(vovworldd) - ໜຶ່ງໃນບັນດາໜ້າທີ່ຈຸດສຸມຂອງໂຄງການກໍ່ສ້າງຊົນນະບົດໃໝ່ຢູ່ແຂວງຮ່ານາມ ນັ້ນແມ່ນພັດທະນາການຜະລິດ, ຍົກສູງລາຍຮັບໃຫ້ແກ່ປະຊາຊົນ ແລະ ການປູກເຫັດແມ່ນໜຶ່ງໃນ 10 ແຜນຮ່າງທີ່ຂະແໜງກະສິກຳແຂວງໄດ້ຜັນຂະຫຍາຍ ເພື່ອສ້າງວຽກເຮັດງານທຳໃຫ້ແກ່ປະຊາຊົນໃນເວລາຫວ່າງ, ຊ່ວຍໃຫ້ປະຊາຊົນສ້າງຄວາມຮັ່ງມີໃນບ້ານເກີດເມືອງນອນຂອງຕົນ.
ຊາວກະສີກອນແຂວງຮ່ານາມກັບວຽກງານປູກເຫັດ
(ພາບ: ອິນເຕີແນດ)
ຄວາມປະທັບໃຈຂອງພວກຂ້າພະເຈົ້າເມື່ອມາຢ້ຽມຢາມຄອບຄົວອ້ານ ດິນຈີຈູງ ຢູ່ຕາແສງຂາຟອງ, ເມືອງກິມບາງ, ແຂວງຮ່ານາມ, ນັ້ນແມ່ນໄດ້ເຫັນຫູໜູທີ່ປົງຂື້ນເປັນຈຳນວນຫຼວງຫຼາຍ, ໃນນັ້ນມີເຫັດໃຫຍ່ເກືອບເທົ່າກັບຝາມື.ໃກ້ຈະຮອດມື້ເກັບກ່ຽວ. ເມື່ອເຫັນສວນເຫັດພວມກ້າວເຂົ້າສູ່ໄລຍະເກັບກ່ຽວ, ມີຫຼາຍຄົນຈະຄິດວ່າ ຄອບຄົວອ້າຍຕ້ອງລົງທຶນຫຼາຍນັບທັງດ້ານຊັບສິນ ແລະ ເຫື່ອແຮງ. ແຕ່ອ້າຍ ຈູງ ໃຫ້ຮູ້ວ່າ: ເງິນລົງທຶນໃຫ້ແກ່ການປູກເຫັດແມ່ນບໍ່ຫຼາຍ ແລະ ບໍ່ໃຊ້ເຫື່ອແຮງຫຼາຍ. ໂດຍໄດ້ຮັບການໜູນຊ່ວຍເງິນ 200.000 ດົ່ງ /ເນື້ອທີ່ປູກເຫັດ 1 ຕາລາງແມັດຈາກອຳນາດການປົກຄອງແຂວງຮ່ານາມ ແລະ ໄດ້ຮັບແນະນຳກ່ຽວກັບວິທີການປູກເຫັດຈາກພະນັກງານເຕັກນິກ, ອ້າຍຈູງໄດ້ປະສົບຜົນສຳເລັດໃນການປູກເຫັດ. ໃນເບື້ອງຕົ້ນ, ແຕ່ລະເດືອນຄອບຄົວອ້າຍສ້າງລາຍຮັບຈາກການປູກເຫັດໄດ້ແຕ່ 3 – 4 ລ້ານດົ່ງ.
“ກອນນີ້, ເສດຖະກິດຂອງຄອບຄົວຂ້າພະເຈົ້າແມ່ນອີງໃສ່ການຜະລິດກະສີກຳເປັນຕົ້ນຕໍ່, ເຮັດນາພຽງແຕ່ພໍກິນເທົ່ານັ້ນ, ຫາກບໍ່ມີເງິນສະສົມໄດ້, ປູກເຫັດແມ່ນງ່າຍດາຍ, ຊາວກະສີກອນຜູ້ໃດກໍ່ສາມາດເຮັດໄດ້. ຮູບແບບປູກເຫັດຍັງແກ້ໄຂວຽກເຮັດງານທຳໃຫ້ແກ່ຊາວກະສີກອນໃນເວລາຫວ່າງອີກດ້ວຍ. ເມື່ອທຽບໃສ່ເຮັດນາ, ການປູກເຫັດທັງງ່າຍ ແລະ ສະບາຍກວ່າ, ພຽງແຕ່ຫົດນ້ຳເທົ່ານັ້ນ, ບໍ່ຕ້ອງໃສ່ຝຸ່ນຄືເຮັດນາ”.
