ພະລັງຊີວິດຂອງບົດເພງແຫ່ງປະຫວັດສາດ “ ລຸງໂຮ່ໃນວັນມະຫາໄຊ ”

ວັນຈັນ ທີ 30 ເມສາ ຄ.ສ. 2012 | 16:17:44

ນັກດົນຕີ Pham Tuyen ຜູ້ປະພັນບົດເພງແຫ່ງປະຫວັດສາດ
“ ລຸງໂຮ່ໃນວັນມະຫາໄຊ ”
(ພາບ: vanhoadoisong.vn )

(vovworld-) ນັກດົນຕີ Pham Tuyen ໄດ້ປະພັນບົດເພງແຫ່ງປະຫວັດສາດ “ ລຸງໂຮ່ໃນວັນມະຫາໄຊ ” ກ່ອນທີ່ພາກໃຕ້ຫວຽດນາມໄດ້ຮັບການປົດປ່ອຍພຽງ 2 ວັນເທົ່ານັ້ນ. ໂດຍແທດເໝາະກັບຈິດໃຈຂອງປະຊາຊົນ, ແລະ ໄດ້ຮັບການຕອບສະໜອງຈາກປະຊາຊົນໃນທົ່ວປະເທດ, ດັ່ງນັ້ນ, ບົດເພງນີ້ມີກຳລັງແຜ່ຂະຫຍາຍຢ່າງມະຫາສານ.

“ ດັ່ງທີ່ມີລຸງໂຮ່ໃນວັນມະຫາໄຊ, ຄຳໂອວາດຂອງລຸງໄດ້ກາຍໄຊຊະນະອັນຍິ່ງໃຫຍ່. 30 ປີແຫ່ງການຕໍ່ສູ້ເພື່ອຜືນແຜ່ນດິນອັນຄົບຖ້ວນ, 30 ປີແຫ່ງສາທາ ລະນະລັດປະຊາທິປະໄຕຫວຽດນາມທຳການຕໍ່ຕ້ານໄດ້ປະສົບຜົນສຳເລັດ. ຫວຽດນາມ ໂຮ່ຈິມິິນ......” ບົດເພງພຽງປະກອບດ້ວຍ 58 ສັບເທົ່ານັ້ນ, ແຕ່ ສາມາດເວົ້າເຖິງທຸກສິ່ງທຸກຢ່າງທີ່ປະຊາຊົນຫວຽດນາມໄລຍະນັ້ນມີຄວາມຫວັງຢາກມີເອກະລາດ, ສັນຕິພາບ, ເອກະພາບ. ຈັງຫວະຂອງບົດເພງແມ່ນຈັງຫວະຫົວໃຈຂອງຊາວຫວຽດນາມນັບລ້ານໆຄົນດ້ວຍຄວາມຫວັງຢາກໄດ້ຮັບໄຊຊະນະ ແລະ ບືນຕົວຂຶ້ນໃນທ່າມກາງສັນຕິພາບ. 37 ປີໄດ້ຜ່ານພົ້ນໄປແລ້ວ, ແຕ່ນັກດົນຕີ Pham Tuyen ຍັງຄົງບໍ່ຫຼົງລືມຈຸດເວລາທີ່ມະຫັດສະຈັນ ອັນໄດ້ພາ Pham Tuyen ຈັບປາກກາແຕ່ງບົດເພງ “ ລຸງໂຮ່ໃນວັນມະຫາໄຊ ” ໃຫ້ສຳເລັດ.

ນັກດົນຕີ Pham Tuyen ເລົ່າສູ່ຟັງວ່າ :

