(vovworld) - ພາຍຫຼັງຜັນຂະຫຍາຍໂຄງການກໍ່ສ້າງຊົນນະບົດໃໝ່ມາເປັນເວລາເກືອບ 4 ປີ, 3 ຕາແສງຄື: ວິ້ງຖູຍ, ວິ້ງແທກ, ວິ້ງກິມຢູ່ເມືອງວິ້ງລິງ, ແຂວງກວາງຈີ້ ໄດ້ປະຕິບັດສຳເລັດການກໍ່ສ້າງຊົນນະບົໃໝ່. ແຂວງກວາງຈີ້ ພວມສູ້ຊົນນຳວິ້ງລິງ ກາຍເປັນເມືອງທຳອິດຂອງແຂວງທີ່ປະຕິບັດສຳເລັດຈຸດໝາຍແຫ່ງຊາດກໍ່ສ້າງຊົນນະບົດໃໝ່ໃນປີ 2020.
ຊາວວິ້ງລິງຮ່ວມແຮງຮ່ວມໃຈກໍ່ສ້າງຊົນນະບົດໃໝ່
(ພາບອິນເຕີແນດ)
ມາຢ້ຽມຢາມຕາແສງວິ້ງແທກ, ເມືອງວິ້ງລິງ, ແມ່ນໜຶ່ງໃນ 3 ຕາແສງທຳອິດຂອງແຂວງກວາງຈີ້ ທີ່ໄດ້ປະຕິບັດສຳເລັດຈຸດໝາຍກ່ຽວກັບການກໍ່ສ້າງຊົນນະບົດໃໝ່, ກໍ່ເຫັນວ່າທຸກເສັ້ນທາງຈາກໃຈກາງຕາແສງເຖິງແຕ່ລະບ້ານລ້ວນແຕ່ໄດ້ຮັບການປູຢາງ ຫຼືກໍ່ສ້າງດ້ວຍເບຕົງ. ທັງສອງພາກທາງແມ່ນບັນດາປ່າຢາງພາລາທີ່ຂຽວອຸ່ມທູ່ມ ແລະ ສວນໝາກຜິກໄທທີ່ນຳມາເຊິ່ງຄວາມອິ່ມໜຳສຳລານໃຫ້ຫຼາຍຄອບຄົວຢູ່ທີ່ນີ້. ເມື່ອຍາມຄຳ່ຄືນກໍ່ມີໄຟຟ້າເຍືອງທາງໃນທົ່ວບ້ານ, ຕາແສງ.
ນັບແຕ່ອຳນາດການປົກຄອງຕາແສງປຸກລະດົມການຮ່ວມແຮງຮ່ວມໃຈກໍ່ສ້າງບັນດາກິດຈະກຳຊົນນະບົດໃໝ່, ບັນດາຄອບຄົວໃນບ້ານ, ລ້ວນແຕ່ສະໜັບສະໜູນຂະບວນການ “ທຸກຄອບຄົວບໍລິຈາກທີ່ດິນ“ ເພື່ອກໍ່ສ້າງທາງ, ຫໍປະຊຸມບ້ານ, ໂຮງຮຽນ, ສຸກສາລາ... ທ່ານ ຫງວຽນວັນຫ່ຽນ, ຢູ່ຕາແສງວິ້ງແທກແບ່ງປັນວ່າ: ກ່ອນນີ້ 4 ປີ, ຊາວໜຸ່ມ, ແມ່ຍິງ, ນັບທັງຜູ້ອາຍຸສູງກໍ່ລ້ວນແຕ່ຖືຈົກ, ຫຼົ້ວ, ພ້ອມກັນເປີດທາງ. ບັນຍາກາດເຮັດວຽກໃນບ້ານຟົດຟື້ນມ່ວນຊື່ນຄືວັນບຸນ
“ປະຊາຊົນພວກຂ້າພະເຈົ້າຕອບສະໜອງຂະບວນການກໍ່ສ້າງຊົນນະບົດໃໝ່, ພິເສດແມ່ນການກໍ່ສ້າງທາງຄົມມະນາຄົມຊົນນະບົດ, ການບໍລິຈາກຕົ້ນໄມ້, ທີ່ດິນ. ປະຈຸບັນບັນດາຮູບແບບເສດຖະກິດທີ່ມີປະສິດທິຜົນນັບມື້ນັບຫຼາຍ. ພວກຂ້າພະເຈົ້າພວມປູກຕົ້ນໄມ້ກະສີກຳທີ່ໃຫ້ສະມັດຕະພາບສູງ“.
