(vovworld) - ດ້ວຍການໝູນໃຊ້ຄວາມສາມາດບົ່ມຊ້ອນ, ທ່າສະດວກຂອງທ້ອງຖີ່ນ, ແຂວງນິງທ້ວນ ພວມຫັນປ່ຽນຢ່າງແຮງ, ສ້າງໂຄງປະກອບຂະແໜງລ້ຽງສັດຄືນໃໝ່, ໃນນັ້ນສຸມໃສ່ພັດທະນາສັດລ້ຽງ, ສັດປີກນຳມາເຊິ່ງມູນຄ່າດ້ານເສດຖະກິດສູງ, ປະກອບສ່ວນປັບປຸງຊີວິດການເປັນຢູ່ຂອງປະຊາຊົນ. ນີ້ກໍ່ແມ່ນໜຶ່ງໃນບັນດາທິດເດີນທີ່ຖືກຕ້ອງ, ວິທີເຮັດທີ່ດີ, ຊ່ວຍໃຫ້ຫຼາຍທ້ອງຖີ່ນໃນແຂວງນິງທ້ວນ ປະຕິບັດສຳເລັດບັນດາມາດຖານໃນໂຄງການກໍ່ສ້າງຊົນນະບົດໃໝ່ໂດຍໄວ.
ຊາວນິງທ້ວນລ້ຽງງົວ
ໂດຍກຳນົດວ່າລ້ຽງສັດແມ່ນທ່າແຮງໃນການຜະລິດກະສິກຳ, ໄລຍະ 2011-2015, ແຂວງນິງທ້ວນ ໄດ້ສຸມໃສ່ປະຕິບັດແຜນນະໂຍບາຍພັດທະນາການລ້ຽງສັດຕາມຮູບແບບຟາມລວມສຸນຕິດພັນກັບການພັດທະນາທ່ົງຫຍ້າ. ຍ້ອນເຫດນັ້ນຈຶ່ງເສີມຂະຫຍາຍໄດ້ຄວາມສາມາດບົ່ມຊ້ອນ, ທ່າສະດວກຂອງທ້ອງຖີ່ນ, ຊຸກຍູ້ການລ້ຽງສັດມີເຂົາຂອງແຂວງໃຫ້ພັດທະນາ. ປະຈຸບັນຝູງສັດລ້ຽງທັງໝົດຂອງແຂວງນິງທ້ວນ ມີປະມານ 254.000 ໂຕ, ໃນນັ້ນຫຼາຍກວ່າໝູ່ແມ່ນໂຕແກະ ດ້ວຍ 92.000 ໂຕ, ງົວມີກວ່າ 89.000 ໂຕ. ໃນຊຸມປີມໍ່ໆມານີ້, ຕໍ່ໜ້າການຜັນແປຢ່າງສັບສົນຂອງດິນຟ້າອາກາດ ແລະ ໄພແຫ້ງແລ້ງແກ່ຍາວ, ແຂວງ ນິງທ້ວນ ໄດ້ມີແຜນນະໂຍບາຍຂົນຂວາຍປະຊາຊົນລ້ຽງສັດຕາມແບບລ້ຽງປ່ອຍ, ສົມທົບກັບການທອມສັດ, ນີ້ຖືກຖືວ່າແມ່ນທິດທາງໃໝ່ທີ່ນຳມາເຊິ່ງປະສິດທິຜົນໃຫ້ແກ່ຜູ້ລ້ຽງສັດ. ທ່ານ ເລກວຽດທັ໋ງ, ຮອງປະທານຄະນະກຳມະການປະຊາຊົນຕາແສງ ຍີ້ຮ່າ, ເມືອງ ທ້ວນນາມ, ໃຫ້ຮູ້ວ່າ:
“ການຫັນມາລ້ຽງສັດຕາມຮູບແບບທອມສັດຢູ່ເຮືອນ ໄດ້ນຳມາເຊິ່ງຜົນປະໂຫຍດຈຳນວນໜຶ່ງຢ່າງແນ່ນອນໃຫ້ແກ່ປະຊາຊົນ, ເຊັ່ນປະຢັດແຮງງານ, ຄວບຄຸມພະຍາດ ແລະ ຕິດຕາມການພັດທະນາໄດ້, ເມື່ອງົວບໍ່ຕ້ອງໄປມາຫຼາຍມັນຈະພັດທະນາໄວກວ່າ, ອັນຈະຊ່ວຍໃຫ້ປະຊາຊົນພັດ ທະນາເສດຖະກິດຄອບຄົວ“.
