(vovworld) - ປະຕິບັດໂຄງການຈຸດໝາຍແຫ່ງຊາດກໍ່ສ້າງຊົນນະບົດໃໝ່ໄລຍະ 2011 – 2015, ນະຄອນເຊີນລາ, ແຂວງເຊີນລາ ໄດ້ເລືອກຕາແສງຈ່ຽງຊົມ ເປັນບ່ອນກໍ່ສ້າງຊົນນະບົດໃໝ່. ດ້ວຍຄວາມຕັດສິນໃຈ ແລະ ຄວາມມານະພະຍາຍາມຂອງອຳນາດການປົກຄອງ ແລະ ປະຊາຊົນ, ຕາແສງພວມສູ້ຊົນປະຕິບັດສຳເລັດຈຸດໝາຍກໍ່ສ້າງຊົນນະບົດໃໝ່ໃນປີນີ້.
ຊາວບ້ານຈ່ຽງຊົມ, ແຂວງເຊີນລາ
ນັບແຕ່ໄດ້ຮັບການເລືອກເຟັ້ນເປັນແຫ່ງກໍ່ສ້າງຊົນນະບົດໃໝ່, ອຳນາດການປົກຄອງຕາແສງ ຕະຫຼອດຮອດໝູ່ບ້ານຕ່າງໆ, ແລະ ບັນດາອົງການຈັດຕັ້ງມະຫາຊົນ ໄດ້ຜັນຂະຫຍາຍການໂຄສະນາເຜີຍແຜ່ເຖິງແຕ່ລະຄອບຄົວປະຊາຊົນ ເພື່ອໃຫ້ທຸກຄົນເຂົ້າໃຈແຈ້ງກ່ຽວກັບຜົນປະໂຫຍດ, ກໍ່ຄືຄວາມຮັບຜິດຊອບໃນການກໍ່ສ້າງຊົນນະບົດໃໝ່. ທາງຕາແສງກໍ່ປະກາດໃຊ້ມະຕິຊີ້ນຳນຳພາ, ວາງແຜນການໃນແຕ່ລະປີ, ກຳນົດເນື້ອໃນ ປະຕິບັດກ່ອນ; ຊີ້ນຳການປະຕິບັດບັນດາຄາດໝາຍ, ມາດຖານໃຫ້ສຳເລັດໃນແຕ່ລະປີ, ພ້ອມທັງແບ່ງໜ້າທີ່ລະອຽດໃຫ້ຜູ້ຮັບຜິດຊອບແຕ່ລະຄົນໃນທ້ອງຖີ່ນ.
ຈຸດພົ້ນເດັ່ນໃນການກໍ່ສ້າງຊົນນະບົດໃໝ່ຂອງຕາແສງແມ່ນຂະບວນການກໍ່ສ້າງທາງຄົມມະນາຄົມລະຫວ່າງບ້ານ, ດ້ວຍການປະກອບສ່ວນຢ່າງຕັ້ງໜ້າຂອງປະຊາຊົນ. ຢູ່ບ້ານຫຸ້ມ, ພະນັກງານບ້ານໄດ້ໂຄສະນາ, ຂົນຂວາຍປະຊາຊົນປະກອບທີ່ດິນເກືອບ 1.600 ຕາແມັດ, ລະດົມແຮງງານເພື່ອກໍ່ສ້າງທາງຄົມມະນາຄົມ. ທາງເຂົ້າບ້ານລ້ວນແຕ່ໄດ້ຮັບການກໍ່ສ້າງດ້ວຍເບຕົງຕາມທິດນຳລັດ ແລະ ປະຊາຊົນພ້ອມກັນເຮັດ, ອັນໄດ້ສ້າງຄວາມສະດວກໃຫ້ປະຊາຊົນໃນການໄປມາ, ຈຳໜ່ວຍຜະລິດຕະພັນກະເສດ. ປະຈຸບັນ, ແຂວງເຊີນລາ ໄດ້ເລືອກບ້ານຫຸ້ມເປັນບ້ານທ່ອງທ່ຽວປະຊາຄົມ, ອັນໄດ້ແກ້ໄຂວຽກເຮັດງານທຳໃຫ້ປະຊາຊົນຫຼາຍຄົນ, ລາຍຮັບສະເລ່ຍຂອງແຕ່ລະຄອບຄົວໃນບ້ານບັນລຸ 1.800.000ດົ່ງ/ເດືອນ, ບ້ານຫຸ້ມກໍ່ບໍ່ມີຄອບຄົວທຸກຍາກ. ທ່ານ ກວ່າງວັນຟ໋ອງ, ນາຍບ້ານຫຸ້ມ, ນະຄອນເຊີນລາ, ແຂວງເຊີນລາ, ໃຫ້ຮູ້ວ່າ:
“ປະຈຸບັນ, ບ້ານຫຸ້ມມີທາງໄປມາຢ່າງສະດວກສະບາຍ. ບ້ານພວມສູ້ຊົນພັດທະນາເສດຖະກິດຄອບຄົວຄືລ້ຽງງົວ, ໝູ, ໄກ່, ປູກສາລີ, ຂຸດໜອງລ້ຽງປາ. ປະຈຸບັນຊີວິດຂອງປະຊາຊົນໃນບ້ານໄດ້ດີພໍສົມຄວນ. ເມື່ອຂົນຂວາຍປະກອບສ່ວນເຂົ້າໃນວຽກງານລວມຂອງບ້ານ, ປະຊາຊົນລ້ວນແຕ່ສະໜັບສະໜູນໃນທັນທີ“.
ຊາວບ້ານຈ່ຽງຊົມປະກອບທີ່ດິນ ແລະ ແຮງງານເຂົ້າໃນການກໍ່ສ້າງທາງ ຕາແສງຈ່ຽງຊົມ ມີເນື້ອທີ່ທຳມະຊາດແມ່ນ 6.200 ເຮັກຕາ, ໃນນັ້ນເນື້ອທີ່ດິນຜະລິດກະສີກຳກວມ 15%. ດັ່ງນັ້ນໃນການຫັນປ່ຽນໂຄງປະກອບເສດຖະກິດ, ທາງຕາແສງກຳນົດເສີມຂະຫຍາຍຂົງເຂດບໍລິການການຄ້າ ແລະ ຫັນປ່ຽນໂຄງປະກອບເສດຖະກິດກະສີກຳຕາມທິດຜະລິດເປັນສິນຄ້າຢ່າງມີປະສິດທິຜົນ. ທາງຕາແສງສົມທົບກັບສະຫະກອນ ຫ່າຢູຍເຖືອງ ຫັນປ່ຽນຜົນລະປູກຢູ່ບ້ານຕົງ, ບ້ານຫຸ້ມ, ບ້ານແປງ, ບ້ານອ້າຍ, ໃນເນື້ອທີ່ 21 ເຮັກຕາຈາກການປູກເຂົ້າມາປູກຜັກ, ດອກໄມ້ທີ່ມີຄຸນນະພາບສູງກວ່າ… ແກ້ໄຂວຽກເຮັດງານທຳໃຫ້ຜູ້ອອກແຮງງານ 200 ກວ່າຄົນ, ລາຍຮັບສະເລ່ຍຂອງຜູ້ອອກແຮງງານແຕ່ລະຄົນແມ່ນແຕ່ 3,5 ລ້ານເຖິງ 4 ລ້ານດົ່ງ/ເດືອນ. ປະຊາຊົນຫຼາຍຄົນກໍ່ຫັນເນື້ອທີ່ນາທີ່ມີປະສິດທິຜົນຕຳ່ມາຂຸດໜອງລ້ຽງປາທີ່ມີປະສິດທິຜົນດ້ານເສດຖະກິດສູງ. ທ່ານ ໂດຢູຍເທື່ອງ, ຫົວໜ້າສະຫະກອນ ຫ່າຢູຍເຖືອງ, ໃຫ້ຮູ້ວ່າ:
“ຂ້າພະເຈົ້າໄດ້ສະເໜີກັບຄະນະກຳມະການຕາແສງຫັນປ່ຽນຜົນລະປູກຈາກການປູກເຂົ້າມາປູກດອກໄມ້. ໃນງານວາງສະແດງດອກໄມ້ລະດູບານໃໝ່ຂອງນະຄອນເຊີນລາ ຜ່ານມາ, ລ້ວນແຕ່ແມ່ນດອກໄມ້ຂອງສະຫະກອນ. ດິນຟ້າອາກາດຢູ່ທີ່ນີ້ເໝາະສົມກັບການປູກດອກກຸຫຼາບທີ່ສຸດ. ໃນເບື້ອງຕົ້ນການປູກດອກໄມ້ກໍ່ປະສົບກັບຄວາມຫຍຸ້ງຍາກຢູ່, ແຕ່ປະຈຸບັນໄດ້ພັດທະນາຢ່າງແຮງ, ປະຊາຊົນຕ່າງກໍສະໜັບສະໜູນ“.
