(vovworld) - ເຮືອນໃໝ່ໃຫຍ່ໂຕໂອໂຖງຫຼາຍຫຼັງ, ທາງເບຕົງທີ່ກວ້າງຂວາງ, ຄອງເໝືອງໄດ້ຮັບການກໍ່ສ້າງດ້ວຍເບຕົງ, ໝາກທັນ, ໝາກອະງຸ່ນເຕັມສວນ… ນັ້ນແມ່ນຮູບພາບຢູ່ບັນດາຕາແສງໃນເຂດຊົນເຜົ່າຈຳ, ແຂວງນິງຖ້ວນໃນປະຈຸບັນ ພາຍຫຼັງສອງກວ່າປີແຫ່ງການປະຕິບັດໂຄງການກໍ່ສ້າງຊົນນະບົດໃໝ່. ໃນລາຍການຊົນນະບົດໃໝ່ຫວຽດນາມ ມື້ນີ້, ນັກຂ່າວວິທະຍຸກະຈາຍສຽງຫວຽດນາມ ມີບົດຂຽນ “ຊາວເຜົ່າຈຳຢູ່ນິງຖ້ວນ ຮ່ວມແຮງຮ່ວມໃຈກໍ່ສ້າງຊົນນະບົດໃໝ່”. ເຊີນທ່ານຮັບຟັງ.
(ພາບ ອິນເຕີແນດ)
ໃນຊຸມມື້ນີ້, ຢູ່ລຽບຕາມເສັ້ນທາງຈາກເທດສະບານເຟືອກເຢີນ ໄປຍັງຕາແສງພູດອຍເຟືອກທ໋າຍ, ເມືອງນິງເຟືອກ ຫຼື ຈາກຕາແສງເຍິນເຊີນ, ເມືອງນິງເຊີນໄປຍັງຕາແສງຊວນຫາຍ, ເມືອງນິງຫາຍ, ແຂວງນິງຖ້ວນ, ຢູ່ບ່ອນໃດກໍ່ພົບເຫັນຊາວຊົນເຜົ່າຈຳພວມຕັ້ງໜ້າກໍ່ສ້າງທາງຄົມມະນາຄົມໃນເຂດຊົນນະບົດ. ພ້ອມກັບລະບົບທາງຄົມມະນາຄົມໃນເຂດຊົນນະບົດແລ້ວ, ເນື້ອທີ່ດິນໄຮ່ນັບພັນເຮັກຕາທີປະເປັນເຮື້ອໃນເມື່ອກ່ອນ, ປະຈຸບັນໄດ້ກາຍເປັນສວນໝາກກ້ວຍ, ໝາກທັນທີ່ຂຽວອຸ່ມທູ່ມ. ມາຢາມບ້ານຈຳເຟືອກເຍິນ, ຕາແສງຊວນຫາຍ, ຈາກທາງໄກໄດ້ຍິນສຽງລົດດຸດ, ສຽງພໍ່ແມ່ປະຊາຊົນພວມເຮັດທາງຊຸກຍູ້ກັນເຮັດວຽກຢ່າງວ່ອງໄວເພື່ອໃຫ້ທາງເບຕົງຕອນເຊື່ອມຕໍ່ກັບທາງຫຼວງ 1A ສຳເລັດເພື່ອນຳເຂົ້າໃຊ້ການ. ໃນເມື່ອກ່ອນ. ເສັ້ນທາງເຂົ້າບ້ານບໍພຽງ, ຮອດລະດູຝົນທາງເຄີຍເປັນບວກ, ເປັນຕົມ ເຮັດໃຫ້ການໄປມາຫຍຸ້ງຍາກຫຼາຍ, ແຕ່ຮອດຕົ້ນປີ 2011, ດ້ວຍແຫຼ່ງທຶນກວ່າ 600 ລ້ານດົ່ງ ໂດຍລັດລົງທຶນ ແລະ ປະຊາຊົນປະກອບນັ້ນ, ເສັ້ນທາງເບຕົງໃນບ້ານຍາວ 400 ກວ່າແມັດ ໄດ້ຮັບການກໍ່ສ້າງ, ຊ່ວຍໃຫ້ພໍ່ແມ່ປະຊາຊົນໄປມາ, ຂົນສົ່ງສິນຄ້າຢ່າງສະດວກສະບາຍ. ທ່ານ ດ້າວຫຽວ, ຊາວບ້ານຈຳເຟືອກເຍິນ, ໄດ້ເວົ້າດ້ວຍຄວາມພາກພູມໃຈວ່າ:
“ກ່ອນນີ້, ຮອດລະດູຝົນ, ເສັ້ນທາງເຄີຍເປັນບວກ, ເປັນຕົມໄປມາບໍ່ໄດ້, ແຕ່ດ້ວຍການຮ່ວມແຮງຮ່ວມໃຈຂອງປະຊາຊົນ. ມາຮອດປະຈຸບັນ, ໄດ້ມີເສັ້ນທາງໃໝ່ແລ້ວ, ການໄປມາກໍ່ສະດວກສະບາຍກວ່າ. ພວກຂ້າພະເຈົ້າດີໃຈຫຼາຍ ເພາະວ່າ ເຮັດທາງເພື່ອຮັບໃຊ້ໃຫ້ການໄປມາຂອງພວກຂ້າພະເຈົ້າ”
