(vovworld)- ການກໍ່ສ້າງຊົນນະບົດໃໝ່ຢູ່ແຂວງ Gia Lai ດ້ວຍ 19 ມາດຖານ ແມ່ນບັນຫາທີ່ຍັງປະສົບກັບຄວາມຫຍຸ້ງຍາກຫຼາຍຢ່າງ, ເພາະວ່າຊີວິດຂອງຊາວທ້ອງຖີ່ນໃນປະຈຸບັນຍັງບໍ່ທັນໄດ້ຮັບການປັບປຸງພໍປານໃດ, ພິເສດແມ່ນສຳຫຼັບຊາວຊົນເຜົ່າສ່ວນໜ້ອຍ. ແຕ່ໃນຄວາມຫຍຸ້ງຍາກນັ້ນ, ຕາແສງ Ayun Ha, ເມືອງ Phu Thien, ແຂວງ Gia Lai ພັດມີວິທີການທີ່ເໝາະສົມ, ລະດົມແຫຼ່ງກຳລັງຈາກປະຊາຊົນໄດ້ຫຼາຍ ເພື່ອກໍ່ສ້າງຊົນນະບົດໃໝ່.
ນັບແຕ່ຜັນຂະຫຍາຍໂຄງການກໍ່ສ້າງຊົນນະບົດໃໝ່, ໂສມໜ້າຊັນນະບົດຢູ່ Phu Thienໄດ້ຮັບການປ່ຽນໃໝ່ເທື່ອລະກ້າວ
(ພາບ: khuyennongvn.gov.vn)
ເມື່ອມາຢ້ຽມຢາມຕາແສງ Ayun Ha ເຊິ່ງແມ່ນຕາແສງແບບຢ່າງໃນໂຄງການກໍ່ສ້າງຊົນນະບົດໃໝ່ຢູ່ Phu Thien, ຜູ້ໃດກໍ່ສາມາດເຫັນໄດ້ຈຸດພິເສດໃນການດຳເນີນຊີວິດປະຈຳວັນ, ນັ້ນແມ່ນສະຕິຮັກສາອະນາໄມສິ່ງແວດລ້ອມຂອງປະຊາຊົນຢູ່ທີ່ນີ້. ແບບແຜນດຳເນີນຊີວິດນີ້ໄດ້ມີມານັບແຕ່ເມືອ່ຕາແສງຜັນຂະຫຍາຍຮູບແບບກໍ່ສ້າງຊົນນະບົດໃໝ່. ເຖິງວ່າຊີວິດຍັງປະສົບກັບຄວາມຫຍຸ້ງຍາກຫຼາຍຢ່າງກໍ່ຕາມ, ແຕ່ເມື່ອຮັບຮູ້ໄດ້ວ່າການກໍ່ສ້າງຊົນນະບົດໃໝ່ຈະສ້າງການຫັນປ່ຽນໃນທຸກດ້ານໂດຍພື້ນຖານ. ດັ່ງນັ້ນພໍ່ແມ່ປະຊາຊົນຈຶງທຳຄວາມສະອາດຖະໜົນຫົນທາງ, ກໍ່ສ້າງວິດຖ່າຍ, ຂຸດນ້ຳສ້າງ... ບໍ່ພຽງແຕ່ກໍ່ສ້າງບັນດາກິດຈະກຳດຳເນີນຊີວິດໃນຄອບຄົວເທົ່ານັ້ນ, ຫຼາຍຄອບຄົວຍັງມອບທີ່ດິນເພື່ອເປີດກວ້າງຫົນທາງ ແລະ ກໍ່ສ້າງຫໍວັດທະນະທຳ ເພື່ອຜົນປະໂຫຍດຂອງບ້ານ,ຕາແສງອີກດ້ວຍ. ອ້າຍ Nguyen Manh Cuong, ຜູ້ທີ່ໄດ້ມອບທີ່ດິນ 200 ຕາລາງແມັດເພື່ອກໍ່ສ້າງຫໍວັດທະນະທຳບ້ານ, ໃຫ້ຮູ້ວ່າ:
”ຜ່ານການປຸກລະດົມຂົນຂວາຍຂອງທົ່ວພັກ ແລະ ອຳນາດການປົກຄອງທຸກຂັ້ນກ່ຽວກັບໂຄງການກໍ່ສ້າງຊົນນະບົດໃໝ່, ພວກຂ້າພະເຈົ້າໄດ້ເຂົ້າໃຈກ່ຽວກັບແຜນນະໂຍບາຍ, ນະໂຍບາຍຂອງພັກ ແລະ ລັດ. ເມື່ອເຫັນວ່າທີ່ດິນຂອງບ້ານຍັງຂາດ, ພວກຂ້າພະເຈົ້າກໍ່ສະໝັກໃຈມອບທີ່ດິນຂອງຕົນເພື່ອກໍ່ສ້າງລະບົບຫົນທາງ, ຫໍວັດທະນະທຳໃຫ້ບ້ານ”.
