(vovworld) - ພາຍຫຼັງ 1 ກວ່າປີແຫ່ງການປະຕິບັດໂຄງການຈຸດໝາຍແຫ່ງຊາດກ່ຽວກັບການກໍ່ສ້າງຊົນນະບົດໃໝ່, ໂສມໜ້າເຂດຊົນນະບົດຢູ່ຫຼາຍຕາແສງໃນແຂວງບິ່ງດິ້ງ ໄດ້ມີການປ່ຽນແປງເທື່ອລະກ້າວ. ສິ່ງທີ່ໜ້າຮັບຮູ້ນັ້ນແມ່ນປະຊາຊົນໄດ້ກາຍເປັນເຈົ້າຂອງໂຄງການ. ຍ້ອນໄດ້ຮັບຄວາມເຫັນດີເຫັນພ້ອມຈາກປະຊາຊົນ, ຂະບວນການກໍ່ສ້າງຊົນນະບົດໃໝ່ຢູ່ບິ່ງດິ້ງ ຈຶ່ງບັນລຸໄດ້ຜົນງານທີ່ຕັ້ງໜ້າ.
ກໍ່ສ້າງຊົນນະບົດໃໝ່ຢູ່ບິ່ງດິ້ງ
(ພາບ: google.com.vn)
ໃນການຜັນຂະຫຍາຍການກໍ່ສ້າງຊົນນະບົດໃໝ່ໄລຍະ 2011 - 2020, ແຂວງບິ່ງດິ້ງໄດ້ເລືອກເຟັ້ນ 4 ຕາແສງຄື: ເຍິນໂລກ (ເທດສະບານອານເຍິນ), ບິ່ງງີ (ເມືອງໄຕເຊີນ), ຮ່ວາຍເຮືອງ (ເມືອງຮ່ວາຍເຍິນ), ເອິນແທກ (ເມືອງຮ່ວາຍເອິນ) ເປັນຕາແສງປະຕິບັດທົດລອງ. ພ້ອມກັນນັ້ນ, ແຂວງບິ່ງດິ້ງ ກໍ່ໄດ້ວາງຈຸດໝາຍເຖິງປີ 2012 ທົ່ວແຂວງຈະມີ 26 ຕາແສງບັນລຸມາດຕະຖານພັດທະນາຊົນນະບົດໃໝ່, ຮອດປີ 2020, ທົ່ວແຂວງຈະມີ 65 ຕາແສງບັນລຸມາດຕະຖານຊົນນະບົດໃໝ່, ກວມ 50% ຈຳນວນຕາແສງໃນເຂດຊົນນະບົດ.
ພາຍຫຼັງຕາແສງເຍິນໂລກ (ເທດສະບານອານເຍິນ)ໄດ້ຮັບການຄັດເລືອກເປັນຕາແສງປະຕິບັດທົດລອງ ການກໍ່ສ້າງຊົນນະບົດໃໝ່ທີ່ເປັນແບບຢ່າງຂອງແຂວງ, ອຳນາດການປົກຄອງທ້ອງຖີ່ນໄດ້ກໍ່ສ້າງແຜນຮ່າງ, ຜັນຂະຫຍາຍການວາງແຜນກຳນົດກໍ່ສ້າງຊົນນະບົດໃໝ່ຕາມບັນດາມາດຕະຖານໂດຍລັດຖະບານໄດ້ກຳນົດ. ທາງຕາແສງກໍ່ສະແຫວງຫາການລົງທຶນຂອງລັດ ແລະ ຜ່ານບັນດາລາຍການ, ໂຄງການ ເພື່ອເພີ່ມລະດັບຄວາມໄວໃນການພັດທະນາເສດຖະກິດ - ສັງຄົມ. ມາຮອດປະຈຸບັນ, ຜ່ານການກວດກາບັນດາມາດຕະຖານຕ່າງໆຕາມຂໍ້ກຳນົດ, ຕາແສງເຍິນໂລກ ບັນລຸໄດ້ 12/19 ມາດຕະຖານ; ຈຸດໝາຍເຖິງປີ 2015, ຕາແສງຈະກາຍເປັນຕາແສງຊົນນະບົດໃໝ່ທີ່ເປັນແບບຢ່າງໂດຍພື້ນຖານຂອງແຂວງ… ທ່ານ Cao Van Nghia, ປະທານຄະນະກຳມະການປະຊາຊົນຕາແສງເຍິນໂລກ ຢັ້ງຢືນວ່າ: ຍ້ອນໄດ້ຮັບຄວາມເຫັນດີເຫັນພ້ອມຈາກປະຊາຊົນ, ທ້ອງຖີ່ນຈຶ່ງປະຕິບັດສຳເລັດ 12/19 ມາດຕະຖານກ່ຽວກັບການກໍ່ສ້າງຊົນນະບົດໃໝ່.
