(ເອື້ອຍ ຟານທິໂຕເມື່ອຍ, ເປັນເຈົ້າຂອງສະຫະກອນຜະລິດເຂົ້າປຸ້ນແຫ້ງ)

        ເຂດພູສູງແຂວງ ບັກກ້ານ ໄດ້ປະກົດມີແມ່ຍິງເຊິ່ງແມ່ນຊາວເຜົ່າສ່ວນໜ້ອຍເປັນເຈົ້າຂອງວິສາຫະກິດນັບມື້ນັບຫຼາຍ. ເຂົາເຈົ້າໄດ້ສະແດງໃຫ້ເຫັນຄຸນນະທາດ, ການບືນຕົວຂຶ້ນສ້າງຄວາມຮັ່ງມີ ແລະ ປະກອບສ່ວນໃຫ້ແກ່ການພັດທະນາເສດຖະກິດ, ສັງຄົມຢູ່ທ້ອງຖິ່ນ.

        ຢູ່ບ້ານ ຈູງຮວ່າ, ຕາແສງ ກົງບັ່ງ, ເມືອງ ປາກນ້ຳ, ມີຫຼາຍຄອບຄົວຊາວເຜົ່າ ໄຕ່ ເຮັດເຂົ້າປຸ້ນດ້ວຍມື, ເຖິງຢ່າງໃດກໍ່ຕາມ, ຍ້ອນພຽງແຕ່ຜະລິດແບບຍ່ອຍ, ໜ້ອຍ ສະນັ້ນ ລາຍຮັບບໍ່ສູງ ແລະ ບໍ່ໝັ້ນຄົງ. ດ້ວຍແນວຄິດຍົກສູງມູນຄ່າຜະລິດຕະພັນດັ່ງກ່າວ, ປີ 2020, ເອື້ອຍ ຟານທິໂຕເມື່ອຍ, ຊາວເຜົ່າ ໄຕ່, ຢູ່ບ້ານ ຈູງຮວ່າ, ເປັນເຈົ້າຂອງສະຫະກອນຜະລິດເຂົ້າປຸ້ນແຫ້ງ, ໄດ້ຂົນຂວາຍສະມາຊິກຕື່ມ 7 ຄົນ, ເປັນຕົ້ນແມ່ນຍາດຕິພີ່ນ້ອງ ແລະ ປະຊາຊົນໃນບ້ານ, ສ້າງຕັ້ງຮູບແບບສະຫະກອນ. ປະຈຸບັນ, ແຕ່ລະປີ, ສະຫະກອນຜະລິດເຂົ້າປຸ້ນໄດ້ກວ່າ 20 ໂຕນ, ສະໜອງໃຫ້ແກ່ຕະຫຼາດຢູ່ພາຍໃນ ແລະ ນອກແຂວງ, ສ້າງແຫຼ່ງລາຍຮັບເປັນປົກກະຕິໃຫ້ແກ່ສະມາຊິກໃນສະຫະກອນ. ປີ 2024, ເອື້ອຍ ຍາດໄດ້ລາງວັນທີ່ການແຂ່ງຂັນ “ແມ່ຍິງ startup ປະດິດຄິດສ້າງ ແລະ ຫັນເປັນສີຂຽວ” ໂດຍສູນກາງສະຫະພັນແມ່ຍິງ ຫວຽດນາມ ຈັດຂຶ້ນ. ເອື້ອຍ ຟານທິໂຕເມື່ອຍ, ໃຫ້ຮູ້ວ່າ:

        “ໂດຍອີງໃສ່ເຍື່ອງອາຫານພື້ນເມືອງແມ່ນເຂົ້າໜຽວ 5 ສີຂອງພໍ່ແມ່ປະຊາຊົນຊາວເຜົ່າ ໄຕ່, ໃນໄລຍະກ່ອນ ພໍ່, ແມ່ຂ້າພະເຈົ້າເຮັດເຂົ້າປຸ້ນຂາວ, ມາຮອດລຸ້ນຂ້າພະເຈົ້າແມ່ນເຮັດເຂົ້າປຸ້ນສີ. ບັນດາແຫຼ່ງວັດຖຸດິບເຮັດເຂົ້າປຸ້ນຂອງຂ້າພະເຈົ້າແມ່ນເຮັດຈາກເຂົ້າສານ, ໄດ້ປູກຢູ່ທ້ອງຖິ່ນ, ສົມທົບກັບບັນດາຜັກ, ໝາກໄມ້ໃນສວນ. ເມື່ອສາມາດລອດເຂົ້າຮອບຊີງຊະນະເລີດການແຂ່ງຂັນແມ່ຍິງ startup, ຫັນເປັນສີຂຽວ 2024, ຂ້າພະເຈົ້າຮູ້ສຶກມີກຳລັງໃຈຫຼາຍຂຶ້ນ ເພື່ອຕໍ່ກຳລັງແຮງໃຫ້ຂ້າພະເຈົ້າສືບຕໍ່ເດີນຕາມການພັດທະນາໂຄງການນີ້”.