ການປູກເຫັດຢູ່ແຂວງຮ່ານາມ
(ພາບ: ອິນເຕີແນດ)
ໂຄງການພັດທະນາການປູກເຫັດໃນແຂວງຮ່ານາມ ແມ່ນໜຶ່ງໃນ 10 ແຜນຮ່າງທີ່ໄດ້ຮັບການຜັນຂະຫຍາຍ ເພື່ອຊ່ວຍໃຫ້ຊາວກະສີກອນພັດທະນາການຜະລິດ, ສ້າງວຽກເຮັດງານທຳໃຫ້ຊາວກະສີກ່ອນໃນເວລາຫວ່າງ, ປະກອບສ່ວນເພີ່ມລາຍຮັບຕື່ມອີກ. ທ່ານ ຈູວັນເຮີບ, ຮອງຫົວໜ້າສະຫະກອນກະສີກຳຕາແສງຂາຟອງ ໃຫ້ຮູ້ວ່າ: ປະຊາຊົນສາມາດນຳໃຊ້ເດີ່ນບ້ານ ຫຼືສ່ວນໜຶ່ງໃນສວນກໍ່ສາມາດປູກເຫັດໄດ້. ຄ່າໃຊ້ຈ່າຍໃນເບື້ອງຕົ້ນກໍ່ບໍ່ຫຼາຍ, ພຽງແຕ່ມີ 10 ລ້ານດົ່ງກໍ່ສາມາດປູກເຫັດໃນເນື້ອທີ່ປະມານແຕ່ 60 – 70 ຕາລາງແມັດໄດ້. ວັດຖຸດິບເພື່ອປູກເຫັດແມ່ນເຟືອງ, ແກບ… ພາຍຫຼັງ 1 ເດືອນ ກໍ່ສາມາດເກັບກູ້ໄດ້. ລາຄາຂາຍເຫັດໃນປະຈຸບັນແມ່ນເປັນປົກກະຕິ. ເຫັດ ແລະ ເຫັດຫູໜູແຫ້ງມີລາຄາປະມານ 100.000 ດົ່ງ/ກິໂລກຼາມ. ເຫັດບໍ່ພຽງແຕ່ປູກໃນບໍລິເວນເຮືອນຢູ່ເທົ່ານັ້ນ, ຫາກສາມາດປູກຢູ່ເຂດນາອີກດ້ວຍ. ຖ້າປຽບທຽບປະສິດທິຜົນດ້ານເສດຖະກິດ, ປູກເຫັດໄດ້ສ້າງລາຍຮັບສູງກວ່າປູກເຂົ້າແຕ່ 3 – 4 ເທື່ອ. ທ່ານຈູວັນເຮີບ ໃຫ້ຮູ້ວ່າ:
“ພາຍຫຼັງຜັນຂະຫຍາຍຮູບແບບປູກເຫັດ, ປະຊາຊົນຕາແສງຂາຟອງ ໄດ້ສະໜັບສະໜູນທີ່ສຸດ. ປີນີ້, ພວກຂ້າພະເຈົ້າສືບຕໍ່ສະເໜີເປີດຊຸດອົບຮົມດ້ານເຕັກນິກປູກເຫັດໃຫ້ພໍ່ແມ່ປະຊາຊົນ ເພື່ອຍົກສູງປະສິດທິຜົນກວ່າອີກ. ປະຈຸບັນມີຫຼາຍຄອບຄົວໄດ້ຈົດຊື່ເຂົ້າຮ່ວມແລ້ວ ”.
