(vovworld)-ການກໍ່ສ້າງຊົນນະບົດໃໝ່ແມ່ນແຜນນະໂຍບາຍໃຫຍ່ຂອງພັກ ແລະ ລັດ, ແມ່ນການຂົນຂວາຍທີ່ຮຽກຮ້ອງໃຫ້ມີຄວາມມານະພະຍາຍາມເຂົ້າຮ່ວມຢ່າງຕັ້ງໜ້າຂອງທັງລະບົບການເມືອງ ແລະ ຂອງທົ່ວສັງຄົມ. ໂດຍແມ່ນສະມາຊິກຂອງຄະນະຊີ້ນຳການກໍ່ສ້າງຊົນນະບົດໃໝ່, ສະມາຄົມຊາວກະສິກອນຫວຽດນາມ ມີບົດບາດແມ່ນກຳລັງໜູນຕົ້ນຕໍໃນການຜັນຂະຫຍາຍມະຕິຂອງພັກກ່ຽວກັບຂະບວນການກໍ່ສ້າງຊົນນະບົດໃໝ່.
(ພາບ: hoinongdanbacgiang.org.vn)
ໂດຍແມ່ນອົງການສັງຄົມການເມືອງທີ່ກວ້າງໃຫຍ່, ມີມູນເຊື້ອປະ ຫວັດຄວາມເປັນມາກວ່າ 80 ປີ, ສະມາຄົມຊາວກະສິກອນຫວຽດນາມແມ່ນອົງການສັງຄົມ, ການເມືອງທີ່ໝັ້ນຄົງເຂັ້ມແຂງນັບແຕ່ຂັ້ນສູນກາງລົງຮອດຂັ້ນຮາກຖານ, ເປັນແຫ່ງເຕົ້າໂຮມ, ສາມັກຄີຊາວກະສິກອນ ແລະ ບັນດາສະມາຊິກຂອງສະມາຄົມຊາວກະສິກອນຫວຽດນາມໃນຂະບວນ ການແຂ່ງຂັນຮັກຊາດ, ຍູ້ແຮງການຜະລິດ, ປະກອບສ່ວນຢ່າງເໝາະສົມເຂົ້າໃນບັນດາຜົນງານອັນໃຫຍ່ຫຼວງຂອງຂະແໜງອຸດສາຫະກຳຫວຽດນາມໃນໄລຍະຜ່ານມາ. ຈາກປະເທດໜຶ່ງທີ່ຂາດແຄນທັນຍາຫານ, ຫວຽດນາມ ໄດ້ກາຍເປັນໜຶ່ງໃນບັນດາປະເທດນຳໜ້າຢູ່ໃນໂລກກ່ຽວກັບຜະລິດຕະພັນກະເສດບາງປະເພດຄື: ເຂົ້າສານ, ກາເຟ, ໝາກຜິກໄທ, ໝາກມວງຫິມະພານ, ສິນໃນນ້ຳ… ປີນີ້, ເຖິງວ່າດິນຟ້າອາກາດມີການຜັນແປຢ່າງສັບສົນກໍ່ຕາມ, ແຕ່ຄາດວ່າປະລິມານການຜະລິດທັນຍາຫານຂອງຫວຽດນາມ ຍັງຄົງບັນລຸ 40 ລ້ານໂຕນ, ສົ່ງອອກເຂົ້າສານບັນລຸປະມານ 7 ລ້ານໂຕນ. ຫວ່າງແລ້ວນີ້, ໃນການເຮັດວຽກກັບການນຳສະມາຄົມຊາວກະສິກອນຫວຽດນາມ, ທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ Nguyen Phu Trong ໄດ້ຕີລາຄາສູງບົດບາດຂອງສະມາຄົມຊາວກະສິກອນທຸກຂັ້ນ ທີ່ໄດ້ເປັນເສນາທິການໃຫ້ພັກ, ລັດ ໃນການກໍ່ສ້າງຊົນນະບົດໃໝ່ ຕາມທິດທີ່ທັນສະໄໝເທື່ອລະກ້າວ, ທ່ານເລຂາທິການໃຫຍ່ Nguyen Phu Trong, ຊີ້ແຈ້ງວ່າ:
”ກະສິກຳ, ຊາວກະສິກອນ ແລະ ຊົນນະບົດ ແມ່ນຂົງເຂດສຳຄັນທີ່ສຸດ, ແມ່ນຍຸດທະສາດໃນພາລະກິດຫັນເປັນປະເທດອຸດສາຫະກຳ ແລະ ທັນສະໄໝ. ນີ້ແມ່ນພື້ນຖານ ແລະ ກຳລັງທີ່ສຳຄັນເພື່ອພັດທະນາເສດຖະກິດສັງຄົມຢ່າງໝັ້ນຄົງ, ຮັກສາຄວາມໝັ້ນຄົງ, ຮັບປະກັນການປ້ອງກັນຊາດ, ປ້ອງກັນຄວາມສະຫງົບ, ພິເສດແມ່ນການຄຳ້ປະກັນດ້ານສະບຽງອາຫານ, ຮັກສາສິ່ງແວດລ້ອມຊີວະພາບຂອງປະເທດຊາດ.. ”.
