ ຈະໄດ້ຮັບການຮັບປະກັນດ້ານຄຸນນະພາບ ແລະ ລາຄາ“.
ພາບປະກອບອິນເຕີແນດ ບັນດາຮ້ານຂາຍປື້ມໃຫຍ່ ແລະ ມີອິດທິພົນຊື່ສຽງຂອງບໍລິສັດປື້ມ, ອຸປະກອນການຮຽນ ແລະ ກໍ່ສ້າງໂຮງຮຽນຮ່າໂນ້ຍ ໃນຖະໜົນ ຫຼີເທື່ອງກຽດ, ສູນຂາຍປື້ມ ແລະ ອຸປະກອນການຮຽນຢູ່ຖະໜົນຢາງຫວໍ, ຮ້ານຂາຍປື້ມຕ່ຽນຟອງ ຢູ່ຖະໜົນຫງວຽນທ໋າຍຫອກ, ຖະໜົນຈ່າງຕ່ຽນ... ລ້ວນແຕ່ມີພໍ່ແມ່ນັກຮຽນ, ນັກຮຽນມາຊື້ເປັນຈຳນວນຫຼວງຫຼາຍ. ອຸປະກອນການຮຽນຢູ່ບັນດາຮ້ານຂາຍປື້ມດັ່ງກ່າວສ່ວນຫຼາຍແມ່ນຜະລິດຕະພັນຂອງບໍລິສັດພາຍໃນປະເທດຄື: ຮົ່ງຮ່າ, ທຽນລອງ, ເບັ໋ນແງ໋... ປ້າ ຫງວຽນທິທູຮ່ຽນ, ຫົວໜ້າຮ້ານຂາຍປື້ມຕ່ຽນຟອງ, ໃນຖະໜົນຫງວຽນທ້າຍຫອກ, ໃຫ້ຮູ້ວ່າ:
“ລາຄາສິນຄ້າພາຍໃນປະເທດ ແລະ ນຳເຂົ້າຈາກຕ່າງປະເທດຍັງຄົງຮັກສາໄວ້ເປັນປົກກະຕິ, ຮູບແບບກໍ່ໄດ້ຮັບການປັບປຸງຫຼາຍ. ເຄື່ອງໃຊ້ໃນການຮຳ່ຮຽນແມ່ນອຸດົມສົມບູນ, ຫຼາຍຮູບຫຼາຍແບບ ແລະ ຮັບປະກັນດ້ານຄຸນນະພາບອີກ. ປີນີ້, ຜູ້ໃຊ້ສອຍມັກຊື້ສິນຄ້າພາຍໃນປະເທດຫຼາຍກວ່າ ເມື່ອທຽບໃສ່ຊຸມປີກ່ອນໆ“
ພາບປະກອບອິນເຕີແນດ
ຢູ່ບັນດາຮ້ານຂາຍປື້ມ ແລະ ຮ້ານຊັບພະສິນຄ້າໃຫຍ່ໃນແຂວງ ເກິ່ນເທີ ຄື: ຮ້ານຂາຍປື້ມເຟືອງນາມ, ຮ້ານຂາຍປື້ມການຮຽນ, ຮ້ານຊັບພະສິນຄ້າ Coopmart, Big C... ລ້ວນແຕ່ມີພໍ່ແມ່ນັກຮຽນ ແລະ ນັກຮຽນມາຊື້ເປັນຈຳນວນຫຼວງຫຼາຍ. ທ່ານ ຫງວຽນວັນລວງ, ຢູ່ຮ້ານຂາຍປື້ມເຟືອງນາມ, ໃຫ້ຮູ້ວ່າ:
“ຮ້ານຂາຍປື້ມເຟືອງນາມ ກໍ່ຄືບໍລິສັດວັດທະນະທຳເຟືອງນາມ ມຸ້ງໄປສູ່ການແບ່ງປັນຄວາມຫຍຸ້ງຍາກກັບຜູ້ໃຊ້ສອຍເມື່ອກ້າວເຂົ້າສົກຮຽນໃໝ່. ພວກຂ້າພະເຈົ້າໄດ້ມີບັນດາລາຍການຫຼຸດລາຄາສິນຄ້າ ແຕ່ຍັງຮັບປະກັນດ້ານຄຸນນະພາບໄວ້ຄືເກົ່າ “.
ຕະຫຼາດປື້ມ ແລະ ເຄື່ອງໃຊ້ໃນການຮຳ່ຮຽນຍາມໃດກໍ່ຟົດຟື້ນໃນໂອກາດໄຂສົກຮຽນໃໝ່. ບັນດາອຸປະກອນຮັບໃຊ້ໃຫ້ແກ່ນັກຮຽນ ທີ່ມີຫຼາຍຮູບຫຼາຍແບບ ແລະ ມີຄຸນນະພາບສູງນັ້ນ ໄດ້ສ້າງເງື່ອນໄຂສະດວກໃຫ້ພໍ່ແມ່ນັກຮຽນເລືອກຊື້ໃຫ້ລູກຂອງຕົນໃນສົກຮຽນໃໝ່ນີ້.