ຍ້ອນດິນຟ້າອາກາດອຳນວຍຄວາມສະດວກໃຫ້ການລ້ຽງສັດ, ດັ່ງນັ້ນອາຊີບລ້ຽງແບ້, ແກະ ຢູ່ນິງທ້ວນ ຈຶ່ງພັດທະນາຢ່າງແຮງ, ເຊິ່ງສຸມໃສ່ຕົ້ນຕໍຢູ່ບັນດາເມືອງນິງເຊີນ, ນິງເຟືອກ, ນິງຫາຍ, ທ້ວນນາມ, ທ້ວນບັກ. ຊີ້ນແກະແມ່ນອາຫານພິເສດທີ່ພວມໄດ້ຮັບຄວາມນິຍົມຈາກນັກທ່ອງທ່ຽວ ແລະ ຜູ້ຊົມໃຊ້ພາຍໃນປະເທດ. ນັບແຕ່ນີ້ເຖິງປີ 2020, ແຂວງນິງທ້ວນ ກຳນົດຍູ້ແຮງຂະແໜງລ້ຽງສັດ, ພັດທະນາຕາມຮູບແບບຟາມ, ຂະໜາດອຸດສາຫະກຳ ແລະ ເຄິ່ງອຸດສາຫະກຳ, ຍົກສູງຄຸນນະພາບຝູງສັດລ້ຽງ, ຕອບສະໜອງຄວາມຕ້ອງການຂອງອຸດສາຫະກຳຜະລິດປຸງແຕ່ງ, ຮັບປະກັນຄວາມປອດໄພ ແລະ ສຸຂະອະນາໄມຂອງອາຫານ, ຍູ້ແຮງບັນດາຜະລິດຕະພັນສົ່ງອອກ. ໄລຍະຈະມາເຖິງ, ນິງທ້ວນ ສ້າງເຂດປູກຝັງ, ຜະລິດສະເພາະ ດ້ວຍຂະໜາດໃຫຍ່, ຕິດພັນກັບບັນດາເຂດລ້ຽງສັດ. ນິງທ້ວນ ຈະສູ້ຊົນພັດທະນາຝູງສັດລ້ຽງແບບລວມສູນ ດ້ວຍງົວ 55.000 ໂຕ, ແບ້ 35.000 ໂຕ ແລະ ເກະ ປະມານ 60.000 ໂຕ. ທ່ານ ຟານກວາງຖື້ວ, ຮອງຫົວໜ້າພະແນກກະສິກຳ ແລະ ພັດທະນາຊົນນະບົດແຂວງ ນິງທ້ວນ, ໃຫ້ຮູ້ວ່າ:
“ເລື່ອງປົກປັກຮັກສາ ແລະ ພັດທະນາຝູງສັດລ້ຽງແມ່ນສຳຄັນທີ່ສຸດ, ຂະແໜງກະສິກຳ, ທ້ອງຖີ່ນ, ແຂວງກໍ່ຈະຍູ້ແຮງວຽກງານໂຄສະນາຂົນຂວາຍ, ແນະນຳປະຊາຊົນປູກຫຍ້າ ຕິດພັນກັບຫົວອາຫານໃຫ້ຝູງສັດລ້ຽງ. ນີ້ແມ່ນບັນຫາມີຄວາມໝາຍຕັດສິນ. ຫວ່າງແລ້ວນີ້ ພ້ອມກັບການໜູນຊ່ວຍຂອງລັດ, ໂດຍອີງໃສ່ຂະໜາດຂອງຝູງສັດລ້ຽງ, ປະຊາຊົນໄດ້ເປັນເຈົ້າການໃນການປູກຫຍ້າເພື່ອໃຊ້ເປັນອາຫານໃຫ້ຝູງສັດລ້ຽງ. ນີ້ແມ່ນວິທີເຮັດດີທີ່ສຸດ“.