ຕາແສງເຟືອກທ໋າຍ, ເມືອງນິງເຟືອກ, ແມ່ນທ້ອງຖີ່ນທີ່ແຂວງຄັດເລືອກເພື່ອປະຕິບັດທົດລອງໂຄງການກໍ່ສ້າງຊົນນະບົດໃໝ່. ໄລຍະຜ່ານມາ, ອົງຄະນະພັກ ແລະ ອຳນາດການປົກຄອງຕາແສງເຟືອກທ໋າຍ ໄດ້ລະດົມທຸກແຫຼ່ງກຳລັງ, ພ້ອມທັງສົມທົບກັບບັນດາໂຄງການລົງທຶນໃນຕາແສງເພື່ອກໍ່ສ້າງຊົນນະບົດໃໝ່. ພາຍຫຼັງ 2 ກວ່າປີ ທີ່ຜັນຂະຫຍາຍການປະຕິບັດ, ທ້ອງຖີ່ນລະດົມເງິນໄດ້ກວ່າ 6 ຕຶ້ດົ່ງ ເພື່ອກໍ່ສ້າງບັນດາກິດຈະກຳຮັບໃຊ້ຊີວິດການເປັນຢູ່ຂອງປະຊາຊົນ, ໃນນັ້ນແຫຼ່ງທຶນປະກອບຂອງປະຊາຊົນແມ່ນກວ່າ 1,7 ຕຶ້ດົ່ງ. ທ່ານ ຫ໋ານເຕິນຢູຍ, ຮອງປະທານຄະນະກຳມະການປະຊາຊົນ ຕາແສງເຟືອກທ໋າຍ, ເມືອງນິງເຟືອກ, ແຂວງນິງຖ້ວນ, ໃຫ້ຮູ້ວ່າ:
“ເມື່ອພັກ ແລະ ລັດເອົາໃຈໃສ່ເລືອກຕາແສງເຟືອກທ໋າຍ ເປັນແຫ່ງປະຕິບັດທົດລອງໂຄງການກໍ່ສ້າງຊົນນະບົດໃໝ່ຂອງແຂວງ. ນັບແຕ່ປີ 2011 ມາຮອດປະຈຸບັນ, ພວກຂ້າພະເຈົ້າໄດ້ເສີມຂະຫຍາຍກຳລັງແຮງຂອງປະຊາຊົນ ແລະ ເຂົາເຈົ້າໄດ້ຕັ້ງໜ້າສະໜັບສະໜູນ, ປະກອບສ່ວນເຂົ້າໃນການກໍ່ສ້າງຊົນນະບົດໃໝ່”.
ເຖິງວ່າເສດຖະກິດຂອງຊາວກະສີກອນຫຼາຍຄອບຄົວຍັງປະສົບກັບຄວາມຫຍຸ້ງຍາກຢູ່, ແຕ່ເມື່ອລະດົມເຂົາເຈົ້າປະກອບສ່ວນກໍ່ສ້າງເສັ້ນທາງຊົນນະບົດຕາມໂຄງການກໍ່ສ້າງຊົນນະບົດໃໝ່, ປະຊາຊົນທຸກຄົນລ້ວນແຕ່ສະໜັບສະໜູນ. ມີຫຼາຍຄອບຄົວໄດ້ສະໜອງທີ່ດິນຂອງຕົນເພື່ອກໍ່ສ້າງກິດຈະກຳຕ່າງໆໃນໂຄງການກໍ່ສ້າງຊົນນະບົດໃໝ່. ຄອບຄົວທ່ານ ໂງວັນກວາງ ຢູ່ບ້ານທ໋າຍຮ່ວາ, ຕາແສງເຟືອກທ໋າຍ ໄດ້ສະຫງວນທີ່ດິນກວ່າ 900 ຕາລາງແມດ ເພື່ອກໍ່ສ້າງຄອງເໝືອງລະບາຍນ້ຳເຄັມ. ທ່ານ ໂງວັນກວາງ ແບ່ງປັນວ່າ:
“ສະຫງວນທີ່ດິນເພື່ອໃຫ້ເຂດນີ້ບໍ່ຖືກນ້ຳຖ້ວມອີກ. ປະຈຸບັນ, ລັດຊ່ວຍເຫຼືອປະຊາຊົນກໍ່ສ້າງຊົນນະບົດໃໝ່. ພວກຂ້າພະເຈົ້າດີໃຈຫຼາຍ, ເພາະວ່າມັນຈະສ້າງເງື່ອນໄຂສະດວກໃຫ້ທຸກຄົນໃນບ້ານ”.