“ ຄ່ຳຄືນວັນທີ 28 ເມສາ ປີ 1975, ຂ້າພະເຈົ້າໄດ້ຍິນຂ່າວຈາກວິທະຍຸກະຈາຍສຽງຫວຽດນາມວ່າ ມີນັກບິນຄົນໜຶ່ງຂັບເຮືອບິນຖິ້ມລະເບີດລົງໃສ່ສະ ໜາມບິນ Tan Son Nhat , ພາຍຫຼັງມາຈຶ່ງຮູ້ວ່າ ນັກບິນຄົນນັ້ນແມ່ນນັກວິລະຊົນ Nguyen Thanh Trung . ຂ້າພະເຈົ້າຕົກໃຈເພາະວ່າ Tan Son Nhat ໝາຍເຖິງຢູ່ ໄຊງ່ອນ. ຂ້າພະເຈົ້າເຊື່ອແນວ່າ ພຽງ 2-3 ມື້ຂ້າງໜ້າ ພາກໃຕ້ຈະໄດ້ຮັບການປົດປ່ອຍ, ເວລານັ້ນຊາວຫວຽດນາມຢູ່ທຸກແຫ່ງຫົນຈະພາກັນຫຼັ່ງໄຫລອອກສູ່ຖະໜົນຫົນທາງເພື່ອຂັບຮ້ອງ. ຮອດເວລາ 23 ໂມງຂອງມື້ນັ້ນ, ຂ້າພະເຈົ້າໄດ້ແຕ່ງບົດເພງນີ້ສຳເລັດ, ບໍ່ຖືກດັດແປງຈັກໜ້ອຍ. ຂ້າພະເຈົ້າຖືວ່າຕົນເອງໄດ້ຊຳລະບ້ວງໜີ້ສິນດ້ານຈິດໃຈຕໍ່ຄວາມຕ້ອງການດ້ານສິລະປະຂອງປະເທດຊາດ ”

ຫວນຄືນໄລຍະເວລາແຫ່ງປະຫວັດສາດ, ຫວ່າງຕົ້ນເດືອນເມສາປີ 1975 ເມື່ອກອງທັບປົດປ່ອຍເປີດການບຸກໂຈມຕີຂະໜາດໃຫຍ່ເຂົ້າໄຊງ່ອນ, ຄາວນັ້ນ ນັກດົນຕີ Pham Tuyen ພວມເຮັດວຽກຢູ່ວິທະຍຸກະຈາຍວຽງຫວຽດນາມ. ແລະ ກໍໃນຄາວນັ້ນ, ທ່ານ Tran Lam ບັນນາທິການໃຫຍ່ ວິທະຍຸກະຈາຍສຽງຫວຽດນາມໄດ້ໃຫ້ຄຳຕັກເຕືອນ ບັນດາຜູ້ເຮັດວຽກງານດ້ານດົນຕີໃນທຸກເວລາວ່າ: ຕ້ອງປະພັນໃຫ້ໄດ້ບົດເພງທີ່ສົມກັບໄຊຊະນະທີ່ຍິ່ງໃຫຍ່ໃກ້ຈະມາເຖິງນີ້. ແລະ ຜ່ານການຮັບຟັງຂ່າວຄາວຂອງວິທະຍຸກະຈາຍສຽງຫວຽດນາມໃນແຕ່ລະຄ່ຳຄືນ, ນັກດົນຕີ Pham Tuyen ໄດ້ສຸມຈິດສຸມໃຈປະພັນເພງໃຫ້ແກ່ມື້ມະຫາໄຊຂອງປະເທດຊາດ. ນັກດົນຕີ Pham Tuyen ໃຫ້ຮູ້ວ່າ :

“ ລຸ່ນຄົນພວກຂ້າພະເຈົ້າຍັງຈືດີຄຳສັ່ງສອນຂອງລຸງໂຮ່ທີ່ວ່າ: ຕີໃຫ້ຈັກກະພັດອາເມລິກາຖອຍໄປ, ຕີໃຫ້ພວກຫຸ່ນໄຊງ່ອນແຕກທະລາຍ; ພໍ່ແມ່ປະຊາຊົນ,ນັກຮົບຈົ່ງກ້າວຂຶ້ນ; 2 ພາກເໜືອ-ໃຕ້ໂຮມເຂົ້າກັນເປັນປຶກໜຶ່ງແຜ່ນດຽວ, ລະດູບານໃໝ່ປີນີ້ຈະມ່ວນຊື່ນກ່ວາທຸກໆປີ. ສຽງຂັບຮ້ອງຟົດຟື້ນມ່ວນຊື່ນຖືກຂ້າພະເຈົ້າເລີ່ມຕົ້ນແຕ່ງດ້ວຍຄຳວ່າ : ຫວຽດນາມ-ໂຮ່ຈິມິນ ໂດຍຂັບຊ້ຳແລ້ວຊ້ຳອີກ. ພາຍຫຼັງທີ່ຂ້າພະເຈົ້າແຕ່ງວັກທຳອິດ, ເວລານັ້ນລຸງໂຮ່ໄດ້ເຖິງແກ່ມໍລະນະກຳແລ້ວ, ດັ່ງນັ້ນຂ້າພະເຈົ້າໄດ້ແຕ່ງຄຳວ່າ: ດັ່ງທີ່ມີລຸງໂຮ່ໃນວັນມະຫາໄຊ. ຂ້າພະເຈົ້າເຕື້ອງເຖິງຫຼັກໝາຍແຫ່ງປະຫວັດສາດແຕ່ປີ 1945 ຫາປີ 1975 ໝາຍຄວາມວ່າໄລຍະ 30 ປີແຫ່ງການຕໍ່ສູ້ເພື່ອຜືນແຜ່ນດິນອັນຄົບຖ້ວນ, 30 ປີແຫ່ງການຕໍ່ຕ້ານໄດ້ປະສົບຜົນສຳເລັດ. ນີ້ແມ່ນຫຼັກໝາຍປະຫວັດສາດບໍ່ສະເພາະແຕ່ຂ້າພະເຈົ້າເອງເທົ່າ ນັ້ນ, ຫາກຍັງຝັງເລິກໃນດວງໃຈຂອງຊາວຫວຽດນາມແຕ່ລະຄົນອີກດ້ວຍ ”

ຄືດັ່ງການທຳນາຍຂອງນັກດົນຕີ Pham Tuyen, ເວລາ 11 ໂມງ 30 ນາທີຂອງວັນທີ 30 ເມສາ, ປະເທດຊາດຫວຽດນາມຍາດໄດ້ເອກະລາດ, ອິດສະຫຼະພາບຢ່າງສົມບູນ, 2 ພາກເໜືອ-ໃຕ້ຖືກໂຮມເຂົ້າກັນເປັນປຶກໜຶ່ງແຜ່ນ ດຽວ. ແລະ ບົດເພງດັ່ງກ່າວ ໃນທັນທີໄດ້ຖືກອັດສຽງເພື່ອອອກອາກາດພ້ອມກັບ ຂ່າວໄຊຊະນະໃນເວລາ 17 ໂມງຂອງວັນດຽວກັນ. ນັ້ນແມ່ນຕອນອັດສຽງທີ່ໜ້າຕື້ນຕັນໃຈທີ່ສຸດໃນຊີວິດຂອງນັກດົນຕີ Pham Tuyen. ທ່ານເວົ້າວ່າ :

“ ເວລາ 13 ໂມງຂອງວັນທີ 30 ເມສາ, ຄະນະດົນຕີໄດ້ເຕົ້າໂຮມກັນເພື່ອອັດສຽງບົດເພງນີ້ແລ້ວ. ຂ້າພະເຈົ້າໄດ້ເຂົ້າຮ່ວມການອັດສຽງຫຼາຍເທື່ອແລ້ວ, ແຕ່ບໍ່ມີການອັດສຽງເທື່ອໃດພັດຕື້ນຕັນໃຈເຊັ່ນນັ້ນ, ທັງຜູ້ຂັບຮ້ອງ, ທັງຜູ້ເສບເຄື່ອງດົນຕີ, ຜູ້ບັນຊາ ຕ່າງກໍຫຼັ່ງນ້ຳຕາ. ຜູ້ບັນຊາກອງດົນຕີໃນມື້ນັ້ນ ແມ່ນທ່ານ Cao Viet Bach ສ່ວນຂັບຮ້ອງແມ່ນທ່ານ Dang Hung ແລະ ທ່ານນາງ Tuyet Thanh ພ້ອມກັບຄະນະສິລະປະກອນວິທະຍຸກະຈາຍສຽງຫວຽດນາມ. ເມື່ອເປີດຟັງບົດເພງນີ້, ໝົດທຸກຄົນຕ່າງກໍເວົ້າວ່າ ໃຊ້ບົດເພງນີ້ເທົ່ານັ້ນ ແລະ ແລ່ນມາຈັບມືຖາມຂ້າພະເຈົ້າວ່າ ຄວນດັດແປງຫຍັງບໍ່? ຂ້າພະເຈົ້າຕອບວ່າ ບໍ່ມີຈັກເທື່ອທີ່ຂ້າພະເຈົ້າມີຄວາມຮູ້ສຶກແປກປະຫຼາດເມື່ອເຂົ້າຮ່ວມການອັດສຽງບົດເພງ ເບິ່ງຄືວ່າມັນໄດ້ມີມາກ່ອນແລ້ວ ”

