(vovworld) - ນັບແຕ່ດົນນານມາແລ້ວ, ຕອນບ່າຍມື້ທ້າຍປີຍາມໃດກໍ່ແມ່ນຈຸດເວລາມີຄວາມສັກສິດທີ່ສຸດສຳລັບຊາວ ຫວຽດນາມ ແຕ່ລະຄົນ. ເຖິງວ່າຈະຢູ່ໃນເກນອາຍຸໃດກໍ່ຕາມ, ເຂົາເຈົ້າກໍ່ຮູ້ສຶກມີຄວາມລ່າເລີງບັນເທີງໃຈ ເມື່ອໄດ້ເຂົ້າຮ່ວມຄາບເຂົ້າສົ່ງທ້າຍປີເກົ່າພ້ອມກັບບັນດາສະມາຊິກໃນຄອບຄົວ ເພື່ອພ້ອມກັນຫວນຄືນບັນດາວຽກງານທີ່ໄດ້ເຮັດໃນປີເກົ່າ, ມຸ່ງໄປເຖິງຄວາມພາກພູມໃຈ ແລະ ຄາດໝາຍໃນປີໃໝ່.
ຄາບເຂົ້າໃນຍາມແລງຂອງມື້ສຸດທ້າຍໃນປີ, ດ້ວຍການເຕົ້າໂຮມຂອງທຸກຄົນໃນຄອບຄົວ
ທີ່ເຕັມໄປດ້ວຍຄວາມອົບອຸ່ນ
ຕອນບ່າຍວັນທີ 30 ບຸນເຕັດ (ວັນທີ 30 ເດືອນ 12 ໄລ່ຕາມຈັນທະປະຕິທິນ) ແມ່ນຈຸດເວລາທີ່ເປັນເອກະລັກສະເພາະທີ່ສຸດຂອງບຸນເຕັດ ຫວຽດນາມ, ໃນຍາມນີ້, ຜູ້ຄົນທັງຫຼາຍບາງທີຈະຕິດຄາກັບວຽກງານ, ບາງທີມີເວລາຫວ່າງ, ບາງທີມີຄວາມສະເທືອນໃຈ, ເມື່ອທັງຄອບຄົວເຕົ້າໂຮມກັນ, ລູກຫຼານອວຍພອນສຸຂະພາບປູຍ່າຕາຍາຍ, ພໍ່ແມ່, ແລະ ພ້ອມກັນຫວນຄືນທຸກສິ່ງທຸກຢ່າງທີ່ໄດ້ຜ່ານໄປໃນປີ ແລະ ລໍຖ້າຈຸດເວລາຕ້ອນຮັບປີໃໝ່.
ເທບ
ປີໃດກໍ່ຄືກັນ, ຮອດວັນທີ 30 ຂອງບຸນເຕັດ, ບັນດາລູກຫຼານໃນຄອບຄົວທ່ານ ຫງວຽນວັນບິ່ງ ຢູ່ບ້ານ ຢາຖູ໋ຍ (ປະຈຸບັນຂຶ້ນກັບຕາແສງ ຢາຖູ້ຍ, ເມືອງ ລອງບຽນ, ຮ່າໂນ້ຍ) ກໍ່ເຕົ້າໂຮມກັນຢ່າງພ້ອມພຽງ, ແລ້ວພາກັນໄປຍັງເຂດສຸສານຂອງໝູ່ບ້ານເພື່ອບູລະນະສ້ອມແປງຂຸມຝັງສົບຍາດຕິພີ່ນ້ອງ, ຈູດທູບທຽນທີ່ຫອມຫວນເພື່ອເຊີນບັນພະບຸລຸດ, ປູຍ່າຕາຍາຍກັບເມືອເອົາບຸນເຕັດພ້ອມກັບຄອບຄົວ. ນີ້ແມ່ນປະເພນີທີ່ມີມາກ່ອນນີ້ຫຼາຍລຸ້ນຄົນຂອງຄອບຄົວຊາວ ຫວຽດນາມ, ສະແດງໃຫ້ເຫັນຄວາມເຄົາລົບນັບຖືຕໍ່ບັນພະບຸລຸດ, ຜູ້ທີ່ໄດ້ກຳເນີດ, ຜ່ານນັ້ນສ້າງຄວາມສະໜິດຕິດພັນ, ຄວາມຮັກແພງລະຫວ່າງບັນດາຜູ້ຍັງມີຊີວິດຢູ່. ທ່ານ ຫງວຽນວັນບິ່ງ ເວົ້າຄວາມໃນໃຈສູ່ຟັງວ່າ:
“ແຕ່ລະປີເມື່ອຮອດວັນສຸດທ້າຍຂອງປີ, ຂ້າພະເຈົ້າພ້ອມກັບລູກຫຼານເຄີຍໄປຍັງເຂດສຸສານເພື່ອຈັດມ້ຽນ, ເຮັດອະນາໄມ ແລະ ເຊີນບັນພະບຸລຸດກັບເມືອເອົາບຸນເຕັດພ້ອມກັບຄອບຄົວ. ຂ້າພະເຈົ້າຢາກໃຫ້ລູກຫຼານສືບຕໍ່ຮັກສາປະເພນີຂອງບັນພະບຸລຸດ ກໍ່ຄືມູນເຊື້ອຂອງຄອບຄົວໄວ້ຕະຫຼອດໄປ “.
