(vovworld) - ໂດຍໄດ້ຮັບຖືວ່າແມ່ນແຂວງທີ່ຍັງປະສົບກັບຄວາມຫຍຸ້ງຍາກກໍ່ຕາມ, ແຕ່ໃນຫຼາຍປີຜ່ານມາ, ຍ້ອນມີຄວາມເອົາໃຈໃສ່ລົງທຶນພັດທະນາລະບົບຄົມມະນາຄົມຊົນນະບົດ, ເສດຖະກິດສັງຄົມຂອງແຂວງ ຊອກຈັງ ກໍ່ຄ່ອຍໆພັດທະນາຢ່າງຕັ້ງໜ້າ, ການຜະລິດນັບມື້ນັບກ້າວໜ້າ, ຊີວິດທາງດ້ານວັດຖຸ ແລະ ຈິດໃຈຂອງປະຊາຊົນເຂດຊົນນະບົດ, ເຂດຫ່າງໄກສອກຫຼີກສ່ວນຫຼາຍໄດ້ຮັບການຍົກຂຶ້ນຢ່າງເຫັນໄດ້ຊັດ.
ທາງຄົມມະນາຄົມໃນເຂດທົ່ງນາຢູ່ຊອກຈັງ
(ພາບອິນເຕີແນດ)
ໄປ ຊອກຈັງ ໃນຊຸມມື້ນີ້, ທ່ານຈະເຫັນທາງຄົມມະນາຄົມໃນທ້ອງຖີ່ນໄດ້ຮັບການເປີດກວ້າງ, ສະຫຼັບກັນສ້າງເປັນຕາໜ່າງຄົມມະນາຄົມໄປຍັງແຕ່ລະບ້ານ, ແຕ່ລະເຂດຊຸມຊົນ. ບັນດາທາງດິນເປັນຕົມໃນເມື່ອກ່ອນ ປະຈຸບັນໄດ້ຮັບການປ່ຽນແທນດ້ວຍທາງເບຕົງທີ່ຮາບພຽງ, ສ້າງເງື່ອນໄຂໃຫ້ລົດໂອໂຕ, ບັນດາພາຫະນະສາທາລະນະ, ການບໍລິການໄປຍັງໃຈກາງຕາແສງ ຫຼືໃຫ້ລົດຈັກໄປຍັງແຕ່ລະໝູ່ບ້ານຢ່າງສະດວກສະບາຍ. ສິ່ງດັ່ງກ່າວໄດ້ສ້າງເປັນພະລັງຊີວິດໃໝ່ໃຫ້ເຂດບ້ານນາ, ເຂດຫ່າງໄກສອກຫຼີກທີ່ປະສົບກັບຄວາມຫຍຸ້ງຍາກເປັນພິເສດ. ທ່ານ ດ່າວເດີ ຢູ່ຕາແສງ ລອງຟູ໋, ເມືອງ ລອງຟູ໋, ແບ່ງປັນວ່າ:
“ເມື່ອທຽບໃສ່ຊຸມປີກ່ອນນີ້, ເສດຖະກິດຂອງແຕ່ລະຄອບຄົວໃນຕາແສງ ລອງຟູ໋ ໄດ້ຮັບການພັດທະນາ ຍ້ອນມີລະບົບທາງຄົມມະນາຄົມຊົນນະບົດ. ກ່ຽວກັບການລ້ຽງສັດ, ການປູກຝັງກໍ່ພັດທະນາເຊັ່ນດຽວກັນ, ຍ້ອນການພົວພັນຂ້າຂາຍມີຄວາມສະດວກສະບາຍກວ່າ“.