ຊາວບ້ານຈ່ຽງຊົມຽນຜົນລະປູກຈາກການປູກເຂົ້າມາປູດດອກກຸຫຼາບ ຮອດທ້າຍປີ 2014, ຕາແສງຈ່ຽງຊົມ ໄດ້ປະຕິບັດສຳເລັດ 15/19 ມາດຖານກ່ຽວກັບການກໍ່ສ້າງຊົນນະບົດໃໝ່. ທ່ານ ລຸ່ວັນທ້ຽນ, ປະທານຄະນະກຳມະການປະຊາຊົນຕາແສງຈ່ຽງຊົມ, ໃຫ້ຮູ້ວ່າ:
“ເພື່ອປະຕິບັດສຳເລັດຈຸດໝາຍກໍ່ສ້າງຊົນນະບົດໃໝ່, ຕາແສງໄດ້ເພີ່ມທະວີການຊີ້ນຳນຳພາຂອງພັກ, ການບໍລິຫານຂອງລັດ ແລະ ການເສີມຂະຫຍາຍກຳລັງແຮງຂອງບັນດາອົງການການເມືອງ, ສັງຄົມ, ກຳລັງແຮງ ແຫ່ງຄວາມສາມັກຄີຂອງທົ່ວປວງຊົນ, ການຍູ້ແຮງວຽກງານໂຄສະນາ, ຍົກສູງຄວາມຮູ້ໃຫ້ປະຊາຊົນທຸກຊັ້ນວັນນະ ເພື່ອກໍ່ສ້າງຊົນນະບົດໃໝ່. ສຸມໃສ່ແກ້ໄຂຄວາມຫຍຸ້ງຍາກໃນການພັດທະນາເສດຖະກິດສະຫະກອນ, ພັດທະນາອາຊີບ ແລະ ດຶງດູດບັນດາວິສາຫະກິດລົງທຶນເຂົ້າໃນການຜະລິດ, ເພີ່ມທະວີວຽກງານສົ່ງເສີມກະສີກຳ, ຍູ້ແຮງການຖ່າຍທອດວິທະຍາສາດເຕັກນິກເຂົ້າໃນການຜະລິດກະສີກຳ ແລະ ອຸດສາຫະກຳຜະລິດປຸງແຕ່ງຜະລິດຕະພັນກະເສດ“.
ຮັກສາບັນດາມາດຖານທີ່ບັນລຸໄດ້ຢ່າງໝັ້ນຄົງ, ອຳນາດການປົກຄອງ ແລະ ປະຊາຊົນຕາແສງຈ່ຽງຊົມ ສູ້ຊົນປະຕິບັດສຳເລັດບັນດາມາດຖານທີ່ຍັງເຫຼືອໃນປີນີ້. ແຕ່ສິ່ງສຳຄັນກວ່າແມ່ນ, ຕາແສງຈ່ຽງຊົມ ໄດ້ຕັດສິນໃຈກໍ່ສ້າງພື້ນຖານໂຄງລ່າງ, ຍົກສູງຊີວິດທາງດ້ານວັດຖຸ, ຈິດໃຈຂອງປະຊາຊົນ, ຮັບປະກັນປະສິດທິຜົນຕ່າງໆເຊິ່ງໂຄງການຊົນນະບົດໃໝ່ໄດ້ນຳມາໃຫ້ປະຊາຊົນບັນດາເຜົ່າຢ່າງໝັ້ນຄົງ.