ຊາວວິ້ງລິງຮ່ວມແຮງຮ່ວມໃຈກໍ່ສ້າງທາງເບຕົງ
(ພາບອິນເຕີແນດ) ມາຮອດປະຈຸບັນ, ຕາແສງວິ້ງແທກ ບັນລຸໄດ້ 19 ມາດຖານກ່ຽວກັບການກໍ່ສ້າງຊົນນະບົດໃໝ່, ນັບແຕ່ການກໍ່ສ້າງພື້ນຖານໂຄງລ່າງຕະຫຼອດຮອດບັນດາມາດຖານຍາກທີ່ຈະບັນລຸໄດ້ຄື: ສິ່ງແວດລ້ອມ, ການສຶກສາ, ການຫຼຸດຜ່ອນຈຳນວນຄອບຄົວທີ່ທຸກຍາກ. ເພື່ອບັນລຸໄດ້ຜົນງານດັ່ງກ່າວ, ນອກຈາກໄດ້ຮັບການໜູນຊ່ວຍຢ່າງໄດ້ການໄດ້ງານຈາກຫຼາຍອົງການ, ວິສາຫະກິດແລ້ວ, ອຳນາດການປົກຄອງຕາແສງວິ້ງແທກ ຍັງລະດົມກຳລັງແຮງຂອງປະຊາຊົນໃນຕາແສງອີກ. ວິ້ງແທກ ມີຄວາມສະດວກແມ່ນໄດ້ຮັບການອຸປະຖຳຈາກທ່ານປະທານປະເທດ ເຈືອງເຕິ໋ນຊາງ; ບັນດາຫົວໜ່ວຍ, ວິສາຫະກິດໃນຕາແສງກໍ່ໄດ້ໜູນຊ່ວຍເງິນນັບຮ້ອຍຕື້ດົ່ງເພື່ອກໍ່ສ້າງພື້ນຖານໂຄງລ່າງ, ລົງທຶນພັດທະນາເສດຖະກິດຄອບຄົວ. ປະຊາຊົນໃນຕາແສງຍັງບໍລິຈາກທີ່ດິນໄດ້ເກືອບ 50.000 ຕາແມັດ. ທ່ານ ຫງວຽນຍືແທ່ງ, ຮອງປະທານຄະນະກຳມະການປະຊາຊົນຕາແສງວິ້ງແທກ, ໃຫ້ຮູ້ວ່າ, ຕົ້ນຢາງພາລາ ແລະ ຕົ້ນໝາກພິກໄທແມ່ນສອງປະເພດຕົ້ນຕໍຂອງທ້ອງຖີ່ນທີ່ໄດ້ຊ່ວຍປະຊາຊົນຫຼຸດພົ້ນອອກຈາກຄວາມທຸກຍາກ ແລະ ບືນຕົວຂຶ້ນເພື່ອສ້າງຄວາມຮັ່ງມີ.
“ຢູ່ວິ້ງແທກ ດິນແດງ bazan ແມ່ນເໝາະສົມກັບຕົ້ນຢາງພາລາ ແລະ ຕົ້ນໝາກພິກໄທ, ມູນຄ່າທີ່ຫາໄດ້ຈາກການປູກຕົ້ນຢາງພາລາ ແລະ ຕົ້ນໝາກພິກໄທໃນເນື້ອທີ່ດຽວແມ່ນຫຼາຍທົບ 3, 4 ເທົ່າເມື່ອທຽບໃສ່ການປູກຕົ້ນໄມ້ອຸດສາຫະກຳໄລຍະສັ້ນອື່ນໆ. ທາງຕາແສງສຸມໃສ່ຮຽກຮ້ອງບັນດາໂຄງການອຸປະຖຳດ້ານວິທະຍາສາດ, ເຕັກນິກກະສີກຳໃຫ້ປະຊາຊົນໃນຕາແສງ“.
