(vovworld) - ຕາແສງ ແຄ໋ງທ້ຽນ, ເມືອງ ອຽນແຄ໋ງ, ແມ່ນໜຶ່ງໃນ 3 ຕາແສງທຳອິດຂອງແຂງ ນິງບິ່ງ ບັນລຸໄດ້ມາດຖານກ່ຽວກັບການກໍ່ສ້າງຊົນນະບົດໃໝ່ນັບແຕ່ຕົ້ນປີ 2014. ນອກຈາກການປ່ຽນແປງດ້ານພື້ນຖານໂຄງລ່າງ, ທາງຄົມມະນາຄົມແລ້ວ, ຊີວິດຂອງປະຊາຊົນຢູ່ແຫ່ງນີ້ກໍ່ໄດ້ຮັບການພັດທະນາຢ່າງບໍ່ຢຸດຢັ້ງ, ປີ 2014, ລາຍຮັບສະເລ່ຍຂອງປະຊາຊົນບັນລຸ 25 ລ້ານດົ່ງ1ຄົນ/ປີ.
ລຸງ ຟ້າມງອກກວ່ຽນ, ຢູ່ບ້ານ 1, ຕາແສງ ແຄ໋ງທ້ຽນ, ບົວລະບັດຕົ້ນໄມ້ປະດັບ
(ພາບ: ອິນເຕີແນດ)
ໂດຍແມ່ນທ້ອງຖີ່ນທີ່ມີເນື້ອທີ່ຜະລິດກະສິກຳໜ້ອຍສຸດໃນເມືອງ, ດັ່ງນັ້ນຕາແສງ ແຄ໋ງທ້ຽນ ໄດ້ສຸມໃສ່ຫັນປ່ຽນໂຄງປະກອບກະສິກຳ, ພັດທະນາຂະແໜງອາຊີບ, ເພີ່ມອັດຕາແຮງງານບໍລິການ. ໃນນັ້ນເອົາໃຈໃສ່ເປັນພິເສດເຖິງການພັດທະນາອາຊີບປູກຕົ້ນໄມ້ປະດັບ ແລະ ເຂົ້າຂຽບ, ເຂົ້າປຸ້ນ. ປະຈຸບັນ, ອາຊີບປູກຕົ້ນໄມ້ປະດັບສາມາດດຶງດູດເກືອບ 300 ຄອບຄົວໃນຕາແສງເຂົ້າຮ່ວມ. ລາຍຮັບຈາກການປູກຕົ້ນໄມ້ໃຫ້ແຕ່ລະຄອບຄົວແມ່ນແຕ່ສິບເຖິງຮ້ອຍລ້ານດົ່ງ/ປີ. ລາຍຮັບຈາກຂະແໜງອາຊີບ ແລະ ການບໍລິການບັນລຸກວ່າ 70% ຍອດມູນຄ່າຜະລິດອຸດສາຫະກຳ, ອຸດສາຫະກຳ - ຫັດຖະກຳນ້ອຍ ແລະ ການບໍລິການໃນທົ່ວຕາແສງ.
ທົ່ວຕາແສງມີກວ່າ 40 ຄອບຄົວເຮັດອາຊີບຜະລິດເຂົ້າປຸ້ນ, ເຂົ້າຂຽບ,, ດ້ວຍລາຍຮັບນັບສິບລ້ານດົ່ງ/ປີ. ໂດຍໄດ້ຮັບການຊ່ວຍເຫຼືອແຫຼ່ງທຶນເພື່ອສົ່ງເສີມອຸດສາຫະກຳ, ແກ້ໄຂວຽກເຮັດງານທຳ, ຫຼາຍຄອບຄົວໄດ້ລົງທຶນປະກອບເຄື່ອງຈັກ, ຍົກສູງສະມັດຕະພາບ, ຄຸນນະພາບຜະລິດຕະພັນ, ຕອບສະໜອງຄວາມຮຽກຮ້ອງຕ້ອງການຂອງລູກຄ້າ. ທ່ານ ຫງວຽນວັນກ່ອງ, ຜູ້ເຮັດອາຊີບຜະລິດເຂົ້າປຸ້ນ, ເຂົ້າຂຽບ, ໃຫ້ຮູ້ວ່າ:
“ຂອບຄົວຂ້າພະເຈົ້າຜະລິດເຂົ້າຂຽບນີ້ແຕ່ດົນແລ້ວ, ເມື່ອນຳໃຊ້ເຄື່ອງຈັກເຂົ້າໃນການຜະລິດແມ່ນປະຢັດເວລາໄດ້ຫຼາຍ. ກ່ອນນີ້, ເພື່ອບົດແປ້ງຜະລິດເຂົ້າຂຽບໃຫ້ໄດ້ 200 ອັນແມ່ນຕ້ອງເສຍເວລາ 3 ຊົ່ວໂມງເຄິ່ງ, ແຕ່ປະຈຸບັນມີແຕ່ເຄິ່ງຊົ່ວໂມງເທົ່ານັ້ນ“.
