(vovworld) - ຕາແສງພູດອຍຢຸງຟອງ, ເມືອງກາວຟອງ, ແມ່ນຕາແສງທຳອິດຂອງແຂວງຮ່ວາບິ່ງ ໄດ້ຮັບການຮັບຮອງວ່າແມ່ນຕາແສງຊົນນະບົດໃໝ່. ການພັດທະນາເສດຖະກິດຟາມ ແລະ ການສ້າງຮູບແບບຜະລິດຢູ່ທີ່ນີ້, ໄດ້ນຳມາເຊິ່ງປະສິດທິຜົນສູງ ແລະ ຖືກຖືວ່າແມ່ນໄມ້ງັດທີ່ຊ່ວຍໃຫ້ຂະບວນການກໍ່ສ້າງຊົນນະບົດໃໝ່ສຳເລັດຜົນໂດຍໄວ, ພ້ອມທັງປະກອບສ່ວນຍົກສູງຊີວິດການເປັນຢູ່ຂອງປະຊາຊົນຢູ່ຕາແສງຢຸງຟອງອີກດ້ວຍ..
ພາບປະກອບ
ຕາແສງພູດອຍຢຸງຟອງ, ເມືອງກາວຟອງ, ມີ 90% ຈຳນວນພົນລະເມືອງແມ່ນຊາວເຜົ່າເມື່ອງ. ໂດຍຕັ້ງຢູ່ເຂດພູດອຍ, ພູມມີປະເທດທຸລະກັນດານ, ດັ່ງນັ້ນການກໍ່ສ້າງ, ພັດທະພື້ນຖານໂຄງລ່າງຊົນນະບົດປະສົບກັບຄວາມຫຍຸ້ງຍາກທີ່ສຸດ. ໃນຊຸມປີກ່ອນ, ເຖິງວ່າໄດ້ຮັບການໜູນຊ່ວຍຈາກລັດແລ້ວກໍ່ຕາມ, ແຕ່ຊີວິດການເປັນຢູ່ຂອງປະຊາຊົນຍັງປະສົບກັບຄວາມຫຍຸ້ງຍາກຫຼາຍ, ອັດຕາສ່ວນຄອບຄົວທຸກຍາກຍັງສູງ. ເພື່ອຊ່ວຍໃຫ້ປະຊາຊົນຫຼຸດພົ້ນອອກຈາກຄວາມທຸກຍາກ, ມີຊີວິດເປັນປົກກະຕິ, ອຳນາດການປົກຄອງຕາແສງຢຸງຟອງ ໄດ້ລົງທຶນພັດທະນາຮູບແບບການຜະລິດກະສີກຳ, ດ້ວຍວິທີຂະຫຍາຍເນື້ອທີ່ປູກຕົ້ນໝາກກ້ຽງ, ສົມທົບກັບການຫັນປ່ຽນຜົນລະປູກ, ນຳໃຊ້ຄວາມກ້າວໜ້າດ້ານວິທະຍາສາດ, ເຕັກນິກ ເພື່ອເພີ່ມສະມັດຕະພາບ, ປະລິມານການຜະລິດ ແລະ ເພີ່ມລາຍຮັບຕື່ມອີກ. ມາຮອດປະຈຸບັນ, ທາງຕາແສງໄດ້ຮັບເງິນຊ່ວຍເຫຼືອຈາກເມືອງເກືອບ 500 ລ້ານດົ່ງ ແລະ ໄດ້ກໍ່ສ້າງເຂດປູກຕົ້ນໝາກກ້ຽງ, ໝາກກ້ຽງນ້ອຍ ໃນເນື້ອທີ່ກວ່າ 60 ເຮັກຕາສຳເລັດ.