ບໍ່ພຽງແຕ່ຮ່ວມແຮງຮ່ວມໃຈກໍ່ສ້າງທາງໃນເຂດຊົນນະບົດເທົ່ານັ້ນ, ພໍ່ແມ່ປະຊາຊົນໃນຕາແສງເຟືອກເຫົ້າ ຍັງຫັນປ່ຽນຜົນລະປູກ, ສັດລ້ຽງອີກດ້ວຍ, ອັນໄດ້ນຳມາເຊິ່ງປະສິດທິຜົນທາງດ້ານເສດຖະກິດສູງ, ຕົວຢ່າງຄື: ຮູບແບບລ້ຽງປາ, ປູກຜັກ, ປູກສາລີ, ໝາກທັນ ໄດ້ປະກອບສ່ວນເພີ່ມລາຍຮັບ, ປັບປຸງຊີວິດການເປັນຢູຂອງປະຊາຊົນ.
(ພາບ ອິນເຕີແນດ) ດ້ວຍຄວາມມານະພະຍາຍາມໃນການຊີ້ນຳນຳພາ, ມີໄຫວພິກໃນການບໍລິຫານ ແລະ ການຈັດຕັ້ງປະຕິບັດ, ມາຮອດປະຈຸບັນ, ນິງຖ້ວນມີ 1 ຕາແສງບັນລຸ 9 ມາດຖານ, 6 ຕາແສງບັນລຸ 8 ມາດຖານ, 4 ຕາແສງບັນລຸໄດ້ 5 ມາດຖານໃນການກໍ່ສ້າງຊົນນະບົດໃໝ່. ທ່ານ ເຈົາທັງລອງ, ຮອງຫົວໜ້າພະແນກກະສີກຳ ແລະ ພັດທະນາຊົນນະບົດແຂວງນິງຖ້ວນ, ໃຫ້ຮູ້ວ່າ:
“ໃນຕໍ່ໜ້າພວກຂ້າພະເຈົ້າຈະສືບຕໍ່ລະດົມກຳລັງແຮງໃນໝູ່ປະຊາຊົນເພື່ອເຂົ້າຮ່ວມການກໍ່ສ້າງຊົນນະບົດໃໝ່. ປະຊາຊົນແມ່ນເຈົ້າຂອງ, ລັດໜູນຊ່ວຍ ກຳນົດທິດ, ຂົນຂວາຍວິສາຫະກິດລົງທຶນເຂົ້າກະສີກຳ ແລະ ຊົນນະບົດ. ໂຄສະນາແຕ່ລະຫົວຂໍ້, ແຕ່ລະກິດຈະກຳ. ກ່ອນອື່ນໝົດ, ກິດຈະກຳໃດປະຊາຊົນສາມາດເຮັດໄດ້, ພວກຂ້າພະເຈົ້າຈະພະຍາຍາມຂົນຂວາຍ, ກຳນົດຢ່າງຈະແຈ້ງມາດຖານໃດໂດຍລັດໜູນຊ່ວຍຕາແສງເຮັດ, ມາດຖານໃດລັດໜູນຊ່ວຍ ແຕ່ປະຊາຊົນເຮັດ, ມາດຖານໃດໂດຍປະຊາຊົນເຮັດເອງ…”
ມາຢາມບັນດາຕາແສງຊົນເຜົ່າຈຳແຂວງນິງຖ້ວນ ໃນປະຈຸບັນ, ເຫັນວ່າໂສມໜ້າຊົນນະບົດໄດ້ມີການປ່ຽນແປງຫຼາຍຢ່າງ. ບັນດາຜົນງານທີ່ໜ້າຊື່ນຊົມໃນການກໍ່ສ້າງຊົນນະບົດໃໝ່ ສະແດງໃຫ້ເຫັນຄວາມເຫັນດີເຫັນພ້ອມສູງໃນໝູ່ປະຊາຊົນ, ອັນໄດ້ປະກອບສ່ວນສຳຄັນເຂົ້າໃນກິດຈະການພັດທະນາເສດຖະກິດສັງຄົມຂອງແຂວງ.