(vovworld) - ປະຈຸບັນ, ທ້ອງຖີ່ນຕ່າງໆພວມຕັ້ງໜ້າຜັນຂະຫຍາຍການຜະລິດກະສີກຳຕາມຮູບແບບ “ທົ່ງນາແບບຢ່າງຂະໜາດໃຫຍ່” ແລະ ຄວາມຈິງແລ້ວ, ຮູບແບບນີ້ພວມບັນລຸປະສິດທິຜົນຢ່າງເຫັນໄດ້ຊັດກ່ຽວກັບ ສະມັດຕະພາບ, ຄຸນນະພາບ ແລະ ການຈຳໜ່າຍຜະລິດຕະພັນ. ສິ່ງສຳຄັນທີ່ສຸດເຊິ່ງຮູບແບບນີ້ໄດ້ນຳມາໃຫ້ນັ້ນແມ່ນ, ຮັບປະກັນຜົນປະໂຫຍດຂອງຊາວກະສິກອນ ແລະ ວິສາຫະກິດ. ນີ້ຖືກຖືວ່າແມ່ນທິດທາງໃໝ່ໃນການຜະລິດກະສີກຳ ກໍ່ຄືໃນຂະບວນການກໍ່ສ້າງຊົນນະບົດໃໝ່ປະຈຸບັນນີ້.
ພາບປະກອບ
ໃນໄລຍະຜ່ານມາ, ຜ່ານການປະຕິບັດຮູບແບບທົ່ງນາແບບຢ່າງຂະໜາດໃຫຍ່ຢູ່ເຂດທົ່ງພຽງ ແມ່ນ້ຳຂອງໄດ້ເຫັນວ່າ, ນີ້ແມ່ນທິດທາງທີ່ຖືກຕ້ອງ ແລະ ໃນເບື້ອງຕົ້ນໄດ້ສ້າງໃຫ້ມີບັນດາຮູບແບບຄົບຊຸດ, ນັບແຕ່ການຜະລິດຕະຫຼອດຮອດການເກັບຊື້ ຫຼື ຮ່ວມສຳພັນກັບຫຼາຍຫົວໜ່ວຍ, ຈັດຕັ້ງການຜະລິດ ແລະ ຈຳໜ່າຍຢ່າງມີປະສິດທິຜົນ ແລະ ໝັ້ນຄົງ. ນີ້ແມ່ນທິດຜະລິດທີ່ຕັ້ງໜ້າ, ຊ່ວຍໃຫ້ຊາວກະສີກອນໝູນໃຊ້ບັນດາມາດຕະການດ້ານເຕັກນິກເປັນຢ່າງ ດີ ແລະ ຄົບຊຸດ, ປະກອບສ່ວນຍົກສູງລະດັບການປູກຝັງຂອງຊາວກະສີກອນ, ສ້າງໃຫ້ມີຖັນແຖວຊາວກະສີກອນທີ່ກ້າວໜ້າເທື່ອລະກ້າວ, ຜະລິດເຂົ້າໄດ້ຮັບຜົນດີ, ຮັບປະກັນສິ່ງແວດລ້ອມ ແລະ ສ້າງລາຍຮັບສູງກວ່າ. ວິສາຫະກິດເຂົ້າຮ່ວມຮູບແບບນີ້ ຈະມີເງື່ອນໄຂຮ່ວມສຳພັນກັບການຜະລິດ ແລະ ຈຳໜ່າຍຜະລິດຕະພັນ. ນີ້ກໍ່ແມ່ນກາລະໂອກາດເປີດກວ້າງການລົງທຶນປະກອບເຄື່ອງຈັກ. ຫັນການຜະລິດເຂົ້າຕາມທິດທັນສະໄໝ ແລະ ໝັ້ນຄົງ, ປະກອບສ່ວນປະຕິບັດການສ້າງໂຄງປະກອບຂະແໜງປູກຝັງຄືນໃໝ່, ຍົກສູງມູນຄ່າເພີ່ມເຂົ້າສານຂຶ້ນ. ຢູ່ບັນດາແຂວງທາງພາກເໜືອ, ຮູບແບບທົ່ງນາແບບຢ່າງຂະໜາດໃຫຍ່ໄດ້ຮັບການຜັນຂະຫຍາຍຢູ່ແຂວງ ແທງຮ໋ວາ, ນາມດິ້ງ, ທ້າຍບິ່ງ, ຮ່າໂນ້ຍ. ທ່ານ ຟ້າມດົ່ງກວາງ (Pham Dong Quang), ຮອງຫົວໜ້າກົມປູກຝັງ, ກະຊວງກະສີກຳ ແລະ ພັດທະນາຊົນນະບົດຫວຽດນາມ, ໃຫ້ຮູ້ວ່າ:
“ບັນດາແຂວງນາມດຶ້ງ, ທ້າຍບິ່ງ, ຫາຍເຢືອງ, ບັກຢາງ… ໄດ້ມີນະໂຍບາຍໜູນຊ່ວຍຊາວກະສີກອນ ແລະ ວິສາຫະກິດ, ສ້າງເງື່ອນໄຂພ້ອມກັນທຳການຜະລິດ, ຈຳໜ່າຍຕາມ ຮູບແບບທົ່ງນາແບບຢ່າງຂະໜາດໃຫຍ່. ເລື່ອງຜັນຂະຫຍາຍການຜະລິດຕາມຮູບແບບທົ່ງນາແບບຢ່າງຂະໜາດໃຫຍ່ພວມ ໄດ້ຮັບການສະໜັບສະໜູນ ແລະ ຄວາມເຫັນດີເປັນເອກະພາບສູງຈາກບັນດາທ້ອງຖີ່ນທາງພາກເໜືອ”
ພາບປະກອບ
ຊາວກະສີກອນຢູ່ບັນດາເຂດທາງພາກກາງ ແລະ ທາງທິດໃຕ້ຂອງພາກກາງ ມີຄວາມເຊື້ອໝັ້ນ ແລະ ໝູນໃຊ້ຮູບແບບທົ່ງນາແບບຢ່າງຂະໜາດໃຫຍ່ເຂົ້າໃນການຜະລິດ. ທ່ານ ວັນບ໋າຢູ (Van Ba Du), ສະມາຊິກສະຫະກອນກະສີກຳຕາແສງ ຮ່ວາຍມີ້ (Hoai My), ເມືອງ ຮ່ວາຍເຍີນ, ແຂວງ ບິ່ງດິ້ງ, ໃຫ້ຮູ້ວ່າ: ຮູບແບບນີ້ໄດ້ຮັບການໜູນຊ່ວຍຈາກອຳນາດການປົກຄອງທ້ອງຖີ່ນ ແລະ ບັນລຸໄດ້ສະມັດຕະພາບສູງ, ຄ່າໃຊ້ຈ່າຍໃນການຜະລິດຫຼຸດລົງ, ທ່ານ ວັນບ໋າຢູ, ໃຫ້ຮູ້ວ່າ:
“ປະຕິບັດຮູບແບບທົ່ງນາແບບຢ່າງຂະໜາດໃຫຍ່ ໄດ້ຊ່ວຍໃຫ້ຊາວກະສີກອນຈັດຕັ້ງການຜະລິດຢ່າງຄົບຊຸດ. ປະຈຸບັນ, ການຜະລິດເຂົ້າໄດ້ຮັບການປະຕິບັດພ້ອມກັນ ດ້ວຍແນວພັນດຽວກັນ, ອັນໄດ້ສ້າງເງື່ອນໄຂສະດວກໃຫ້ແກ່ການບົວລະບັດ, ການລົງທຶນ, ດັ່ງນັ້ນຈຶ່ງສາມາດຫຼີກລ້ຽງສັດຕູພືດໄດ້. ”
ພາບປະກອບ
ໃນໄລຍະຜ່ານມາ, ໃນສະພາບການທີ່ລາຄາຜະລິດຕະພັນກະເສດຖືກຫຼຸດລົງ, ລາຄາວັດຖຸອຸປະກອນເພີ່ມຂຶ້ນສູງນັ້ນ, ຮູບແບບທົ່ງນາແບບຢ່າງຂະໜາດໃຫຍ່ ໄດ້ຊ່ວຍໃຫ້ຊາວກະສີກອນຜ່ານຜ່າຄວາມຫຍຸ້ງຍາກ. ປະຈຸບັນ, ໂຄງການທົ່ງນາແບບຢ່າງຂະໜາດໃຫຍ່ໄດ້ຮັບການຮ່ວມມື, ຊ່ວຍເຫຼືອຈາກວິສາຫະກິດຫຼາຍແຫ່ງ, ດ້ວຍຮູບການໃຫ້ຊາວກະສີກອນກູ້ຢືມແນວພັນ, ຝຸ່ນເຄມີ ໂດຍບໍ່ຄິດໄລ່ກຳໄລ ແລະ ທ້າຍລະດູຈະເກັບຊື້ຜະລິດຕະພັນໃຫ້ເຂົາເຈົ້າ. ປ້າ ຫງວຽນທິມິງງວຽດ, ຫົວໜ້າຫ້ອງການຕາງໜ້າບໍລິສັດໃຫຍ່ວັດຖຸອຸປະກອນກະສີກຳແຂວງ ເງອານ, ເຊິ່ງແມ່ນໜຶ່ງໃນບັນດາວິສາຫະກິດທີ່ໄດ້ເຂົ້າຮ່ວມຮູບແບບທົ່ງ ນາແບບຢ່າງຂະໜາດໃຫຍ່ກັບຊາວກະສີກອນພາກກາງ, ໃຫ້ຮູ້ວ່າ:
“ການກໍ່ສ້າງທົ່ງນາແບບຢ່າງ ໄດ້ຊ່ວຍໃຫ້ປະຊາຊົນມີແຫຼ່ງລາຍຮັບສູງກວ່າ. ມີວິສາຫະກິດຈຳນວນໜຶ່ງໄດ້ໜູນຊ່ວຍປະຊາຊົນດ້ວຍຫຼາຍຮູບການ. ເມື່ອປະຊາຊົນເຫັນດີເປັນເອກະພາບໃນການຜະລິດ, ຈະສ້າງເງື່ອນໄຂສະດວກໃຫ້ແກ່ການສົງ່ອອກກວ່າ. ເຂົ້າຮ່ວມທົ່ງນາແບບຢ່າງກັບບໍລິສັດ, ລາຍຮັບຂອງປະຊາຊົນຈະສູງກວ່າແຕ່ 10 ເຖິງ 15%”.
ພາບປະກອບ
ປະຈຸບັນ, ມີຫຼາຍແຂວງ, ນະຄອນໃນທົ່ວປະເທດພວມຜັນຂະຫຍາຍຮູບແບບທົ່ງນາແບບຢ່າງຂະໜາດໃຫ ຍ່, ທີ່ປູກເຂົ້າຕາມມາດຖານ “ປະຕິບັດການຜະລິດກະສີກຳໄດ້ດີ - VietGap” ເພື່ອຮັບໃຊ້ໃຫ້ແກ່ການສົ່ງອອກ. ເມື່ອເຂົ້າຮ່ວມຮູບແບບນີ້, ຊາວກະສີກອນໄດ້ຮັບການແນະນຳຈາກພະນັກງານກ່ຽວກັບເຕັກນິກການປູກ ຝັງ ແລະ ວິທີບັນທຶກວິວັດການຜະລິດໃສ່ປື້ມຄູ່ມື (ຕາມແບບຟອມ)… ເລື່ອງຜັນຂະຫຍາຍການກໍ່ສ້າງຮູບແບບທົ່ງນາແບບຢ່າງຂະໜາດໃຫຍ່ ຕິດພັນກັບການຜະລິດເຂົ້າຕາມມາດຖານ VietGap ໄດ້ສ້າງເງື່ອນໄຂສະດວກເພື່ອໃຫ້ຂະແໜງກະສີກຳວາງແຜນກຳນົດເຂດ ຜະລິດເຂົ້າທີ່ມີຄຸນນະພາບສູງຕາມທິດໝັ້ນຄົງ; ທັງຊ່ວຍໃຫ້ຊາວກະສີກອນໝູນໃຊ້ບັນດາຄວາມກ້າວໜ້າດ້ານວິທະຍາ ສາດເຕັກນິກເຂົ້າໃນການຜະລິດຕາມທິດລວມສູນ, ດ້ວຍຈຳນວນຫຼາຍ ແລະ ຄຸນນະພາບສູງ. ນີ້ແມ່ນໜຶງໃນບັນດາມາດຖານ, ທີ່ປະກອບສ່ວນສ້າງຂະບວນການກໍ່ສ້າງຊົນນະບົດໃໝ່ໃຫ້ສຳເລັດ.