ບັນຍາກາດຟ້າວຟັ່ງ, ເບີກບານມ່ວນຊື່ນທີ່ສຸດຂອງບັນດາຄອບຄົວຊາວ ຫວຽດນາມ ໃນວັນທ້າຍປີ, ນັ້ນແມ່ນເວລາບັນດາແມ່ຍິງໃນຄອບຄົວແຕ່ງກິນເພື່ອກະກຽມພາເຂົ້າບູຊາໃນບຸນເຕັດ. ໃນໂອກາດຄືແນວນີ້, ບັນດາຜູ້ເປັນແມ່ກໍ່ເຄີຍແນະນຳໃຫ້ລູກສາວ, ລູກໃພ້ວິທີແຕ່ງອາຫານ, ຈັດວາງບັນດາເຍື່ອງອາຫານທີ່ເປັນເອກະລັກສະເພາະຂອງບຸນເຕັດ ຕາມປະເພນີຂອງຄອບຄົວ. ປ້າ ຫວູທິຕິ່ງ, ຢູ່ບ້ານ ຢາຖູ້ຍ, ໃຫ້ຮູ້ວ່າ:
“ພາເຂົ້າບຸນເຕັດໃນວັນທ້າຍປີຂອງຄອບຄົວຂ້າພະເຈົ້າ, ຍາມໃດກໍ່ມີເຂົ້າຕົ້ມ, ເຂົ້າໜົມຫວານ, ແກງໜໍ່ໄມ້, ອາຫານຂົ້ວ, ແໜມຈືນ… ວຽກງານມີພຽງເທົ່ານັ້ນແຕ່ລູກຫຼານກໍ່ພາກັນເຮັດເພື່ອມີພາເຂົ້າຖະຫວາຍບູຊາ, ເຊີນບັນພະບຸລຸດກັບເມືອເອົາບຸນເຕັດພ້ອມກັບຄອບຄົວ “.
ໃນຂະນະທີ່ແມ່ຍິງຟ້າວຟັ່ງກະກຽມພາເຂົ້າບູຊານັ້ນ, ຜູ້ຊາຍໃນຄອບຄົວກໍ່ຜັດຖູ ເຮັດອະນາໄມແທ່ນບູຊາ, ຈັດວາງຕົ້ນໄມ້ປະດັບ, ກະກຽມເຫຼົ້າ, ຊາ ຖະຫວາຍບູຊາບັນພະບຸລຸດ. ໃນວັນທ້າຍປີ, ບັນດາຜູ້ມີອາຍຸສູງໃນຄອບຄົວເປັນຜູ້ມີຄວາມມ່ວນຊື່ນທີ່ສຸດ, ເພາະວ່າລູກຫຼານໃນຄອບຄົວເກືອບທັງໝົດໄດ້ກັບເມືອຢ່າງພ້ອມພຽງ. ເຖິງວ່າສຸຂະພາບບໍ່ແຂງແຮງອີກ, ແຕ່ແມ່ເຖົ້າ ຫວູທິເຈິດ, ກໍ່ຮູ້ສຶກມ່ວນຊື່ນທີ່ສຸດເມື່ອໄດ້ຕ້ອນຮັບລູກຫຼານກັບເມືອໃນໂອກາດບຸນເຕັດ.
“ຜູ້ໃດກໍ່ມັກບຸນເຕັດ, ສ່ວນຂ້າພະເຈົ້າພາກພູມໃຈຫຼາຍ. ບຸນເຕັດລູກຫຼານມາເຕົ້າໂຮມກັນ, ຂ້າພະເຈົ້າດີໃຈຫຼາຍ“.
ພາເຂົ້າບູຊາໃນຕອນບ່າຍມື້ສຸດທ້າຍຂອງປີ ຍາມໃດກໍ່ແມ່ນພາເຂົ້າມີ່ມີອາຫານແຊບນົວຫຼາຍເຍື່ອງ ແລະ ໄດ້ຮັບການກະກຽມຢ່າງລະອຽດລະອໍທີ່ສຸດໃນປີ. ພາເຂົ້ານີ້, ກ່ອນອື່ນໝົດແມ່ນເພື່ອຖະຫວາຍບູຊາບັນພະບຸລຸດ, ຫຼັງຈາກນັ້ນຈຶ່ງໃຫ້ທຸກຄົນໃນຄອບຄົວຮັບປະທານ. ພາເຂົ້າໃນມື້ທ້າຍປີຍັງມີຄຸນຄ່າດ້ານຈິດໃຈ, ສ້າງຄວາມສະໜິດຕິດພັນລະຫວ່າງສະມາຊິກໃນຄອບຄົວນຳກັນ. ທຸກຄົນຜູ້ໃດກໍ່ພາກພູມໃຈ, ພ້ອມກັນແບ່ງປັນຄວາມສະດວກ, ຄວາມຫຍຸ້ງຍາກນຳກັນ ແລະ ອວຍພອນກັນໃຫ້ປະສົບແຕ່ຄວາມໂຊກດີໃນປີໃໝ່. ຍ້ອນເຫດນັ້ນ, ໃນວັນສຸດທ້າຍຂອງປີ, ຜູ້ໃດກໍ່ຢາກເຕົ້າໂຮມພ້ອມກັບຄອບຄົວ ເພື່ອໄດ້ເຈືອຈານເຂົ້າກັບບັນຍາກາດຂອງບຸນເຕັດ.