”ບັນຫາກໍ່ສ້າງຊົນນະບົດໃໝ່ຄືຈຸດໝາຍແຫ່ງຊາດໄດ້ວາງອອກແມ່ນເລີ່ມມາຈາກປະຊາຊົນ, ປະຊາຊົນແມ່ນເຈົ້າຂອງ ດັ່ງນັ້ນບັນຫາໂຄສະນາແມ່ນສຳຄັນທີ່ສຸດ. ປະຈຸບັນ, ປະຊາຊົນໄດ້ຮັບຮູ້ແລ້ວວ່າ ເຈົ້າຂອງກໍ່ສ້າງຊົນນະບົດໃໝ່ແມ່ນປະຊາຊົນ”.
ບິ່ງດິ້ງປະຕິບັດໂຄງການຈຸດໝາຍແຫ່ງຊາດກ່ຽວກັບການກໍ່ສ້າງຊົນນະບົດໃໝ່
(ພາບ: google.com.vn)
ພາຍຫຼັງ 1 ກວ່າປີ ແຫ່ງການປະຕິບັດໂຄງການນີ້, ເຍິນໂລກ ໄດ້ມີການປ່ຽນແປງຫຼາຍຢ່າງ. ໝູ່ບ້ານຕາແສງມີຄວາມສະອາດສວຍງາມ, ພື້ນຖານໂຄງລ່າງໄດ້ຮັບການລົງທຶນ, ຍົກລະດັບ. ປະຊາຊົນຢູ່ຕາແສງໄດ້ປະກອບທີ່ດິນກວ່າ 5000 ຕາລາງແມັດ ເພື່ອເປີດເສັ້ນທາງຄົມມະນາຄົມຊົນນະບົດ, ຂຸດຄອງເໝືອງໄດ້ກວ່າ 3000 ແມດກ້ອນ… ທ່ານ Ta Van Ngoan, ຢູ່ບ້ານອານແທ່ງ, ຕາແສງເບິນໂລກ, ຜູ້ທີ່ໄດ້ມອບທີ່ດິນນັບຮ້ອຍຕາລາງແມດເພື່ອກໍ່ສ້າງຊົນນະບົດໃໝ່, ໃຫ້ຮູ້ວ່າ:
”ຕາມແຜນນະໂຍບາຍຂອງລັດ, ຄອບຄົວຂ້າພະເຈົ້າໄດ້ຕອບສະໜອງຢ່າງຕັ້ງໜ້າ. ຜ່ານການຕອບສະໜອງຂະບວນການກໍ່ສ້າງຊົນນະບົດໃໝ່ເຫັນວ່າມັນໄດ້ນຳມາເຊິ່ງຜົນປະໂຫຍດຢ່າງຫຼວງຫຼາຍໃຫ້ແກ່ປະຊາຊົນ. ຄອບຄົວຂ້າພະເຈົ້າກໍ່ຄືພໍ່ແມ່ປະຊາຊົນຢູ່ທີ່ນີ້ໄດ້ຕອບສະໜອງໂຄງການກໍ່ສ້າງຊົນນະບົດໃໝ່ດ້ວຍຄວາມພາກພູມໃຈທີ່ສຸດ.”