ທາງຄົມມະນາຄົມລະຫວ່າງໝູ່ບ້ານຢູ່ຊອກຈັງ
(ພາບອິນເຕີແນດ)
ໂດຍກຳນົດວ່າວຽກງານພັດທະນາໂຄງລ່າງແມ່ນໜຶ່ງໃນບັນດາຄາດໝາຍສຳຄັນແຖວໜ້າໃນວິວັດແຫ່ງການພັດທະນາເສດຖະກິດສັງຄົມ, ແຂວງຊອກຈັງ ໄດ້ລົງທຶນ, ຂຸດຄົ້ນທາງສຳຄັນຫຼາຍສາຍເຊັ່ນທາງຫຼວງ 60, ທາງຫຼວງ ນາມຊົງເຫົ້າ (ທິດໃຕ້ແມ່ນຳ້ເຫົ້າ), ທາງຫຼວງກວານໂລ້ຟຸ້ງຮຽບ, ຕະຫຼອດຮອດທາງແຂວງ, ທາງເມືອງ, ຕາແສງ… ບັນດາເສັ້ນທາງເຫຼົ່ານັ້ນໄປຜ່ານທ້ອງຖີ່ນເກືອບທັງໝົດໃນແຂວງ, ສ້າງເປັນລະບົບພື້ນຖານໂຄງລ່າງຄົມມະນາຄົມຕິດຕໍ່ກັນ. ນີ້ແມ່ນໄມ້ງັດໃຫ້ແກ່ການພັດທະນາເສດຖະກິດ - ສັງຄົມຂອງແຂວງ, ຮັບໃຊ້ວຽກງານຜະລິດ, ຂົນສົ່ງຢ່າງມີປະສິດທິຜົນ, ຍົກສູງມູນຄ່າ, ຄຸນນະພາບສິນຄ້າ, ຜະລິດຕະພັນ, ການຄົມມະນາຄົມ ກໍ່ຄືຊີວິດທາງດ້ານວັດຖຸ ແລະ ຈິດໃຈຂອງປະຊາຊົນໃນເຂດຊົນນະບົດ ຊອກຈັງ ຂຶ້ນຕື່ມ.
ໄລ່ສະເພາະໃນໄລຍະ 5 ປີ (2010-2015), ແຂວງ ຊອກຈັງ ໄດ້ລົງທຶນກໍ່ສ້າງທາງຄົມມະນາຄົມໃໝ່ເກືອບ 1.000 ກມ. ໃນນັ້ນທາງຄົມມະນາຄົມໃນເຂດຊົນນະບົດກວມກວ່າ 85% ຂອງບັນດາຕາແສງເກືອບທັງໝົດໃນແຂວງ, ດ້ວຍລວງຍາວເກືອບ 830 ກມ. ທ່ານ ເລືອງມິງກວຽດ, ປະທານຄະນະກຳມະການປະຊາຊົນເມືອງ ມິ້ຊວຽນ, ໃຫ້ຂໍ້ສັງເກດວ່າ:
“ຂ້າພະເຈົ້າຖືວ່າທາງແຂວງ 940 ສຳລັບແຂວງ ຊອກຈັງ ແມ່ນກິດຈະກຳສຳຄັນພິເສດ ລວງຍາວທັງໝົດຂອງເສັ້ນທາງນີ້ແມ່ນເກືອບ 50 ກມ, ແລະ ໄປຜ່ານ 4 ເມືອງ, ໃນນັ້ນຕອນຜ່ານເມືອງ ມິ້ຊວຽນ ຍາວເກືອບ 20 ກມ ເສັ້ນທາງນີ້ກໍ່ເຊື່ອມຕໍ່ກັບທາງຫຼວງ 3 ສາຍເຊັ່ນ: ທາງຫຼວງກວານໂລ້ຟຸ້ງຮຽບ, ທາງຫຼວງ 1 A, ແລະ ທາງຫຼວງນາມຊົງເຫົ້າ, ອັນໄດ້ຊ່ວຍສ້າງໂສມໜ້າໃໝ່ໃຫ້ເຂດຊົນນະບົດ ມິ້ຊວຽນ, ແກ້ໄຂການຂົນສົ່ງສິນຄ້າໃຫ້ປະຊາຊົນ. ການຜະລິດ, ດຳເນີນທຸລະກິດ, ລ້ຽງປູກສິນໃນນຳ້ ຂອງປະຊາຊົນກໍ່ສະດວກສະບາຍກວ່າ.“
