(vovworld) - ບໍ່ມີເວລາໃດທີ່ຕາແສງສິນແຈ້ງ, ເມືອງຊີມາກາຍ, ແຂວງລາວກາຍ ພັດມີຄວາມຟົດຟື້ນ ດ້ວຍຂະບວນການແຂ່ງຂັນອອກແຮງງານ, ກໍ່ສ້າງທາງຄົມມະນາຄົມຊົນນະບົດຄືໃນປະຈຸບັນ. ໂຄງການກໍ່ສ້າງຊົນນະບົດໃໝ່ໄດ້ລະດົມທັງວົງຄະນາຍາດເຂົ້າຮ່ວມດ້ວຍຄວາມສະໝັກໃຈ, ບາງຄົນປະກອບທີ່ດິນ, ບາງຄົນປະກອບເຫ່ືອແຮງ ແລະ ບໍລິຈາກເງິນເພື່ອປະຕິບັດໂຄງການ.
ຊາວເຜົ່າໃນເຂດພູດອຍແຂວງລາວກາຍ
(ພາບ: ອິນເຕີແນດ)
ບ້ານ ສະສິນໂປ ໄດ້ຮັບເລືອກເຟັ້ນປະຕິບັດທົດລອງໂຄງການກໍ່ສ້າງຊົນນະບົດໃໝ່ຂອງຕາແສງ. ນັບແຕ່ປີ 2012, ບ້ານໄດ້ຕັ້ງໜ້າໂຄສະນາ, ຂົນຂວາຍປະຊາຊົນປະກອບທີ່ດິນ, ເຫື່ອແຮງ ແລະ ບໍລິຈາກເງິນເພື່ອກໍ່ສ້າງທາງເບຕົງ ແລະ ກໍ່ສ້າງບັນດາກິດຈະກຳສະຫວັດດີການສັງຄົມ. ອ້າຍສຸ່ງແຊວຢາ, ເຈົ້າບ້ານສະສິນໂປ, ໃຫ້ຮູ້ວ່າ:
“ທັງລັດ ແລະ ປະຊາຊົນພ້ອມກັນປະຕິບັດການກໍ່ສ້າງຊົນນະບົດໃໝ່. ປະຊາຊົນປະກອບທີ່ດິນ, ເຫື່ອແຮງ, ບໍລິຈາກເງິນ, ສ່ວນລັດສະຫງວນຫິນ, ຊີມັງເພື່ອກໍ່ສ້າງທາງ. ກ່ອນນີ້ບໍ່ມີທາງຄົມມະນາຄົມ, ການໄປມາຫຍຸ້ງຍາກທີ່ສຸດ. ປະຈຸບັນມີທາງໄປມາຢ່າງສະດວກສະບາຍ, ພໍ່ແມ່ປະຊາຊົນມີເງື່ອນໄຂພົບປະແລກປ່ຽນ, ຮຳ່ຮຽນເອົາບົດຮຽນ“.
ນັບແຕ່ກໍ່ສ້າງທົດລອງບ້ານຊົນນະບົດໃໝ່, ມາຮອດປະຈຸບັນໂຄງການກໍ່ສ້າງຊົນນະບົດໃໝ່ຢູ່ຕາແສງສິນແຈ້ງ ໄດ້ຮັບການຜັນຂະຫຍາຍຢູ່ທັງ 9 ບ້ານ. ທ່ານ ທ່າວອາຈື້, ບ້ານສິນຈາຍ ໃຫ້ຮູ້ວ່າ. ໂຄງການກໍ່ສ້າງຊົນນະບົດໃໝ່ ໄດ້ລະດົມທັງລະບົບເຂົ້າຮ່ວມ. ຄອບຄົວທ່ານ ຈື້ ກໍ່ປະກອບທີ່ດິນເກືອບ 100 ຕາລາງແມັດເພື່ອກໍ່ສ້າງທາງຄົມມະນາຄົມ ດ້ວຍຄວາມສະໝັກໃຈ.
“ສຳຫຼັບຂ້າພະເຈົ້າແລ້ວ, ປະກອບທີ່ດິນ, ເຫື່ອແຮງ ແລະ ບໍລິຈາກເງິນເພື່ອກໍ່ສ້າງທາງເບຕົງ ແມ່ນສິ່ງສຳຄັນທີ່ສຸດ“.
ຊາວເຜົ່າໃນເຂດພູດອຍແຂວງລາວກາຍຮ່ວມແຮງຮ່ວມໃຈກໍ່ສ້າງທາງ
(ພາບ: ອິນເຕີແນດ) ໜຶ່ງໃນບັນດາມາດຖານສຳຄັນໃນການກໍ່ສ້າງຊົນນະບົດໃໝ່ ເຊິ່ງຕາແສງສິນແຈ້ງ ສຸມໃສ່ປະຕິບັດນັ້ນແມ່ນພັດທະນາການຜະລິດຕາມທິດຜະລິດກະສີກຳສົມທົບກັບວຽກງານປ່າໄມ້ ແລະ ຍົກສູງມູນຄ່າການຜະລິດໃນເນື້ອທີ່ປູກຝັງ. ທາງຕາແສງໄດ້ຍູ້ແຮງການປູກຝັງ 2 ລະດູ/ປີ, ຍົກລະດັບຄອງຊີບຂອງປະຊາຊົນຂຶ້ນສະເລ່ຍ 600 ກິໂລກຼາມ/ຄົນ/ປີ. ນອກຈາກນາຂັ້ນໃດທີ່ປູກ 2 ລະດູດ້ວຍແນວພັນເຂົ້າໃໝ່ທີ່ມີສະມັດຕະພາບສູງແລ້ວ, ເນື້ອທີ່ໂນນພູເກືອຍທັງໝົດແມ່ນປູກປ່າ, ປູກສາລີ, ຖ່ົວເຫຼືອງ ແລະ ຕົ້ນໄມ້ອຸດສາຫະກຳເປັນສິນຄ້າອື່ນໆອີກ.
ຍ້ອນມີເນື້ອທີ່ໂນນພູກວ້າງ, ສິນແຈ້ງ ກໍ່ແມ່ນທ້ອງຖີ່ນນຳໜ້າຂອງເມືອງ ຊີມາກາຍ ກ່ຽວກັບການລ້ຽງສັດໃນຄອບຄົວ, ດ້ວຍການລ້ຽງສັດແບບເຄິ່ງອຸດສາຫະກຳ, ມີແຜນກຳນົດເຂດປູກຫຍ້າ ແລະ ເປັນເຈົ້າການກ່ຽວກັບຫົວອາຫານສັດ, ຍ້ອນເຫດນັ້ນ, ມາຮອດປະຈຸບັນ ສິນແຈ້ງ ຈຶ່ງເປັນຕາແສງທີ່ມີສັດລ້ຽງຫຼາຍກວ່າໝູ່ໃນເມືອງ. ທ່ານ ຫຼູ່ມິງຢູຍ, ບ້ານມ່າວຊາວຈາຍ, ໃຫ້ຮູ້ວ່າ:
“ບັນດາເຈົ້າບ້ານລ້ວນແຕ່ເຫັນດີໃຫ້ 9 ບ້ານວາງແຜນກຳນົດຕາມ 19 ມາດຖານທີ່ແຂວງໄດ້ວາງອອກ. ປະຈຸບັນ, ພວກຂ້າພະເຈົ້າໄດ້ຊ່ວຍເຫຼືອກັນ, ພ້ອມກັນກໍ່ສ້າງສຳເລັດບັນດາເສັ້ນທາງຄົມມະນາຄົມໃນບ້ານຕາມມາດຖານທີ່ແຂວງໄດ້ວາງອອກເທື່ອລະກ້າວແລ້ວ. “
ຊາວເຜົ່າໃນເຂດພູດອຍແຂວງລາວກາຍຮ່ວມແຮງຮ່ວມໃຈກໍ່ສ້າງທາງ
(ພາບ: ອິນເຕີແນດ) ຕາມທ່ານ ກືແຊວຈຸ້ງ, ຮອງປະທານຄະນະກຳມະນາການປະຊາຊົນຕາແສງສິນແຈ້ງ ແລ້ວ, ການວາງແຜນແມ່ນວຽກງານຫຍຸ້ງຍາກ ແລະ ສັບສົນ, ແຕ່ດ້ວຍການຊ່ວຍເຫຼືອຂອງຂະແໜງການກ່ຽວຂ້ອງຕ່າງໆ, ປະຈຸບັນ, ຕາແສງສິນແຈ້ງ ໄດ້ວາງແຜນກຳນົດສຳເລັດແລ້ວ ແລະ ບັນລຸໄດ້ 5/19 ມາດຖານກ່ຽວກັບການກໍ່ສ້າງຊົນນະບົດໃໝ່.
“ພວກຂ້າພະເຈົ້າໄດ້ໂຄສະນາ, ຂົນຂວາຍປະຊາຊົນເສີມຂະຫຍາຍກຳລັງແຮງ. ດັ່ງນັ້ນປະຊາຊົນທັງໝົດໃນ 9 ບ້ານຂອງຕາແສງສິນແຈ້ງ ໄດ້ເຫັນດີປະກອບທີ່ດິນເພື່ອກໍ່ສ້າງທາງຄົມມະນາຄົມ, ໂຮງຮຽນ, ສຸກສາລາ, ຫໍວັດທະນະທຳ. ທາງຕາແສງໄດ້ວາງແຜນການກໍ່ສ້າງຊົນນະບົດໃໝ່ຢ່າງລະອຽດຄື, ແຕ່ລະປີຈະສູ້ຊົນປະຕິບັດສຳເລັດ 4 ມາດຖານ“.
ດ້ວຍຄວາມມານະພະຍາຍາມ, ສາມັກຄີເສີມຂະຫຍາຍກຳລັງພາຍໃນ ເພື່ອກໍ່ສ້າງຊົນນະບົດໃໝ່ຂອງອຳນາດການປົກຄອງ ແລະ ປະຊາຊົນບັນດາເຜົ່າໃນຕາແສງ, ດ້ວຍບັນດາວຽກງານອັນລະອຽດ, ສິນແຈ້ງ ພວມພະຍາຍາມປະຕິບັດສຳເລັດບັນດາມາດຖານກໍ່ສ້າງຊົນນະບົດໃໝ່ຢ່າງວ່ອງໄວ. ແລະສູ້ຊົນຮອດທ້າຍປີ 2015 ຈະສຳເລັດມາດຖານທັງໝົດໃນໂຄງການກໍ່ສ້າງຊົນນະບົດໃໝ່.