ຍ້ອນຕັ້ງໜ້າຫັນປ່ຽນຂະແໜງອາຊີບ, ສ້າງວຽກເຮັດງານທຳ, ເພີ່ມລາຍຮັບ. ມາຮອດປະຈຸບັນ, ຊີວິດຂອງປະຊາຊົນໃນຕາແສງ ແຄ໋ງທ້ຽນ ນັບມື້ນັບດີຂຶ້ນ. ລາຍຮັບສະເລ່ຍໃສ່ຫົວຄົນໃນປີ 2014 ບັນລຸ 28,5 ລ້ານດົ່ງ/ປີ, ອັດຕາສ່ວນຄອບຄົວທຸກຍາກຍັງເຫຼືອພຽງ 2,5%. ບັນດານະໂຍບາຍສັງຄົມໄດ້ຮັບປະກັນ, ໂຮງຮຽນທັງ 3 ຊັ້ນລ້ວນແຕ່ບັນລຸມາດຕະຖານແຫ່ງຊາດ; ຂະບວນການສົ່ງເສີມການຮຽນ, ສົ່ງເສີມຜູ້ທີ່ມີຄວາມສາມາດພັດທະນາຢ່າງແຮງ. ກວ່າ 70% ຈຳນວນປະຊາຊົນເຂົ້າຮ່ວມປະກັນສຸຂະພາບ. ປະຊາຊົນໄດ້ຮັບການສົ່ງເສີມສຸຂະພາບໃນເບື້ອງຕົ້ນຢູ່ສຸກສາລາຕາແສງ. ທ່ານ ຫງວຽນຊວນທ້ວນ, ຊາວບ້ານເຈີ້ແຊງ, ແບ່ງປັນວ່າ:
“ພາຍຫຼັງບັນລຸມາດຖານຊົນນະບົດໃໝ່, ໂສມໜ້າຊົນນະບົດໄດ້ມີການປ່ຽນໃໝ່ຢ່າງຮອບດ້ານ, ຈາກນັ້ນນຳມາເຊິ່ງຜົນປະໂຫຍດຢ່າງແທດຈິງໃຫ້ສັງຄົມ ແລະປະຊາຊົນ. ພິເສດ, ຮູບແບບຊົນນະບົດໃໝ່ໄດ້ສ້າງຊີວິດໃໝ່, ປະສິດທິຜົນໃໝ່ໃນການພັດທະນາເສດຖະກິດຂອງປະຊາຊົນ, ນັບແຕ່ໄຟຟ້າ, ທາງຄົມມະນາຄົມ, ໂຮງຮຽນ, ສຸກສາລາ, ສູນບໍລິການ. ຊີວິດທາງດ້ານວັດຖຸ ແລະ ຈິດໃຈຂອງປະຊາຊົນນັບມື້ນັບໄດ້ຮັບການຍົກສູງຂຶ້ນ.“
ໂດຍກຳນົດການກໍ່ສ້າງພື້ນຖານໂຄງລ່າງເປັນຂອດບຸກທະລຸ, ດ້ວຍທິດນຳລັດ ແລະ ປະຊາຊົນພ້ອມກັນເຮັດ, ນອກຈາກງົບປະມານໜູນຊ່ວຍຂອງລັດແມ່ນ 80 ຕື້ດົ່ງ, ຕາແສງຍັງລະດົມແຫຼ່ງກຳລັງສັງຄົມໄດ້ກວ່າ 91 ຕື້ດົ່ງ. ປະຊາຊົນນັບສິບຄອບຄົວໄດ້ບໍລິຈາກທີ່ດິນນັບພັນຕາແມດເພື່ອຮັບໃຊ້ໃຫ້ແກ່ການກໍ່ສ້າງຊົນນະບົດໃໝ່. ມາຮອດປະຈຸບັນ, ທົ່ວຕາແສງມີທາງເບຕົງ 24 ກມ. ທາງໃນບ້ານກໍ່ສະອາດ, ປອດໂປ່ງ, ສ້າງຄວາມສະດວກໃຫ້ແກ່ການໄປມາ.