ທ່ານເລຂາທິການໃຫຍ່ Nguyễn Phú Trọng ພົບປະກັບຜູ້ແທນຊາວກະສີກອນທີ່ການເຮັດວຽກ
(ພາບ: dantri.com.vn)
ປະຈຸບັນ, ສະມາຄົມຊາວກະສິກອນຫວຽດນາມມີສະມາຊິກກວ່າ 10 ລ້ານຄົນ, ນີ້ແມ່ນກຳລັງແກ່ນສານໃນຂະບວນການກໍ່ສ້າງຊົນນະບົດໃໝ່, ດ້ວຍບັນດາມາດຕະຖານອັນລະອຽດ. ຕາມນັ້ນແລ້ວ, ເສດຖະກິດຊົນນະບົດພວມຫັນປ່ຽນຕາມທິດອຸດສາຫະກຳ, ການບໍລິການ, ຂະແໜງອາຊີບ, ບັນດາຮູບການຈັດຕັ້ງການຜະລິດສືບຕໍ່ໄດ້ຮັບການປ່ຽນໃໝ່; ພື້ນຖານໂຄງລ່າງເສດຖະກິດ - ສັງຄົມໄດ້ຮັບການເພີ່ມທະວີ. ສະມາຄົມຊາວກະສິກອນທ້ອງຖີ່ນທຸກຂັ້ນ ໄດ້ມີມາດຕະການຫຼາຍຢ່າງເພື່ອໜູນຊ່ວຍຊາວກະສິກອນພັດທະນາເສດຖະກິດ, ຮັກສາຊີວິດໃຫ້ເປັນປົກກະຕິ… ຂະບວນການຊາວກະສິກອນແຂ່ງຂັນກັນຜະລິດ, ດຳເນີນທຸລະກິດ, ສາມັກຄືຊ່ວຍເຫຼືອກັນລົບລ້າງຄວາມອຶດຫີວ ຫຼຸດຜ່ອນຄວາມທຸກຍາກ ແລະ ສ້າງຄວາມຮັ່ງມີຢ່າງຊອບທຳຕິດພັນກັບບັ້ນຂົນຂວາຍ ”ທົ່ວປວງຊົນສາມັກຄີກັນສ້າງຊີວິດວັດທະນະທຳ”…ໄດ້ເຮັດໃຫ້ບັນດາເຂດຊົນນະບົດມີການຫັນປ່ຽນຢ່າງແຮງ. ປະຈຸບັນ, ລັດ ແລະ ສະມາຄົມຊາວກະສິກອນທຸກຂັ້ນພວມເອົາໃຈໃສ່ເຖິງຄວາມສຳພັນລະຫວ່າງລັດ, ຊາວກະສິກອນ, ນັກວິທະ ຍາສາດ, ນັກທຸລະກິດ ເພື່ອແນໃສ່ຍົກສູງປະສິດທິຜົນການຜະລິດກະສິກຳ. ທ່ານນາງ Nguyen Thi Anh Tuyet, ປະທານສະມາຄົມຊາວກະສິກອນແຂວງ ຮ່າຕິ້ງ, ເວົ້າວ່າ:
”ຢູ່ບາງແຫ່ງ, ການນຳທ້ອງຖີ່ນຖືວ່າ, ການກໍ່ສ້າງຊົນນະບົດໃໝ່ແມ່ນໂຄງການໃຫຍ່, ແຕ່ເຂົາເຈົ້າພຽງແຕ່ເອົາໃຈໃສ່ເປັນພິເສດເຖິງການລົງທຶນກໍ່ສ້າງພື້ນຖານໂຄງລ່າງເທົ່ານັ້ນ, ຫາກບໍ່ເອົາໃສ່ໃສ່ເຖິງການເພີ່ມທະວີກຳລັງຄວາມສາມາດໃຫ້ແກ່ຊາວກະສິກອນ, ເພື່ອສ້າງເງື່ອນໄຂເພີ່ມລາຍຮັບໃຫ້ແກ່ເຂົາເຈົ້າ”.
ພາຍຫຼັງ 3 ປີ ແຫ່ງການປະຕິບັດມະຕິຂອງພັກກອມມູນິດຫວຽດນາມກ່ຽວກັບກະສິກຳ, ຊົນນະບົດ ແລະ ຊາວກະສິກອນ ແລະ ການກໍ່ສ້າງຊົນນະບົດໃໝ່, ດ້ວຍການເຄື່ອນໄຫວອັນລະອຽດ ແລະ ແທດຈິງ, ສະມາຄົມຊາວກະສິກອນຫວຽດນາມທຸກຂັ້ນ ພວມສ້າງການຫັນປ່ຽນຢ່າງຈະແຈ້ງ ກ່ຽວກັບສະຕິຄວາມຮັບຮູ້ໃນໝູ່ພະນັກງານ, ໜ້າທີ່ຂອງອົງການຈັດຕັ້ງສະມາຄົມຊາວກະສິກອນໃນການພັດທະນາການກໍ່ສ້າງຊົນນະບົດໃໝ່ທີ່ທັນສະໄໝເທື່ອລະກ້າວ. ບັນດາຜົນງານເບື້ອງຕົ້ນໃນວຽກງານກໍ່ສ້າງຊົນນະບົດໃໝ່ຢູ່ບາງທ້ອງຖີ່ນໄດ້ເປັນການຢືນຢັນໃຫ້ເຫັນວ່າ: ນີ້ແມ່ນແຜນນະໂຍບາຍທີ່ຖືກຕ້ອງ, ສ້າງກຳລັງໜູນຢ່າງແຮງເພື່ອໃຫ້ກະສິກຳ, ຊົນນະບົດ, ຊາວກະສິກອນຫວຽດນາມ ພັດທະນາຢ່າງຮອບດ້ານ ແລະ ໝັ້ນຄົງໃນໄລຍະຍູ້ແຮງການຫັນເປັນປະເທດອຸດສາຫະກຳ ແລະ ທັນສະໄໝ.