ນັບແຕ່ຕົ້ນປີມາຮອດປະຈຸບັນ, ຈາກແຫຼ່ງທຶນຂອງໂຄງການຈຸດໝາຍແຫ່ງຊາດກ່ຽວກັບການກໍ່ສ້າງຊົນນະບົດໃໝ່, ຕາແສງ Ayun Ha ໄດ້ມອບງົວ 12 ໂຕໃຫ້ແກ່ 12 ຄອບຄົວທີ່ທຸກຍາກ, ຂົນຂວາຍເກືອບ 100 ຄອບຄົວຍົກຍ້າຍໄປອາໄສຢູ່ບ່ອນອື່ນ ແລະ ກໍ່ສ້າງເຂດຄອກ, ຟາມ ລ້ຽງສັດ, ສັດປີກຢູ່ແຫ່ງທີ່ເໝາະສົມ; ບຸກເບີກຫົນທາງໃນບ້ານນັບສິມກິໂລແມັດ. ປະຊາຊົນໃນຕາແສງໄດ້ສະໝັກໃຈມອບທີ່ດິນເກືອບ 1000 ຕາລາງແມັດ ເພື່ອກໍ່ສ້າງທາງໃນເຂດຊົນນະບົດ, ກໍ່ສ້າງຫໍວັດທະນະທຳ. ປະຊາຊົນຍັງບໍລິຈາກເງິນ, ປະກອບເຫື່ອແຮງ ເພື່ອພ້ອມກັບອຳນາດການປົກຄອງຕາແສງກໍ່ສ້າງທາງຄົມມະນາຄົມດ້ວຍເບຕົງໄດ້ກວ່າ 5 ກ.ມ. ອຳນາດການປົກຄອງຕາແສງ Ayun Ha ໄດ້ປຶກສາຫາລື, ເຫັນດີເປັນເອກະພາບເລືອກເຟັ້ນບັນດາມາດຕະການທີ່ແທດເໝາະກັບຕົວຈິງ ແລະ ລະດົມທຸກແຫຼ່ງກຳລັງຈາກບັນດາອົງການຈັດຕັ້ງມະຫາຊົນ ແລະ ປະຊາ ຊົນເພື່ອພ້ອມກັນປະຕິບັດ. ທ່ານ Nguyen Sang, ປະທານຄະນະ ກຳມະການປະຊາຊົນຕາແສງ Ayun Ha, ໃຫ້ຮູ້ວ່າ:
”ຄາດໝາຍໃດຖືກຍົກມາກ່ອນ ພວກຂ້າພະເຈົ້າກໍ່ຜັນຂະຫຍາຍ ກ່ອນ. ຕົວຢ່າງຄືຢາກກໍ່ສ້າງຫໍວັດທະນະທຳ, ພວກຂ້າພະເຈົ້າກໍ່ຂົນຂວາຍ ປະຊາຊົນໃນບ້ານຕ່າງໆມອບທີ່ດິນເພື່ອມີເນື້ອທີ່ກໍ່ສ້າງ. ຈາກນັ້ນ, ພວກເຮົາກໍ່ວາງແຜນກໍ່ສ້າງຕະຫຼາດ. ເພື່ອດຳເນີນວຽກງານນີ້, ພວກຂ້າພະເຈົ້າໄດ້ຂົນຂວາຍປະຊາຊົນທັງບໍລິຈາກທີ່ດິນ, ທັງຂາຍດ້ວຍລາຄາຖືກ”.