ຂະບວນການກໍ່ສ້າງຊົນນະບົດໃໝ່ໄດ້ແຜ່ຂະຫຍາຍເຖິງຫຼາຍທ້ອງຖີ່ນຢູ່ແຂວງບິ່ງດິ້ງ. ແຂວງບິ່ງດິ້ງ ໄດ້ລະດົມທຸກແຫຼ່ງທຶນຈາກບັນດາອົງການ, ບັນດາຫົວໜ່ວຍ, ວິສາຫະກິດ ເພື່ອກໍ່ສ້າງພື້ນຖານໂຄງລ່າງ, ບັນດາກິດຈະກຳຄົມມະນາຄົມ, ຊົນລະປະທານ, ແກ້ໄຂຄວາມຫຍຸ້ງຍາກດ້ານທຶນຮອນໃຫ້ແກ່ທ້ອງຖີ່ນຕ່າງໆ. ທ່ານ Phan Thanh Gian, ຜູ້ປະຈຳການຫ້ອງການປະສານງານໂຄງການກໍ່ສ້າງຊົນນະບົດໃໝ່ແຂວງບິ່ງດິ້ງ, ໃຫ້ຮູ້ວ່າ:
”ເພື່ອປະຕິບັດໂຄງການກໍ່ສ້າງຊົນນະບົດໃໝ່, ການນຳແຂວງໄດ້ໄປຍັງທ້ອງຖີ່ນຕ່າງໆເພື່ອຮ່ຳຮຽນເອົາບົດຮຽນ. ຈາກນັ້ນໄດ້ຊີ້ນຳວ່າ, ການກໍ່ສ້າງຊົນນະບົດໃໝ່ຈະສົ່ງຜົນສະທ້ອນເຖິງປະຊາຊົນທຸກຄົນຢູ່ເຂດຊົນນະບົດ. ດັ່ງນັ້ນ, ຕ້ອງມີການຄົ້ນຄ້ວາຢ່າງລະອຽດ. ທີສອງແມ່ນຕ້ອງປະຕິບັດທົດລອງ ຫຼັງຈາກນັ້ນຈຶ່ງຜັນຂະຫຍາຍຢ່າງກວ້າງຂວາງ ແລະ ຕ້ອງພະຍາຍາມເພື່ອເຮັດໃຫ້ປະຊາຊົນສະໜັບສະໜູນ ແລະ ເຫັນດີເຫັນພ້ອມ.”
ອາດເວົ້າໄດ້ວ່າ, ໂຄງການກໍ່ສ້າງຊົນນະບົດໃໝ່ຢູ່ບິ່ງດິ້ງ ໄດ້ເຮັດໃຫ້ໂສມໜ້າບັນດາຕາແສງຢູ່ເຂດຊົນນະບົດມີການປ່ຽນແປງ; ພື້ນຖານໂຄງລ່າງຊົນນະບົດໄດ້ຮັບການປັບປຸງເທື່ອລະກ້າວ, ລະບົບຄົມມະນາຄົມ, ຊົນລະປະທານ, ໂຮງຮຽນ, ສຸກສາລາ… ໄດ້ຮັບການລົງທຶນກໍ່ສ້າງຢ່າງສະອາດສວຍງາມ. ຄວາມຄິດ, ວິທີການຜະລິດຂອງປະຊາຊົນໄດ້ມີການປ່ຽນແປງເທື່ອລະກ້າວ; ຄວາມກ້າວໜ້າດ້ານວິທະຍາສາດ, ເຕັກນິກໃໝ່, ດ້ວຍແນວພັນປູກ, ສັດລ້ຽງທີ່ມີສະມັດຕະພາບ, ຄຸນນະພາບສູງຖືກນຳເຂົ້າຜະລິດນັບມື້ນັບຫຼາຍກວ່າ. ບິ່ງດິ້ງສູ້ຊົນຮອດປີ 2020 ຈະມີ 91/129 ຕາແສງປະຕິບັດສຳເລັດຈຸດໝາຍກໍ່ສ້າງຊົນນະບົດໃໝ່, ປະກອບສ່ວນຍົກສູງຊີວິດການເປັນຢູ່ໃຫ້ແກ່ປະຊາຊົນໃນເຂດຊົນນະບົດ.