ປະຈຸບັນ, ຢູ່ລຽບຕາມສອງພາກທາງໄປສູ່ຕາແສງ ແມ່ນບັນດາສວນຕົ້ນໝາກກ້ຽງ, ໝາກກ້ຽງນ້ອຍສຸກເຫຼືອງ. ໃນໂອກາດບຸນປີໃໝ່ປະຈຳຊາດຜ່ານມາ, ມື້ໃດກໍ່ມີລົດຂົນສົ່ງນັບສິບລົດເຂົ້າຕາແສງເພື່ອເກັບຊື້ຜະລິດຕະພັນກະເສດຢູ່ທີ່ນີ້ໄປຂາຍໃນທົ່ວປະເທດ. ກ່ອນນີ້ສອງສາມປີ, ໃນທົ່ງນ່າບ໋າຍ ຍັງປູກສາລີ, ມັນດ້າງ, ແຕ່ປະຈຸບັນເນື້ອທີ່ດັ່ງກ່າວໄດ້ກາຍເປັນສ່ວນຕົ້ນໝາກກ້ຽງ, ໝາກກ້ຽງນ້ອຍ. ຄອບຄົວອ້າຍ ເຈິ່ນວັນເຫີບ ມີຟາມ ປູກຕົ້ນໝາກກ້ຽງ 4.000 ຕາແມັດ. ດ້ວຍເງິນລົງທຶນໃນເບື້ອງຕົ້ນແມ່ນ 70 ລ້ານດົ່ງ, ແຕ່ຄາດວ່າຮອດຍາມເກັບກ່ຽວຄອບຄົວອ້າຍ ເຫີບ ສາມາດເກັບເງິນໄດ້ປະມານ 4000 ລ້ານດົ່ງ. ອ້າຍ ເຈິ່ຍວັນເຫີບ, ໃຫ້ຮູ້ວ່າ:
“ເມື່ອທຽບໃສ່ການຜະລິດກະສີກຳອື່ນໆ, ແຫຼ່ງລາຍຮັບຈາກຕົ້ນໝາກກ້ຽງແມ່ນຫຼາຍສົມຄວນ. ສົ້ນອອກຂອງຜະລິດຕະພັນໃນປະຈຸບັນແມ່ນຢູ່ຕະຫຼາດຕ່າງໆໃນທົ່ວປະເທດ. ໄລຍະຈະມາເຖິງ, ແນ່ນອນວ່າເນື້ອທີ່ປູກຕົ້ນໝາກກ້ຽງຈະໄດ້ຮັບການຂະຫຍາຍຕື່ມອີກ“.
ພາບປະກອບ ເພື່ອພັດທະນາຕົ້ນໝາກກ້ຽງພ້ອມກັບຕົ້ນໄມ້ອຸດສາຫະກຳອື່ນໆ, ຕາແສງຢຸງຟອງ ໄດ້ໜູນຊ່ວຍເງິນນັບສິບລ້ານດົ່ງໃຫ້ບັນດາຄອບຄົວເຂົ້າຮ່ວມລາຍການປູກຕົ້ນໝາກກ້ຽງ, ຊ່ວຍກໍ່ສ້າງຄອງເໝືອງໃນເຂດທົ່ງນາ, ໜູນຊ່ວຍດ້ານເຕັກນິກປູກຝັງ, ເບ້ຍໄມ້. ນອກນັ້ນ, ທາງຕາແສງກໍ່ໄດ້ລົງທຶນນັບສິບຕື້ດົ່ງເພື່ອກໍ່ສ້າງບັນດາກິດຈະກຳຄື: ທາງເບຕົງໃນບ້ານ, ລະບົບໄຟຟ້າ; ສຸກສາລາບັນລຸມາດຖານຂອງຊາດ, ກໍ່ສ້າງຕະຫຼາດເພື່ອສ້າງຄວາມສະດວກໃຫ້ແກ່ປະຊາຊົນໃນການຄ້າຂາຍ. ທ່ານ ຫງວຽນກວາງວິງ ແມ່ນໜຶ່ງໃນບັນດາຜູ້ທີ່ໄດ້ບໍລິຈາກທີ່ດິນໃຫ້ແກ່ການກໍ່ສ້າງທາງຄົມມະນາຄົມ, ແບ່ງປັນວ່າ:
“ຄອບຄົວຂ້າພະເຈົ້າເຫັນວ່າ, ທຸກຄົນຕ້ອງປະກອບກຳລັງເຫື່ອແຮງເຂົ້າໃນການກໍ່ສ້າງທາງ ເພື່ອສ້າງຄວາມສະດວກໃຫ້ການໄປມາ ແລະ ຂົນສົ່ງສິນຄ້າ. ນັບແຕ່ມີໂຄງການກໍ່ສ້າງຊົນນະບົດໃໝ່, ຕາແສງຂ້າພະເຈົ້ານັບມື້ນັບໃຫຍ່ໂຕ ແລະ ສວຍງານກວ່າ. ທຸກຄອບຄົວ, ທຸກຄົນລ້ວນແຕ່ແຂ່ງຂັນກັນພັດທະນາເສດຖະກິດ. ໃນຊຸມປີມໍ່ໆມານີ້, ເສດຖະກິດຂອງພໍ່ແມ່ປະຊາຊົນໄດ້ພັດທະນາຢ່າງກະໂດດຂັ້ນ“.