ພາຍຫຼັງ 3 ປີແຫ່ງການກໍ່ສ້າງຊົນນະບົດໃໝ່, ຕາແສງ ແຄ໋ງທ້ຽນ ໄດ້ປະຕິບັດສຳເລັດ 19 ມາດຖານ, ກາຍເປັນຕາແສງຊົນນະບົດໃໝ່ທີ່ດີເດັ່ນຂອງແຂວງນິງບິ່ງ. ທ່ານ ຟ້າມມິງແຊງ, ປະທານຄະນະກຳມະການປະຊາຊົນຕາແສງ ແຄ໋ງທ້ຽນ, ໃຫ້ຮູ້ວ່າ: ໂດຍກຳນົດວ່າກໍ່ສ້າງຊົນນະບົດໃໝ່ແມ່ນແຜນນະໂຍບາຍໃຫຍ່ທີ່ມີຄວາມໝາຍ, ຄວາມສຳຄັນພິເສດ ແລະ ມີລັກສະນະຍຸດທະສາດ, ຍາວນານ. ດັ່ງນັ້ນເລື່ອງກາຍເປັນຊົນນະບົດໃໝ່ແມ່ນກຳລັງໜູນເພື່ອໃຫ້ພະນັກງານ ແລະ ປະຊາຊົນຕາແສງ ແຄ໋ງທ້ຽນ ຕັດສິນໃຈກວ່າອີກໃນການຮັກສາ, ພັດທະນາ ແລະ ຍົກສູງຄຸນນະພາບບັນດາມາດຖານ, ປະຕິບັດສຳເລັດຈຸດໝາຍກໍ່ສ້າງຊົນນະບົດໃໝ່ໄລຍະ 2014 – 2020.
“ຕາແສງບັນລຸໄດ້ຄາດໝາຍກໍ່ສ້າງຊົນນະບົດໃໝ່, ແຕ່ຍັງຄົງສູ້ຊົນເພື່ອຮັກສາ ແລະ ຍົກສູງຄຸນນະພາບບັນດາມາດຖານຕື່ມອີກ. ຕົວຢ່າງຄືມາດຖານກໍ່ສ້າງຊົນນະບົດໃໝ່ບັນລຸໄດ້ແລ້ວ, ແຕ່ຍັງຄົງບຸລະນະສ້ອມແປງຕື່ມອີກ“.
ດ້ວຍບັນດາຜົນງານທີ່ບັນລຸໄດ້ນັ້ນ, ພະນັກງານ ແລະ ປະຊາຊົນຕາແສງແຄ໋ງທ້ຽນ ສືບຕໍ່ເສີມຂະຫຍາຍຄວາມສາມາດບົ່ມຊ້ອນຕ່າງໆ, ສູ້ຊົນເພື່ອເຮັດໃຫ້ຕາແສງບໍ່ພຽງແຕ່ແມ່ນຕາແສງດີເດັ່ນຂອງແຂວງ ນິງບິ່ງ ເທົ່ານັ້ນ, ຫາກຍັງຂອງທົ່ວປະເທດອີກດ້ວຍ.