(vovworld) – ພາຍຫຼັງ 3 ປີ ແຫ່ງການຜັນຂະຫຍາຍໂຄງການກໍ່ສ້າງຊົນນະບົດໃໝ່ນັ້ນ ໄດ້ເຮັດໃຫ້ເຂດຊົນນະບົດຫຼາຍແຫ່ງໃນທົ່ວປະເທດມີການປ່ຽນແປງ. ແຕ່ຜ່ານພຶດຕິກຳຕົວຈິງແຫ່ງການຜັນຂະຫຍາຍ ກໍ່ເຫັນວ່າມີຫຼາຍສິ່ງບໍ່ທັນເໝາະສົມ ເຮັດໃຫ້ກິດຈະກຳຫຼາຍແຫ່ງບໍ່ທັນເສີມຂະຫຍາຍຄຸນປະໂຫຍດໄດ້ໝົດເທື່ອ, ປະຊາຊົນບໍ່ທັນໄດ້ຮັບຜົນປະໂຫຍດຫຼາຍຈາກໂຄງການ. ດັ່ງນັ້ນຕ້ອງປັບປຸງມາດຕະຖານຈຳນວນໜຶ່ງ, ໂດຍສະເພາະແມ່ນຕ້ອງປັບປຸງວິທີປະຕິບັດ ເພື່ອເຮັດໃຫ້ໂຄງການກໍ່ສ້າງຊົນນະບົດໃໝ່ບັນລຸປະສິດທິຜົນຢ່າງແທດຈິງກວ່າ.
(ພາບ: .google.com.vn) ເດືອນ 4/2009 ທ່ານນາຍົກລັດຖະມົນຕີຫວຽດນາມ ໄດ້ປະກາດໃຊ້ປະມວນມາດຕະຖານທີ່ເປັນພື້ນຖານ ເພື່ອສ້າງເນື້ອໃນໂຄງການຈຸດໝາຍແຫ່ງຊາດກ່ຽວກັບການກໍ່ສ້າງຊົນນະບົດໃໝ່ ໃນໄລຍະຍູ້ແຮງການຫັນປະເທດຊາດເປັນປະເທດອຸດສາຫະກຳ ແລະ ທັນສະໄໝ. ປະມວນມາດຕະຖານລວມມີ 19 ມາດຕະຖານ, ເຊິ່ງກຳນົດຄາດໝາຍລະອຽດສຳລັບແຕ່ລະທ້ອງຖີ່ນ ເພື່ອໄດ້ຮັບການຮັບຮູ້ວ່າບັນລຸມາດຕະຖານຊົນນະບົດໃໝ່. ພາຍຫຼັງ 3 ປີ ແຫ່ງການຜັນຂະຫຍາຍ, ສິ່ງທີ່ເຫັນໄດ້ງ່າຍທີ່ສຸດນັ້ນແມ່ນໂສມໜ້າຢູ່ເຂດຊົນນະບົດຫຼາຍແຫ່ງໄດ້ມີການເຕີບໂຕ, ຊີວິດຂອງປະຊາຊົນໄດ້ຮັບການປັບປຸງຢ່າງເຫັນໄດ້ຊັດ. ແຕ່ຜ່ານການຜັນຂະຫຍາຍໄດ້ປະກົດມີຫຼາຍສິ່ງທີ່ບໍ່ເໝາະສົມ. ຕົວຢ່າງຄື: ຕາແສງຊອງເຟື້ອງ, ຢູ່ຊານນະຄອນຮ່າໂນ້ຍ ບັນລຸໄດ້ 16/19 ມາດຕະຖານ, ໃນນັ້ນມີເຖິງ 70% ຈຳນວນເສັ້ນທາງຄົມມະນາຄົມຢູ່ໃນເຂດຊົນນະບົດໂດຍປະຊາຊົນເປັນຜູ້ປຶກສາຫາລື, ບໍລິຈາກເງິນ ແລະ ຕິດຕາມຂະບວນວິວັດແຫ່ງການກໍ່ສ້າງ, ແຕ່ຄຽງຂ້າງນັ້ນ, ຮູບແບບກິດຈະກຳຕະຫຼາດ ຫຼືຫໍວັດທະນະທຳຕາແສງພັດບໍ່ທັນເໝາະສົມກັບສະພາບຕົວຈິງຂອງທ້ອງຖີ່ນ. ຕະຫຼາດທູເກວ໋ ຢູ່ບໍລິເວນຕາແສງຊອງເຟື້ອງ ໄດ້ຮັບການກໍ່ສ້າງສຳເລັດນັບແຕ່ປີກາຍ, ແຕ່ມາຮອດປະຈຸບັນ, ຈຳນວນຜູ້ທີ່ມາຊື້ຂາຍໃນຕະຫຼາດຍັງໜ້ອຍຢູ່, ເພາະວ່າປະຊາຊົນເຄີຍຈັດຕະຫຼາດຢູ່ແຄມທາງ, ເພື່ອມີຄວາມສະດວກໃຫ້ແກ່ການຂົນສົ່ງ, ຄ້າຂາຍ. ປ້າ Nguyen Thi Hoi, ຜູ້ຂາຍເຄື່ອງຢູ່ທີ່ນີ້, ໃຫ້ຮູ້ວ່າ:
”ໃນເບື້ອງຕົ້ນເຂົາເຈົ້າໄດ້ເຂົ້າມາຂາຍເຄື່ອງໃນຕະຫຼາດຢ່າງເປັນລະບຽບ, ຕໍ່ມາບໍ່ເຂົ້າອີກ, ຫາກຂາຍເຄື່ອງຕາມເສັ້ນທາງເຂົ້າຕະຫຼາດ, ດັ່ງນັ້ນປະຊາຊົນກໍ່ບໍ່ເຂົ້າຊື້ເຄື່ອງໃນຕະຫຼາດອີກ”.