ກໍ່ສ້າງທາງຢູ່ແຂວງ Gia Lai
(ພາບ: google.com.vn)
ປະຈຸບັນ, Ayun Ha ແມ່ນຕາແສງທີ່ມີພື້ນຖານເສດຖະກິດພັດທະນາທີ່ສຸດຂອງເມືອງ Phu Thien, ຊີວິດຂອງປະຊາຊົນເປັນປົກກະຕິ, ລະບົບທາງຄົມມະນາຄົມໄດ້ຮັບການປູຢາງ ແລະ ກໍ່ສ້າງດ້ວຍເບຕົງ. ລະບົບຄອງເໝືອງຂອງຕາແສງກໍ່ໄດ້ຮັບການກໍ່ສ້າງຖາວອນໂດຍພື້ນຖານ; ຮັບປະກັນໄຟຟ້າສະໜອງໃຫ້ 98% ຈຳນວນຄອບຄົວນຳໃຊ້ເປັນປະຈຳ; ມີຕະຫຼາດ, ລະບົບໂຮງຮຽນ, ສຸກສາລາບັນລຸມາດຕະຖານທີ່ໄດ້ກຳນົດ... ບົດຮຽນໃນການກໍ່ສ້າງຊົນນະບົດໃໝ່ຂອງ Ayun Ha ໄດ້ຮັບການຜັນຂະຫຍາຍໃນທົ່ວເມືອງ Phu Thien. ທ່ານ Ksor Duong, ຫົວໜ້າຫ້ອງການກະສີກຳ ແລະ ພັດທະນາຊົນນະບົດ, ຜູ້ປະຈຳການຄະນະຊີ້ນຳໂຄງການກໍ່ສ້າງຊົນນະບົດໃໝ່ເມືອງ Phu Thien, ເລົ່າສູ່ຟັງວ່າ:
”ພວກຂ້າພະເຈົ້າສົມທົບກັບກຳລັງຊາວໜຸ່ມຮ່ວມແຮງຮ່ວມໃຈກໍ່ສ້າງຊົນນະບົດໃໝ່ ແລະ ໄດ້ເຮັດວຽກງານໂຄສະນາເປັນຢ່າງດີ. ນອກນັ້ນ, ພວກຂ້າພະເຈົ້າກໍ່ສົມທົບກັບສະມາຄົມແມ່ຍິງ, ສະມາຄົມຊາວກະສີກອນ, ແລະ ນັກຮົບເກົ່າຕັ້ງໜ້າຂົນຂວາຍ, ໂຄສະນາເພື່ອໃຫ້ປະຊາຊົນເຂົ້າໃຈໄດ້ບັນຫາກໍ່ສ້າງຊົນນະບົດໃໝ່ແມ່ນເພື່ອຜົນປະໂຫຍດຂອງເຂົາເຈົ້າເອງ. ເມື່ອມີຄວາມເຂົ້າໃຈ, ເຂົາເຈົ້າຈະສືບຕໍ່ມອບທີ່ດິນ ແລະ ປະກອບເຫື່ອແຮງຂອງຕົນເຂົ້າໃນໂຄງການກໍ່ສ້າງຊົນນະບົດໃໝ່ໃນໄລຍະຕໍ່ໄປ”.
ຊົນນະບົດຢູ່ Ayun Ha ເວົ້າສະເພາະ, ເມືອງ Phu Thien, ແຂວງ Gia Lai ເວົ້າລວມພວມມີການປ່ຽນໃໝ່. ບົດຮຽນກ່ຽວກັບຄວາມນຶກຄິດ, ວິທີເຮັດຢ່າງເໝາະສົມ, ໄດ້ຮັບການສະໜັບສະໜູນຢ່າງສຸດຈິດສຸດໃຈຈາກປະຊາຊົນ. ສິ່ງດັ່ງກ່າວໄດ້ກາຍເປັນກຳລັງໜູນທີ່ສຳຄັນເພື່ອໃຫ້ໂຄງການກໍ່ສ້າງຊົນນະບົດໃໝ່ຢູ່ Ayun Ha ເວົ້າສະເພາະ ແລະ ເມືອງ Phu Thien ເວົ້າລວມ, ສືບຕໍ່ໄດ້ຮັບການປະຕິບັດຢ່າງວ່ອງໄວ ແລະ ນຳມາເຊິ່ງປະສິດທິຜົນສູງ.
Pham Duy