(ເອື້ອຍ ຮ່າທິເຍິມ startup ດ້ວຍອາຊີບປຸງແຕ່ງບັນດາຜະລິດຕະພັນຈາກດອກກຸຫຼາບ)

        ກໍ່ຢູ່ແຂວງ ບັກກ້ານ, ມີເອື້ອຍ ຮ່າທິເຍິມ startup ດ້ວຍອາຊີບປຸງແຕ່ງບັນດາຜະລິດຕະພັນຈາກດອກກຸຫຼາບ, ຫົວໜ້າສະຫະກອນ ຊາ ແຮ້ງຟຸກ, ຢູ່ບ້ານ ຕົງຕ່າງ, ຕາແສງ ກາວກີ່, ເມືອງ ເຈີ້ເມີຍ. ໃນເບື້ອງຕົ້ນ, ເອື້ອຍປະສົບກັບຄວາມຫຍຸ້ງຍາກຫຼາຍຢ່າງໃນວິວັດການຄົ້ນຄວ້າ ແລະ ພັດທະນາຜະລິດຕະພັນ, ຍ້ອນນີ້ແມ່ນທິດກ້າວເດີນໃໝ່ທີ່ຍັງບໍ່ທັນມີຜູ້ເຮັດເທື່ອ, ໂດຍສະເພາະແມ່ນສຳລັບຜູ້ທີ່ບໍ່ມີຄວາມຮູ້ດ້ານກະສິກຳຄືເອື້ອຍ. ພາຍຫຼັງການທົດລອງລົ້ມເຫຼວເປັນຫຼາຍຄັ້ງນັ້ນ, ເອື້ອຍ ເຍິມ ໄດ້ຖອດຖອນບົດຮຽນ ແລະ ຜະລິດອອກຜະລິດຕະພັນຊາດອກກຸຫຼາບທີ່ເປັນເອກະລັກສະເພາະ. ຊາຊະນິດນີ້ບໍ່ພຽງແຕ່ຮັກສາລົດຊາດ ກິ່ນຫອມແບບທຳມະຊາດເທົ່ານັ້ນ, ຫາກຍັງດີຕໍ່ສຸຂະພາບອີກດ້ວຍ. ປະຈຸບັນ, ສະຫະກອນ ຊາ ແຮ້ງຟຸກ ໄດ້ສະໜອງຢູ່ບັນດາແຂວງ, ຄື: ຖາຍງວຽນ, ຮ່າໂນ້ຍ, ນະຄອນ ໂຮ່ຈີມິນ… ເອື້ອຍ ຮ່າທິເຍິມ, ແບ່ງປັນວ່າ:

        “ຕາແສງ ກາວກີ່ ທີ່ຂ້າພະເຈົ້າດຳລົງຊີວິດກໍ່ພຽງແຕ່ເຮັດກະສິກຳຢ່າງດຽວ, ຄື ປູກສາລີ, ປູກເຂົ້າ ແລະ ມີຕົ້ນອ້ອຍຫຼາຍປີທີ່ໄດ້ຮັບຖືວ່າເປັນຫຼັກແຫຼ່ງ. ເຖິງຢ່າງໃດກໍ່ຕາມ, ການປູກຕົ້ນອ້ອຍບໍ່ບັນລຸປະສິດທິຜົນ. ສະນັ້ນ, ຂ້າພະເຈົ້າຄິດວ່າຈະປ່ຽນແປງດ້ວຍຕົ້ນໄມ້ຫຼາຍປີຊະນິດອື່ນທີ່ນຳມາເຊິ່ງມູນຄ່າ, ສ້າງລາຍຮັບເປັນປົກກະຕິກວ່າ. ຂ້າພະເຈົ້າເຫັນວ່າ, ປະຈຸບັນຊາດອກກຸຫຼາບແມ່ນໄດ້ຮັບຄວາມນິຍົມທີ່ສຸດ, ເປັນມິດກັບສິ່ງແວດລ້ອມ, ປະຈຸບັນຜູ້ໃດກໍ່ຢາກນຳໃຊ້ຜະລິດຕະພັນ organic, ສະນັ້ນ, ຂ້າພະເຈົ້າຈິ່ງຕັດສິນໃຈເລືອກເອົາຕົ້ນດອກກຸຫຼາບເພື່ອ startup”.