ພະນັກງານແນນຳວິທີປູກເຫັດ
(ພາບ: ອິນເຕີແນດ)
ຈາກຮູບແບບນີ້, ໃນໂຄງການກໍ່ສ້າງຊົນນະບົດໃໝ່, ແຂວງຮ່ານາມ ໄດ້ສຸມໃສ່ຜັນຂະຫຍາຍ 10 ແຜນຮ່າງ ເພື່ອຊ່ວຍພໍ່ແມ່ປະຊາຊົນພັດທະນາການຜະລິດ. ທ່ານ ຫງວຽນແມ້ງຮຸ່ງ, ຮອງຫົວໜ້າພະແນກກະສີກຳ ແລະ ພັດທະນາຊົນນະບົດແຂວງຮ່ານາມ ໃຫ້ຮູ້ວ່າ: ດ້ວຍຮູບແບບປູກເຫັດນີ້, ປະຈຸບັນທາງພະແນກໄດ້ເຊັນສັນຍາກັບບໍລິສັດ ງອກດົ້ງ ເພື່ອໜູນຊ່ວຍທາງດ້ານເຕັກນິກ, ສະໜອງວັດຖຸດິບ ແລະ ຮັບປະກັນສົ້ນອອກໃຫ້ແກ່ຊາວກະສີກອນ. ປີ 2012, ຮ່ານາມ ມີ 40 ຄອບຄົວປູກເຫັດ, ດ້ວຍເນື້ອທີ່ປະມານ 36.000 ຕາລາງແມັດ, ປະລິມານການຜະລິດເຫັດແມ່ນ 136 ໂຕນ, ບັນລຸມູນຄ່າ 4 ຕື້ກວ່າດົ່ງ. ໃນໄລຍະແຕ່ປີ 2013 – 2015, ຈະມີ 200 ກວ່າຄອບຄົວປູກເຫັດ, ດ້ວຍປະລິມານການຜະລິດປະມານ 380 ໂຕນ, ບັນລຸມູນຄ່າປະມານ 12 ຕື້ດົ່ງ. ທ່ານ ຫງວຽນແມ້ງຮຸ່ງ ໃຫ້ຮູ້ວ່າ:
“ສະເພາະແຜນຮ່າງກ່ຽວກັບການພັດທະນາເຫັດທີ່ເປັນອາຫານ ແລະ ເປັນວັດຖຸການຢາ, ພວກຂ້າພະເຈົ້າໄດ້ວາງແຜນການເຖິງປີ 2015 ແລ້ວ, ທາງແຂວງກໍ່ໄດ້ສ້າງກົນໄກກ່ຽວກັບການໜູນຊ່ວຍເງິນ, ການອົບຮົມ, ແລະ ການຮັບປະກັນສົ້ນອອກໃຫ້ແກ່ຜະລິດຕະພັນຢ່າງລະອຽດ. ປີ 2013, ຈະຮັບປະກັນແຫຼ່ງທຶນໃຫ້ປະຊາຊົນເຂົ້າຮ່ວມໂຄງການປູກເຫັດ ແນໃສ່ບັນລຸປະສິດທິຜົນສູງສຸດ, ສ້າງອາຊີບໃໝ່ຕື່ມອີກ ແລະ ສືບຕໍ່ຂະຫຍາຍແຜນຮ່າງນີ້ຢ່າງກວ້າງຂວາງໃນທ້ອງຖີ່ນ”.
ຮູບແບບປູກເຫັດເປັນອາຫານຢູ່ຮ່ານາມ ມີທ່າສະດວກຫຼາຍຢ່າງ ແລະ ສາມາດນຳມາເຊິ່ງປະສິດທິຜົນສູງສຸດ, ຍ້ອນເງິນລົງທຶນໜ້ອຍ, ໄລຍະເວລາເກັບກູ້ສັ້ນ, ນຳມາເຊິ່ງຜົນກຳໄລສູງ, ນີ້ແມ່ນໜຶ່ງໃນບັນດາທິດທາງພັດທະນາ ເພື່ອໃຫ້ຊາວກະສີກອນແຂວງ ຮ່ານາມສາມາດສ້າງຄວາມຮັ່ງມີເທື່ອລະກ້າວໃນບ້ານເກີດເມືອງນອນຂອງຕົນໄດ້.