(vovworld)- ຕາແສງວິ້ງແທກ, ເມືອງວິ້ງລິງ, ແຂວງກວາງຈີ້ ແມ່ນໜຶ່ງໃນ 3 ຕາແສງຂອງຫວຽດນາມ ທີ່ໄດ້ຮັບການອຸປະກະລະຈາກທ່ານປະທານປະເທດ ເຈືອງເຕີ໋ນຊາງ ເພື່ອປະຕິບັດໂຄງການກໍ່ສ້າງຊົນນະບົດໃໝ່. ນີ້ທັງແມ່ນຄວາມເປັນກຽດ ທັງແມ່ນກຳລັງໜູນເພື່ອຊ່ວຍອຳນາດການປົກຄອງ ແລະ ປະຊາຊົນຕາແສງວີ້ງແທກ ບັນລຸຄາດໝາຍກໍ່ສ້າງຊົນນະບົດໃໝ່ໂດຍໄວ.
ທາງຄົມມະນາຄົມໃນເມືອງວິ້ງລິງ ໄດ້ຮັບການກໍ່ສ້າງດ້ວຍເບຕົງ
(ພາບອິນເຕີແນດ)
ວີ້ງແທກ ມີເກືອບ 1.100 ຄອບຄົວ, ດ້ວຍພົນລະເມືອງກວ່າ 3.600 ຄົນ ແລະ ແບ່ງອອກເປັນ 10 ບ້ານ. ນີ້ແມ່ນເຂດດິນແດງ bazan ທີ່ອຸດົມສົມບຸນ, ມີຄວາມສະດວກທີ່ສຸດໃຫ້ແກ່ການພັດທະນາກະສີກຳ.
ວີ້ງແທກ ຕິດພັນກັບອຸໂມງວິ້ງໂມກ, ເຊິ່ງແມ່ນກິດຈະກຳທີ່ມີຊື່ສຽງໂດນທະຫານ ແລະ ປະຊາຊົນວີ້ງລິງ ກໍ່ສ້າງເມື່ອປີ 1965. ໃນເວລານັ້ນ, ວິ້ງລີງ ຖືກກອງທັບອາກາດ ແລະ ກອງປືນໃຫຍ່ອາເມລິກາ ທຳລາຍຢ່າງຕໍ່ເນື່ອງ, ເຮັດໃຫ້ວິ້ງໂມກ ແລະ ບ້ານອື່ນໆເກືອບທັງໝົດຢູ່ວິ້ງລີງ ຖືກທຳລາຍກ້ຽງ. ປະຈຸບັນ, ເມື່ອມາຢາມວິ້ງແທກ ກໍ່ເຫັນວ່າ ບັນດາເສັ້ນທາງລະຫວ່າງບ້ານ, ຕາແສງລ້ວນແຕ່ໄດ້ຮັບການກໍ່ສ້າງດ້ວຍເບຕົງ ແລະ ຊີມັງຢ່າງຮາບພຽງ, ຍາມຄຳ່ຄືນມີໄຟເຍືອງທາງບໍ່ຕ່າງຫຍັງໃນເຂດຕົວເມືອງ. ທ່ານ ຫງວຽນວຽດຊິງ, ປະທານຄະນະກຳມະການປະຊາຊົນຕາແສງວິ້ງແທກ ໃຫ້ຮູ້ວ່າ. ຜົນສຳເລັດກວ່າໝູ່ຂອງໂຄງການກໍ່ສ້າງຊົນນະບົດໃໝ່ຢູ່ທ້ອງຖີ່ນແມ່ນເລີ່ມມາຈາກບັນດາເສັ້ນທາງ. ຫວນຄືນໄລຍະເລີ່ມລົງມືກໍ່ສ້າງທາງເບຕົງ, ປະຊາຊົນຕາແສງມີຄວາມເບີກບານມ່ວນຊື່ນຄືໄຂງານບູນ, ທັງສອງພາກທາງເຕັມໄປດ້ວຍປ້າຍຄຳຂວັນ. ປະຊາຊົນທຸກຄົນໃນຕາແສງ, ນັບແຕ່ຜູ້ເຖົ້າແກ່ສາລາ, ແມ່ຍິງ, ຊາວໜຸ່ມ ຕະຫຼອດຮອດພວກນ້ອງນັກຮຽນ ລ້ວນແຕ່ຮ່ວມແຮງຮ່ວມໃຈຂູດດິນ, ເຮັດອະນາໄມ ທຳຄວາມສະອາດເສັ້ນທາງ. ທ່ານ ຫງວຽນວຽດຊິງ, ຖືວ່າໂຄງການກໍ່ສ້າງຊົນນະບົດໃໝ່ ໄດ້ເຮັດໃຫ້ບັນຍາກາດອອກແຮງງານລວມໝູ່ມີຄວາມຟົດຟື້ນຄືດັ່ງໃນຊຸມປີຕົ້ນ, ພາຍຫຼັງພາກໃຕ້ໄດ້ຮັບການປົດປ່ອຍ, ໂຮມປະເທດຊາດເປັນເອກະພາບ.