ທາງຄົມມະນາຄົມໄປຍັງເຂດໃຈກາງແຂວງຊອກຈັງ
(ພາບອິນເຕີແນດ)
ໃນ 5 ປີຜ່ານມາ, ທ້ອງຖີ່ນໄດ້ລົງທຶນ 1.000 ຕື້ກວ່າດົ່ງເຂົ້າລະບົບທາງຄົມມະນາຄົມຊົນນະບົດ. ບັນດາຕາແສງມີທາງລົດໂອໂຕໄປຍັງໃຈກາງແຂວງກໍ່ບັນລຸເກືອບ 94%,
ໃນຕໍ່ໜ້າ, ຊອກຈັງ ສູ້ຊົນກໍ່ສ້າງລະບົບທາງຄົມມະນາຄົມຊົນນະບົດໃນທົ່ວແຂວງ. ທາງແຂວງກໍ່ຄາດຄະເນວ່ານັບແຕ່ນີ້ເຖິງປີ 2020, ຈະຜັນຂະຫຍາຍການລົງທຶນໃຫ້ 779 ກິດຈະກຳຄົມມະນາຄົມໃນທົ່ວແຂວງ, ດ້ວຍມູນຄ່າທັງໝົດແມ່ນກວ່າ 1.000 ຕື້ດົ່ງ. ທ່ານເຈິ່ນແອງຫວຽດ, ຜູ້ອຳນວຍການພະແນກຄົມມະນາຄົມຂົນສົ່ງແຂວງ ຊອກຈັງ, ໃຫ້ຮູ້ວ່າ:
“ດ້ວຍຄວາມຕັດສິນໃຈກໍ່ສ້າງທາງຄົມມະນາຄົມໃຫ້ສຳເລັດກ່ອນ ເພື່ອສ້າງພື້ນຖານໃຫ້ແກ່ການພັດທະນາບັນດາຂະແໜງເສດຖະກິດອື່ນໆ. ໃນແຜນການຕໍ່ໜ້າຂອງແຂວງແມ່ນຕ້ອງປັບປຸງ, ຍົກລະດັບລະບົບທາງຄົມມະນາຄົມໃນແຂວງ. ພິເສດແມ່ນພັດທະນາທາງຄົມມະນາຄົມຊົນນະບົດຢ່າງຮອບດ້ານກວ່າ, ຮັບປະກັນມາດຕະຖານທາງຄົມມະນາຄົມຕາມຄາດໝາຍທີ່ກະຊວງຄົມມະນາຄົມຂົນສົ່ງໄດ້ປະກາດໃຊ້. ສຳລັບເລື່ອງນີ້, ພວກຂ້າພະເຈົ້າຈະພະຍາຍາມພ້ອມກັບທ້ອງຖີ່ນຕ່າງໆເຮັດແນວໃດໃຫ້ພັດທະນາກວ່າອີກ, ພວກຂ້າພະເຈົ້າຈະຂົນຂວາຍ ກໍ່ຄືຍາດແຍ່ງທຸກແຫຼ່ງທຶນເພື່ອລົງທຶນ, ເປີດກວ້າງຕາໜ່າງຄົມມະນາຄົມ, ຍົກສູງການຄຸ້ມຄອງ, ຂຸດຄົ້ນຢ່າງມີປະສິດທິຜົນ“
ລະບົບໂຄງລ່າງຄົມມະນາຄົມສຳເລັດບໍລິບູນ ແມ່ນມີບົດບາດສຳຄັນທີ່ສຸດໃນການພັດທະນາເສດຖະກິດຂອງແຂວງ ຊອກຈັງ. ຈາກນັ້ນໂສມໜ້າຊົນນະບົດກໍ່ຈະເລີນເຕີບໂຕຢ່າງຈະແຈ່ງ, ພ້ອມກັບລະບົບເສັ້ນທາງຄົມມະນາຄົມລະຫວ່າງແຂວງ, ເມືອງ, ຕາແສງ, ຊີວິດການເປັນຢູ່ຂອງປະຊາຊົນກໍ່ມີປ່ຽນແປງເທື່ອລະກ້າວ