ພາບປະກອບ ປີ 2014, ລາຍຮັບສະເລ່ຍໃສ່ຫົວຄົນຂອງປະຊາຊົນໃນຕາແສງຢຸງຟອງ ບັນລຸ 24 ລ້ານດົ່ງ/ຄົນ. ອັດຕາຄອບຄົວທຸກຍາກກໍ່ຫຼຸດລົງໃນແຕ່ລະປີ. ທາງຕາແສງລະດົມເເງິນບໍລິຈາກໄດ້ 44 ຕື້ດົ່ງເພື່ອກໍ່ສ້າງຊົນນະບົດໃໝ່. ບັນລຸໄດ້ຜົນງານດັ່ງກ່າວແມ່ນຍ້ອນຕາແສງຢຸງຟອງ ໄດ້ເອົາໃຈໃສ່ເປັນພິເສດເຖິງການໂຄສະນາ, ຖືພະນັກງານ, ຜູ້ມີອິດທິພົນຊື່ສຽງໃນບໍລິເວນເປັນແບບຢ່າງນຳໜ້າໃນການບຸກເບີກໜ້າພຽງ, ບໍລິຈາກທີ່ດິນ ແລະ ເງິນ ເພື່ອກໍ່ສ້າງພື້ນຖານໂຄງລ່າງ... ທ່ານ ບຸ່ຍວັນຊັ໋ງ, ປະທານຄະນະກຳມະການປະຊາຊົນຕາແສງຢຸງຟອງ, ແບ່ງປັນວ່າ:
“ເຖິງວ່າໄດ້ຮັບການຮັບຮອງວ່າເປັນຕາແສງປະຕິບັດສຳເລັດມາດຖານກ່ຽວກັບການກໍ່ສ້າງຊົນນະບົດໃໝ່ກໍ່ຕາມ, ແຕ່ພວກຂ້າພະເຈົ້າຍັງຄົງສືບຕໍ່ສູ້ຊົນປັບປຸງທຸກມາດຖານໃຫ້ດີຂຶ້ນ. ທາງຕາແສງກໍ່ຈະສືບຕໍ່ຂົນຂວາຍປະຊາຊົນກໍ່ສ້າງຄອບຄົວ, ໝູ່ບ້ານຕາແສງໃຫ້ສວຍງາມກວ່າ, ສູ້ຊົນເພື່ອໃຫ້ເສດຖະກິດ - ສັງຄົມຂອງຕາແສງນັບມື້ນັບພັດທະນາກວ່າ, ຊີວິດຂອງປະຊາຊົນນັບມື້ນັບໄດ້ຮັບການຍົກສູງຂຶ້ນ.“
ເມື່ອເຫັນສວນຕົ້ນໝາກກ້ຽງສຸກເຫຼືອງລຽບຕາມເນີນພູ, ປະຊາຊົນໃນຕາແສງຍິ່ງເບີກບານມ່ວນຊື່ນ. ຕົ້ນປີນີ້, ກະຊວງວິທະຍາສາດ - ເຕັກໂນໂລຢີ ໄດ້ມອບໃບຢັ້ງຢືນເຄື່ອງໝາຍການຄ້າໃຫ້ແກ່ໝາກກ້ຽງກາວຟອງ. ນັບແຕ່ນີ້ເປັນຕົ້ນໄປ, ໝາກກ້ຽງກາວຟອງ ຈະມີທີ່ຕັ້ງຢ່າງຫມັ້ນຄົງໃນຕະຫຼາດ, ຊ່ວຍປະຊາຊົນມີຊີວິດເປັນປົກກະຕິ ແລະ ກໍ່ສ້າງຊົນນະບົດໃໝ່ໃຫ້ນັບມື້ນັບຮັ່ງມີ, ສວຍງາມ.