ຫໍວັດທະນະທຳໃນຕາແສງກໍ່ໄດ້ຮັບການກໍ່ສ້າງຢ່າງໃຫຍ່ໂຕໂອຖົງ ແລະ ສວຍງາມ, ແຕ່ຕາມຜູ້ຄຸ້ມຄອງຢູ່ທີ່ນີ້ແລ້ວ, ຫໍວັດທະນະທຳນີ້ບໍ່ເໝາະສົມກັບຮີດຄອງປະເພນີ ກໍ່ຄືການເຄື່ອນໄຫວຂອງຊາວກະສິກອນ. ການນຳຕາແສງຊອງເຟື້ອງ ຖືວ່າ: ຖ້າຫາກປະຊາຊົນບໍ່ເຂົ້າຕະຫຼາດ ຫຼືບໍ່ນຳໃຊ້ຫໍວັດທະນະທຳ ມັນຈະເປັນການຟູມເຟືອຍ. ທ່ານ Bui Van Duc, ປະທານຕາແສງຊອງເຟື້ອງ, ໃຫ້ຮູ້ວ່າ:
”ນີ້ແມ່ນຮູບແບບໃໝ່ ແລະ ໄລຍະທຳອິດແຫ່ງການປະຕິບັດກໍ່ປະສົບກັບຄວາມຫຍຸ້ງຍາກບໍ່ແມ່ນໜ້ອຍ ກ່ຽວກັບຄວາມຮັບຮູ້ ກໍ່ຄືບົດບາດເຂົ້າຮ່ວມຂອງພໍ່ແມ່ປະຊາຊົນ. ບັນດາກິດຈະກຳໄດ້ ແລະ ພວມຜັນຂະຫຍາຍໃນໂຄງການກໍ່ສ້າງຊົນນະບົດໃໝ່ ຕ້ອງໂດຍປະຊາຊົນເປັນຜູ້ປະຕິບັດຈຶ່ງເສີມຂະຫຍາຍປະສິດທິຜົນໄດ້”
(ພາບ: .google.com.vn)
ພາຍຫຼັງ 3 ປີ ແຫ່ງການຜັນຂະຫຍາຍໂຄງການກໍ່ສ້າງຊົນນະບົດໃໝ່ຢູ່ 9000 ຕາແສງໃນທົ່ວປະເທດ, ຫວ່າງແລ້ວນີ້ກະຊວງກະສີກຳ ແລະ ພັດທະນາຊົນນະບົດ ໄດ້ສະເໜີຕໍ່ນາຍົກລັດຖະມົນຕີປັບປຸງ 5 ມາດຕະຖານຄື: ປັບປຸງມາດຕະຖານກ່ຽວກັບໂຄງປະກອບແຮງງານ, ເພາະວ່າຕາມການກຳນົດກ່ອນນີ້ແລ້ວ, ຈຳນວນແຮງງານທີ່ເຮັດວຽກງານກະສິກຳໃນຕາແສງຊົນນະບົດໃໝ່ກວມບໍ່ເກີນ 30%. ຖ້າປະຕິບັດຄືແນວນັ້ນແມ່ນບໍ່ເໝາະສົມກັບບັນດາຕາແສງຢູ່ເຂດຫ່າງໄກສອກຫຼີກແລະເຂດປູກຕົ້ນໄມ້ກະສີກຳເປັນຕົ້ນ. ດັ່ງນັ້ນ, ຄວນຍົກອອກບັນດາມາດຕະການອື່ນໆ ເພື່ອສືບຕໍ່ຮັບເອົາຄວາມເຫັນຈາກທ້ອງຖີ່ນ, ບັນດາກະຊວງ, ຂະແໜງການຕ່າງໆ, ກ່ອນທີ່ຈະຍື່ນສະເໜີຕໍ່ນາຍົກລັດຖະມົນຕີພິຈາລະ ນາ ແລະ ຕົກລົງ. ສຳຫຼັບມາດຕະຖານດ້ານລາຍຮັບແລ້ວ, ຕາແສງໜຶ່ງ ທີ່ບັນລຸມາດຕະຖານກໍ່ສ້າງຊົນນະບົດໃໝ່ ແມ່ນຕ້ອງມີລາຍຮັບສະເລ່ຍໃສ່ຫົວຄົນສູງກວ່າ ເມື່ອທຽບໃສ່ລະດັບສະເລ່ຍທົ່ວໄປໃນເຂດຊົນນະບົດຂອງທົ່ວປະເທດ, ໝາຍຄວາມວ່າສູງກວ່າລະດັບ 22 ລ້ານດົ່ງ/ຄົນ/ປີ. ແຕ່ນີ້ພຽງແຕ່ແມ່ນລະດັບກຳນົດລວມຂອງທົ່ວປະເທດເທົ່ານັ້ນ, ສ່ວນແຕ່ລະເຂດກໍ່ມີລະດັບສະເພາະ. ທ່ານລັດຖະມົນຕີຊ່ວຍວ່າການກະຊວງກະສີກຳ ແລະ ພັດທະນາຊົນນະບົດ Nguyen Dang Khoa ຖືວ່າ, ການປັບປຸງບັນດາມາດຕະຖານຄັ້ງນີ້ແມ່ນແນໃສ່ເຮັດໃຫ້ມັນເໝາະສົມກວ່າ:
”ການປັບປຸງມາດຕະຖານຄັ້ງນີ້ບໍ່ແມ່ນເຮັດໃຫ້ຄວາມຕ້ອງການຂອງແຕ່ລະມາດຕະຖານຫຼຸດລົງ, ຫາກແມ່ນການແກ້ໄຂສິ່ງທີ່ຕິດຂັດ, ຄວາມຫຍຸ້ງຍາກ, ສິ່ງບໍ່ທັນເໝາະສົມ.. ການປັບປຸງບໍ່ສົ່ງຜົນສະທ້ອນຫຼາຍເຖິງການປະຕິບັດຈຸດໝາຍລວມຂອງໂຄງການ”
ບົດຮຽນໃນເບື້ອງຕົ້ນແຫ່ງການກໍ່ສ້າງຊົນນະບົດໃໝ່ໄດ້ສະແດງໃຫ້ເຫັນວ່າ: ບັນຫາງົບປະມານໜູນຊ່ວຍຂອງລັດບໍ່ມີຄວາມໝາຍຕັດສິນ, ຫາກຕົວຈິງຢູ່ແຫ່ງໃດເຮັດວຽກງານໂຄສະນາໄດ້ດີ, ສ້າງຄວາມເຫັນດີເຫັນພ້ອມ, ເສີມຂະຫຍາຍກຳລັງແຮງພາຍໃນທ້ອງຖີ່ນໄດ້, ແມ່ນຈະນຳມາເຊິ່ງຜົນສຳເລັດ. ໃນໂຄງການກໍ່ສ້າງຊົນນະບົດໃໝ່, ກ່ອນອື່ນໝົດແມ່ນຕ້ອງເຮັດໃຫ້ປະຊາຊົນມີຄວາມເຂົ້າໃຈກ່ຽວກັບແຜນນະໂຍບາຍ, ເຂົາເຈົ້າຕ້ອງເຫັນໄດ້ວ່າຕົນເອງເຮັດວຽກນັ້ນ ແມ່ນເພື່ອຕົວເອງ, ແລະ ເພື່ອຄອບຄົວຂອງຕົນ. ເຮັດໄດ້ຄືແນວນັ້ນ ໂຄງການກໍ່ສ້າງຊົນນະບົດໃໝ່ຈຶ່ງເປັນກຳລັງໜູນ, ແທດຈິງ, ມີປະສິດທິຜົນ ແລະ ສ້າງການພັດທະນາໃນເຂດກະສິກຳ ແລະ ຊົນນະບົດໄດ້ຢ່າງໝັ້ນຄົງ.