ບົດເພງຖືກອອກອາກາດໃນທ່າມກາງບັນຍາກາດສະຫງ່າອົງອາດ ແລະ ຟົດຟື້ນມ່ວນຊື່ນ ໃນຂະນະທີ່ຊາວຫວຽດນາມນັບລ້ານໆຄົນພາກັນຫຼັ່ງໄຫຼລົງສູ່ຖະໜົນຫົນທາງ ແກວງທຸ່ງ, ຕີກອງ, ຕົບມືຂັບຮ້ອງຕາມຈັງຫວະບົດເພງ. ນັກສິລະປີນດີເດັ່ນ Tuyet Thanh ເລົ່າຄືນສູ່ຟັງກ່ຽວກັບການອັດສຽງບົດເພງໃນມື້ນັ້ນວ່າ : “ ທຸກໆຄົນຂັບຮ້ອງດ້ວຍນ້ຳໃຈ, ທັງມ່ວນ, ທັງດີໃຈ, ທັງຫຼັ່ງນ້ຳຕາ. ເວລາອັດສຽງ ແມ່ນຕື້ນຕັນໃຈຫຼາຍ. ຂ້າພະເຈົ້າຮູ້ສຶກວ່າ ຕົນເອງຂັບຮ້ອງຍັງບໍ່ທັນໄດ້ດີປານໃດ, ແຕ່ກໍຍັງຄົງພະຍາຍາມໃຫ້ສຳເລັດ. ອັດສຽງແລ້ວ ກໍໃຫ້ອອກອາກາດເລີຍ, ບັນດາອ້າຍເອື້ອຍນ້ອງດີໃຈຫຼາຍ ແລະ ພ້ອມກັນຫຼັ່ງນ້ຳຕາ . ດົນຕີຜ່ານທາງວິທະຍຸກະຈາຍສຽງແມ່ນມີລັກສະນະຕໍ່ສູ້, ແມ່ນອາວຸດອັນແຫຼມຄົມເພື່ອຕີສັດຕູ ”

37 ປີພາຍຫຼັງທີ່ບົດເພງຖືກອອກອາກາດເປັນຄັ້ງທຳອິດ, ມື້ນີ້ ນັ່ງຈັບປ້າຍໂຄສະນາພິມຮູບລຸງໂຮ່, ທຸ່ງແດງດາວຄຳ ພ້ອມກັບແຖວຕົວໜັງສືພາສາຫວຽດ ແລະ ພາສາອັງກິດ “ດັ່ງທີ່ມີລຸງໂຮ່ໃນວັນມະຫາໄຊ”, ຄູ່ຕາຂອງນັກດົນຕີຜົມຫງອກບໍ່ສາມາດອົດກັ້ນນຳຕາຍ້ອນຄວາມຜາສຸກ. ບົດເພງເຖິງວ່າສັ້ນກໍຕາມ, ແຕ່ມີກຳລັງໄຟຢ່າງມະຫາສານ, ມັນຝັງເລິກໃນດວງໃຈຂອງຊາວຫວຽດນາມແຕ່ລະຄົນ ແລະ ທັງເປັນສານແຫ່ງໄຊຊະນະຂອງຍຸກສະໄໝ ໂຮ່ຈິມິນເພື່ອສົ່ງເຖິງເພື່ອນມິດສາກົນ.