“ໄດ້ຮັບການອຸປະກະລະຈາກທ່ານປະທານປະເທດ ເຈືອງເຕິ້ຊາງ ໃນການກໍ່ສ້າງຊົນນະບົດໃໝ່ ແມ່ນເງື່ອນໄຂເພື່ອໃຫ້ຕາແສງສູ້ຊົນກໍ່ສ້າງຊົນນະບົດໃໝ່ໃຫ້ສຳເລັດກ່ອນແຜນການທີ່ໄດ້ວາງອອກ. ປະຊາຊົນຕາແສງກໍ່ພາກພູມໃຈທີ່ສຸດ“
ດ້ວຍບົດບາດແມ່ນຜູ້ອຸປະກະລະ, ທ່ານປະທານປະເທດ ເຈືອງເຕິ໋ນຊາງ ໄດ້ຮຽກຮ້ອງໃຫ້ສ່ວນບຸກຄົນ, ວິສາຫະກິດ, ນັກວິທະຍາສາດບໍລິຈາກເງິນ, ຍົກອອກມາດຕະການ ເພື່ອໃຫ້ວິ້ງແທກ ປະຕິບັດໂຄງການກໍ່ສ້າງຊົນນະບົດໃໝ່ສຳເລັດຄາດໝາຍຕາມແຜນການທີ່ໄດ້ວາງອອກ. ພາຍຫຼັງ 2 ປີແຫ່ງການຜັນຂະຫຍາຍ, ທາງຕາແສງໄດ້ຮັບການຊ່ວຍເຫຼືອຈາກຫຼາຍອົງການ ແລະ ຫົວໜ່ວຍຕ່າງໆຄື: ບໍລິສັດຫຸ້ນສ່ວນຊີມັງທັງລອງຊ່ວຍເຫຼືອຊີມັງ 1000 ໂຕນ, ຄະນະກຳມະການປະຊາຊົນເມືອງວິ້ງລີງ ຊ່ວຍເຫຼືອຫີນ 3000 ແມັດກ້ອນເພື່ອໃຫ້ທ້ອງຖີ່ນກໍ່ສ້າງທາງເບຕົງ, ບໍລິສັດຫຸ້ນສ່ວນຫຼັກຊັບໄຊງ່ອນ ຊ່ວຍເຫຼືອງົວ 100 ໂຕ ໃຫ້ບັນດາຄອບຄົວທີ່ທຸກຍາກ ເພື່ອຊ່ວຍເຂົາເຈົ້າຫຼຸດພົ້ນອອກຈາກຄວາມທຸກຍາກ... ສ່ວນພໍ່ແມ່ປະຊາຊົນກໍ່ສະຫງວນທີ່ດິນເກືອບ 50.000 ຕາລາງແມັດ ແລະ ແຮງງານນັບພັນວັນ... ທ່ານ ເຈິ່ນວັນແທ່ກ, ຜູ້ທີ່ໄດ້ປະກອບທີ່ດິນ 100 ຕາລາງແມັດເພື່ອກໍ່ສ້າງທາງ, ແບ່ງປັນວ່າ:
“ປະຊາຊົນຕ່າງກໍ່ດີໃຈເມື່ອຜັນຂະຫຍາຍໂຄງການກໍ່ສ້າງຊົນນະບົດໃໝ່, ພິເສດແມ່ນກໍ່ສ້າງທາງເບຕົງ ເພາະວ່າໃນຍາມຝົນຕົກ, ທາງເຄີຍເປັນຂີ້ຕົມ, ການໄປມາຂອງປະຊາຊົນປະສົບກັບຄວາມຫຍຸ້ງຍາກຫຼາຍ. ສະເພາະຄອບຄົວຂ້າພະເຈົ້າໄດ້ປະກອບທີ່ດິນກວ່າ 25 ແມັດຍາວເພື່ອກໍ່ສ້າງທາງ“
ປະຈຸບັນ, ວິ້ງແທກ ກາຍເປັນໜຶ່ງໃນບັນດາທ້ອງຖີ່ນນຳໜ້າແຂວງກວາງຈີ້ ໃນການກໍ່ສ້າງຊົນນະບົດໃໝ່, ເມື່ອບັນລຸໄດ້ 14/19 ມາດຖານ. ປີ 2013, ທາງຕາແສງສູ້ຊົນຈະບັນລຸຕື່ມອີກ 2 ມາດຖານ.