(ພາບປະກອບ)
ເພື່ອມຸ່ງໄປເຖິງການລ້ຽງແກະ, ແບ້ແບບຍືນຍົງ. ພະແນກວິທະຍາສາດ ແລະ ເຕັກໂນໂລຢີແຂວງນິງທ້ວນ ທັງຜັນຂະຫຍາຍການ “ແນະນຳດ້ານພູມສາດໃຫ້ຜະລິດຕະພັນຊີ້ນແກະຂອງນິງທ້ວນ“. ຜ່ານນັ້ນຈະຊ່ວຍຍົກສູງມູນຄ່າເສດຖະກິດໃຫ້ຜະລິດຕະພັນພິເສດຂອງແຂວງ, ພ້ອມທັງສ້າງປະຖົມປັດໃຈໃຫ້ແກ່ການສົ່ງອອກຜະລິດຕະພັນຊີ້ນແກະ ນິງທ້ວນ ໄປຍັງປະເທດຕ່າງໆໃນອະນາຄົດ. ດ້ວຍເລື່ອງໝູນໃຊ້ຄວາມສາມາດບົ່ມຊ້ອນ, ທ່າແຮງ ແລະ ທິດທາງຫັນປ່ຽນຢ່າງແຮງຂອງຂະແໜງລ້ຽງສັດນັ້ນ, ໄດ້ປະກອບສ່ວນປັບປຸງ, ເພີ່ມລາຍຮັບໃຫ້ແກ່ປະຊາຊົນ, ພ້ອມທັງປະກອບສ່ວນຢ່າງມີປະສິດທິຜົນເຂົ້າໃນໂຄງການກໍ່ສ້າງຊົນນະບົດໃໝ່ຢູ່ຫຼາຍທ້ອງຖີ່ນ. ນັບພັນຄອບຄົວຊາວກະສິກອນ ໄດ້ໜູນຊ່ວຍແຮງງານນັບພັນວັນ, ບໍລິຈາກທີ່ດິນ, ປະກອບເງິນເພື່ອກໍ່ສ້າງພື້ນຖານໂຄງລ່າງ. ຜ່ານ 3 ປີແຫ່ງການປະຕິບັດໂຄງການກໍ່ສ້າງຊົນນະບົດໃໝ່, ມາຮອດປະຈຸບັນ 100% ຈຳນວນຕາແສງຂອງນິງທ້ວນ ໄດ້ປະຕິບັດສຳເລັດວຽກງານວາງແຜນກຳນົດ. ໃນປີນີ້ຈະມີ 11 ຕາແສງບັນລຸໄດ້ 19/19 ມາດຖານກໍ່ສ້າງຊົນນະບົດໃໝ່. ອັດຕາສ່ວນຄອບຄົວທຸກຍາກຢູ່ເຂດຊົນນະບົດຫຼຸດລົງຢ່າງແຮງ, ລາຍຮັບສະເລ່ຍໃສ່ຫົວຄົນເຂດຊົນນະບົດເພີ່ມຂຶ້ນຈາກ 11,95 ລ້ານດົ່ງ/ຄົນ/ປີ 2011 ຂຶ້ນເຖິງເກືອບ 20 ລ້ານດົ່ງ/ຄົນ/ປີ 2014. ມາຮອດປະຈຸບັນ, ບັນດາຕາແສງເກືອບທັງໝົດບັນລຸໄດ້ມາດຖານກໍ່ສ້າງພື້ນຖານໂຄງລ່າງ, ຄົມມະນາຄົມ, 100% ຈຳນວນຕາແສງ ແລະ ບ້ານໄດ້ມີໄຟຟ້າຈາກຕາໜ່່າງໄຟຟ້າແຫ່ງຊາດ.
ຈາກການກຳນົດຄວາມສາມາດບົ່ມຊ້ອນ, ທ່າສະດວກຂອງທ້ອງຖີ່ນໃນການພັດທະນາການລ້ຽງສັດ ນຳມາເຊິ່ງປະສິດທິຜົນດ້ານເສດຖະກິດ, ຈາກນັ້ນສ້າງເງື່ອນໄຂໃຫ້ປະຊາຊົນຕັ້ງໜ້າເຂົ້າຮ່ວມການກໍ່ສ້າງຊົນນະບົດໃໝ່, ນີ້ກໍ່ແມ່ນບົດຮຽນເພື່ອໃຫ້ຫຼາຍຕາແສງໃນແຂວງຮຳ່ຮຽນເອົາ. ສິ່ງດັ່ງກ່າວຍັງສະແດງໃຫ້ເຫັນວ່າ: ຖ້າມີວິທີເຮັດຢ່າງເໝາະສົມ, ສົມກັບຈິດໃຈຂອງປະຊາຊົນ, ນິງທ້ວນ ຈະສຳເລັດບັນດາຄາດໝາຍກ່ຽວກັບການກໍ່ສ້າງຊົນນະບົດໃໝ່ໂດຍໄວ.