        ປະຈຸບັນ, ແຂວງ ບັກກ້ານ ມີສະຫະກອນກວ່າ 100 ແຫ່ງໂດຍແມ່ຍິງເປັນເຈົ້າຂອງ. ມາຮອດປະຈຸບັນ, ມີຫຼາຍຜະລິດຕະພັນ, ຄື: ເສັ້ນລ້ອນ, ເຂົ້າປຸ້ນ ເສັ້ນເຝີ, ຊາດອກຄາມີເລີຍ (Camellia), ຊາ ຊານຕວຽດ (ຊາ Snowshan) … ຂອງແຂວງ ບັກກ້ານ ໄດ້ເປັນທີ່ຮູ້ຈັກຢູ່ຕະຫຼາດຫຼາຍແຫ່ງ, ຄື: ຮ່າໂນ້ຍ, ດ່ານັ້ງ, ຫາຍຟ່ອງ, ກວາງນິງ, ນະຄອນ ໂຮ່ຈີມິນ… ພິເສດ, ມີຜະລິດຕະພັນ OCOP (ໂຄງການລະດັບຊາດ ໜຶ່ງຕາແສງ ໜຶ່ງຜະລິດຕະພັນ) ຈຳນວນໜຶ່ງຂອງບັນດາສະຫະກອນໂດຍແມ່ຍິງເປັນເຈົ້າຂອງ ໄດ້ສົ່ງອອກໄປຍັງບັນດາຕະຫຼາດຕ່າງປະເທດ, ຄື: ຍີ່ປຸ່ນ, ເອີລົບ… ທ່ານນາງ ຫງວຽນທິເຫວ້, ຮອງປະທານສະຫະພັນແມ່ຍິງແຂວງ ບັກກ້ານ, ໃຫ້ຮູ້ວ່າ:

        “ສຳລັບແມ່ຍິງໜຸ່ມເປັນເຈົ້າຂອງໜ່ວຍການຮ່ວມມື, ສະຫະກອນພວກຂ້າພະເຈົ້າໄດ້ຕີລາຄາວ່າ ນັ້ນແມ່ນບັນດາແບບຢ່າງ startup ທີ່ໄປຖືກທິດ. ພວກຂ້າພະເຈົ້າກໍ່ຈັດບັນດາຊຸດຝຶກອົບຮົມ, ບຳລຸງຄວາມຮູ້, ປຸກລຸກຈິດໃຈເປັນເຈົ້າ, ຄວາມຮູ້ໃນການດຳເນີນທຸລະກິດ, ທັກສະຄຸ້ມຄອງຮູບແບບຂອງຕົນ ໃຫ້ແກ່ແມ່ຍິງ, ເຮັດແນວໃດໃຫ້ສຳຜັດກັບຕະຫຼາດ, ຜະລິດອອກຜະລິດຕະພັນທີ່ດີ, ຕອບສະໜອງມາດຕະຖານດ້ານຄຸນນະພາບ, ເຄື່ອງໝາຍການຄ້າ ແລະ ຄວາມຕ້ອງການຂອງຜູ້ບໍລິໂພກ”.

        ຈິດໃຈ startup ຂອງແມ່ຍິງເຂດພູສູງແຂວງ ບັກກ້ານ ບໍ່ພຽງແຕ່ຢຸດຢູ່ເລື່ອງພັດທະນາເສດຖະກິດເທົ່ານັ້ນ, ຫາກຍັງແຜ່ກະຈາຍແຮງບັນດານໃຈໃຫ້ແກ່ແມ່ຍິງຫຼາຍຄົນ. ຜົນສຳເລັດຂອງບັນດາເອື້ອຍນ້ອງໄດ້ເປັນການຢັ້ງຢືນທີ່ຕັ້ງຂອງແມ່ຍິງໃນສັງຄົມ.