ພາຍຫຼັງ 4 ປີ ແຫ່ງການຜັນຂະຫຍາຍໂຄງການກໍ່ສ້າງຊົນນະບົດໃໝ່, ເມືອງວິ້ງລິງ ລະດົມເງິນໄດ້ກວ່າ 400 ຕື້ດົ່ງ, ໃນນັ້ນແຫຼ່ງທຶນໂດຍປະຊາຊົນ ແລະ ວິສາຫະກິດບໍລິຈາກແມ່ນ 100 ຕື້ກວ່າດົ່ງ. ບັນດາທ້ອງຖີ່ນໄດ້ຜັນຂະຫຍາຍຄວາມສາມາດບົ່ມຊ້ອນຂອງທ້ອງຖີ່ນຢ່າງມີປະສິດທິຜົນ. ອັດຕາສ່ວນຄອບຄົວທຸກຍາກໄດ້ຫຼຸດລົງຢ່າງໄວ, ປະຈຸບັນຍັງເຫຼືອພຽງ 8,5% ເທົ່ານັ້ນ, ຫຼາຍຮູບແບບທີ່ດີໃນການກໍ່ສ້າງຊົນນະບົດໃໝ່ຢູ່ເມືອງວິ້ງລິງ ໄດ້ຮັບການຂະຫຍາຍອອກຢ່າງກວ້າງຂວາງ. ທ່ານ ຟານຕ໋ຽນຢຸງ, ຮອງຫົວໜ້າຄະນະຊີ້ນຳໂຄງການກໍ່ສ້າງຊົນນະບົດໃໝ່ເມືອງວິ້ງລິງ, ໃຫ້ຮູ້ວ່າ:
“ສິ່ງທີ່ພວກຂ້າພະເຈົ້າເອົາໃຈໃສ່ທີ່ສຸດໃນປະຈຸບັນ ແມ່ນເລື່ອງວາງແຜນກຳນົດພັດທະນາເຂດຜະລິດ. ພ້ອມທັງສືບຕໍ່ລະດົມບັນດາແຫຼ່ງທຶນ, ບັນດາລາຍການປະສົມເພື່ອລົງທຶນກໍ່ສ້າງພື້ນຖານໂຄງລ່າງ, ຍົກສູງລາຍຮັບໃຫ້ປະຊາຊົນໃນບ້ານຢ່າງບໍ່ຢຸດຢັ້ງ“.
ວິ້ງລິງ, ເຂດດິນວິລະຊົນໃນສົງຄາມ, ປະຈຸບັນພວມແມ່ນຄັນທຸງນຳໜ້າຂອງແຂວງກວາງຈີ້ ໃນຂະບວນການກໍ່ສ້າງຊົນນະບົດໃໝ່. ນອກຈາກ 3 ຕາແສງທີ່ໄດ້ປະຕິບັດສຳເລັດໂຄງການກໍ່ສ້າງຊົນນະບົດໃໝ່ນັ້ນ, ບັນດາຕາແສງໃນເມືອງສ່ວນຫຼາຍແມ່ນບັນລຸໄດ້ແຕ່ 10 – 18 ມາດຖານ. ດ້ວຍຄວາມຄືບໜ້າຄືປະຈຸບັນ, ພະນັກງານ ແລະ ປະຊາຊົນເມືອງວິ້ງລິງ ສາມາດເຊື່ອໝັ້ນຕໍ່ແຜນການທີ່ໄດ້ວາງອອກແມ່ນກາຍເປັນເມືອງຊົນນະບົດໃໝ່ທຳອິດຂອງແຂວງກວາງຈີ້ ໃນປີ 2020.