ຫວນຄືນໄລຍະກ່ອນນີ້, ເມື່ອໄປຢ້ຽມຢາມ ແລະ ເຮັດວຽກຢູ່ຕາແສງ ວິ້ງແທກ, ທ່ານນາງຮອງປະທານປະເທດ ຫງວຽນທິຢວານ ຖືວ່າ, ວິ້ແທກ ແມ່ນທ້ອງຖີ່ນຍັງປະສົບກັບຄວາມທຸກຍາກ, ແຕ່ພັດມີມູນເຊື້ອປະຕິວັດ. ທ່ານນາງຮອງປະທານປະເທດ ໄດ້ແນະນຳໃຫ້ຄະນະພັກ, ອຳນາດການປົກຄອງ ແລະ ປະຊາຊົນສືບຕໍ່ເສີມຂະຫຍາຍມູນເຊື້ອປະຕິວັດ, ປະກອບກຳລັງເຫື່ອແຮງ ເພື່ອໃຫ້ໂຄງການປະສົບຜົນສຳເລັດຄືດັ່ງຄວາມປາຖະໜາຂອງປະຊາຊົນ.
“ຄະບວນການກໍ່ສ້າງຊົນນະບົດໃໝ່ຂອງພວກເຮົາ, ເຖິງວ່າຍັງປະສົບກັບຄວາມຫຍຸ້ງຍາກ ແຕ່ພັດບັນລຸໄດ້ 14/19 ມາດຖານ, ເຊິ່ງບໍ່ແມ່ນວ່າຢູ່ບ່ອນໃດກໍ່ສາມາດເຮັດໄດ້. ການປະກອບສ່ວນຂອງປະຊາຊົນໃນການກໍ່ສ້າງຊົນນະບົດໃໝ່ສະແດງໃຫ້ເຫັນຄວາມຮັບຜິດຊອບຂອງພວກເຮົາທີ່ມີຕໍ່ບ້ານຕາແສງ. ໄລຍະຈະມາເຖິງ. ຂ້າພະເຈົ້າຫວັງວ່າອົງຄະນະພັກ, ພະນັກງານອຳນາດການປົກຄອງຈະມີຄວາມເອົາໃຈໃສ່ກວ່າອີກເຖິງບັ້ນຂົນຂວາຍທົ່ວປະເທດຮ່ວມແຮງຮ່ວມໃຈກໍ່ສ້າງຊົນນະບົດໃໝ່“.
ວິ້ງແທກ ມີຊື່ສຽງດ້ວຍອຸໂມງ ວິ້ງໂມກ, ເຊິ່ງແມ່ນປູຊະນີຍະສະຖານປະຫວັດສາດລະດັບຊາດ, ແມ່ນສັນຍາລັກແຫ່ງຄວາມມຸ້ງຫວັງສັນຕິພາບ, ທັງແມ່ນສະຖານທີ່ຢ້ຽມຢາມທີ່ດຶງດູດນັກທ່ອງທ່ຽວມາຢາມເປັນຈຳນວນຫຼວງຫຼາຍ. ໃນອະນາຄົດໃກ້ໆນີ້, ວິ້ງແທກ ຈະກາຍເປັນຮູບແບບຕົວຢ່າງ ເພື່ອໃຫ້ທ້ອງຖີ່ນອື່ນໆຮຳ່ຮຽນເອົາບົດຮຽນກ່ຽວກັບການກໍ່ສ້າງຊົນນະບົດໃໝ່.